Kha Namsau (July-September 2018) mel muhtheih ding in suak nawnta. Hun leh hun kal a hon kembit leh hatna hon pia Pa Pathian min pahtawi in om hen. Tutung issue ah, gelsa mah bang in,
Saptuam thununna (Church Discipline) thulu zang in article nga hong kisuah hi. Laisiangthou pansan a unau muanhuai mahmah mi nga in hon luikhiak uh thutak sim chiatni hang.
Pansan Laisiangthou pen, adang ngeilou Pathian in adang ngeilou ding, thu ana piakte ahi. Huaiziak in kingakna taak thu ahi I chi ngam hi. Mihing bawltawm dan (law/by-law) peuh ahihlouh ziak in ginglel kei ni. Mihingte dan bawlte bel a hun leh mun dungzui in khek lamdang theih gige a, khek zihzeh ahi ngut hi. Tua ahihman in Editor laikung pan in tunai zek a I gam, India, a thiltung khat kamteh uthuai kasa.
September 6, 2018, Nilaini, in India a vaihawmna sang pen (Supreme Court) in gam mite lak ah ki deidanna (discrimination) tun ahi chihziak in gam sung a dankhat (Section 377 of Indian Penal code (IPC) zat nawnlouh ding in thutanna a lata. Ngeina dan banglou a pasal-leh-pasal kipolhna (homosexuality), numei-leh-numei thanghuaitak a kipolhna (lesbianism) khelhna ahi. Hiai khelhna, theihsiamna ding in, kipolhna thanghuai i chi ding uh. Kipolhna thanghuai a khial peuhmah, Section 377 IPC dung zui in, sumtang Rs.1 lakh tan atam liausak theih ahi a/ua, jail a leng khumtheih ahilai uh. Kum 150 phial kizangta, sapkangten 1862 kum a dan ana bawl khiak utuh September 6, 2018 in zatnawnlouh ding a phiat ahita.
Tua ahihman in hiai kipolhna thanghuai (homosexual/lesbianism) tuh khelhna a sim ahi nawnkei. Bangteng hileh gam vaihawmte dan bawl tuh dan ahita mai a, himahleh unauten Laisiangthou in hiai thu bang chi bang in ana chiamteh hiam chih theichiat leng deihhuai sakziak in, tamlou, ka hon taklang hi. Laisiangthou a Pathian deihdan bang hi hiam chih suina ding in hunpi thumte aban ban in en ni hang.
* PATE HUN AH : Pate hun ah kipolhna thanghuai khelhna (sin) ahi. Sodom leh Gomorra zentel khuate hiai khelhna ziak in Pathian in mei-leh-kat zang in a haltum hi (Genesis 19:24-28). Hiai thu sawltak Peter in eite zillai ding ahi chih ana hilh hi, “Sodom leh Gomorrah khuate amah limsaklou hong om dingte etsakna ding in a zang a, vut suaksak in hihmang thang in siamlouh a tangsakta hi” (2 Peter 2:6). Pathian neilou mite sazai pe ding a Pathian in Sodom leh Gomorrah telkhe chitchiat hi (Genesis 18:20). Amaute khelhna haih vuallouh in kipolhna thanghuai ahi. Pasal leh Pasal kal a hukna (lust) ahi, “Tuzan a na in a honglut mite koi a om uh ahia? Amau ka luppih theihna ding un ka kiang uah hon pekhia in, a hong chi uhi” (Gen.19:5-7). Amaute, “Sodom khawmite, a tek-akhang ahi uh” (Genesis 19:4). Lot in a tanute amau luppih ding in piak chiam mah leh utlou-ua, a zinte (pasal melpu ahi uh) mahmah a enlah tinten uhi (Genesis 19:8-9).
Genesis 18:20 a kipolhna thanghuai khelhna khawktak ahihdan Juda in chiangtak in a chiamteh, “Sodom leh Gommorah leh a kiang kim ua khuate kingaihna a kipumpiak a, gitlouhna lek lua, amau mihinpih loute nangawn enlah a a delh ziak un, tangtawn mei a gawt a om dingte etsakna ding a suankhiak in a om uhi” (Jude 7). Aman Sodom leh Gomorra mite khelhna tuh “sexual immorality” leh “going after strange fresh” ahihdan hilhchian hi. Laisiangthou khenpi masa, Pate Hun, ah kipolhna thanghuai khelhna (sin) ahihdan haih vuallouh in muh theih.
* MOSI HUN AH : Sazai khauhtak piakna hun Mosi Dan nuai-a i om khaklouh man un leh hiai Mosi dan kizang nawnlou ahihman in kipah huaipetmah. Himahleh, Paul in Romete kiang ah hiai bang thu ana gelh hi, “Huchiin dan a siangthou hi, thupiak leng a siangthou a, a dik a, a hoih hi” (Romete 7:12). Chang 4na a “I zillai ding ua gelh ahi” a chih behlap hi; Pathian dan thupiakte apan, homosexuality tel in, Amah deihdan bang hi hiam chih izil theihna ding uh ahi. Homosexuality toh kisai Mosi Dan nuai ah sinsakna bang a om a?
“Numei bang in pasal na luppih ding ahi kei, thil kihhuai ahi” (Leviticus 18:22). Pasal leh Pasal kipolh Pathian muh in kihhuai ahi. Tua mah bang in numei leh numei kipolh leng kihhuai ahi. Huai toh kibang a kihhuai tuh ganhing toh kipolh ahi (Leviticus 18:23). Hiai bang khelhna ziak in Kanaan mite a gam uh suh in om ua, Pathian in Israel mite kiang ah a pia hi (Leviticus 18:24-25). Israel mite leng Kanaan mite khelhna a akiak uleh Pathian in Kanaan gam apan law-khe (vomit out) ding ahih dan vaukholhna thu a peta (Leviticus 18:26-30). Kipolhna thanghuai gah tuh sihna ahi, “Mi’n numei bang a pasal a luppih leh thil kihhuai mahmah hihtuak ahi ua, hihlup ngei ngei ding ahi. A sisan moh a tung uah a om ding” (Leviticus 20:13).
* KHRISTIAN HUN AH : ThukhunThak in chiangtak in kipolhna thanghuai mohpaih hi. Korinth khua a saptuam kiang ah Paul in hiai bang in a chi, “…zekhem in om kei un, kingaih hatte, milim bête, angkawmte leh mihukte leh tawkhawhukten….Pathian gam a luah kei ding uh” (1 Korinth 6:9-10). Hiai a thumal nih chiamteh ding tuh “mihukte” (homosexuals) leh “tawkawhukte” (sodomites) ahi. Homosexual thumal ahihleh English ah “Effiminate” (KJV) ahi a, Greek pau ah “Malakos” ahi. Malakos thumal English a hon hilhchet chiang un “effeminate, of a catamite, a male who submits his body to unnatural lewdness” ahi (Thayer). “Sodomite” thumalleng “abusers of themselves with mankind” chiin KJV in zang a, Greek thumal ah “arsenokoital” ahi. Hiai Greek thumal hilhchetna hiai ahi “one who lies with a male as with a female, a sodomite”. Nidanglai a Paul in khem in omkei un a chih, tuhun in le ahi kholdiak hi. Malakos thumal pen pasal nohchi zuakte genna a zatdeuh himahleh, arsenokoital thumal pen homosexual himhim genna a kizang thumal ahi.
Jesu Khrist Tanchinhoih ginna chidam (sound doctrine-1 Timothy 1:10-11) in numei leh pasal, ahih hang a nupa hiloute kipolhna thanghuai mohpaih ahihchiang in kiteng a nupa hilou, pasal leh pasal (numei leh numei) kipolhna thang huai tuh mohpaih zawsem hi. Kitenna toh kisai ah, siamchil a pan, Pathian deihdan numei khat leh pasal khat pumpi khat a kigawmkhawmna ahi (Genesis 2:24; Matthai 19:4-6).
Hiai ban ah kipolhna thanghuai (khelhna) toh kisai a Thukhunthak a Laisiangthou hon sinsakna bulpi pen Romete 1:18-28 ah chiangtak in muh theih (chiang zaw sem in ngun tak in sim in). Romete laikhak a Paul theihsakna ah pasal leh pasal kipolhna (sex) ngeina dan ahikei him him. Huai mah bang in numei leh numei kipolhna leng ngeina dan ahikei. Ngeina dan tuh nupa (pasal (husband) leh zi (wife) kal a kipolhna ahi. Huailou peuhmah zehphitna ahi vek.
Khangthu ah Pathian diktatna paipi khat a chiangtou den hi. Awngkawmna tuh Pathian in a mohpaih ahi gige. Hiai khelhna ziak in, nidang lai in, amite a nung-ngatsanta. Tomchik a I suina ah “kipolhna thanghuai” tuh Pate Hun ah ‘khelhna khawk’ ahi; Mosi Dan nuai ah ‘kih huai’ ahi; Thukhunthak hun ah Jesu Khrist Tanchinhoih thupi dung zui in “Zumhuai,” “lungsim mi batlouh huai” (debased mind) leh “ginna dam (sound doctrine) toh kituaklou” ahi. Laisiangthou Kha hatkhum, thutak ahi chih pomlou miten hiai a tung a thukigelh a pom theikei ding uh chih a chiang hi. Himahleh, Pathian gingta miten bel adikna sellou hial ding hi.
Kum tampi pailiamta ah Laisiangthou khen lamdang ahi ngeikei. Kum tampi hong kivei lai ding ah leng mihing dan bawlte bang in khenlamdang ahikei ding. Huchi bang a bukim leh namkip Laisiangthou pansan a gelh articlete deih thoh min sim chiat ni. Kha lam leh salam ah phatuam kha ding hi. Hiai thugelhte tungtawn a theihna kibehlap a, hinkhua a zuite unau hampha tungtuan ahi.
Sd:-
Publication Sub-Committee