YOUTH ANNUAL PROGRAMME 2018
– Pausuanlian
Pathian panpihna toh tukum Work Plan a namkipsa mahbangin Tuailaite kithuahkhawmna apaita Nilaini (Wednesday) 7, November 2018 in unaupa Nehkhothang tenna inn ah thovengtak a zatzoh in omta hi. Hiaihun a Tuailaite mi 35 lakvel (numei 18 leh pasal 17) kitel a, tukum a Delhi a tuailai programme kizangte laka numeiten a telzah tamdan lama pasalte a khup masakna pen uh hidingin gingtak huai hi. Youth Co-Ordinator unaupa Jangthang leh Kammuanlal te’n zingkal dak 10:30 a pat ding chiin Tuailaite kiangah gen mahleh uh thugentu Unaupa Nehkhothang leh Jamsonte kiangah dak 11 a pat diing ahihdan gen uhi.
Hun zatna sehnih in kikhen a, hun masa ah unaupa Jamson in hunkemtu hihna la in Unaupa Nehkhothang in tuailaite a dia thumanpha taktak dakkal 2 phial ding sunkhia hi. Aman a genna ah tuailai hun mihing a dia manphapen leh hiahun a kipan a hihnit a omkhalou te (Ezekiel 4:14) mi hamphapen ahihdan leh amah ngakte kianga Toupa hoih le tuailaite hakkol kipuak mihing adia hoih ahihdan (Kahlate 3:25-27) gen masa in, Tuailaite khosak dingdan (Tita 2:4-8) pansanin leh Thukhunlui leh Thukhunthak apan nu-le-pa’ thu mang a lohchingte tanchin apan thuhilhna nei hi.
Toupa a bangkim a nu leh pate thu man ding, ei a talent kepsak a ompen diktak a zat (Matthai 25:14-30) kawmkawm a tunna chiangchiang a muanhuai a om a (Philippite 3:16), Siangthouna delh ding (Hebrew 12:14) leh Ginna a dingkip ding ahihdan thute len gen a, huchiin Job 36;11-14 pansanin thuhilhna ngaikhete leh a ngeingaihloute’ tan dingte genin huntawpna bawl hi. Aman a zohin unaupa Mangsuan pii na a phatna laa sak ahihzoh in unaupa Pauliansiam in hunkhatna thuumna in khak hi.
Hun khatna zohin break saulou omin singpi dawnna kinei a Dak 1;30 in Tuailai Leader Nangmuanlal leh Reuben makaihna nuai ah hun nihna zat in om hi. Hiaipen leng seh nih a khensawn in om hi. Hunseh khatna ah unaupa Jamson in sermon hun saulou in tuailaite hanthawn leh hasotna manpha taktak hon luikhia hi. Aman leng Joseph, Daniel leh a lawm thumte apan Pathian mi itna leh thuakzohna hinkhua zat ding ahihdan gen a, thukhunthak hun a Paul banga kidouna hoih (II Timothy 5:6-8) douzou dinga kitaitehna a tai ding ahihdan, Pathianin ei hanta honpiak banga sep ding (I Peter 4:11), thadah leh zawngtak a omlouh ding (Paunakte 10:4-5).
Nopbawlna leh uain haite haulou ding uh (Paunakte 21:17) ahihdante leh sawltak Paul in tanchinhoih a tangkoupihna a a thuaknate lak aleng lungkelou a apang teitei dante ngaihtuah a amah etton ding ahihdan tanphain thuhilhna manphatak tuailaite’ ading piapia a, a zohna dingin Kahlate 3:40-41 pansan in mahni lampite kivelchet thak a Vante lam a Pathian kianga lungtang ngatthak poimoh ahihdan gen hi. Huaizoh in Unaupa Mungmuanlian piina toh laa khat sa in Unaupa Pauminlun in thuumna toh seh nihna a amasapen a zohna bawl hi.
Huchiin, minute 10 vel ding zunthakna hun hong ahih zoh in unaupa Mungmuanlian piina ink tuailaite kipolhlimna hun zat in om hi. Hiai hun ah tuailaiteng in pan mun neichiat in hun nuamtaka zatzoh ahihin unaupa Jamson in numei hi in pasal hileh kingaihnat a kipolhkhawm zel ding, mahni lawmte kia chihlouh a kuapeuh huamtel a kipawlkhjawm vekin unai sunga kilainatna piangsak ahihsan amah hinkhua apan zillai lakhia in hon gen a, huchimahbang in Unaupa Nekkhothang in leng amah tangval lai hun zatdante apan zillai la in nungak-tangval kal ah salam kitaitehna ah chihtakna leh tupguhna poimoh ahihdan gen in huntawpna thumna leh nekding ankuang tunga kipahthu genna nei in Tuailaite Programme, 2018 khak in om hi.
Programme teng zatzoh ahihin co-ordinator te’n tuailaite nek dinga ama nitak apan ana buaipih uh nitaklam dak 5:30 vel in ann leh voksa meh limtak kinekhawm a, huaikhita meh huanna beel te sill eh nawtsiang ahihkhit in mahni innlam chiat zuan a kikhen in om hi.Hiai programme zatna hunsung ah bangmah buaina omlou a hon zousak I biak Pathian kiangah kipahthu I gen a amin I phat uh ahi. Huaite ban ah hichibanga tuailaite ading a programme hon bawlsak Saptuam makaite tungah leh Co-ordinator te panlakna tung ah kipahthu I gen ua, a poimoh penpen programme neihna dinga inn kiphaltak a hon zangsak unaupa Nekkhothang leh a innkuante tungah kipahthu I gen tuantuan ahi.
Hiai propgramme zatzoh a ompen tuailaite hinkhua a lohchingtaka a hong gahsuah theihna dingin tuailaite’n hanchiam in huaite ban ah michih in I hihtheihnaa lam choiat ah thumna toh pangtou zel ni. Ka kipak.
