Bangziak a Khristiante’n Sabbath tanglou uh ahia?

James Guite

THUPATNA : Sabbath kichi thumal pen Hebrew pau “Shabbath” apan kilasawn ahi a, “Khawl” chihna ahi. Hiai thumal “Sabbath” pen hun tuamtuam genna diing in kizang hi. Khatna ah, “Ni” (day) genna in kizang hi.

“Khawlni (Sabbath) theigige un, tang siangthou diing in. Ni guk sung semgim in na nna tengteng uh na sem diing ua, himahleh a ni sagihni bel na Toupa uh Pasian’ khawlni (Sabbath) ahi a, huai ni in nna himhim na semkei diing uh…” (Exo. 20:8-10). Huaiziak in ni sagihni bel KHAWLNI a kichi hi.

Nihna ah, “Kum” (year) genna in leng kizang leuleu hi. “Kum guk sung na loute uah chi na theh diing ua, kum guk sung na grephuante uh na hah diing ua, a gah na lou diing uh. Himahleh, a kum sagihna gam a diing in khawlna (sabbath) ahi dia, Toupa a dia khawlna (sabbath) ahi diing” (Lev. 25:3-4). Hiai bel “KHAWLKUM” (Sabbath kum) chih in om hi.

Tuni in hiai “Khawlni” (Sabbath) I tan kuul lailai hiam? Hiai toh kisai Lai Siangthou in bang chibang in a hon hilh a? Bang chik a kipan a “Khawlni” tan a na om pan a, bang chik a bei hiam? chihte i Lai Siangthou pansan in i suutkhawm diing uhi.

1. BANGZIAK A KHAWLNI (SABBATH) TANGLOU I HIA? (Why Don’t We Observe Sabbath?)

Tu hun a “Khawlni” (Sabbath) tan a kuul nawnlouhna ziak bang zah hiam i ensuk diing:

1. Sabbath Tan Diing Thupiak Pen Israelte A Diing Kia A Piak Ahi (The Command To Observe Sabbath Was Given To The Israelites Only)

Ekso 31:12-17 “Huan TOUPAN Mosi kiang ah thu a gen a, Israel suante kiang ah thugen in, chihtaktak in Ka KHAWLNI na tan diing uh ahi: na khang ua Kei leh nou kal a chiamtehna a hihziak in… Huaiziak in Israel suante’n KHAWLNI a tang diing ua, thuchiam tawntung diing in, a khang a khang un KHAWLNI a tang diing uhi. Khantawn in Kei leh Israel suante kikal a chiamtehna ahi…a chi hi.” Sabbath pen Pasian leh Israel suante’ kikal a chiamtehna ahi a, nam dangte a hikhalou hi.

Deut. 5:15 “Nang leng Aigupta gam ah sikha na hi khin a, TOUPA na Pasian in huai a kipan khut hattak leh banzak a ahon pikhiak na hi chih theigige in; huaiziak in ahi, TOUPA na Pasian in KHAWLNI tang diing a thu a honpiak” Aigupta gam a suak-le-sal a om khin a, huai apan vaan Pasian in ban thahat a apikhiak mite a dia piak ahi. Huai bel Israelte kia ahi uh.

Ezekiel 20:10-12 “Huchi in Aigupta gam pawtsan diing in Ka chita a, gamdai ah Ka honpi lutta a. Huan Ka daan bawlte amaute Ka pia a, Ka thugelte Ka ensak a, huaite mi’n a zuih ua a hinna diing un. Huailou leng Kei leh amaute kikal a chiamtehna diing in Ka KHAWLNI amau Ka pia a, Kei TOUPA, amaute koihtuampa Ka hi chih a theihtheihna diing un.” Pasian in Aigupta gam pawtsan diing a asawlte kuate ahi ua? Gamdai a apilutte kuate ahi ua? Israel tate ahi uh. Huaiziak in Pasian in, Amah leh Israel suante kikal a chiamtehna diing in KHAWLNI a pia hi.

Nehemiah 9:13-14 “Sinai vum ah leng na hoh suk a, vaan a kipan in amau Na houpih a, vaihawm dikte leh daan dikte, thuseh leh thupiak hoihte Na pia hi. Amau kiang ah Na KHAWLNI siangthou na theisak a, Na sikha Mosi khut in, thupiakte leh, thusehte leh daante thupiak in amaute na pia hi”. Sinai tangvum a Pasian in a houpihte kuate ahi ua? Mosi zang a thupiakte, daante leh thusehte Pasian in a piakte kuate ahi ua? Israelte ahi uh. Israelte kiang ah KHAWLNI tan diing thu a pia hi.

1. Sabbath Tuh Thukhun Lui Hun A Om Ahi A, Thukhun Lui Pen Israelte A Diing Kia A Piak Ahihziak In (Sabbath Was In The Old Testament, And The Old Testament Was Given For The Israelites Only)

Eksodas 20:8 “KHAWLNI theigige un, tang siangthou diing in. Ni guk sung semgim in na nna tengteng uh na sem diing ua, himahleh a ni sagihni bel na Toupa uh Pasian’ KHAWLNI ahi a, huai ni in nna himhim na semkei diing uh…” Mosi in Sinai tangvum a daan a lak lai in KHAWLNI tan diing leng thusawmpiakte lak ah a tel hi. Huaiziak in KHAWLNI tan diing thupiak pen Thukhun Lui ahi chih teltak in i theithei hi.

Deuteronomi 5:1-3 “Huan, Mosiin Israelte tengteng a samkhawm a, a kiang uah, Israel mite aw, Na sin ua na zuih ding uh daante, vaihawmte tuni a na bil ua na zak ua ka gen ngaikhia un. TOUPA i Pasian in Horeb ah i kiang uah thu a khung hi. TOUPAN hiai thu i pi leh pute kiang ah a na khungkei a, eite, tutan a hingdam a omlaite tengteng kiang ah ahi, a khun zawk” Mosi in Aigupta a pan a pipawt Israelte a samkhawm a, tu hun a Thukhun Lui i chih uh Pasian in a kiang ua pia ahihdan teltak in a gen hi. Huai Thukhun Lui pen a pipute uh – Adam, Noah, Abraham, Isak leh Jakobte a diing hilou in, Mosi in Aigupta a pan a apikhiak Israelte a diing ahi. Huaiziak in Horeb (huai bel Sinai tang) a piak Thusawmpiakte’ lak a telkha KHAWLNI tan diing pen Israelte’ kia a diing ahi.

Levitikas 26:46 “Hiaite Sinai tang a Mosi zang a Amah leh Israel suante’ kal a TOUPAN a bawl thupiakte, vaihawmte leh daante ahi”. Sinai tang a piak a om Daan (ahihke’h Thukhun Lui) pen “Pasian leh Israelte kal a” bawl thupiakte ahi uh. Huaiziak in KHAWLNI leng Israelte a diing ahi.

Hiai Sinai tang a piak Daan (Thukhun Lui) a kizat sungteng Israelte hilou namdangte a tel theikei uhi:

Deuteronomi 23:3 “Amonte leh Moabte TOUPA mite kikhawm khawmte lak ah a tel ding uh ahikei. Suan sawmna tan in a lak ua mi TOUPA mite kikhawm khawmte lak ah a tel mahmah louh ding uh ahi”. Israel nam hikhalou Jentel mi Amon leh Moabte pen Toupa’ mite lak a tel mahmahlou diing a thupiak ahi uh. Huaiziak in Thukhun Lui hun a piak a om KHAWLNI pen Jentelte (eite) a diing hikhalou hi.

Ezekiel 44:3 “TOUPA PASIAN in hichi in a chi ahi: Pautuam mi kuamah, lungtang leh sa a zeksumlouh, Israel tate lak ah pautuam mi himhim Ka mun siangthou ah a lut ding uh a hikei”. Zeksum louh Jentelte’n Toupa biakna mun siangthou ah Thukhun Lui hun in tan himhim a nei theikei uhi. Huaiziak in Thukhun Lui daan sung a om KHAWLNI tan diing thupiak pen Jentelte a diing hikhalou in Israel tate a diing liauliau ahi.

Ephesate 2:11-12 “Huaiziak in, tumalam a nou sa a Jentelte, sa a khut a sum zeksum a chihte un zeksumlouh hon chihte u aw, Huchihlai in, Khris lou-in Israelte khua-leh-tui toh kimidang in khovel ah lametna neilou leh Pasian lou a om in, thuchiam thukhun lak ah mikhual in na om uh chih theigige un”. Zeksumlouh Jentelte pen huchih hunlai in (Thukhun Lui hunlai in) “Thuchiam thukhun lak ah mikhual” ahi uh. Mikhual in bel innsung ah tan bangmah a neikei hi. KHAWLNI pen Thukhun Lui sung a om a hihman in Israel lou siahsiah KHAWLNI lak ah leng mikhual ahi uhi.

Huaiziak in, hiai a tung a Bible tangte apan in KHAWLNI tan diing thupiak pen Thukhun Lui hun a piak ahi a, huai Thukhun Lui pen Israelte kia’ a diing ahihman in eite’n KHAWLNI i tan uh kuul nawnlou hi.

1. Sabbath Tuh Thukhun Lui A Om Ahi A, Thukhun Lui Hihbei Ahihtak Ziak In (Sabbath Was In The Old Testament, And The Old Testament Was Abolished)

Eksodas 20:8-9 kikal ah KHAWLNI pen Thusawmpiakte lak a telkha ahihziak in Thukhun Lui hi ahihdan a tung ah i simta uhi. Huaiziak in Thukhun Lui a kigenna peuh ah KHAWLNI leng telkha ahi chih theitel kawm in a ban a Bible tangte i simsuk diing.

Kolossate 2:14-16 “I tatlekna tengteng hon ngaidam a, batna lai thupiak a gelh, i tung ua om eimah hondou gige tuh a thaimangta ngal a; huai ngei tuh Kross a kilhlum in a lakheta hi. Huan, lalna leh thuneihnate suankhia in, huai Kross ah huaite tuh zou in a langtang in theihsakna in a zangta hi. Huchi in, nek thu ah hiam, dawn thu ah hiam, ankuanglui thu ah hiam, kha thak thu ah hiam, KHAWLNI thu ah hiam, kuamah in hon demkei uhen”. Thukhun Lui a zuihzoh louh ziak ua amaute a dia “batna lai” bang a chiamteh a om huai “thupiak a gelh” ngeingei tuh Jesu Khris in Kross ah kilhbelh in a lakheta hi. Huaiziak in “…KHAWLNI thu ah hiam kuamah in hon demkei hen” a chi hi. Khawlni tanlouh hiam, sa sianglou nekthu hiam, khathak thu hiam Thukhun Lui hun a chiiktak a a zehtante uh zuih nawnlouh ziak in demna kuamah in hon bawlkei uhen a chi hi.

Romete 10:4 “Khris bel a gingta peuhmahte a din diktatna a muh theihna ding un daan tawpna ahi ngal a”. Jesu Khris a hong kilang a Kross lek ah “Daan (Thukhun Lui) a tawpsakta” hi. Daan pen hihbei a omta ahihman in Daan in a tunkhawm KHAWLNI leng a beikhawmta a, huaiziak in KHAWLNI i tan uh a kuul nawnkei hi.

Hebrute 7:18 “A hatlouh leh a phattuam louhna ziak in thupiak om masa tuh paihkhiak ahi”. Pasian a kipan Thupiak nih i mu a huai bel Thukhun Lui leh Thukhun Thak ahi. Thukhun Lui pen piak masak ahi. Huai “Thupiak om masa (Thukhun Lui)” pen “A hatlouh leh a phattuamlouh ziak in… paihkhiak ahita”. Huaiziak in Thukhun Lui sung a om KHAWLNI tan diing thupiak leng paihkhiak ahita hi.

Hebrute 10:9 “Huaitak in, ngai in, ‘na deihlam hih diing in Ka hongpai,’ a na chita a, A nihna a tunding theihna diing in a masapen a lamangta ahi”. Jesu Khris pen Pa Pasian’ deihlam hih diing in a hong pai hi. Huai Pa Pasian deihlam bel “A nihna (Thukhun Thak) a tunding theihna diing a a masapen (Thukhun Lui) lakmang” ahi. Huai mah Jesu Khris in hong hih bukim in “A masapen (Thukhun Lui) a lamangta hi”. Lakmang a omta Thukhun sung a om KHAWLNI pen leng lakmang khawm in a om a, huaiziak in KHAWLNI i tan uh kuul nawnlou hi

Jesu Khris in “Daan (Thukhun Lui)” a sukbei nung a zat i sawm teitei leh, Pasian ngaih in hiai bang a chiamteh ihi:

Galatiate 5:4 “Nou daan a siamtan tumte aw, Khris toh kikhenta na hi uh, hehpihna na puksanta uhi”. Tuni a Thukhun Lui zat sawm teiteina pen Khris toh kikhenna ahi a, hehpihna puksanna ahi.

Nasepte 15:10 “Huchi in, i pipute leh eite’n i zoh louhsa hakkol tun ah nungzuite tung a ngak tum a bangdia Pasian kalh na hi ua leh?” Nasepte 15:1 na ah Judate lak a mi khenkhatten Jentel nungzuite kiang a Mosi daan a zuih teitei diing uh leh zek a sum diing uh ahi chi’n a gen uhi. Huai thubuai Jerusalem khua a a ngaihtuah khawm lai un Kha Siangthou pina toh Peter in a tung a Nasepte 15:10na a na gen hi. Thukhun Lui zuih sawmna leh midangte zuihsak sawmna pen “Pasian kalhna” ahi a chi hilhial hi. Huaiziak in tuni a Thukhun Lui in a tuunkhawm KHAWLNI tan diing phut teiteina pen Pasian kalhna ahi.

1. Thukhun Lui Zawlneite’n SABBATH Bei Hun Diing A Genkhawl Uh (The Old Testament Prophets Foretold About The Sabbath Coming To An End)

Hosia 2:11 “A vualnopna tengteng ka tawpsak diing a, a ankuangluite, a kha thakte, a khawlnite, leh a kikhawmpi kulmut tengteng ka tawpsak diing.” Zawlnei Hosia in KHAWLNI leh Israelte zektan tuamtuamte tawpsak a om diing ahih dan ana genkhawl hi. Huaite bangchik chiang a tawp diing hiam chih zawlnei Amos in teltak in na genkhawl nawn hi.

Amos 8:5,10 “Buh ka zuak theihna diing un khathak chik chia mang diing a, tangbuang buh ka suahkhiak theihna ding ua KHAWLNI chik chia mang diIng ahia?… Huan, hichi bang ni ahong tun chiang in a hong bei diing TOUPA PASIAN in a chi, Sun lai in ni ka tumsak diing a, ni sat lai in leitung ka mialsak diing hi.” KHAWLNI leh khathakte bei hun diing Toupa’n a gen bel “sun laitak a ni a hong tum a, nisat laitak a leitung a hong mial chiang in” chih ahi. Huai ni bang chik in a tung a? Luke in huai hun/ni kichiantak in a na chiamteh hi.

Luke 23:44-46 “Huan, dak gukna diing khawng ahi a, huai nungsiah dak kuana hun tan in gam pumpi a hongmial vekta a, ni vak a beita hi; Huan, Pasian biakinn puanzak a lai ah a hong kekta hi. Huan, Jesu aw ngaihtak in a kikou a, Pa, na khut ah Ka kha Ka hon kemsak hi a chi a. Huan, huai a chih khit in A kha A khahta hi.” Hiai a hun kigen sung i theihtel semna di’n Judate dakkal simdan leh eite hun simdan bukkakna i bawl diing:

Johan 11:9 “Huan Jesu’n, sun in dakkal sawm-le-nih a om ka hia?… a chi a”. Hiai Sun hun Dakkal 12 sung hichibang in a kikhen hi

Eite Hun Simdan	Judate Hun Simdan	Eite Hun Simdan	Judate Hun Simdan
06-07 AM	Dak Khatna	12-01 PM	Dak Sagihna
07-08 AM	Dak Nihna	01-02 PM	Dak Giatna
08-09 AM	Dak Thumna	02-03 PM	Dak Kuana
09-10 AM	Dak Lina	03-04 PM	Dak Sawmna
10-11 AM	Dak Ngana	04-05 PM	Dak Sawm-le-khatna
11-12 AM	Dak Gukna	05-06 PM	Dak Sawm-le-nihna

Jesu Kross lek a khai kang a a omlai in Dak Gukna (Huai bel jinglam dak 12.00 vel) a kipan dak kuana (Huai bel nitaklam dak 3.00 vel) tan gam pumpi a mial a, nivak a bei hi. Zawlnei Amos in a na genkholh bang in, sun nisat san laitak mahmah in ni a tum a, leitung a hong mial hi.

Huchia leitung a hong mial tak in Mosi kiang a thupiak bangbang a kilam (Eks. 25:8-9) Biakbuk a “Mun siangthou” leh “Mun Siangthoupen” khentu Biakbuk Puanzak a laitak ah a hong keksuakta hi. Hiai in Mosi Daan tungtawn a Israelte toh Pasian kizopna pen kikekta/kitanta ahihdan a hon theisak hi. Huaiziak in zawlnei Amos in ana genkholh huai KHAWLNI bei hun diing tuh Jesu Khris in kross lek ah a hih tangtungta hi. Khris in Thukhun Lui daante kross lek a beisakta (Rom. 10:4) ahihman in tuni’n KHAWLNI i tan uh kuul nawnlou hi.

• SABBATH TAN DIING AHI CHIH SINSAKTUTE’ PANSAN KHENKHATTE? (Some Of The Stand of Those Who Teaches To Observe Sabbath)

Tulai in khenkhatte’n “KHAWLNI” tan ngeingei diing ahi chi in Bible tang mun tuamtuam pansan in kuhkaltak leh chitaktak in a gen uhi. Tua a pansan tangpite uh Lai Siangthou a kibulphuh mah hihiam chih i sutkhawm diing uh.

1. SABBATH Pen Israelte Om Mapek Genesis 2:2-3 Kikal Ah Tan A Na Omkhinta Ahi. Huaiziak In Jesu’n A Beisak Khakei.

Genesis 2:2-3 “Huan, Pasian in ni sagih ni in a nasep a zou a; ni sagih niin a nasep tengteng A khawl santa hi. Huchi in, Pasian in ni sagih ni A vualzawl a, A tangta hi: huai ni a Pasian in a siam leh a bawl a nnasep tengteng a khawlsan ziak in.”

Genesis 1 ah Pasian in thilsiamte ni guk sung a a siam dan a banban in hon gen suk hi. A tung a i Bible tang simna ah, NI SAGIH NI a vualzawl dan leh a tandan (NKJV in hih siangthou –sanctified chi’n a let hi) i mu. Hiai mun a Ni sagih ni vualzawltu kua ahia? Ni sagihni tangtu (hih siangthoutu) kua ahia? Pasian ahi. Mihingte tan diing a genlou in Amah mah in a vualzawldan leh a tan dan a genzaw hi.

Hiai mun a Pasian’ nnasep kichiamtehte lak a khat, huai bel “KHAWLNI tan diing” mihingte sep dia kigen hileh, huai thutuun in a huamkhak sung a om Pasian’ nnasep dangte leng i sep kuul diing hi. Huaibel lei leh vaan bang, sun leh zan bang, sing-le-loute bang, leh ganhingte bang leng i bawl kul diing hi. Mihingte’ zuih diing hilou in Pasian in Amah’ thilhihte mihingte’ theih dia ana chiamteh na ahi.

Mihingte zuih dia kigen ahih nailouh ziak mah in Adam, Noah, Abraham, Isaak, Jakob ten leng KHAWLNI a tanlam uh koimun mah ah chiamteh in na omkhalou hi. KHAWLNI pen Aigupta apan a apikhiakte tan diing a thupiak (Deut 5:15; Ezek 20:10-12) ahihman in Huaima hun ah mihingte’ KHAWLNI tanna koimun mah ah chiamteh in a omkei hi. Sinai tang a tunma ua Bible thute Jesu’n subei khalou chi a zuih diing hileh Noah bang a long i sui kuul diinga (Gen 6:14-16), Abraham bang a Kanaan gam (tulai a Israel gam) zuan a i zinkhiak kuul diing hi (Gen 12).

Huaiziak in Gen. 2:2-3 pansan a “KHAWLNI tan” sawmna pen, satan in Sam laibu pansan a Jesu a va khem mawkmawk dan (Mt.4:6; Sam 91:11) toh kibang lel diing hi. Bible tang khat va sim mawk ziak a ei zuih diing hikha hia hilou chih theitel loupi a i zuih leh “A vapai a a awklumta” (Mt. 27:5) chih simkha a awklup loh a chih uh toh kibat theih diing hi.

1. Mosi Daan Piak Ahihma In Eksodas 16 Ah SABBATH A Tang Ve Uale…!

A tunglam a i gen khittak mah bang in Deut. 5:1,2,15 ah KHAWLNI tan diing pen Aigupta gam a pan pikhiak a om Israel tate a diing ahi chih chiangtak in i muthei hi. Eksodas 16 a KHAWLNI tangtute kuamah dang hilou in Mosi in Aigupta a kipan a pikhiak Israel mipite ahi uh. Huaiziak in KHAWLNI tang diing a Toupa Thupiak pen a piaknate mah in a zui uhi.

1. Sabbath Pen Pasian’ Tangtawn Thukhun (Perpetual Covenant) Ahi A, Huaiziak In Hihbei Theih Ahikei.

Eksodas 31:16 “Huaiziak in Israel suanten KHAWLNI a tang ding ua,tangtawn thuchiam diing in, a khang a khang un KHAWLNI a tang diing uhi.” Hiai mun a “Tangtawn Thukhun/Thuchiam” a chih ziak in Tangtawn a a om kuul diing ahi chih ngaihdan a hinawn leuleu hi. KHAWLNI pen “tangtawn thuchiam” ahih mah bang in Pasian in Israelte’ kiang a “Tangtawn Thuchiam” diing a a piak thupiak bangzah hiam om hi. Tuate:

TANGBUANG THILLAT

Levitikas 6:18 “Aron suan pasal tengteng in a nek diing uh ahi. Huaibel TOUPA a dia haltum thillat tungthu a na suante zel uh tan a TANGTAWN DAAN ahi ding: kuapeuh huaite khoih peuhmah hihtuam ahi ding uh, chi in thu pia in, chi in.” Tuni’n “Tangtawn Thukhun” ziak a KHAWLNI  tan diing ahi chiten haltum thillat diing in “Tangbuang Thillat” a laan zel uhia?

LEVI SIAMPUTNA

Eksodas 29:9 “Huan kawnggak in amau na gak dia, Aron leh a tapate, a tung uah lukhubem na koih diing: TANGTAWN THUSEH diing in siampu nasepna amau a ahi ding: huchi in Aron leh a tapate na hih siangthou diing hi.” Aron leh a tapate siamputna pen Tangtawn Siamputna diing a gen ahi. Himahleh tuni in Levite siamputna a beita hi. Juda nam a kipan a hong suak Jesu Khris in siampu lianpen hihna a lata hi (Heb. 7:11-14).

GIMLIM HALNA

Eksodas 30:8 “Huan nitaklam a Aron in khawnvakte a det chiang in, a tung ah gimlim a hal diing, na khang na khang un TOUPA ma ah TANGTAWN GIMLIM ahi ni louhlouh diing.” Gimlim (incense) a hal pen uh Toupa ma a “Tangtawn Gimlim” (Perpetual Incense) diing a piak ahi. Himahleh tuni’n kuama’n gimlim a hal nawnkei uhi.

Pasian in Israel tate kiang a “Tangtawn Thukhun” a piak tengteng (KHAWLNI leng tel in), Israelte Pasian’ ma a teeltuam nam a hihna uh a tawp masiah a kizang hi. “Tangtawn Thukhun” A chih in, Israelte “teeltuam nam” a hih sungteng uh a genna ahi. Huchi hilou hileh Pasian zuauthei suak diing hi.

Zawlnei Jeremiah in, “Hiai daan sehte ka ma a kipan a man a leh, Israel suante ka ma a kipan in nam hih a tawpden sam diing uh chih Toupa thupawt ahi” (Jer.31:36) chi in ana genkhawl hi. Thukhun Lui daante Jesu Khris in kross lek ah a beisakta hi (Kol. 2:14; Eph. 2:15; Heb. 10:9; Rom. 10:4). Huaiziak in Israelte, “teeltuam nam” ahihna uh tangtawn a di’n a beita hi. Teeltuam nam ahihna uh a bei toh kiton in Israelte’ a dia “Tangtawn Thukhun” tengteng leng a beikhawmta hi. Tangtawn Thukhun dang teng beivek a KHAWLNI kia beilou chih om thei tuamlou hi.

1. Thukhun Lui Daan Sung Ah “Khalam’ Daan” (Moral Law) Leh “Salam Daan” (Ceremonial Law) A Om. Jesu’n A Sukbei Pen “Salam Daan” Ahi.

KHALAM DAAN (Moral Law): Suangpek nih a gelh a om Thupiak Sawmte, Pasian’ khutzung mahmah a gelh a omte (Ekso. 31:18; Deut. 9:10; Ekso. 32:16; Deut. 10:41) “Khalam daan” a chi uhi. A khen chiang in “Toupa’ daan” leng a chi uhi. Lai Siangthou in a chih hilou in mihingte’n “Moral Law” a chih uh ahi.

SALAM DAAN (Ceremonial Law): Kithoihna daante, kisiansakna daante leh kivaihawmna chi tuamtuam, Mosi laibute a kigelhte “Salam daan” a chi ua, a khen chiang in “Mosi Daan” leng a chi uhi.

Hiai a tung a bang a mihingte’ khenkakna pen Pasian in a pompih hiam I en diing uh.

Khatna ah, Mosi’ laibute a daan kipete tengteng – Thupiak Sawmte hi henla thupiak dangdangte (Mite’n salam daan a chihte uh) hitaleh, Pasian in hichibang in a chiamteh hi, “Hiaite Sinai tang a Mosi zang a Amah leh Israel suante’ kaal a Toupa’n a bawl thupiakte, vaihawmte leh daante ahi” (Lev. 26:46; 27:34). Toupa’n khentuamna bawl lou in a vek un “Toupa’ daan” a chi hi.

Nihna ah, “Na nu-le-pa zahtak in” (Ekso. 20:12) chi a Thupiak Sawmte lak a telkha, mihingte’n “Khalam daan” (Moral Law) a chih uh Jesu Khris in “Mosi Daan” (Salam Daan) a chi hi (Mk. 7:10). Huaiziak in “Toupa’ Daan” a chih uh Jesu Khris in “Mosi daan” chi’n a gen a, khentuamna a bawlkei hi.

Thumna ah, Ezra in Kha hatkhum a a gelhna ah hichibang in ana gelh hi: “Mosi daan, Toupa Pasian in A piak…” (Ezra 7:6). Huaiziak in khentuamna bangmah a omkei a “Mosi Daan” I chih Thukhun Lui tengteng “Toupa’ Daan” ahi.

Lina ah, 2 Kronikil 31:3 “Kumpipa’n a tantuan lak a khenkhatte Toupa’ Daan a kigelh bang in halmang thillat diing, zingkal leh nitak a halmang thillat diing, KHAWLNIte leh kha thakte leh sehsa ankuangluinate a halmang thillat diing in a koihkhen hi”. Mihingte’ khendan in “Khawlni” pen Toupa’ daan ahi a, kithoihnate leh halmang thillatte leh khathakte leh sehsa ankuangluinate “salam daan” ahi. Himahleh a tung a i Lai Siangthou sim in huaite’ tengteng “Toupa’ daan” a chi hi.

Ngana ah, Luka 2:22-23 “Huan Mosi’ daan dungzui a kisiansakna nite a hong beitak in, Amah tuh Jerusalem khua ah Toupa kiang a lat diing in a hon pi ua, ‘tapa suul hong khempeuh Toupa lak ah siangthou chih in a om diing’ chi in Toupa’ daan ah a kigelh ngal a”. Nau pian khit a kisiansakna leh tapa suulhong (nau masapen pasal) peuhmah in Toupa mai a kisiansakna a neih pen uh mihingte’ khennenna ah “Mosi daan” (Ceremonial law) ahi. Himahleh, Luka in “Toupa’ daan” a chi hi.

Hiai a tung a bi (point) ngate a pan i muhtheih bel Thukhun Lui daante tengteng kikhentuamna bangmah omlou in, Mosi zang a Israel tate a dia Toupa’n a na piak thukhunte ahi uhi. Huaiziak in a khen chiang in “Toupa’ daan” chih in a om a, huai Toupa’ daante mah a khen chiang in “Mosi’ daan” chih in leng a om zel hi. Thukibang genna ahi. Huai daante tengteng Khris in kross lek a kilhbelh in a lakheta a (Kol. 2:14; Eph. 2:15; Heb. 10:9; Rom. 10:4), KHAWLNI tel in a vek in a beikhawmta uhi.

1. Hebrute 4:1,9 In “Khawlna A Lutna Thuchiam”, “Khawlni a Khawlna” A Omlai A Chi.

Hebrute bung 4na a “Khawlna” kigen pen “Sabbath Khawlna” ahikei hi. Hiai “Khawlna” pen Joshua in Israel tate a petheikei (4:8). Himahleh, Joshua leh Israel tate’n KHAWLNI (Sabbath) a tang uhi. Joshua in Israel tate gamchiam ah pilut mahleh khawlna a piaklouh ziak in nidang khat a genzaw hi. “Pasian’ mite’ a diing in khawlna a om” a chi hi (4:9). Huai khawlna a lut diing in khristiante thanopsuah a pang di’n Hebrute 11 ah hasot in i om uhi. Huaiziak in huai khawlna kigen pen KHAWLNI hilou in tunung hun a khristiante’n lei sepgimnate nusia a vaan khopi a khawlna i muh diing a genna ahi (Kil. 14:13).

1. Jesu In Leng KHAWLNI A Tang Vele.

KHAWLNI tan diing pen Mosi Daan nuai a omte a dia piak ahihdan i genta uh. Jesu pen “Daan nuai a hong piang” ahihdan sawltakpi Paul in Galatia 4:4 na ah chiangtak in ana gen hi. Mosi’ daan nuai a hong piang ahih man in “a zek a sum” hi (Lk. 2:21). Phetlou in Paikan ankuangluina leng a mang/zui hi (Mt. 26:17-25). Sabbath kia hilou in ankuangluinate, paikan kuut leh zeksumte leh Mosi daante a zui hi. Juda nam a mi ahi a, Mosi daan nuai a suak ahih man in a zuih kuul hi. Himahleh, huai daante tengteng hihtangtung in (Mt 5:18), Kross lek ah a beisakta hi (Kol. 2:14; Heb. 10:9). Huai daante a beisak ma in a nungzuite “Tangthupha” gen dia a sawlna ah, Jentelte lam a pailou diing leh Israel nam belam mangte’ kiang kia a pai diing in a hilh hi (Mt. 10:5-6). Thukhun Lui kizat sungteng Jentelte’n tan neikha theilou ahihman in Jesu’n A nungzuite Israelte kiang kia ah a sawlzaw hi. Himahleh, Daan a beisak khit nung in, huai bel Kross a a sihkhit nung in leh a thohnawn nung in Khovel tengteng a pai a namchihte kiang a Tanchin Hoih hilh diing in thu a pia hi (Mt. 28:18; Mk. 16:15). Huaiziak in Jesu Khris a sihma leh a sihnung, Thukhun Lui a beisak ma leh a beisak nung kibatlouhna thupitak a om chih i theithei hi.

1. SABBATH TAN DIING AHI CHITE KIANG A DOTTUAK DOTNATE? (The Questionable Questions To Those Who Teaches To Observe Sabbath)

Tuni a KHAWLNI tan diing ahi chitute lak ah KHAWLNI toh kisai in dottuak dotna tampi om hi. Tuate lak a khenkhatte i enkhawm diing uh;

1. KHAWLNI Tan Lai Diing Ahihleh Bang Ziak A KHAWLNI Toh Kisai A Daan Kipete Tengteng Leng Zuiveklou Ahi Ua?

• Eksodas 20:10 KHAWLNI a nna himhim seplouh diing.
• Eksodas 16:29 KHAWLNI a michih amau’ omna mun chiat a a om diing uh, vakkhia kuamah omlou diing.
• Eksodas 35:3 KHAWLNI a meikuang himhim omsaklouh diing.
• Nehemiah 10:31 KHAWLNI a antang leh van bangmah leilou diing.
• Nehemiah 13:15-18 KHAWLNI a puakgik leh van himhim pawlou diing.
• Eksodas 35:1-2 KHAWLNI tanglou peuhmah hihlup diing.

1. KHAWLNI Tan Lai Diing Ahihleh Bang Ziak A Thukhun Thak In KHAWLNI Tan Diing Thupiak Hon Pe Nawnlou Ahia?

Thupiak Sawmte lak ah KHAWLNI tan diing thupiak lousiah thupiak dang tengteng Thukhun Thak ah a kimu vek hi.

Khatna: Kei loungal Pasian dang na nei diing uh ahikei (1 Kor. 8:5,6; Eph. 4:6; Nas. 14:15)

Nihna: Milim (idols) himhim na bawl diing uh ahikei (1 Kor. 6:9-10; Kil. 21:8)

Thumna:  Toupa na Pasian min a mawk in na lou diing ahikei (Jak. 5:12)

Lina: KHAWLNI theigige in, tang siangthou diing in – ? ? ?

Ngana: Na nu-le-pa zahtak in (Eph.6:1-2; Kol. 3:20)

Gukna: Tual na that diing ahikei (1 Jn. 3:15; 1 Pet. 4:15; Kil. 21:8)

Sagihna: Ang na kawm diing ahikei (1 Kor. 6:9-10)

Giatna: Guk na gu diing ahikei (Eph. 4:25-28; 1 Kor 6:10)

Kuana: Theihpih Taklou in na pang diing ahikei (Eph. 4:25; Kol. 3:9)

Sawmna: Na eng diing ahikei (1 Kor. 6:10; Kol. 3:5)

Thupiak dangte pen Thukhun Thak in genkik vek mahleh KHAWLNI pen genkhalou bilbel hi.

1. KHAWLNI Tan Lai Diing Ahihleh Bang Ziak A KHAWLKUM (Sabbatical Year) Leng Tanglou Diing? (Ekso 23:10-12)

Israelte’n KHAWLKUM (Sabbath Kum) a na tanlouh ziak un Babylon gam ah kum 70 sung sal a pimang in a om uhi (2 Kron. 36:21). KHAWLNI tang diing a thupiak a omte kiang ah KHAWLKUM tan ngeingei diing a thupiak ahi. Tuni a KHAWLNI tang mite’n KHAWLKUM a tang uhia?

1. THUKHITNA (Conclusion):

KHAWLNI tan diing thupiak pen Thukhun Lui hun a thupiak poimoh mahmah ahi. Hiai thupiak pen Israel namte kia liauliau a dia piak ahi a (Lev. 26:46), Israelte leh Pasian kikal a chiamtehna Thukhun ahi (Ekso 31:12-17; Ezek. 20:10-12). Huaiziak in Israel mi hiloute a diing hikhalou hi (Deut 23:3; Ezek. 44:3). KHAWLNI tel in Thukhun Lui tengteng Jesu Khris in hih tangtung in (Matt. 5:17-18) Kross lek ah beisakta hi (Kol. 2:14). A nihna (Thukhun Thak) a tunding theihna diing in, a masa (Thukhun Lui) a lamangta hi (Heb. 10:9). Huaiziak in KHAWLNI pen a beisa Thukhun ahi a, tuni a eite zuih diing hi nawnlou hi.Thukhun Lui zuih sawm a pan teiteina pen “Pasian kalhna” (Nas. 15:10) ahi a, Khris toh kikhenna ahi a, hehpihna puksanna ahi (Gal. 5:4).

Tuni in nang leh keite a diing a Pasian in A Tapa Jesu Khris sisan a Thukhun Thak a hon piak (Heb. 10:29) tungtawn in Pasian’ ta hihna i ngahthei hi. Jesu Khris in, “A gingta a baptisma tang hotdam in a om diing” (Mk. 16:16) a chi hi. Huchi a a hotdam lel peuhmahte Toupa’n, A(Khris) SAPTUAM ah behlap hi (Nas. 2:47). A saptuam a behlap a omte peuhmah “Pasian chiteel, kumpi siampute, nam siangthou, Amah a tuambik mite…” (1 Pet. 2:9) chih in a om uhi. Toupa’ namteel i hih theihna diing in Jesu Khris gingta a, i khelhnate ngaihdamna dia baptisma i tan kuul hi (Nas. 2:38). Jesu’n hon it hi.