“Hih haksat a ka om ma in ka vakmang nak a; tun zaw na thu ka zuita hi ” (Sam 119:67)
Banghiam thununna (discipline) khat omlou in mihing akikhawsa dik theikei. Pawlpi chih in amau poimoh dungzui in thununna tuamtuam kineih chiat uhi.Ahihhang in, poimoh law mahleh mihing pianzia (nature) ah thununna pen kipakta lawtellou hi. Himahleh pawlpi damna, masawnna leh tup-le-ngim sepsuahna di’n hiai tuh alou theilou ahi zel. Hiai thununna tuh lampiallou dia hon pitu ahihkia hilou in, ana lampialte leng lamdik a kiknawn dia khanglou saktu ahi.
Toupa’ saptuamte lak ah leng thununna bei a khawsak theih ahikei. I hin i khawsak ding dan khat (‘ought to conduct ’) omsa a om. Huaiziak in, Paul in Timothi kiang ah Pathian hing saptuamte “Bangchibang in ahia a om ding uh chih na theihna ding in ka gelh” (how you ought to conduct yourself in the house of God…” 1 Timothy 3:15) ana chi hi. Tua dungzui in Pathian hon ngiat hinkhua i zat theihna di’n hilhthoh thununna (instructive or preventive discipline) zawi tuamtuam zang in kisemsuah hi. Hiai hilhthoh hasotna, taihilhna leh vaunate’n gahsuah a neihlouh chiang in, saptuam sung a gilou (evil) khamdaih louh (unchecked) in kikoih maimai leh, silngou bang a a sukkhak peuh zelsuak ding ahihziak in bawldikthoh thununna (corrective discipline) piak hong poimoh hi ( 1 Korinth 5:6-7).
- Bangziak a Bawldik Tupna a Thununna (Corrective Discipline) Zat Poimoh Hiam?
Hiai thununna ah kuamah a kipak a omkei. Pathian mahmah leng hiai thununna khauhpai zawpen piak a kipak tuankei. Adiktak a gen in Kuapeuhmah a dia hoihzaw leh baihlamzaw lampi (easy way) pen aki ngeingaihlouh chiang in a khauhzaw lampi (hard way) zat akul chihthu ahi. Hiai bawldikthoh thununna lak ding kuapeuh in haksa kisa chiat ahihman in, bangziak a hiai poimoh hiam chih theihtel poimoh mahmah hi. A thiltup diktak theitelte di’n hiai tuh nelhsiah theihvual ahikei. Bangziak hi hiam, anuai ah tomkim in ensuk ni.
- Pathian Thumanna Ahi
Khristian ginom thou hi’a i theihte tel in, “ Saptuam thununna in’ phattuamna neikei, kisik a hongkik om lam leng theikha khang… ngaihsak selouh damhuai zaw” kichi khasek adia aw chih in om hi. Ahihhang in, thununna piak tuh Pathian thumanna ahi chih theih masak ngeingei ding ahi. Tua mikhial pen kisik hia ahihkeileh hongkik tuanlou chihpen en i gen theikei. Himahleh thununna piak kulte paulam bawlse lou-a sepsuah tuh i mohpuak ahi. Thupiak ahi a, i zuih ding leng ahi. Huaiziak in Pathian thupiak “…huai migiloupa tuh na lak ua kipan delhkhia un” (1 Korinth 5:13) a chih zuih ding ahi mai hi. I zuih leh thumang, i zuih keileh thumanglou kihi lel hi.
Thununna piak ding toh kisai Pathian thupiak tampi kimu hi. Thuhilhna dang hilh a, pukna leh kikhenna tunte (siamte) “Chiamteh a kiheisan” (note and avoid) ding (Romete 16:17). Thanghuai taka khawsate“A sa Setan piak” ding (1 Korinth 5:8 cf 1 Timothy 1:20). “Dan lou bang a om unau tengteng lak a kihemkhe” dia Toupa Jesu min a thu honpia (II Thessalonika 3:6). Huai kia hilou in amaute “kithuahpih hetlouh” ding chih hilai (II Thessalonika 3:14). Tita kiang ah, gintuamna neimi khatvei nihvei hilhnung in, “deih ken” chi giu-geu (Tita 3:10). Khris’ sinsakna thu’a om gigelou leh talekte“Inn a tungsak louh ding, paukam hoih a leng khak louh ding” tan a thupiak ahi (II Johan 10). Hiai teng ban ah, a kisik utloute Jesu’n, “…Nang ding in Jentel leh siahkhonmi bang hi heh…”chi tep mai (Mathai 18:17). Huaiziak in, Jesu itte’n Amah apan chiangtak a thupiak amuh a nelhsiah ngamkei ding hi (Johan 14:15, 23-24).
- b) A Vakmang Pen Pi-kiknawn Tupna Ahi
Lungtang khauhsak a kisk tumlou mi khat saptuam in kithuahpihna (fellowship) a suktan pen itna nasep thupitak ahi. Bawldikthoh thununna in a tup tuh, “bawldik-sukdik”, ahi. Huaiziak in, Paul in Korinte kiang ah, angkawm-kingaih thanghuai a om pen, “…Mi huchibang zaw, a kha Toupa’ ni chia hotdam a a om theihna ding in Setan pe lehang” achi hi (I Korinth 5:5). Hiai thupiak a sepsuah ziak un a nohkhiak uh, unaupa tuh, kisik in a hong kik hi (II Korinth 2:5-11). Kisik uhia, ahihkeileh mangthang paisuak uh chihzaw theikei hang, Paul in Himenaia leh Aleksandarte leng Setan ana pia hi (I Timothi 1:20). Hebrew ah, “Toupa’n a itte asawi nak a, ta a kipahpih tuh avo nak hi” (Heb 12:6) achi. Jesu’n Leodisia a A saptuamte kiang ah, “Ka itte tuh ka thuhilh in, ka sawi-a; huaiziak in, phatuam ngai inla, kisik in” chi hi (Kilakna 3:19). Huaiziak in, bawldik tupna thununna tuh itna nasep thupi penpen ahi. Hiai theichiante’n saptuam thununna a zadah ngeikei ua, a soiselkei uh.
Thugentu pa’n leng, “Gilou nasep kintak a gawtna akibawl louh ziak in, huaiziak in mite tapate lungtang gilou hih ding in huai ah koih kip in a om hi” chi’n vauhilhna chikhat (warning) honna pia hi (Eklijiasti 8:11). Jeremia hunlai in leng ut-le-dah a gamtate thununna bangmah piak ahihlouh ziak un, “…thil gilou hihmite khut a hatsak ua, kuamah in a gitlouh uh kisik a tuplouh loh uhi” (Jereria 23:14). Sam gelh tu’n leng thununna manphat dan hiai bang in ana gen, “Hih haksat a ka omma in ka vakmang nak a, tunzaw na thu ka zuita hi” (Sam 119:67). Hih haksat a om tuh Pathian itna nasep ahizaw.
- c) Itna Ziak Mah a Membar Dangte’ Kha Venbitna Ahi
Khelhna pen a hihna diktak leh a gah muhchet ahihchiang in midangte’n kihumbit dan ana thei uhi. Bawldik thoh thununna piak in khelhna gah a huaisiat dan chiangtak in a taklang hi. Himahleh, saptuam in ngaikhawklou-a khelhna a omsak maimai chiang in khelhna mel muhchetna pen sukmial a om in, maingaltak in khelhna khuk ah mite tuaklut uhi. Ahi ding bang a khelhna pen gawtna piak ahihchiang in, member-te lak ah lauhna piang in khelhna lak ah kihemkhia uhi. Zuau gen ziak a Anania leh Saphira hong sih helhul chiang un, “saptuam tengteng leh huai thu za peuhte’n a lauta mahmah uhi” (Nas 5:11) chih I mu. Hia’n zuau gen alauh huai dan midangte musak in sinsak hi.
Hiaiziak mah ahi Paul in,”Silngou tawmchik in tanghou beu apum in a zelsuak nak chih na thei kei uhia?” chi’n khelhna khawk salou-a kisaktheihpih zawmah Korinte ana taina (I Korinmth 5:1-2,6). Saptuam pen mi khat khelhna ziak a avek a sukbuah ahihlouh ding ahi. Huaiziak in, hiai tuh saptuam sianthouna kepbitna ahi. Pergamam leh Thaiatira saptuamte’n alak ua diklouhna khawksalou-a a ompih ziak un Jesu’n ana mohpaih . Kisik di’n vauhilh hi (Kilakna 2:14-16,20-21). Saptuam in a hiding bangtak in hiai thununna semsuah hile hang, mangthang kisik muhkik om ngeingei dia, midangte leng lau in pilvang sak dia, kha tampi kiveng bit kha ding hi.
- d) Khawvel Mite’ Lak a Toupa leh A Saptuam Zahtak leh Tawisang a a om Theihna Ding ahi
Saptuam tuh khawvel muh a avak ding ahi (Mathai 5:14-16). Pathian min thupina dia saptuam ahin ding ahi (1 Korinth 10:31). Siangthoutak a ahinziak a pawlam mite’n Pathian a pahtawi theih ding uh ahi. Saptuam sung a maingaltak a khelhna a om theihleh saptuam in’ ahihna mangsak a, min hoih-minpha atante mansuah chihna ahi. Saptuam in ahi ding bangtak in thununna zang hileh, khawvel in Khris leh A saptuam sang koih mai ding hi. Khelhna gen mai-a khuhmang sang a, tua khelhnate apan saptuam a kikep siangthou leh saptuam in zahtakna tang ding hi. Anania leh Saphirate tung a thiltung ziak in saptuam leh aza teng in lauhna nei mai uhi (Nasepte 5:11).
I Toupa Jesu’n A saptuam, “Nin banglou leh, vuailou leh, huchibang thil mawngmawng pulou a,siangthou leh gensiatbei a om zaw a, amah leh amah tuh saptuamte thupitak a a kipiak” a deih hi. Hiai Toupa’ deihna i buchinsak theihna di’n saptuam in thununna ngaihkhawk kul hi. Huaiziak in, Pathian in a sianthouna i koppih theihna ding in a tate thununna a pezel (Hebrew12:10).
- Thukhunlui Hun a Bawldikthoh Thununna
Pathian hihna khat tuh thununna pia Pathian ahi (Hebrew 12:5-11). Hilhthoh, taithoh leh vauhilh thoh a thununna a lohsap chiang in Pathian in bawldik thoh thununna ana zang hi. Thukhunlui hun a etsakna piak theih omte’n chiangsak mahmah hi.
a). Kora, Dathan leh Abiram Tungtang ah (Nambars 16:1-50)
Mi tallang mahmah Kora, Dathan leh Abiram ban ah, midang heutu dia tel 250 mahmah Mosi leh Aaron kalh di’n hong kisa uhi. Pathian thangpai mahmah a, lei kamka sak in hiai mi thumte leh asungkuante, ban ah, aneih-alam teng utoh hing vui-lup in a om uhi (Nambars 16:25-33). Lei in avalh madeuh in Isrealte kiang ah Pathian in, “Hiai migiloute’ puan inn a kipan in pawt khia un; a bangmah uh khoih kei un, huchilou in zaw a khelhna tengteng uah na pang kha ding uhi” chi’a vauhilh (warn) in a om uh (Nambars 16:26). Kihemkhekei le uh bang achi ding ua? A dawnna i theihsa hi maw. Thukhunthak’ thununna toh akibang mahmah (cf. Romete 16:17;1 Korinth 5:6; II Johan 9-11). Hiai mi thumte kia hilou in, amau nungthuap 250 leh Mosi kalh a phun mipite teng toh hiai thuziak in mi 14,700 si tang hial uhi!!! (Nambars 16:35,49).
- b) Akan Thil Hihkhelh Tungtang ah (Joshua 7:1-26)
Pathian in aphal hetlouh thil ana lakguk ziak in Isrealte melmate lak ah vuallel dimdem uhi (Joshua 7:1-6’10-12). Alak ua kipan hiai Pathian muhdah lakmang ahihma vuallel den ding ua, akiang ua omlou himhim ding ahihdan Pathian in theisak hi (Joshua 7:12-13). Tua toh kiton in Akan leh a inkuante denlup in a om uh (Joshua 7:21-26). Hiai ah leng Akan khelhna ziak a amanthat veklouhna ding un thununna khauhtak Isreal-te’n Akan tung ah ana semsuah uhi.
- c) Babulon Saltanna
Judate kum 70 vengveng Babulon sal (slavery) a a-om uh, hilhthoh thununna alimsaklouh ziak uh ahi. Jawlneite sawl in thuhilh in vau saksak mahleh amau a ngeihngaih louh mawngmawng ziak un Pathian in hehpihna bei bang hial in thah-le-mat di’n pekhia hi ( II Kronikil 36:11-21).
- Thukhunthak a Bawldikthoh a Thununna
I Toupa Jesu’n Mathai 18:15-18 ah khelhna kisik dia hilhna kipia nial teiteite Jentel leh siahkhon bang mai-a koihkhe di’n thu pia hi. Jesu’ thu i ngaihkhawk (serious) taktak leh hiai i zuih kul hi. Saptuam bawldik tupna ziak a thununna ana om khenkhat i en ding.
- Jerusalem Saptuam ah (Nasep 5:1-11)
A neiloute kankuahna dia a thilneihte uh zuak a sawltakte’ khebul a hon koihkhawm lai un, Anania leh Saphira in zuau gen in saptuam ah diklouhna (error) hon paw lut uh (Nasepte 4:32-36;5:1-11). Hiai khelhna in ma a sawnlouh a saptuam a lauhna om theihna di’n nupate sihsak in a om uh. Huchi’n saptuamte leh aza peuh te’n lau mahmah uhi. Tua bang gamtatna thil lauh huaipi ahi chih zillai, kim leh kiang in, chian hi.
- Korinth Saptuam ah (I Korinth 5:1-13; II Korinth 2:5-11;7:9-12)
Pawlam mite lak a leng omlou khelhna thanghuai khat Korin khua a membar khat in hih hi. Nohkhia a bawldik sang in ki-otpih nalai uhi.Taina (rebuke) khauhtak a zak uh toh kiton in nohsuah ahi ngei ding ua, huaiziak in mipa kisik ahihdan I mu uh. Hiai thununna in’ kisikna dia lungkhamsak in, amau leh amau kisusiangthou di’n thupukna neisak hi. Saptuam in hiai bang in thununna semsuah lebel, van-gam kai utte tuh kisik ngei dia gintak ahi. Ihih sun chia le’ng adiklou pen’ kibukna ding mun ana pia ki omsek a, hia’n khelhna maingalsak in gilou pen kisik naksang in engtak in pawlkai zawmah hi.
- THUKHITNA
Bawldik tupna a thununna tuh tulai-a theihsiam pen di’n “dis-fellowship” I chih ahi. Unaute toh kithuahna ana om gige pen lakkhiak (dis-fellowship or ex-communication) chihna ahi. Huai tuh ei ut-thu a hih ahikei. A kisik teitei ding chih theihchet ziak a hih leng ahikei. Athupi pen in, Pathian thupiak ahihziak a hih ahi. Hiai tuh thumanna ahi. Hiai thununna piak tuh phuba lakna lemchanga zat leh ki mudahte kitauhtuahna ahikei. Hong kisik thei hamham hiam chihna toh sepsuah ahizaw. Huan, amah hutkhiak zohlouh tawp in, adangte venbitna leh saptuam hahsiangna ahi. Gitlouhna koihkhelou-a omsak tuh amau toh sihkhawm theihna thang (trap) ahi. Huaiziak in, Pathian in Kilakna 18:4-5 hiai chi hi:
“Huan, van a kipan in aw dang in hichi bang a gen ka za a, ‘ka mite, a khelhna-a na pankhak louhna ding un leh a hi (plagues) na kailouhna ding un, amah a kipan in hongpai khia un: A khelhna tuh van a tung hialta ngal a, huan Pathian in a khelhnate a theigige hi” (And I heard another voice from heaven saying, “Come out of her,my people,lest you share in her sins,lest you receive of her plagues.For her sins have reached to heqaven,and God has remembered her iniquities).
Gelhtu : Kamlianpau
*****