Special Report by Thongginlian
Aman i thumnate hon dawng in, geelsa mah bang in zan Kiginni (December 8, 2018 -1030-1530 hours) in tukum a ding a nihveina Family Meet manpha tak a zatzoh hita. Hiai hun ah nupi 14 leh papi 13 kitel thei a, naupang leh tuailai leng hun khop a kitel theih man in kipah huai petmah. Maban ah leng hichi bang hun manpha imuh lam-en in kizat tangpi hiai a nuai ah tamlou unaute sim theih ding in kon luikhia hi.
- Zingni hong suak a Family Meet neihni ding ahihman in amun ding, Asola Bhatti Wildlife sanctuary, delh unaute gari 10 val in kikuan dupdup hi. Hunchiam dak 10 kilap chiat a, Co-ordinator, unaupa Siamkhanmuan, gelsiamna ziak in amun ah singpi kidawn khawm masa a, sangkan khitphet lum hithit lai chituam tuamte ne in dak 1030 tan hun saulou kizang hi. Zinglam session masa unaupa Janglet makaihna in kizang. Unaupa Khaminthang in late hon pi a, Asola Bhatti Wildlife sanctuary a auditorium thawn zua zua in phatna late kisa. Huchiin, thugentu unaupa Jamson in minutes 60 vel thupi “Nu-leh-Pate Gamtat Khawhei ah Tate/Tuailaite Zuih Ding In” chih zang in hasotna hoihtak hon gen hi. Thugentu in Laisiangthou a pansante 2 Peter 2:21; 1 Korinth 11:1; 1 Timothy 4:12 leh Phillipi 4:8 ahi.
- Tuailaite etton leh zuih ding in Khris a unau pichingtate, nouneltak a genvek man hikei mah leh, kampau-khawhei ah, gamtatna ah, itna leh, ginna ah leh siangthouna lam ngaihkhawk ding ahih dan hon gen hi. Thugen siam ban ah presentation kichup tak in hon luikhia a, ngaikhete kitai mah mah chiat hi. Hiai hun saulou chik ah limchingten (actors) a director deihna leh kawkmuh bang bang gelhsa (script) dung zui a lim a chiin mah bang ua, Khristianten leng hon kawkmuhtu (director), Kha hatkhum a gelh, Laisiangthou a I muh bang bang a ma sawn ding ahihdan siamnel tak in hon taklang hi. Dak 1230 hours in thugen tuh tomkim tak in hon zou a, sun-ann baihtak in kine khawm hi.
- Co-ordinator felna ziak mah in program neihna mun ah buh leh mehlim, Kelsa, huansa leh unauten a puakkhawmte ki nekhawm. Nek ding tam a, dawn ding kiningching ahihman in paikhawm unaute taksa lam ah loeng kitai mah mah. Huchiin sunnung dak 1330 hours in session nihna, geelsa bang in, houlim khawmna hun unaupa Thongginlian pina in kipan nawn hi. Hiai hun ah unaupa Siamkhamnuan in lasaknate ah hon makaih a, tua mah bang in unaupa Pauminthang in thumna ah hon makaih hi. Houlim khawmna a thupi hiai ahi “Saptuam Biakhawmna/Programs a Nu-le-Pate Gamtat Khawhei a Tate/Tuailaite Zuih/Etton Ding In.”
- Biaknate a unau deihthoh huai numeiten tan langeilou ahih ziak un amauten tan neite omzia ana mu chiang pen uh ahihman in amau muh leh ngaihkhawkte ki genkhawm masa. Hunvomtu leh thumna makaite ki genkhawm a, a ban ban in La lam a hon makaih, Thilpiak latna lam a hon makaih, Theihgigena lam a hon makaih leh thugenna lam a hon makaih te leng ki genkhawm hi. Thuhoih-Lahoih tamtak genkhawm ahihman in gelh khiak vek zoh ding hilou. Himahleh, tomkim deuh a gen in tan nei peuh mah kimansa (ready) a tante suk buchin ding ahihdan leh, mimal chitlouhnate gengenlou a mahni tante a hoih thei pen leh kilawm thei pen a sukbuchin ding ahihdan gen khawm ahi. Unau paikhawmten thuhoih-lahoih kigente zui pah a tuailaite etton tham hiding a kisa ding a deihsakna thugen in unaupa Nekkhothang in nitak lam dak 1530 hours (3.30 pm) vel in program zohna in thumna ah hon makaih a, zoh ahi. Hichi bang in hun manpha unauten kizang khawm hi. Pa Pathian venna leh kepbitnate thupi a, kipah huai. Aman thupina tang hen.
- Program teng zoh in nitak biakna ding mun ki delh siau-siau a, dak nga leh akim (1730 hours) in unaupa Thongginlian inn mun ah biakna kinei khawm nawn. Hiai hun ah unaupa Jamson in thugenna la a, biak khawmna nuamtak hinei nawn. Tualaite felna leh unau bangzah hiamte kipiak zohna ziak in biakna program zoh in nitak ann nekhawmna kinei a, nitak dak giat (2000 hours) vel in inlum chiat zuan in mangpha kikhak in Kignni tuh manpha tak a zat hi a theih ahi.
