Kamlianpau
“Krist’ Hattuam khu dih ka sa thou a, anialna diing zawng thei sing.
Hinanle zawng, na kikhenpite uh, chibai theilou, houpi theilou, amaute toh kigawp theilou na chi vevaw u pen dih sa vot sing. Mangpan la, na melmate uh it unlen, amau a diing in thum pie un achi ngala” chi’n taksa lam a unau Zoute khat in hon chi hi. Thutak zui kichi, Krist saptuamte lak mahmah a leng tunitan hiai thu a buai, theisiam theilou leh theihsiam a zuih tumlou om lailai I hih tel chiang in, hiai polam mi khat in a theihsiam ka gintak louh ziak in ka dawng ut zok kei. Himahleh, hon dot tuantuan chiang in Bible pansan in dawnna hoihtak ka pia hi. A zoh in, “Huchi ama le…” honchi a bangmah genbeh nei nawnlou in a Gari hekzom zel hi.
Hiai bang dotnate a om thei a, om leng a om mun mahmah. Manipur context (sung) ah tuh a theisiam ut leh zui utte di’n kigen tam in kigelh tam huntawkta a dia aw ka chisim hi. Ahihleh, Kristiante kithuahkhawmna (fellowship) in huam-phak chiang diing gamgi nei mah a diam? Kua hiam khat i huat leh i hazat a, i doubawl ziak a hiai bang thute gengen I hi diam? Hiai Kristian kithuahkhawmna huam sung (Fellowship limit) om ahihleh, tua gamgi kua khun ahia? Gamgi khun a om ahihleh gamgi vapel hiam ahihkeileh vakanta le’ng bang achi dia? Hiai gamgi kibawl ngaihnep theih, i ut leh utlouh a teeltheih dia piak ahi diam? Huan, huamsung/limit nei a unau hisa khat kithuahpih nawnlouh pen itna neihlouhna hiam ahihkeileh Pathian’ thuneihna-thutanna pen vasuhsakna ahi diam? Hiai bang dotna neuhneuhte theihsiam a dawnna dik piak chiat apoimoh mahmah.
Pathian a mi thumte toh kithuahna amanpha in a poimoh mahmah. Hiai pansan a Kristian kithuahkhawmna, kipumkhatna leh ki-chimatna gahsuah ahihziak in. Hiai unaute kithuahkhawmna, kituaktuak diamdiam a omna a manphatdan Sam gelh tu’n hiai bang in ana gen hi,“Ngai in unaute kituak diamdiama om khawm anak hoih in anuam mahmah hi”(Sam 133:1). Aban gen behzel in hiai kituah diamdiamna tuh Lu a thau manpha kinilh, puannaktual mong tan a kaikhia leh Zion tang a kezel, Daitui siang kelkel toh tehkak ahi. Huan, hiai bang kituahna ah Toupa vualzawlna om achi lai hi (Sam 133:2-3). Huaiziak in Kristian kithuahkhawmna tuh deihthoh kawm tak a ngaihnat mahmah diing ahi.
Hiai teng i gen nung in, unaute kipumkhat tak a kithuahkhawm dia thupepa mah in, kithuah nawnlou dia paisan diing, ahihkeileh unaute kithuahna lak apan posiah (dis-fellowship) diing in thu hon pia hi. A san tuh, Pathian in amah toh kithuahna hi’n unaute kithuahkhawmna hitaleh gamgi bei hiam ahihkeileh pansan (condition) bei a ana bawl louh ziak in. Hiai i theihsiam louh ua, gamgi i palsat leh pialmang unau takloute toh gawtmun-meidil a lut khawm kha diing I hi. Huaiziak in Pathian Laibu in bang hon sinsak hiam chihte en in, hiai tungtawn in kisik in lampi dik zui di’n I ki ngen uhi.
Tu’n kristian kithuahkhawmna gamgi nei dia thupetu kua hiam chih i en diing uh. Nelhsiah theih maimai hia? Ahihkeileh, “Kou zaw kikhen theilou, amaulou a hitheilou, ginna kibang kei lehle salam a innkuan khat, Inn sung dongtate, i pi-ipu i paih theihlouh ngen hi ua” chihte paulam a siamtan theih diing hiam? Vangam kai ut I hih ua leh tua paulamte zang a pau ngam lailai diing I hi hiam? Gamgi khung a thupetute en mah ni aw…
- Pa Pathian thupiak ahi
II Korinth 6:16-18 “Milimte leh Pathian tempul in leng bang hia kituahna aneih uh? Eite zaw Pathian hing tempul I hingal ua; “Pathian in, amau ah ka om dia, amau ah leng ka pawt dia;huan a Pathian uh ka hi dia, amau leng ka mite ahi diing uh, achih bang in. Huaiziakin, alak ua kipan in hongpawt unla,a tuam in om un, thil sianglou himhim khoih kei un, Toupa’n achi, huchi in, k’on kipahpih dia, Nou din na Pa uh ka hi dia, nou leng kei din tanu tapa na hi diing uh, Toupa bangkim hih thei in a chi” chi in.
Kilakna 18:4-5 “Huan vaan a kipan aw dang in hichibang in a gen hi: Ka mite a khelhna a na pankhak louhna diing un, leh a hi (plague) na kailouhna diing un amah a kipan in hongpai khia un, achih ka za hi. A khelhna van a tungta a, Pathian in a khelhnate a theigige hi.”
Toupa Jesu Krist’ thupiak ahi
Mathai 18:17 “Huan amau leng angaihkhiak nop kei laileh, saptuamte kiang ah tun in. Huan saptuamte leng a ngaihkhiak nop kei leh, amah tuh nang diing in Jentel leh siahkhonmi bang hi hen.”
Kilakna 2:14-16 “Himahleh demna zek kon nei, huailaia mi khenkhat Balaam sinsakna zuite na ompih ziak in, Israel tate ma akipukna koih diing leh milimte kianga kithoihna thilte ne diing leh kingaihna khelhna hih diing in aman tuh Balak a thuhilh hi. Huchimahbang in Nikol pawlte sinsakna zui, mi khenkhat mah na ompih hi; huaiziak in kisik in; huchilou in zaw na kiang ah ka hongpai pah dia,amau ka kama namsau in ka dou diing hi.”
Kilakna 2:20-23 “Himahleh hiai thu ah demna k’on nei hi, huai numei Zezebel, Jawlnei kichinu khawk nasak louh ziak in; aman ka sikha te kingaihna khelhna hih diing leh milimte kiang a kithoihna thilte ne diinga khem in a hilh hi. Huchiin amah akisikna diing in hun ka pia hi; huan ami ngaihna khelhna ah akisik tuan kei hi. Ngai in, amah damlou lupna ah ka pai diing a, a thilhihte akisik tuan kei leh amah angkawm teng leng gimthuakna thupi ah ka pai diing hi. Huan hi in a tate ka that dia; saptuamte tengteng in lungsim kiheinate leh lungtang thei pa kei ka hi chih a thei diing uhi; na thilhihte bangbang un na lak ua mi tengteng kape diing hi.”
- Krist’ Sawltakpite’ thupiak ahi
Romte 12:9 “Itna ahihleh lepchiahna tellou in hi hen. Gilou hua unla, hoihlam len chinten un.”
Romte 16:17 “Huan unaute aw, thuhilhna thu noumau hilhlouh lama kikhenna leh pukna omsakte apan kiveng diing leh ki heisan diing in k’on ngen ahi.”
I Korin 5:4-5 “I Toupa Jesu Krist mina na kikhop chiang un,noute lak ah kha in ka om a, Toupa Jesu Krist thilhihtheihna leng a om hi, Mi huchibang zaw a kha Toupa ni chianga hotdama a om theihna diing in asa hihmang diing in Setan kiang ah pia un.”
I Korin 5: 11-13 “ Tun bel kuapeuh unau min paw ngal in, kingaihhatmi hiam, mi huaiham hiam, milimbemi hiam, hanhatmi hiam, zukham hatmi hiam, lepgumi hiam hileh, kithuahpihlou diing in na kiang uah ka gelh ahi; mi huchibang kiang ah nek leng ne kei un. Paw lam mite tung ah vaihawm diing ken bang ahia ka awlmoh diing om? Nou sunga mite hilou hia na ngaihtuah diing uh? Pawlam a mite tung ah Pathian in vaihawm hilou hia? Huai migilou pa na lak ua kipan koih mang un.”
Ephesa 5:11 “Huan mial thilhih gah nei ngeiloute ah leng panna nei ngeikei unla, pan nak sang in adiklouh dan uh theisak zaw un.”
Philipi 3:2“Uite lak ah kiveng un, na gilou semte apan kiveng un, sa at gawp mite apan kiveng un.”
I Thesalonika 5:21-22 “Bangkim enchian zaw unla, ahoihlam peuhmah len chinten un; gilou lam peuhmah ah ki hem khia un.”
II Thessalonika 3:14-15 “Huan kuapeuh in hiai ka laikhak uaka thu uh a zuih kei uleh, na kithuahpih hetlouhna diing un chiamteh un, a zum theihna diing in. Ahi, melma bang in en kei unla,unau bang in hilh zaw un”
Tita 1:10-11“ Dan bangloua om, thu mawk gengen leh mi khem ching mi tampi,abik in zeksumte laka mi a om uhi. Huai mite kam humsak diing ahi, punna nin deih ziak a thuhilhlouh diing hilh in, mite a inkuankuan un api sia uhi”
Tita 3:10-11“Ginna tuam nei mi zaw khatvei nihvei hilh nung in deih ken. Huchibang mi alampial in a gilou ahi chih na thei uh ,amahmah siamlouh akitang sak ahi.”
II Johan 9-11 “Kuapeuh huai thu kihilhna thu a om gigeloua talek in Pathian anei kei; huai thu kihilhna thu a om gige in Pa leh Tapa anei khawm ahi. Kuapeuh huai thu kihilhna thu hon pawlou a, na kiang ua ahong paileh na inn uah tungsak kei unla, paukam hoih in kha kei un. Paukam hoiha a kha mi a thilhih khelh ah a pang sam hi”
Juda 3 “Deihtakte aw, I kikop hotdamna thu na kiang ua gelh teitei ka tup lai in, misiangthoute kiang a ginna khat vei kepsak a om thu a, phatuamngaitaka humbit a pang diing a hon hanthawn diing in, na kiang ua laigelh akiphamoh chih kana thei hi.”
Adang tampi Thukhunlui leh Thukhunthak apan simbeh diing a omtham lai diing. Himahleh, kuahiam in Pathian a lauh a, Amah a it leh hiai teng ah leng a thupiak bangbang zui diing in kihilhna achiang huntawk mahmah. Tua a tung a i sim Pathian thupiakte apan in gamgi bei a “Krist” min lou peuhmah toh kithuahna neih hiam, ahihkeileh, “Krist’ saptuam” kichi na zong toh kilawmbawl theih tuh Pathian thupiak bohsiatna, thupetu simmohna, gamgi khungtu Pathian nuaisiahna leh douna ahi. Hiai teng theih nung a unau takloute toh kilamdanna omlou a salam leh khalam a kipawl thei vevete tuh a khelhna ua pang in, amau toh tan kibang tang di’n meidil ah pai diing uhi. Huaiziak in Pathian in a khelhna ua i pankhak louh ua, a hi (plague) uh i kaai khak louhna di’n amau akipan kihemkhe di’n thu hon pia hi (cf Kilakna 18:4-5).
Gelh senglou diing I hihman in thusitna ah hiaite chiamteh di’n iki ngen hi. Pialmangte (apostate), unau takloute (false brethren), ginna tuam neite kithuahpihlouhna tuh-
- Amasapen in Pathian thupiak zuihna, thumanna ahi (cf Hebru 5:8-9);
- Ei a diing mahmah, ei vangam kai theihna diing mah, I kha hotdam a i-om theihna diing mah ahi. Amau bang a khial a simtel a I manthat khawmlouhna diing ahi (cf II Peter 2:1-3; II Johan 9-11);
- Saptuam sianthouna kepbit a, saptuam a suksiat diing uh venna ahi (I Korinth 5:6-8);
- Tua bang a kithuahpihna zukkik a (withdraw) omte a kisik ua hotdama hong om nawn theih khak uleh chihna ahi (I Korinth 5:5; II Korinthy 2:5-11). Huaiziak in hiai tuh itna nasep ahi.
Unau it aw, hiaite Pathian thu in i pom hia? Ahihkeileh, tu damsung mah a zuih poimoh in na thei hia? Pathian in diktattak a thukhen di’n na gingta hia? Na dawnna bang ahia? Hiai thupiak khauh leh chiang mahmahte nelhsiah kawmkawm a vangam lut thei di’n I ki gingta himhim hiam? Kivel thak ni.
*****