Gelhtu – Thongginlian
THUPATNA : Nu leh Pate’n tate I itdan hiai a Jesu’ dotna ah chiang mahmah, “Ahihleh noute kuapeuh na tapa un tanghou ngenleh, kuan suang na pe ding ua? Ahihkeh ngasa ngen leh kuan gul na pe ding ua?” (Matthai 7:9-10).
Thumna (praying) thilhihtheihdan toh kisai a houlimna himahleh itna a kilang phamahmah hi! Tate itlou a omkei. Tate it ziak in a penpente kideihsak a, neih manpha pen leng siitlou in kipephal hi. Hithei liai leh mahni hinna nangawn tate pe-ut ngen ki hi ding hi.
- Eite mah bang a tate a ding a kiphal, mahni hinna nangawn siitlou, nidang lai Israel kumpi David ahi. Gal lak a sihkhit in a melma himahleh David in a tapa Absalom a sun (mourn) petmah a kah ngawngoih hi, “Aw, ka tapa Absalom, Ka tapa Absalom, na sihsik in simai leng maw, Aw Absalom, ka tapa, ka tapa” (2 Samuel 18:33) chiin kahtam a lou. Melhoih a minthang Absalom a lu apan khepek tan gensiat bei a chiamteh ahi. Huaiziak a it lua ahi ngei ding. Himahleh, David in Absalom a ding a amah hinna hial a phal ziak tuh a tapa ahih ziak ahi ichilou theikei. Midangte awlmoh zohlouh tawp inleng eimah tate ki-awlmoh chiat a sum leh pai, tha leh zung seng in i pang teitei. David leng huchi bang, kumpi himahleh, mihing khat ahi.
PATHIAN ITNA
- Laisiangthou ah Amah tanau-laina leng hilou, a meltheih leng hisamlou mihingte itna ziak in Pathian’ tapa tang neihsun, Jesu’n a neih manpha pen pen, a hinna a pia, “Pathian in khawvel a it mah mah ziak in a tapa tang neihsun apia hi. Kuapeuh Amah gingtate a manthatlouh ua, tangtawn hinna a neih teihna ding un” (Johan 3:16). Hiai bang tangthu kipahhuai, Tanchinhoih, a om ngei nawn diam? A laithon ah Johan mah in Pathian itna hiai bang in ana chiamteh hi, “Hiai ah itna a om, eiten Pathian i it uh ka chi ahikei, aman a hon it a, i khelhnate thupha tawina ding in, a tapa a honsawl ahi zaw hi” (1 Johan 4:10-11).
- Pathian itna a thupi a, tehvual ahikei. Huai ziak in laphuaktu in hiai bang in la a phuak, “Tuisuahgiat (Pacific Ocean) laitui (ink) suahzou in, vanpi savun (paper) gelh ding hileh, Lei a singhiang (branches) teng laikung (pen) hiin, michih laigelh (writer) mi hileh, Pathian itna gelhna din, Tuisuahgiat kang (dry) ding hi; vanpi kal ah kiphah mahleh laizial teng’n dawllou ding hi” (KL # 383). Pathian itna ahi (1 Johan 4:8).
ITNA ZIAK A JESU’N MAN A PIAK
- Pathian itna vuaksuak saklou Jesu Khrist, Pathian’ tapa ahi. Kihta leh lin pipi in apa deihna hong tangtung sak a, michih hotdamna ding in Tanchinhoih (Gospel) hon pia hi. Mihing bang a leitung a sa leh sisan a hun sawtlou, kum 30 vel, Apa’ nna hongsep sung in Jesu’n zillai tampi hon zilsak. Tangtawn hotdamna ding lampi hongsial lai in akim leh kiang a mite niteng poimohte ngaikhawk in a poimohna hun un damna pia, nek leh dawn ding pia hi. Amah a ding a nna hong sem hilou in midangte a ding a nasem in a kizang bei hi, “Mihing tapa nasepsak a om ding in a hong paikei a, nasem ding leh mi tampi tatna dia a hinna pe ding a hongpai a hizaw hi” (Matthai 20:28). Jesu’n itna man (cost) a piak A hinna lel ahikei a, adamlai in leng mihingte a ding in kizang bei hi, “Kei belamchingpa hoih ka hi; belamchingpa hoih in a belamte adin a hinna pia hi” (Johan 10:11).
EITE ZILLAI: JESU BANG A HINNA PIAK
- Johan in a laithon masapen ah hiai bang in Jesu itna apan zillai la ding in hon hanthawn hi, “Hiai ah itna bang ahia chih i thei hi, A man tuh ei a ding in a hinna a piaktak ziak in; en leng unaute a ding in i hinna piaksam ding ahi” (1 Johan 316). Jesu’n a hinna mihingte a ding in a pia chih omzia bangchi bang in i saang ua? Jesu piak bang a peding hita leng bang chibang in ipe ding ua?
- Leitung a sawtlou a taam sung in a thilhih peuhmah Amah a ding hilou a, midangte phattuampih ding thilte ahi chih atung ah i genta. Tua mah bang in khawvel a milun khenkhatten lamtuam tuam ah panpihna nasep a damsung teng uh sem uhi. Khawvel in mother Teresa (1910-1997) chi a chiamteh in adam sung teng kuamah deihlouh leh ngaihsaklouh ‘phak’ (leprosy) leh HIV/AIDs veite Kolkata khawpi ah enkai hi. Kum tampi hiai bang nnasep hoih sem a, khawvel pahtawina sang pen ‘Nobel Peace prize’ piak (1979) in om. Asih dong hiai nasep a kipekhia ahih ziak in phak leh HIV/AIDs natna veite a ding a hinna pia a chiamteh ahi. Midang leng awlmohna ziak a thil khat a kizang bei a om tham ding uh; i taklang vek zoukei ding.
- Khristiante’n leng tua mahbang a Tanchinhoih thu nasepna, Tundingna nna leh Gentheite panpihna nna a kizang bei ding in Pa’n hon lamen hi. Khristian masate huchibang in kizang bei uh. Paul leng thutak a ding a kizangbei khat in a sihma in hichiin a chi hi, “…Toupa Jesu’ min ziak in Jerusalem khua a hen kia hilou in, sih leng ngap ka hi” (Nasepte 21:13). Hiai nate sem a ikizatbei chiang in Jesu bang a unaute a diing a hinna pia kihipan ding hi. Itna nna sepdan gentheihdan tuamtuam ommah leh sehthum a khen in, saulou lou in, i ensuk ding uh.
ITNA NASEP:TANCHINHOIH THU NASEPNA
- Jesu’n namchih apan nungzuite bawl ding chi a, “Kuan unla namchih apan nungzuite bawl unla…” (Matthai 28:19), eiten bel ikim-ikiang ah septheih bang bang isem uh. A sekei. Ban ah, ikim-ikiang ichih chiang in leng Kol leh vaite huap khaloulai hi. Amau lak a semthei Kol leh vaite om ahihman un, amau lak kiluhlou mah ahi. Jentelte lak a Tanchinhoih tuntu dia Pathian belseh Paul ahihbang in (Nasepte 9:15) eite leng a hon belsehna eilak mah himailou hiam? Thugen a vakna eilak mah ahi a, simtheih dia lai sutkhiakte leng eilak mah a hawm ding ahih ziak in singtang pau in kigelh vek hi. Panlaknate taklat theih ding hunkhop om mah leh khat lel itaklang ding.
- Kum 2018-19 sung in laibuta (tracts/pamphlets) sutkhiak ki-uangbawl a, tunitan in thupi 11 laibuta 11 in kisunkhia hi. Copy 5000 chiat kisun ahihman in 5,5000 pha a, sum senna lam ah (sutkhiakna leh postage ah) Rs.1 lakh vel kisengta. Unau mun tuamtuam a omte toh pangkhawm a sutkhiak laibuta tamkhop gingloumite lak ah hawm khiak hita. Hiai laibuta simkha a thutak theihbeh ut Chiin Hills a mi om chih thu zak ahih in ei a ding a ‘Masidonia Sapna’ (Macedonia Calling-Nasepte 16:9) hilou ding hiam chiin kingaikhawk hi. Business thupukna bang in Preacher, unaupa Jamson, sawl lem kisa a, kilawptak in amah June 13, 2019 niin Chiin hills zuan in zinkhia hi. Dam a tup bang a apaitheih leh New Lamka a unaute 2/3 toh kithuah in Tanchinhoih khua 2/3 ah va gen ding uh. July 2019 khabul vel a hong kik ding ua lamet ahi. Hawm ding in Laibuta hunkhop leng pua hi. Gahsuang ding a thutak chi a tuh, Pathian in khangsak ngei ding hi, “Ken kasuan a, Appolos in tui in a vak a, himahleh Pathian in a khangsak hi” 1 Korinthte 3:6).
ITNA NASEP:KEPBITNA NNA
- Nidanglai in Israel mite bitna ding in bitna khawpite seh khiak in om a, huai khawpite a om michih a bit uhi (Numbars 35). Mohna nei kuahiam a mohna chet ahihleh bel mohpaih ahi. Himahleh, chet ahihma bel a bit. Huaiziak in bitna khawpi a kichi hi. Tuni inleng Saptuam bitna khawpite bang ahi. Belam huang bang a genteh ahi a, huai ah Pathian Belamte bit uhi. Laisiangthou dungzui a saptuam bitna tuh pitu upate mohpuak ahi a, Paul in Ephesa khua a upate a mohpuakna uh a theisakta, “Pathian saptuamte, amah sisan a a leite, vak ding in noumau leh na heute uh teng teng tung ah pilvang un, Kha Siangthou in a tung uah nou heutu in a hon bawl hi” (Nasepte 20:28). Upate duty chiangzaw leh bukimzaw a theihna din Nasepte 20:20:17-32 simni. Saptuam a upate nasepna panpihtu Deaconte ahi uh.
- Saptuam a pitu upate poimohdan Paul mah hichiin a genbeh, “Ka painung chiang in ngehangte na lak uah a hong lut ding ua, pawlte a hawikei ding uh chih ka thei hi. Noumau lak a mi nangawn, nungzui pawlte amau lam a kaimang ding in thutuam gen na hong om ding uhi. Huaiziak in limsak unla; kumthum hilhial khitui kekawm a, sun leh zan a michih taihilh ka tawpsanlouh dan, thei gige un” (Nasepte 20:29-31). Pilvang a limsak a panlak in damna leh bitna tun ding a geel ahi.
- Delhi khawpi a saptuamte tel in mun tamzaw ah upate kinei naikei mahleh pituten panla in bitna ding leh khantouhna ding lampi kizong den hi. Panlaknate taklat kim sipsip zoh ding hikei mahleh taklat louh theihlouh khat i taklang ding. Unaute inn vehna program Preacher in a bawl a unau mimalmalte veh a, a kikholhpih bitna ding a panlakna hoih khat ahi. Kha lam a kitundingna ban ah, taksa lam ah leng unau kua hiam angvan ngai om hiam chih thei masatu leh zongsuahtu ahi. Hasotna leh thumsakna a hunzat ahih ban ah kitheihsiam tuahna leh ki maingalna hun manpha ahi. Saptuam vai a bitna ding leh khantouhna ding lam tuamtuam a panlaknate hundang ah i taklangta uh.
ITNA NASEP:GENTHEI PANPIH
- Itna ziak a awlmoh in Delhi a Khris Saptuam tamlouten hun paisa ah unaute lak leh ginglou mite lak ah bangzah vei hiam panpihna khut i zakta. Tunai zek in Manipur a om unau mi thum damlouhna ziak a tasam om ahi chih akitheih in makaiten thupukna la in sumtang a panpih lem kisa. Toupa ni a thilpiak apan bangzah hiam toh unaute lak a kiphalten ngapzah chiat thohkhawm in Rs.90,000/- ki kaikhawm hi. Unau thumte khat ah sumtang Rs.30,000/- chiat June 2019 kha in Piakkhiak hita.
- Neihval khenkhia a panpihna piak ahikei. Ahi ngeikei. Neih sunsunte apan kiphaltak a piak khiak ahi. Tuabang kiphalna hilou hiam i biak Pa Pathian deih? Korinth saptuamte kiang ah Paul in, “kimanna pen a om phot leh, mi a neihlouhpi hilou in, a neih bangzel a a piak ki pahpih tuak ahi” (2 Korinthte 8:12) a chi. Hun tamzaw ah nei teltul napi a pelou in om theihmawk hi. Bang ziak hiam ichih leh pekhe ding a kimanna (readiness) omlouh ziak ahi nuam mahmah. Panpihna nasepna a ding kia hilou in Tanchinhoih puanzakna ding leh misiangthoute ki dopsangna ding a panlaknate ah sen-leh-paih a om gige. Huai ding a pekhe din kimanna inei hiam? Kidot tuak dotna ahi.
- Itna nei kuapeuh in a unau tung a a hihding Johan hon sinsak thuhilhna hiai ahi “…kuapeuh in khawvel sum nei in, a unau tasam in mutaleh, amah a lainat tuankei leh Pathian itna amah a banchhiin a om ding? Unaute aw, thukia in ki-it kei ni, leikia in leng ki-it sam kei hi, thilhih leh chihtaktak in hi zaw hen” (1 Johan 3:17). Hichi bang a gamtangte Jesu thupiak “…na vak uh mi mitmuh ding in vak hen, huchi in na thilhoih hihte uh a mu ding ua, na pa uh van a om a pahtawi thei ding uhi” (Matthai 5:16) sutang tungte ahi uh. Mi’n a hon chiamtehna uh koipen ahi dia: sumchil honsa uh hia, thilphal? Nang leh kei a kinga ahi. Thilphal a hon theihna ding un Paul in Galatiate a thuhilhna zuithei ding in ki hanthawnni, “Huchiin, lemtang hun i neihdan bang zel in mi teng teng tung ah thilhoih hih ni, ginna a inkuanpihte lak a omte tung ah ki kholdiak hen” (Galatiate 6:10).
THUKHITNA
- Toupa Jesu’n a hon it ziak in mihingte a ding in a kizang bei a, itna man piak A hinna ahi. Amah enton a eite leng midangte, unaute damna ding a kizat bei tuh michih mohpuakna (duty) ahi. Amah bang a itna paai a, ki zangbeite hon pahtak ziak a “… na hih hoih e… (Matthai 25:23) hon chih zak nuamlaw ding hi. Huaikia hilou in “…na Pu kipahna ah lut in” (Matthai 25:23) hon chih behlai ding hi. Hiai sang a zak nop huaizaw bang thu a om dia?
****