Church of Christ, New Delhi

“The Churches of Christ salute you” (Romans 16:16)

SAPTUAM –genkholhna leh tangtunna

Hauminthang

THUMASA- SAPTUAM

Saptuam kichi thumal tuh Greek pau “Ekklesia” apan  kilakhia ahi

a,  huai tuh  “sapkhiak tuam”  “call out” chihna ahi. Pathian’ tapa ittak lalgam a omdia khovel akipan sapkhiak a omte genna ahi (Kol 1:13). Huai omdan tuh Khris thupiak zuite khalam pumpi khat a kigawmkhawm a bawlkhiak leng ahi (I Kor 12:27; Heb 5:8,9, Eph. 4:4-5).  Baptisma tang a Hotdam a om mite behlapna mun  tuh sapkhiakte omna ahi (Mark 16:16; Nas 2:47).

Saptuam (Church) tuh thakhat thu a hong om/ding khemawk hilou in geelkholh, genkholh/genlawk leh  chiam masak  a ana om in huchia hong piangkhia/kiphutkhia ahihdan Bible in chiangtakin a honlak hi.

GENKHOLHNA

A tung apan Pathian lungsim ah Saptuam tuh  ana om gige ahihdan  Sawltak Paul in Ephesa khua  a saptuam omte lai a khakna ah hiai bang in taklang hi –  “ I Toupa Jesu Kris Pa leh Pathian phat in omhen. Aman vanmun khawng a khalam vualzawlna chiteng in eite kris ah hon vualzawlta, Amah mai a siangthou leh dembei a om ding a leitung pian ma a eite honna teltak bang ngei in. Aman a deih a a tup bangbang in, eite Jesu Kris vang a atate hi ding in, itna ziakin honna sepkhol khinta, huchi a It-a a hon piak deihsakna thupi mahmah pahtawina i hih theihna ding in” (Eph 1:3-6).  Pathian in leitung a siam matham apan saptuam kichi hong om ding in na geelkhol a, lamkhiak ana tum khinta hi. Mihingte om nung a kigeel panphet ahihlouhdan kichiantak a theih in om hi.

Huai mah tuh Thukhun Lui hun lai pek apan hilhkholh in na om a (Heb. 9:11,23;10:1), huai hunlai in saptuam omlou ahihman in muh a utmahmah uhi (I Pet 1:10-12).  Himahleh, Pathian in Zawlneite zang in hiai a nuai a bang in Lalgam hong om dingdan tuh  a thu in na genkholsak masa phot hi.

  1. Zawlnei Isai in “Ni nanungte ah hichi ahi ding a, TOUPA in omna tang tuh tang lian tungte ah hihkip in a om ding a, tangneu khakhate tung ah leng tawisan in a om ding; huailai ah namchihte tuh a hoh zuazua ding uhi. Huan, chi tampite a hoh ding ua, Hongpai unla, TOUPA tang ah, Jakob Pathian in ah, i hohtou ding uh; huchiin aman a lamte tanchinte a hon sinsak ding a, a lampite ah i pai ding, a chi ding uh; Zion akipan in dan thu lah a hongpawt sin ngal a, TOUPA thu Jerusalem akipan in a hongpawt sin hi” (Isai 2:2-3) chiin na genkhol hi.
  2. Huchimah in Zawlnei Mika in “Himahleh ni nanung chiang in hichi ahi ding a, TOUPA na omna tang uh tang lian tungte a hihkip in a om ding a, tang neute tung ah tawisang in a omlai ding; huai ah tawisang in a omlai ding; huai ah chichihte a pai zungzung ding uh. Huan, nam tampite a pai ding ua, Hong unla, TOUPA tang ah, Jakob Pathian inn ah i hohtou ding uh; huchiin aman a lampi tanchinte honsinsak ding a, a lampiahte ah i pai ding ua, a chi ding uh; Zion akipan in dan thu a hongpawt sin ngal a. TOUPA thu bel Jerusalem a kipan in hong pawtsin ahi” (Mika 4:1-2) chiin a hong kilam khiak diing thu na genkhol hi.
  3. Zawlnei Joel in “Huai nung chiang in hichi a hong hi ding a, mitengteng tung ah ka kha ka sung ding; huchiin na tapate, na tanute un ka thu a gen ding ua, na putekte un mang a man ding ua, na tangvalte un kilaknate a mu ding uh; Huai ni khawng chiang in sikhapate, skhanute tung ah leng ka kha ka sung ding” (Joel 2:28-29) chiin gen hi.
  4. Babulon Kumpipa Nebukednezzar’ mang ( Dan 2: 31-35) leh a omzia hilhchetna (Dan 2:36-45) tungtang ah, Kumpipa’n a mang in  milim, hattak mai, a tetna thupi mahmah, a ma ah  ding, amel kihtakhuai mahmah mu hi. Huai milim apan Lalgam li (4) kilang hi.

1)  A Lu Dangka-eng (Gold) ahi a, tua in Babulon Lalgam  a ensak a,  BC 600 vel in  Kumpi Nebukednezzar lal a, huai lalgam tuh BC 536 in puksia hi.

2)   A awm leh a bante dangka (Silver)  ahi ua, tua in  Media kumpi Daruis leh Persia kumpi  Cyruste’ dinkhiak Medo-persia lalgam a ensak a, BC 330 in puksia hi.

  1. A gil leh a pheipite dal (Brass) ahi ua, kumpi thupi Alexander in a dinkhiak Mecedonia lalgam a ensak a, tua lalgam tuh BC 323 in a sepaih liante lak ah hawmzaak in om hi.
  2. Akhete sik, a khepekte sik leh tung khenkhat kihelkhawm (Iron mixed with clay) ahi a, huai tuh BC 30 a Octavius Caesar in khovel thuneihna toh a dinkhiak Rome lalgam  ahi. Chang 44na ah “Huai kumpite hunlai in” chih in a kawk tuh Rome/khovel kumpite vaihawmlai hun  genna ahi a, “himahleh hiai gam tengteng a kitam nen sak ding a, a suse vek ding a,” chih in a kawk nop ahihleh, a tung a lalgam thumte (Babulon, Medo-Persia leh Mecedonia) hihsiat a omvek diing genna ahi a, huai nung a  Daniel in thiltung khat ah Pathian Lalgam  tuh Rome Lalgam  AD 30 a hong kipat nung leh a omsung ngei a dingkhe/kiphutkhe ding ahi chih na gen/mukhol hi.

Hiai a tung a Zawlneite genkholhna apan chiamteh tuak omte tuh –

  1. a) Ninanungte ah
  2. b) Jerusalem ah
  3. c) Khovel lalgam lina hunlai in lamkhiak hi ding
  4. d) huai ah nam chihte hoh zuazua ding
  5. e) Thukhun Thak hun tuh Ninanungte (“Last days” ) genna ahi ( Heb. 1:1-2; Nas 2:16-17).

Caesar vaihawm hunlaitak mah in Thukhun Thak thu hong kipan panta hi. Tua hunlai in Baptispa Johan  Judia gamdai ah “kisik un van lalgam (saptuam) a naita” chiin thu gen in a hongpai a (Matt 3:1-2) huai tuh  Tiberia Kaisar/ Caesar in a vaihawm kum sawm leh kum ngana kum ahi ( Luke 3:1-2).  Saptuam tuh Baptispa Johan phuhkhiak ahikei a, amah bel hongtung diing chi a  taangkoutu lel ahi. Amah tuh huai lalgam sung ah a omkhakei hi ( Matt 11:11).  Huchiin,  Jesu Khris’ mimal nna sep hunlai in leng saptuam/lalgam tuh phuhkhiak a om nailou in, mailam  ah omlai ahihdan a nuai Bible changte apan muh theih nawn hi.

  1. Johan mat a om nung in, Jesu tuh Pathian Tanchin Hoih gen in, Galili gamah a hong a. A hun a hongtungta a, Pathian lalgam leng a hongnaita; kisik unla Tanchin Hoih gingta un, chiin thu hon gen pan hi ( Mark 1:14-15).
  2. A nungjui 12-te kiang ah Jesu’n na pai un, vangam a hong naita, chiin, thu gen zel un

chiin thupia hi ( Matt 10:7).

  1. Midang 70-te a sawlkhiak lai inleng, Pathian gam na kiang nai uah hongtungta, na chi

ding uh chiin a hilh hi ( Luke 10:9).

  1. A nungzuite thum dingdan a sinsakna ah “Na lalgam hongtung hen” a chi sak hi

(Matt 6:9-10).

  1. Suangpi tung ah a saptuam/lalgam lamkhe ding chiin thuchiam a bawl hi ( Matt 16:18).
  1. Nungzuite leng huai lalgam ah om nailou uhi ( Matt 18:1-3).
  2. Khrist in a nungzuite hunlai/damlai mah a hongtung diing hidan hilh hi (Mark 9:1).
  3. A nungzuite kiang ah a thohnawn nung a kilaklai in Pa thilchiam a tung uah sawl ding a, himahleh, tunglam akipan thilhihtheihna silhsaka a om masiah uh khopi (Jerusalem) ah om  kinken diing in  a vaikhak hi (Luke 24:46-49).
  4. Nungzuite’n leng na lam-en gige uh (Nas 1:6). Himahleh, amaute ki-lamet bang a salam lalgam ahikei hi. Tua ahihman in, Jesu’n akiang uah Kha Siangthou a tung ua a hongtun chiang in thilhihtheihna nei ding ua; huchiin, Jerusalem khua khawng ah, Judia leh Samari gam khua teng ah, kawlmong pha a  leng a thu theihpihte  hi ding uh, a chi hi (Nas 1:8).
  5. Thusiahtu (Jesu) a damlai a thusiah in thu neilou ding a, a sih zoh chiang a thu nei pan ding hi (Heb 9:16-17) .

Huai a tunga thute apan i muh theih bel Lalgam tuh a thu a genthoh a omlai ahi chih kilang hi.

TAANGTUNNA:

Jesu Khrist sa a hong pianma  tham apan saptuam phuhkhiak diing leh Thukhun Thak kizat  diing thu  na kigenkhawlta ahi chih i genta hi. Taanglai nite a Zawlneite’n  mite kiang a ana hilhkholhzel uh Lalgam thuchiam pen ni nanung lam chiang a Van  Pathian thilhihtheihna leh Kha Siangthou  toh  Jerusalem ah  hongtung diing, tua ni pen Pentecost  kut ni  ( huai tuh Sabbath ni 7×7= 49 vei  zoh ni khat ni , Nipikal ni masapen ni ahi) huai tuh ni 50 ni   ahihmanin namte paikhawm zuazua diing ua, huai hun ah khelh ngaihdamna thu puankhiak hi diing  chih thugen I mu hi.

Huchibang zel a, geelkholh leh hilhkholh ahih dungzui in, nungzuite’n Jesu a thohnawn nung a leitung a ni 40 sung a om zoh a van a paitouh nung ni 9 sung  Jerusalem khopi ah ana ngak nilouh ua, huchiin, a zingchiang nipikal nimasapen in Pentikost ni (AD 33) in Jerusalem ah a hongtung a, a vek un mun khat ah a omkhawm ua. Thakhatin van akipan ging huihpi nung bang in a hong om guih a. Huan, huaiin a tutna in uh a hihdim vekta a, huan, leite, amah leh amaha kihawm in, mei bang in a kiang uah a hongkilakta a. Huan, a tung uah a tuang chiata, a vek un Kha Siangthou in a dimta uh, Kha in a pausak bangzel in pau dang in a hongpauta uh. Huan, van nuai a nam chih lak akipan Pathian limsak Judate Jerusalem khua ah a tam ua. Huan, huai ging a zak tak un mipi a hongkikhawm ua, mi chih in a pau uh amau pau chiat in a honzak ziak un a lungsim un a hongbuai ua… (Nas 2: 1-6) chih I mu thei hi.

Huai hun ah Peter in hiai a thiltungte tengteng taanglai a zawlneite thugen kholhte tangtunna ahi chih a gen khit in thugen a hon pan hi. Jesu tuh Pathian akipan ahi ngeina chih thilthupite, thillamdangte leh chiamtehnate zang in na lak uah a hon theisakta hi chih a theisak hi.  Huai Khrist tuh a mansak ua, migiloute khut in kross ah na kilhden ua, na hihlumta uhi chiin a hilh nawn hi. Himahleh, Pathian in sihna gaknate phelsak a akaithouta hi. A thugen ngaikhete a thuzawh theihna diing in David thugente la sawn in  Jesu khrist tanchin leh a sihdan leh a thohnawn thu a gen a,  huai theihpihtute ahihdan uh leng  hilh hi. Huchiin  namchih in huai thu azak chiang un  bang kahihta diing ua le chi a kisik in om ua,  huaitakin, Peter in amaute kiang ah, kisik unla, na khelhnate uh ngaihdamna diing in Jesu Khris min in baptisma tang chiat un  chiin thu pia hi.  Huaitakin a paikhawm nam 15te lak ah mi 3000 vel in tua ni mah in  khelh ngaihdamna di’n baptisma tang ngal ua, a hotdam lel peuhmah Toupa’n niteng in a saptuam ah behlapsak zel hi ( Nas 2:32,41,47).

Laisiangthou mun bangzah hiam I etnate apan  Toupa Saptuam tuh  AD 33 kum apat phuhkhiak ahita chih I mu thei hi. Hiaite tengteng Jerusalem khua a thiltung ngen ahi chih leng  theih in om hi. Khasiangthou thilhihtheihna sawltakte tung ah leihbuak in om a,  huai tuh tanglai a zawneite  thugen taangtunna ahi. Hiaite Zawlnei Joel in a gen ahi, huaiziakin a ginlelh huaikei hi chiin chiangtak in Peter in a hilhchian ( Nas 2:16). Hiai thilte tengteng ni nanunglamte ah a hong tung diing chiin Jawlneite’n ana genkhol ua, a genkholh bang ngei un a hong tangtung a saptuam/Lalgam tuh ni nanung lam ah lamkhiak  a hong om  ahihdan Peter in genkhia hi. Kisikna thu leh khelh ngaihdamna thu puankhiak ahih hun in nam chih a mi a tel uhi.

Huaiziakin, Lalgam  kigenkhol pen tuh  Pentecost ni’n Jesu’n  phuhkheta a, huai nungsiah tuh laikhakte ah saptuam chih kigentou denta hi.  Ahihziakin, Saptuam tuh Peter phuhkhiak ahikei a,  phuhkhiak a om theihna diing a phuangkhetu/chabi hongtu lel ahizaw,  saptuam phutkhetu leh neitu  bel Khrist ahi chih manghilh louh diing ahi ( Matt 16:18; I kor 10:4).

THUSITNA

Huaiziakin, saptuam/Lalgam tuh kum asang a sim genkholh ahih nung in Jerusalem ah phuhkhiak ahi. Tuaziak mah in, Pentecostni tuh saptuam muhtheih leh ataktak a apiankhiak ni ahihdan Saptuam khangthu ah ni/kum poimoh hi a chiamteh in om hi.  Hiai nung a phuhkhiak  a om saptuam/pawl kichi khempeuhte Toupa ‘saptuam ahi kha kei chih a chiang lua hi (Matt 15:13; Nas 4:12).  Tua ni apan Khristian hun kipan a ataktak in  Thukhun Thak  thupiakte hong kizang panphet hi (Heb 8:8; 9: 15-17). Himahleh huai ni a saptuam khat kiphut khia tuh Pentecostal/RC/Baptist/AG/SDA/Pres leh a dangdangte ahikei a,  a phutkhetu Khrist ahihziakin, Khrist’ saptuam chih in om hi (Matt 16:18; Rom 16:16).  Suangphum zion (Jerusalem) a ettelsa a lamkhiak ahihman in, tualou suangphum dang himhim kuamahin lem theilou diing hi (Isai 28:16; I Kor 3:11).

Huaiziakin AD 33 in  lalgam tungtang Jawlneite genkholh tuh Khrist in  Jerusalem ah  aphutkhia  in taangtungta a, huai hun a kipan  tunitan in Khrist’ saptuam tuh  omtou denta hi.