– Jamson Guite
Thupatna:
Saptuam thumal Bible a muntampi a tuang ahihman in kuaman Bible in Saptuam toh kisai ana gen ahihdan nial in a kitheih mohbawl theikei diing hi.
Saptuam I chih Bible a gen a ana om ahihleh kua Saptuam hi diing? Bang Saptuam hi a, koi saptuam pen hi diing hiam? Kum zabi khatna hunlai (Saptuam phuhkhiak chiil lai) in bel Jesu’n a lamkhiak Saptuam pen kia om ahihman in hiai thu ah buaina diing omtheilou hi. Himahleh tulai I khovel ah Saptuam kichi a tamluattel ziak in Bible in ana gen Saptuam pen koipen hi ngeingut diing ahia chih theih haksapi diing ahong bangta.
Roman Catholic leh Denomination Thumal Hilhchetna
British dictionary in Roman Catholic toh kisai a hilhchetna ana piakna ah “Roman Catholic tuh Pope thuneihna/lupen hihna nuai a khristian pawl khat” ana chi hi. “Pope makaihna nuai a khristiante kipolkhomna hiang khat” hi a gen inleng om hi. Huai omdan bel Roman Catholic a thuneitu pen (supreme head) Jesu Khris hilou in mihing (Pope) chihna ahi.
Denomintion toh kisai in Collins dictionary in hilhchetna ana piakna ah Denomination tuh ‘Ginna kibang sahkhua neite sung a gintakdan tuam nei pawlkhat’ chin ana hilhchian hi. Huan, denomination tuh – min hiam ahihkeileh bang hiam thil tung a minvuahna hi’n dictionary in hilhchian a, ‘Sect’ I chih toh leng kilamdanna omlou hi’n hilhchetna pia hi. ‘Sect’ I chih leuleu chiang in sahkhua khat apan gindan leh paidan tuam ziak a pialkhia sahkho pawlte genna ahi.
Bible etma inleng a tung a English dictionary hilhchetnate tungtawn apan in Catholic tuh Bible a kimu Saptuam hilou a mihing phuhkhiak ahihdan mutheih in om hi. Huchibang mah in Denomination leng Bible etma inleng a khiakna tungtawn apan in Bible a kimu Saptuam hilou in gindan tuam neihziak a pialkhia pawl ahihdan muhtheih i om hi.
Saptuam Thumal Hilhchetna
Bible a kigen Saptuam pen Catholic ahikei. Protestant hiam Judaisim hiam leng ahikei. Denomination hiam leng ahi samkei. Social organization khat leng ahikei a, Political organization leng ahi samkei chih theih masa phot ni hang. Khristian kichi tampite’n Saptuam bang hi hiam chih a theichiankei ua, a poimohna leng a theikei uh. Huaiziaktak in Pawl/Saptuam in poimohna a neikei a chi uh. Saptuam bang mihing in phuhkhiak theih diing bang anasa in ana phutkhe teltul uhi. Bible in bel mawltak in Saptuam bang hihiam chih ana taklang hi.
Saptuam kichi thumal tuh Greek pau thumal EKKLESIA apan kilasawn ahi a, SAP KHIAK chihna ahi. Huaiziak in Saptuam tuh sapkhiak a omte chihna ahi. Khovel apan Pathian Tapa iitak Lalgam a lut dia sapkhiak a omte ahi uhi (Kolosate 1:13). Sapkhiak a om mite tuh Khris khalam pumpi ahi ua (1 Korinte 12:27), Khris in a hotdam a (Ephesate 5:23), A Saptuam a abehlap mite ahi uhi (Naspte 2:47).
Bible ah ‘Saptuam’ chih thumal gendan nih a gen in ana om hi. Khatna ah vaannuai pumpi huap a gen in a om (Matthai 16:18). Anihna ah tualsung (local) huap a gen in a om nawn. Etsakna diing in Paul in Rome khua a Saptuam omte lai a khakna ah tualsung a Saptuam omte a genna in “Khris Saptuamte’n chibai ahon buk uh” chi in Saptuam genna in thumal khatsang a tamzaw genna (plural) an azang hi (Romte 16:16). Tampite gintakdan a tulai a denomination tuamtuamte a genna hilou in tualsung a Saptuam omte a genna ahizaw. Rome laikhak gelh ahihlai in Jesu Khris Saptuam kia om a, tualai a Denomination kichite khat leng a om naikei. Saptuam pen vaannuai pumpi (Universal) huap a gen ahih peuhpeuh chiang in khatkia (singular) in kigen diing a, tualsung huap a gen ahih chiang in khat sang a tamzaw (Plural) thumal kizang tangpi diing hi.
Gensau lai lehang, Bible ah Korin khua a Saptuam, Ephesa a Saptuam, Philipi a Saptuam leh a dangdang I simkha hi (1Korinte 1:2, Ephesate 1:1, Phil. 1:1). Hiaite banah Kilakna bung 2 leh bung 3 ah Saptuam sagih I muthei hi. Denomination mitbelh toh a etziak un tampite’n hiai thute theikokalh in tulai a Denomination pawl tuamtuamte genna hisak uhi. Huai hunlai in tualai a Denomination pawl tuamtuamte a om naikei. Denomination pawl tuamtuamte genna ahi zenzenkei. A tung a I gensa mahbang in tualsung mun tuamtuam a I Toupa Jesu Khris Saptuam omte, thugin leh paidan kibang neite a genna ahilelzaw hi. Hiaite kigawmkhawm in vaannuai a Saptuam khat a bawl uhi. Denomination lungput koihkhia a Bible I sut leh Saptuam toh kisai theihsiam louh diing bangmah a omkei hi.
Saptuam Dik Apan Pialmangna Masa
Sawltakpite hunlai in Saptuam tuh bubitak a om in a pung hat mahmah. Jerusalem ah Saptuamte sawina hong kipan a, huchin mun tuamtuam ah gingtute hong dalhzak ua a paina lam chiat uah Tanchinhoih gen in gingtu tampi kibehlap toutou hi (Nasepte 8:1-5). Paul ahong pianthak zoh in Judate leh Jeltelte kiang ah Tanchin Hoih a hong tangkoupih a huchi’n Asia leh Europe gam ah Toupa Saptuam dinkhiak in hong om hi.
Hiai hunlai in Saptuamte nakpi a sawi a a-om hang un kiamlam sang in punlam nawtzaw uhi. Pawlam apan sawina ziak in Saptuam sung ah buaina a omkei a, himahleh Saptuam sung mah apan in buaina ahong piangkhia hi. Hiai tuh Sawltak Paul mahmah in kha theihsak a ana genkholhsa leng ahi him hi.
Pawl kaihna hong om diing toh kisai in Ephesa khua a Saptuam upate kiang ah Paul in hiai bang in ana gen hi. “Pathian in ama’ sisan ngei a aleisa, Saptuamte kem diing a kha sianghou in noute ahon koih ziak in nou leh na heute uh tung ah pilvaang un. Ka painung chiang in nge haangte na lak uah ahong lut diing ua, belamhonte a hawikei hial diing uh chih ka thei hi. Noumau lak a kipan mah in leng nungzuite amau lam a piimang diing a thu diklou gen a hong om diing uh” (Nasepte 20:28-30).
Paul in ana vauhilh dungzui mah in Sawltakpite sihkhitvek nung in Saptuamte lak apan nungzuite kaimang diing in thu diklou gen ahong om petmah. Bible in upate tungtawn a Saptuam kivaihawm diing (Nasepte 20:28) chi mahleh hiai mite’n Bible in a gen saptuam kivaihawmna kalh in Rome solkar kivaihawm dan saptuam sung ah pawlut uhi. Huchi in AD 606 kum in upate lak a khenkhat voksang tuam in Saptuam sung a lupen hisak in Pope chin hon minvuah uhi. Huchi in tuni a Catholic chi a I theih uh ahong piangkhia hi. Toupa’n a chiam mahbang in tamloute’n Bible thutak mah lenkip in Saptuam dik tuh mitlou in tunidong ana paitouden hi (Danial 2:44; Matt. 16:18).
Denomination Hong omkhiakdan
Catholic saptuam tuh AD 1054 vel in pawl nih kisuah in Roman leh Greek Orthodox in hong kikhen sawn uhi. Hun hong paitouh zel dungzui in Roman Catholic-te’n Bible polam apan in sinsakna tampi ahon behlap toutou uh. Apailel luat ziak un a siampute uh lak a mikhat Martin Luther in Catholic bawldik ahon sawm. Himahleh Roman Catholic apan nohkhiak in om a huchin amah tungtawn in Reformation Movement/ Protestantism ahong omkhia hi. Hiai tuh tuni a Denomination kichi hong piankhiakna bulpi ahong suak hi. Martin Luthar in Roman Catholic-te gindan diklou tampi paikhe mahleh Bible a kimulou gindan tampi a paipih veve hi.
Thukhitna
Tuni a khristian kichite sehthum in a khentheih hi. Khatna ah Bible a kimu Saptuam dik, huai tuh Khris Saptuamte. Anihna ah Saptuam dik apan sinsakna diklou zuih ziak a pialkhia Roman Catholic-te. A thumna ah Roman Catholic apan pialkhia Protestant /Denomination pawl tuamtuamte ahi uhi. Bible in Saptuam khat kia a gen (Ephesate 4:4; Ephesate 1:23; Kolosate 1:18). Huai Saptuam tuh Khris in a lamkhiak pen, Khris Saptuam ahi (Matthai 16:16-18; Romte 16:16). Roman Catholic ahikei a, Denomination leng ahikei hi.