Kamlianpau
THUPATNA: Khristian kichi atamzawte’n sawma khat piak poimohlai ahi chi’n uangtak in agen uh. Ahihhang in, sawma khat bang Dan nuai a piak ahia, kuate a dia thupiak hihiam? chihte agen zomkei uhi. Kuate nekdia piak ahia chih leh tu Thukhun Thak hun a hiai sawma khat piak poimoh lai hiam? chih Laisiangthou a zonglou in, piak ding ahi chi’n nasatak in asinsak uh. Huaiziakin, hiai tuh a saptuam ua sum muhna lianpen asuak hi. Tuni’n, hiai sawma khat Thukhun Thak hun a thupiak hilai hiam chih I sui ding uh.
Sawma khat Mosi Dan nuai a Isrealte piak dia thupiak ahi:
Nambars 18:24 ah, “ Israel suante’n sawma khat Toupa adia vei thillat dia alat uh…” chi’n akigelh hi. Sawma khat Toupa adia petu Israelte ahi uh chih a chiang hi. Hiai sawma khat tuh, “ Israel suante adding a Toupa’n Sinai tang a Mosi kiang a thupiak apiakte ” laka khat ahi (Levitikas 27:30-31,34). Kalvari’ a Jesu sisan a namkip Thukhun Thak ah bel sawma khat piak ding a gen ahi nawnkei.
Theih ding a poimoh mahmah bel, sawma khat tuh Jesu hong pianma pek Mosi Dan nuai a thupiak ahi. Thukhun Thak hun a kizang nawnlou, gan sisan a kithoihna, neksiang-nek sianglou, zeksum leh thil dangdangte mahbang in sawma khat tuh Thukhun Lui a Mosi Dan nuai a om Israelte zat ding a thupiak ahi. Thukhun Thak hun ah bel, Mosi Dan nuai a toh kibanglou thilpiak ding dan tuam piak in I omta uh (I Corin 16:1-2)
Sawma khat Thukhun Lui hun a siampu tuam Levite kivakna ding a piak ahi:
Sawma khat Thukhun Thak hun a piak ding ahihlouhdan suchiang nawnsem khat tuh hiaipen Levite’ tan leh nekdia piak ahihna ahi. Hiai thu Nambars 18:21,24 ah chiangtak in kigelh hi. “ Huan, Levi tate bel ngai in, nasepna, puan inn nasep sep a nasep man un Israel gam a sawma khat tengteng ka pia hi. Israel suante’n sawma khat Toupa a dia vei thillat dia alat uh Levite goutan ding in ka pia ahi; huaiziakin a kiang uah, Israel suante lak ah goutan a neikei ding uh, kana chita him hi ”. Sawma khat tuh Levite goutan mawngmawng dia Isrealte’n a piak uh ahi. Huan, Biakbuk a siampu nna asep man uh ahi. Huaiziakin Israelte lak ah goutan dang a neikei himhim uh. Tulai a sawma khat nete toh kituak nasa hia ???
Tu thukhun Thak hun ah bel, siampu hihna kikhek in Mosi Dan ngei leng kikhekta hi (Hebrew 7:12). Hiai Dan thak ah Siampu tuam mawng Levite a om nawnkei. Khris’saptuam a mi khat peuh kumpi siampu ahita uh (I Pet 2:5,9). Thukhun Lui hun a biakna leh thillatte beisak ahihtak ziak in Levite’ siamputna leng beisak ahita. Huaiziakin Levite loh ding sawma khat piak a kulnawnkei. Thukhun Thak ah Pathian nasemte nekmuhna di’n saptuamte kiang ah thilpiak ding dan a tuam piak ahita (I Korin 16:1-2; II Korin 9:6-7).
Thukhunlui ah sawma khat apiak chiang un haichi, singgah leh huangvulh ganta chiteng apevek uh (Lev 27:30-33). Hiai dan a apiaklouh chiang un Pathian in kei a non guksak uh, non lok uh chi’n a nam pumpi un hamsiat hi (Malaki 3:7-12). Ahihleh tulai a sawma khat pete’n Dan Laibu a kigelh bang in thil tengteng a pia uhia? (cf Levi 27:30-34).
- Thukhun Lui Mosi Dan beisak ahihtoh kiton in sawma khat leng beisak ahita:
Pathian in poimoh mahmah thupiak a ana neih zeksumte, gan sisan a kithoihte, khawlni (Sabbath) tan dingte, voksa neklouh ding chihte leh adang tampi bangziak a tua zui nawnlou i hi ua? Genkholh a om bangbang a Mosi Dan beisak ahihtak ziak ahi (Rom 10:4; Kol 2:14-17; Gal 3:23-25; Heb 7:12,18; Heb 8:13; Heb 10:9) . Hiai abeita Thukhunlui a Levite’ kivakna dia sawma khat kipia pen leng beisak ahita. Huaiziakin tua Mosi Dan thilhih zeksumte leh gan sisan a kithoih chihte zang a siamtan tumte tung agik bang in, Judate’ thukhunlui sabiak a sawma khat piak lailai tuh Khris Thukhun Thak kalhna ahi (Gal 3:10; Gal 5:2-4).
- Thukhunlui toh kibanglou Thukhun Thak piak i hita:
Pathian Jawlnei Jeremia in, “ Ngaidih nite a hongtung sin, chih Toupa thupawt ahi: huai nite ah Israel inkote leh Juda inkote kiang ah Thukhun Thak ka bawl ding. A pipute uh Aigupta gam a kipana pikhe ding a a khut uh kalet ni a ka thukhun bang hilou in, amau adia heutu ka hih in leng ka thukhun a bohsia ua, chih Toupa thupawt ahi ” chi’n Thukhun Lui pen beisak a, alui toh kibanglou athak bawl a om ding ahihdan ana gen hi (Jeremia 31:31-32). Hiai genkholhna bang in Thukhun Thak tuh piak i hita (Heb 8:7-13). Huaiziakin, Thukhun Thak a thilpiak piakdan alui toh a kibangkei.
Hiai anuai ah Thukhun Thak thilpiakdan tomkim in i en ding
- Apiak ni ding:
Hapta kal a nimasapen chih ahita (I Kor 16:1-2). Thukhun Lui a sawma khat bel apiak ni ding bikhiah ahikei. Thukhun Thak thilpiak tuh ut hunhun a piak hilou in hapta khat sung a nimasapen, huai tuh Jesu Khris thohnawnni a piak dia thupiak ahi.
- Piakzah ding bikhiah-bituk ahikei:
Thukhun Lui ah sawm laka khat ahi Pathian in angiat. Sawma khat sang a tawmzaw ahihkeileh tamzaw ana ngenkei. Thukhun Thak ah bel “Vualzawlna muh bang a ” huai toh kikhom leh kituak a piak ding chih ahi (I Kor 16:2). Pathian tung a na kipahna leh amah na itna alet leh atam dungzui in na thilpiak tam hiam ahihkeileh tawm ding hi. Ape tam in tam mu ding, ape tawm in mu tawm ding ahimai hi (II Kor 9:6).
- Phutluih a piak ahikei:
Thukhun Lui ah sawma khat tuh phutluih a piak ahi. Himahleh Thukhun Thak thilpiak tuh michih in it pipi a piak ding ahikei. Phutluih ziak a piaklouh theihlouh bang a ngaihtuah a piak ding ahikei. Himahleh lungtang a tup bang a kipaktak a piak ding ahizaw. Tulai a sawma khat apiak utoh Thukhun Thak thilpiak a kituakkei (II Kor 9:6-8). Bulpi (H/Q) lamte’n khaloh (pay) lak a sawma khat ding hon cut/eu-khiak sakdan ua piak ahikei. Hia’n Bible naktak in akalhkha hi.
- Sawma khat, saptuam Heutu/Makai ding chitna dia piak ahikei:
Khristian kichi tamzawte’n saptuam a Heutu/ Upa/ Pastor hihtheihna di’n sawma khat kum bangzah hiam ginomtak a petate ahih ngeingei ding achi uh. Thukhunthak in thilphal apoimohdan nasatak in gen mahleh, sawma khat saptuam heutu dingte’ chitna (qualification) di’n apekei. Saptuam heutu hihtheihna dia chitnate/qualifications kigelhte ah sawma khat atuang kha mawngmawngkei (I Tim 3:1-7; Tita 1:5-9). Hiai tuh mihing bawltawm dan leh thupiak ahizaw. Pathian thupiak behlapna ahi. Pathian thu behlap phal ahi ngei kei a, gawt in a om ngeingei ding uh (Diut. 4:4; Kilak 22:18-19).
THUSITNA:
Pathian Laibu akipan in sawma khat tuh Kros a beisak ahita chih I theita uh. Hiai tuh Mosi Dan nuai a thupiak ahi. Dan nuai a biakbuk a nasem siampu tuambik Levite’ nek ding, a goutan ding ua piak ahi. Hiai Levi siamputna leng beisak ahita. Tu Thukhun Thak ah Pathian nasemte leh saptuam nasepna dia poimohte sepsuahna di’n thilpiak piakdan chituam piak i hita. Sawma khat genkhak ahi nawnkei a, pedia thupiak leng ahi nawnkei. Huaiziakin sawma khat pe dia kisinsakna tuh sinsakna diklou ahi a, mihing thupiak ahi. Huaiziakin Pathian min a sawma khat piak lailai tuh athawn a biakna ahi (Mat 15:9).