Church of Christ, New Delhi

“The Churches of Christ salute you” (Romans 16:16)

Tanchinhoih gen diing a sawlna mang diing in

Gelhtu : Pauminlun

THUPATNA- Leitung a piangkhia mihing khempeuh a san (purpose) om a piangkhia i hi uhi. Huchi mahbang in Khris a suak khempeuh leng a san om a Kris a suak leh siam a om i hi uh.

Khris a suak leh siam a i omnasan khat tuh Tanchin Hoih puanzak diing ahi. Huai diing in Toupa Jesu Khris in hon sawl hi. Sawlna i chih chiang in a thupiak om a, sawltu om a, sawl a om leng om chihna ahi. Matthai 28:18-20, “Huchi in Jesu a kiang uah A hong pai a, amau a houpih a, Lei leh van a thuneihna tengteng ka kiang a piak ahita. Huaiziak in, kuan unla, namchih a pan nungzuite bawl unla, Pa leh Tapa leh Kha Siangthou min in baptis unla, thu kon piak tengteng pom diing in thuhilh un. Ngai un, kei khantawn in khovel tawppha in leng na kiang uah ka om diing hi, a chi hi.” Hiai ah Jesu Khris vaan a a kah dek in a nungzuite kiang ah ahih diing uh thukhah (thupiak) khat ana nei hi. Huai tuh, “Thupiak thupi (The Great Commission)” ichih uh ahi. Johan 20:21 ah, “Pa’n, Kei hon sawl bang in nou K’on sawl hi” chi in A nungzuite kiah  A na chi hi. Hiai taangte apat gen diing a sawl a om thupiak pen Khris Tanchin Hoih ahi a hon sawltu Jesu Khris ahi a Sawl a omte Khristiante ahi chih a muhtheih hi.

Tanchin Hoih gen diing a sawlna mang diingte himah lehang kingaikhawk lousek hi. Khris sawlna bang ziak a ngaikhawklou nak i hia chih i ensuk diing.

  1. Sawl a i omna pen i deihtelna (choice/optional) i sak ziak– Khristian i chih chiang in Khris nungzui chihna ahi. Huai omdan tuh Khris enton a A thupiakte bang a hih leh zui chihna ahi. Khris tuh leitung ah Tanchin Hoih nna sem diing a hongpai hi a huaimah tuh khristiante a hon thukhah ahi. Khristian khat a diing in i Toupa hon sawlna man diing leh manlouh diing deihtelna a kinga ahikei, alou-theilou thupiak ahi. 1 Kor 9:16 ah Paul in, “Tanchin Hoih gen mah leng kisaktheihna diing ahikei hi. Hihlouh theihlouh ka tung ah a kinga ahi; Tanchin Hoih genkei leng ka tunggik diing ahi” ana chi. Huaiziak in Tanchin Hoih gen tuh deihtelna himawklou in hihlouh theihlouh thil ahi.

Thupiak (commandment) i chih chiang in a zuitute deihtelna omkhalou, piak a om bangbang a zuih diing chihna ahi. Khovel khosakna ah sepna neite’n i nasepnate ah hihna leh dinmun tuamtuam i nei ua huai i dinmun leh hihna dungzui in ei nasep diing chiat a om, huai mahbang in Khristian kichi tuh hihna leh dinmun khat ahi a, huaite nasep diing a piak khat tuh Tanchin Hoih gen diing ahi. Himahleh hun tamzaw ah eite’n Tanchin Hoih gen i deihtelna sa in kinelhsiah in kingaikhawklou khasek hi. Tanchin Hoih gen diing a kigenkhak chiang in ei a diing a koihlou in midang kuahiam dang in a gen diing in koih in omsek hi.

  1. I hotdamna manpha i sak taktaklouh ziak– Mihingte’n thil manpha i sakte i iit i ngaihte a diing in leng kideihsak hi. Etsakna diing in, koi hiam ah van mantam mahmah, aman diktak a lei diing hileh na lei zohlouh diing discount chi in mantampi kiam in ana zuak uhi. Huai na vamu a, van omte nava lei. Huai tan a hun salou in kuahiam huai van poimoh mahmah kimantak a muhtheih ahihlam theilou khat na deihsak ziak in huchi bang om ahi chi in kintak in na vahilh. Hiai na vahilh tuh bangdang ziak hilou in van hoih pipite nang kimanchik a nava leitheih manpha nasak ziak a na lawm na deihsak mahmah na vahilh ahi. Huai mahbang in Tanchin Hoih gen diing a sawl a i omnapen i ngaihkhawklouh nakna ziak khat tuh I hotdamna pen a manphatdan taktak i theihlouh ziak hikha diing ahi.

Mark 7:31-37 ah Jesu’n bengngong a hihdam lai in kuamah hilhlou diing in achi a himahleh amau tuh a nak tangkoupih zawsem uh. Hiai ah bengngong pa leh ahon tonpihte’n Jesu Khris in a hihdam tuh manpha a sakluat ziak un bangmah genlou diing a khaam a a-omlai un leng khamzohlouh in a na om uhi. Eite’n leng Belamnou gensiatbei leh ninbanglou sisan, Khris sisan pha a tat i hihna manpha sa taktak hi lehang Tanchin Hoih gen tuh kithalawp in kingaikhawk diing hi.

  1. Khovel khosaknate i ngaihthupi luat ziak– Khristiante tuh leilam thilte a i lungsim uh ngalou a tunglam thilte a nga diing a sinsak i hi uh (Kol 3:1-2). Huai mah tuh Paul in ana hihdan ahi. “Thil muhtheihte enlou in thil muhtheihlouhte ka enzaw uhi; thil muhtheihte zaw sawtlou kal a diing ahi a, thil muhtheihlouhte bel tangtawn a diing ahizaw hi” chi in II Kor 4:18 ah ana gen. Himahleh Setan khemnate ziak in mit utna, sa utna leh damsung thupinate’n i lungsim leh i hinkhua hon luahdim nak. Khovel lametna lianpi neite a diing in Tanchin Hoih gen dia kipiakkhiak tuh thil etlah huailua ahikei. Tanchin Hoih gen in ka hun zangbei leng bang a nek zong a bang a kivaak diing, ka innkuante bang a enkol diing chihte’n i lungsim hon kamsek hi. Hiaite tuh bangdang hilou in khovel khosakna diing etluat ziak leh khovel ngaihthupina ziak ahi. Hiai ziak in Tanchin Hoih gen dia Khris in hon sawl ngaihkhawklouh in omnak hi.
  2. Innsung leh Saptuam ah i kichiil louh ziak– Paunakte 22:6 ah “Apaina diing lampi ah naupang chiil in, huan a upat hun nangawn in leng huai akipan apai mangkei diing hi” a chi. Ita-inaute aneu ua pat in lai i simsak ua, a simsak zouloute’n leng a siamna diing uh hoihtak khat i ngaihtuah sak. Sepna hoihtak hiam ahihke’h kivaakna diing hoihtak nei diing in i chiil. Hiaipen a sia hi zenzenlou in ahi diingdan mahleng ahi. Himahleh kua ahia Tanchin Hoih gen dia tate chiil? Tanchin Hoih poimohdan hilh in huai gentu diing in ana kichiil hilehang tuhun in Saptuam in Tanchin Hoih gen diing poimoh ahi chi in a gentu diing i zonzon a ngaikei diing. Hannah in Pathian kiang ah tapa a ngen a piak a a-omleh Toupa nasem diing a pekhe diing in kichiam hi. Huchi in Samuel piak in a om a, Hannah in tuh kichiamna a neih bang in a tapa Samuel tuh Toupa nasem diing in neuchik ahih apan in a pekhepah a Samuel tuh aneu apan a Toupa nasem diing a chiil in a ompah hi. Huaiziak in Laisiangthou in agen bang in i neu apat a i na kichiil khaklouh ziak in gen diing a Khris sawlna kingai khawklou nak ahi.
  3. Tanchin Hoih thilhih theihna i muan zohlouh ziak– Hiai tuh a tamzaw khristiante lak a tung ahi. Ka theihna a tawmlua, mi ka thuzoh zoukei kha diing, a gen ka siamkei chihte i suanlam ahisek. Ei siamna chitna a mi zoh diing kisakha. Paul in hiai hilou ahihdan Rom 1:16 ah hon hilh, “Tanchin Hoih tuh ka zahpihkei a, kuapeuh a gingta phot a diing a Pathian thilhih theihna ahi ngal a”. Tanchin Hoih in mite hondamthei taktak ahi chih muang taktak hilehang gen i kithalawp diing uh. Mosi in leng Israelte pikhe dia sap a a-omlai in ama hihtheihna a sem diing ana sakha in a chitlouhna, a dang awk khawng ana suanlam hi. Himahleh Pathian in Mosi tungtawn a a thilhih theihna hon zat chiang in Israelte tuh Aigupta apat a Mosi zang a piikhiak in om uhi. Tanchin Hoih muanhuailou i sak leh ei leh ei ki-en ni. Mi sang a pilzaw, siamzaw, chinzaw i hih ziak a Khristian hikha i hi zenzenkei. Tanchin Hoih tungtawn a Pathian in i tung a na a sep ziak a khristian hikha i hi. Eimah hatna a mi hotdam diing i kisak a Tanchin Hoih Pathian thilhih theihna ahihlam i phawklouh ziak a sawlna kingai khawklou ahi.

Sawlna ngaikhawk diing a bang kitasam hiam?

  1. Mihinpihte iitna – Eimah i ki-iit bang a i innvengte iit diing Khristiante i hi. I innvengte i chih chiang in i mihinpihte genna ahi. Mihing ei leh ei ki-iitlou kuamah i omkei diing. Damlouhna neuchik i tuahzek chiang a leng ki-enkol pahpahte i hi uh. Huai bang a i inn vengte i mihinpihte iit diing tuh Khris hon sinsakdan ahi. I mihinpihte iitna i neihchiang in ahoihna diing uh kideihsak a, thilhoih amau a diing in kideihsak hi. II Thess 1:8-9 ah Pathian in Amah theiloute tung ah phula diing ahi chih gelh in a om. I mihinpih i itna i lahsak theihna hoihpen ahihleh Pathian thangpaihna a tung ua a tun a phu a lak diing apat a i hotkhiak ahi. Tanchin Hoih kigen tungtawn a i khelhnate ngaihdam a om a hotdamna i muh uh huai thu i mihinpihte iitna i neih chiang in kigen thanuam diing a sawlna kingaikhawk diing hi.
  2. Pathian muanna – A tung ah Tanchin Hoih gen diing a Khris sawlna i ngaihkhawk louhna ziak Khovel khosakna i ngaihthupi luat ziak chih i genna ah Tanchin Hoih gen in i hun zang leng bang ne a bang a kivaak diing chih awlmohna ziak ahi chih i genta. Hiaite a lunghimohna tuh bangdang ziak hilou in Pathian i muan zohlouh ziak ahi. Matt 6:25-34 ah hiaite tengteng lung himohlou a Pathian a muanna ngak a A lalgam leh a diktatna zong masa leng huaite (Khovel thilte) tengteng hon piak behlap diing ahihdan ana gen. Jesu Khris in anungzuite asap lai in anaseplai uh nusia a Amah nungzui diing in a na sam a amau leng a neih teng uh nusia in Jesu nung a zui uhi. Jn 6:27 ah, “An mangthei phet zong in phiaphiakei un, tangtawn hinpha a om diing, Mihing Tapa in hon piak diing zong in phezaw un” ana chih bang in khovel thilte sang in tangtawn thilte thupizaw ahihdan i theih a ngai. Eimah hatna leh hihtheihnate muanglou in, khovel thilte ah muanna koihlou in, Pathian ah muanna koih leng Khris in Tanchin Hoih gen dia hon sawlna pen kingaikhawk thei diing hi.
  3. Lunglutna – Mihingte’n lunglutna kinei chiat hi. Khenkhat game kimawl, khenkhat laisim, khenkhat movie et leh adangdangte. Hiai i lunglut thilte hih diing in sawlhat ngai seselou in thanuamtak in kihih hi. Football lunglut mahmah khat tuh football thu gen diing leh kimawl diing a sawl ngai selou in thanuamtak in gen in kimawl mai hi. Football toh kisai thute, i team panpihte tungtang bang ah kibildoh in huai thu gensawn leh mi toh kikup diing kithalawp huai mahmah. Huai mahbang in Tanchin Hoih gen dia sawlna ngaihkhawkna diing in lunglutna poimoh hi. Pathian thu na lunglutkei chi in kingoh dek le a ut i om kholkei maithei himahleh Pathian thu i lunglut leh i lunglut louh sawlna i man leh i manlouh ah kimuthei diing hi.
  4. Khris iitna theichian – II Kor 5:14 ah Paul in, “Khris itna in a hon sawl teitei ahi” a chih bang in Khris iitna in Tanchin Hoih gen dia sawlna ngaikhawk diing in hon sawl hi. Hiai ah English thumal “Constrain” chih zat in om hi. Huai tuh thilkhat alou-theilou (forced/compelled) a hih ngeingei diing chihna ahi. Khris iitna in Tanchin Hoih gen diing a alou-theilou a hon sawl teitei ahi. Johan 15:13 ah “Mihing in a lawm a dia a hinna a piak sang a itna thupizaw kuama’n a neikei” a chih bang in Khris in mi tengteng a diing in a hinna hong piak tuh itna thupipen ahi. Huai Khris itna tuh eite a diing vuak ahikei a mi tengteng a diing ahi. Huaiziak in Khris in hon it a mi tengteng a diing a a hinna a hong piak tuh a thawn ahihlouhna diing in Khris itna theihchian kiphamoh hi. Huai theihsiamna tuh sawlna i manna diing in kul hi.
  5. Thumanna – Tanchin Hoih genna tuh Khris thumanna ahi. Tanchin Hoih gen diing Khris’ thupiak ahi chih i genta. Johan 14:15 ah, “Nou non it uleh ka thupiakte na zui diing uh” a chi. Pathian i itna tuh a thupiakte i zuihna ahi a (I Jn 5:3), thupiakte zuihna tuh thumanna ahi A thupiakte zuiloupi in Amah ka thei chimi mi zuauthei ahi, thutak amah ah a omkei hi chi a I Johan 2:4 a a gen bang in a thupiakte zui a a thu i man chiang in Khristian diktak kihithei pan hi. Thupiakte zui a thumanna tuh sawlna ngaihkhawkna diing a kisam khat ahi nawn.

Laisiangthou a thugentute apan zillai omte

  1. Jesu Khris – Jesu Khris tuh leitung a thugentu thupipen ahi. Anung i zuihpa leh i etton pa ahihziak in Tanchin Hoih genna ah a panlakdante i etton a ngai. Jesu Khris apan a zillai omte i taklang diing:
  • Sawl a a omna thumangtak in a semkhia – John 20:21 ah “Pa’n kei hon sawl bang in nou kon sawl hi” achi. Pa’n Jesu leitung ah mihingte kiang a Tanchin Hoih puak diing leh hotdamna thu tun diing in leitung ah a hon sawl. Haksatna chiteng, simmohna chiteng, leh kros a sihna tan hial hong thuak diing theisa a leitung a hongpai ahi. Nuamsatak a mihingte pahtawi a om diing a hongpai ahikei. A thiltuah diing Ama’n leng haksa sa lawsam ahi diing, Gethsemani huan ah Pa kiang ah a thum lai in a kho-ul sisan bang in a luang hial hi. Hichibang zahta a haksa himahleh sawl a a-omna thumangtak in semkhia hi. Eite’n leng sawl a i omna i sepkhiakna diing ua haksatna tampi i tuah uh a ngai ahi maithei himahleh huaite thuakzou a sep dia got a i om sepkhiak teitei Khris nung I zuihna ah aloutheilou ahi.
  • Khovel thilte in a kihih buaikei- John 4:34 ah, “Hon sawlpa deihlam hih leh A na sepzoh diing Ka an ahi” a chih bang in Khris in leitung ah a hong pailai in leitung khosaknate ah a kihihbuai ngeikei, huai diing mah in a nungzuite ana sinsak hi. Gamdai a khem a a-om in A hinna in a poimoh, A gilkial mahmahlai in tanghou nek diing a khem in om a, Pathian ze-et diing a khem a om in, khovel hauhsaknate a khem in om hi. Himahleh, Jesu tuh mit utna, sa utna leh damsung thupinate a khemzoh in a omkei. Hiaite tuh khovel thilte ahihziak in. “Khovel a thil om tengteng, sa utnate, mit utnate, damsung thupina limte Pa a kipan ahikei a, khovel a kipan a hizaw hi,” I Johan 2:16. Eite leng Amah bang a khovel thilte a kihih buailou diing in hon deih hi.
  • Mihingte a iit – Jesu Khris in mihingte A hon itman in Pathian toh kikim a omlai leitung ah hongpai in haksakna chiteng hong thuak a khros ah hong si in Tanchin Hoih hong bukimsak hi. Hiai sang a itna thupizaw a om theikei. Jesu in mihingte A hon itna tuh A nasep in a langsak hi. Khris in mihingte a iitna eite’n leng i etton diing a khaap hon nutsiat ahi.
  1. Paul – 1 Kor 11:1 ah Paul in, “Hon enzuite hi un, kei leng Khris enzuipa ka hih mahbang in” a chih bang in eite a diing in Paul hinkhua ah etton a zillai lak diing tampi om hi. Paul hinkhua apat ziltheih bangzah hiam i en diing-
  • Pathian nasem diing in a kikhel chih a omkei – I hinkhua paisate ziak a Pathian a diing a kizang ngamlou chih a omthei. Paul tuh apianthak ma in Khristiante nasatak a sawitu in ana pang hi himahleh huaite ziak a kisiamlouh a ngui maimahlou in a hinkhua paisa a ana hihkhelhte’n maban ah hih hoih zawsem diing in amah hatna pia a Pathian sawltak muanhuai mahmah, mi tampi a diing a hotdamna tanchin tuntu in pang hi. Eite leng Paul mah bang in i hinkhua paisa ah mikhialpen, tatsepen leh Pathian thu ngaihsaklou i na hikhathei. Huaite tuh hon daaltu diing hizawlou in hon hihhattu diing hizaw hi. Ahihkeileh Tanchin Hoih gen diing ana ngaikhawk ngeilou i hihtak leleng tu a kipatthak diing thil kikhel hilou hi.
  • I pilna i siamnate Pathian a diing a zat diing – Paul tuh dan siam mi, Gamaliel khebul a zil a khanglian leh Rome mi hihna nei ahi. Hiai bang hihna tuh mi maimai neihzoh ahi zenzenkei. Himahleh Khristian a hong suah in hiaite tengteng bangmahlou leh niin neng bang phet in a ngai. Amah a diing a punna peuhmah Khris ziak in manna in a sim hi (Phil 3:4-9). Huai omdan tuh a pilna a siamnate Pathian a diing a zat ahihkei leh bangmahlou ahi a chih nopna ahi. Paul in hiai bang pilna siamna nei a, hihna hoihtak a neihlai in khovel thilte ngaithupilou in a pil-a-siamnate a mihinpihte kiang a Khris Tanchin Hoih puanzakna diing in zang hi. Hiai bang in eite’n leng i pilna i siamna i hihnate Toupa a diing a i zat a, mite Khris lam a pilutna diing a i zat diing ahi.
  • Tanchin Hoih i genna ah khentuam neih diing ahikei – Paul in a hinkhua masa ah Khristiante sawi in a na pangden a, himahleh Pathian nasem muanhuaipen khat a hong suak. Huai bang in mi kuahiam Khris thu gingta diing a i uplouh, Tanchin Hoih hilh diing leng uthuailou i sak omthei a himahleh huai bangte ah khentuam nei a Tanchin Hoih gen diing ahikei, Pathian thu in bawlhoih zohlouh neilou ahi chih Paul hinkhua apat in a ziltheih hi.
  1. Timothy – Timothy tuh Khris nungzui ginom mahmah tuailai khat ahi. A hinkhua apan in zillai bangzah hiam en ni.
  • Haksatna a neihte ziak a a nasepna buaisaklou – Timothy tuh damlouhna chikhat nei ahihdan 1 Tim 5:23 ah a muhtheih hi. Suanlam bawl diing hileh a bawl theitham diing in a gintakhuai. Himahleh hiaite ziak in Pathian nna a sepna kisubuaisak tuanlou hi. Damlouhna, taksa hatlouhna seselou in leng khosakna haksatna leh Tanchin Hoih nasep hon subuai thei diing khovel ah tampi om hi. Timothy apan zillai hoihlua khat tuh haksatnate ziak a nasep diing piak a ompen nelhsiah theih mawk hilou ahihdan a muhtheih.
  • Nu leh pate mohpuakna – Timothy a om ginna taktak tuh a pi Loisi leh a nu Iunisi a pat ahihdan 2 Tim 1:5 in a gen hi. Hiai ah enkoltute’ poimohdan leh mohpuakna a letdan a kilang. A tuailai hun apat a Pathian nasem muanhuai leh ginom ahihtheihna diing in a pi a pat kipan in a nu ah hon zuitou hi. Hiai apan in nu leh pa leh enkoltute’n Tanchin Hoih gen diing a sawlna manna diing in mohpuakna liantak nei i hihdan leh a neu ua pat a chiildik ngai ahihdan ziltheih hi.
  • A tuailai hun manpha Toupa a diing in a zang – Ekli. 12:1 ah, “Na tuailai nite in nang hon siampa theigige in” chi a hasotna i muh bang in Timothy in a tuailai hun manphate ah amah siampa theigige in a hatlai nite Pathian a diing in ana zang hi. Tanchin Hoih gen bang in ana vialvak a Paul leh a dangdangte ana zuisek hi. Huaiziak mah in Paul in ginna a ka ta ana chihial hi. Mi tamtakte’n i tuailai hunte ut dandan a zat a upat nung a Pathian thu zuih diing chih i lunggulh ahi taangpi. Himahleh Pathian in i hatlai mah a hon deih ahi. Tuailaite a diing in zillai hoih mahmah khat hiai apan in muhtheih hi.
  1. Jonah – Jonah hinkhua leh ei khristiante hinkhua a kibatna tampitak a om.
  • Jonah tuh Ninevi khomite kiang a Pathian in thugen diing in sawl hi. Himahleh sawl a omna mang utlou in a mohpuakna a kipan in taikhia a Ninevi khua lehlam Tarsis lam a taisawm hi. Pathian kiang apan taikhiak sawm chi in Jonah hai i sa maithei. Himahleh huai mah eite’n leng hun tamzaw ah i hih khakdan hisek hi. Khris in Tanchin Hoih gen dia hon sawllai a sawlna kingaikhawklou a Tanchin Hoih gen i ngaihsakkei leh Jonah dinmun a kiding chihna ahi.
  • Jonah in Tarsis lam zuan a long a a tuan lai in amah ziak in huihpi nung in a long uh tum diing dinmun in om a, amah leh a tuanpihte hinna lauthawng huai in om hi. Huaikia hilou in Ninevi khua ah Pathian thu vagenlou hileh Ninevi khomite Pathian in hih mangthang diing hi. Huchimah bang in eite’n mohpuakna i neih Tanchin Hoih gen diing bang a i genlouh chiang in mi tampite’ khate gawtmun a lut diing a lauthawng huai a koih kha i hi.
  • Jonah in Ninevi khua ah thu a vagen in mipite kisiik in sai-ip puan silh in Pathian a sam uhi. Tanchin Hoih i genna ah kuaman ngainuamlou leh i thugen lohchinglou a bat a i lungkiaklai in a ngainuam a za hile uh a kisiik diing mi tampi om ahi chih i theih a poimoh hi. Tanchin Hoih in mite lungsim ah nna thupitak semthei ahi.

Daltu omte bangchi a dou diing?

Thil hoih, nna hoih sepna himhim ah haksatna tuaklou a lamzangtak a hih chih a om theikei. Hiai haksatna tuh a om diing him ahi himahleh huaite i douzoh chiang in a vualzoupa leh a lohchingpa kihithei pan hi. Huai mah bang in Tanchin Hoih gen diing a sawlna i manna diing ah daltu tampi om hi, huaite i douzohna diing in hiai anuai ate i hih a poimoh.

  1. Kisakkholhna (preparation) – Thilbangkim ah kisakkholhna a poimoh. Kisakkholhna omlouhna ah lohchinna taktak a omkei. Kisakkholhna hoihtak a omna ah lamzanna leh lohchinna om nak hi. Kisakkholhna tuh lohchinna diing a chii (seed) ahi. Tanchin Hoih genna ah leng kisakkholhna poimoh petmah hi. Hiai diing in a hunlai a pat panlak a kichiil a ngai. A khonung a kisakthak chih thil hitheilou bel hikei mahleh kisakkholhna hoihtak a neite mah lamzang uhi. Tanchin Hoih genna mang diing in lungsim, theihna leh taksa a kisakkholhna poimoh mahmah hi. 2 Tim 2:15 ah, “Nasemtu, zumna diing neilou, thutak thu diktak a zang, Pathian pomtak hi diing a nangmah kipe diing in theihtawp suah in kisin (Kisakhol) in” chi in Paul in Timothy ana hasuan hi. Kisakhol loupi a thil i vahih chiang in i deihbang in kilohching zoulou a huai in lungkiakna hon tunthei hi. Huaiziak in Khris nasemtu diing in kisakkholhna, kisinna poimoh ahihdan a lang hi.
  2. Thuumna – Thuumna tuh Khristiante leh Pathian kal a kihou theihna lampi omsun ahi. Thuumna in thil a hihthei. Pathian kiang ah hatna i nget diing ahi. Jesu Khris in hatna a ngah theihna diing in Pathian kiang ah zankhua in a thum hi (Lk 6:12). Thuumna lou in khemna douzoh a hak a Setan thaang a awk a baihsam. Mikhialte hotdam a hihtheihna diing ua thum diing ahi. “Unaute aw, Ka lungtang deihlam leh amau a dia Pathian kiang a ka thumna penzaw, hotdam ahih theihna diing uh ahi,” Rom 10:1. Tanchin Hoih gen diing a utna i neihna diing, hangsanna i neihna diing, salam leh khalam a i poimohte i neihna diing a thum diing ahi. Phil 4:6, “Bangmahlou ah mangbangkei un; himahleh thil bangkim ah, thumna ngetna, kipahthugenna toh na ngetnate uh Pathian kiang ah theihsak in om hen.” Tanchin Hoih gen dia sawlna mang diing a i taksap tengteng honpe diing in lungsimtak in Pathian kiang ah ngen leng aman hon khotuah lotham diing hi.
  3. Kipumpiakna – Khristiante’n i kha tengteng, i hatna tengteng, i lungtang tengteng a Amah iit diing in Pathian in hon deih hi. Huai tuh amah ah kipumpiak diing chihna ahi. Pau 16:3 ah, “Toupa kiang ah na nasepte kemsak inla, huan na ngaihtuahnate hihkip in a om diing hi” chi in Solomon in ana gen. I sep i bawlte ah kipumpiak in Toupa a diing in hih lehang aman i ngaihtuahnate hon hihkip sak diing hi. Sam 37:5 ah, “Na omdan diing Toupa tung ah nga inla Amah muang in, Aman a hihvek diing” a chih bang in i omdan teng Toupa tung ah nga lehang Toupa’n hon panpih diing a, khemnate douzou in sawl a i om bangbang in Tanchin Hoih tuh ei ah daltu omlou in kigenkhe thei diing hi.
  1. Tupguhna – Lochinna diing a kiphamoh khat nawn tuh “tupguhna” ahi. Pathian thu hi seselou, leitung khosakna ah leng tupguhna neite’n lohchinna ngahzel uhi. Tupguhna tuh kipumpiakna toh tonkhawm hi. Tanchin Hoih gen dia sawlna i manna diing a daltu omte i dou theihna diing in tupguhna poimoh hi. Paul in tupguhna a om leh hon hihhatpa Khris ah thil tengteng hihtheih ahihdan (Phil 4:13) ah ana gen hi. Tupguhna i neih chiang in i thilhihte ah hondaltu tampi om mahleh thil tengteng hithei hi. “Huan kidemna a kimawlmi peuhmah bangkim ah mahni kithunun in a om nak uhi. Amau zaw lallukhu sethei mu diing in a hih ua, eite’n bel lallukhu setheilou mu diing in. Huaiziak in kei ka tai a, a ziakbei hilou in; huihkhua leltak nohlou in, ka pang hi. Ka sapum ka hih sidup a; sikha in ka bawl zawzel hi; huchilou in zaw midangte kiang a ka tangkoupih nung in leng bangchi hiam in keimah tak kipahman mutaklou in ka omkha diing hi” chi in 1 Kor 9:25-27 ah Paul in khristian hinkhua a zatdan ana gen hi. Hiai apan in kithuzoh tak a tupguhna nei a kitaitehna a tai ngai ahihdan muhtheih in om hi. Tupguhna i neih chiang in kha mangthang mat utna leh huai diing a hon daltu omte ah kithunun in Tanchin Hoih gen dia sawlna kimang diing hi.

THUKHITNA – Khristiante khovel teng a pai a Tanchin Hoih gen diing a i Toupa Jesu Khris in hon sawl i hi ua, huai sawlna mang diing a sap i hi uh. Himahleh hiai sawlna ngaihkhawklouh in om nak a, huai tuh bang dang ziak hilou in sawl a i omna pen thupiak ahihdan theilou a ei deihtelna i sakkhak ziak bang, i hotdamna manpha i sak taktaklouh ziak bang, khovel khosaknate i ngaih thupiluat ziak bang, saptuam hi in innsung ah hileh huai diing a i kichiil khaklouh ziak bang leh Tanchin Hoih thilhihtheihna i muanzohlouh ziak bang ahi. Hiai sawlna ngaihkhawkna diing in bang kitasam hiam i chih nawn chiang in i mihinpihte itna, Pathian muanna, lunglutna, Khris itna theihsiamna leh thumanna chihte ahi. Hiai a i taksapte i neih chiang in Tanchin Hoih gendia sawl a i omna pen kimang diing hi. Huan, laisiangthou apan in thugentu Jesu Khris, Paul, Timothy leh Jonah-te apan in sawl a a-omna uh alou-theilou ahi chi a a ngaihkhawkdan uh, Pathian a muanna a ngakdan uh leh khovel thilte bangmahlou a ana mu uh ahihdante uh, a hun manphapen uh Pathian a dia a zatdan uh, leh en i nasep diing i zohlouh ziak a mi siamlouh tangthei uh ahi chihte zillai hoih mahmah i lak diing om hi. Huaiteng ban ah, sawl a i omna manglou leh ngaikhawklou dia hon hihbuai thei thilte i douzoh ua, i mualsuah theihna diing un kisakkholhna, thumna, kipumpiakna leh tupguhna neih poimoh ahihdan i zil hi.

Pathian in a chin-a-siamte hituanlou in lungsim a kimante ahi a zat nuam. Hiai a tung a points tuamtuam i taklatte lou leng a dang tampi om diing. Huaite toh i gawmkhawm diing ua pan naktak in lathak ni. “Kua ka sawl dia, kua kuan diing”, chi a  Isai in Toupa’ aw a zak lai in, “Kei hiai ah ka om, hon sawl in” a chih mah bang in ei khristiante’n leng Toupa’ hon sawlna mang diing in hiai ah ka om, kei hon sawl in chi thei chiat diing in hanchiam thak ni.