L.James Guite
Upate dinmun pen dinmun ngaihsang huai mahmah ahi. Upate pen tualsung saptuam enkoltu (1 Pet. 5:2; Nas. 20:28) leh Khris thupiak dungzui a Toupa’ saptuam a vaihawmtu (1 Tim. 5:17) ahi uh.
Dinmun poimohlua ahihziak in hiai dinmun zatkhelhna a om chiang in pialmangna a tun maimah thei hi. Huaiziak in upa hihna pen utna diktak toh I ut/tup poimoh hi. Tupna dikte I genkhinta a, hiai ah TUPNA DIKLOU ahihkeileh UTNA ZIAK DIKLOU te lak ah I Lai Siangthou a pan I muh khenkhatte I kikum khawm diing.
“Huchi in na lak ua saptuam upate tuh kei na upatpih uh leh Khris thuaknate theihpihpa, leh thupina hihlat a hong om diing chiamkholpa in ka hon hasuan hi. Na lak ua Pasian belam hon omte kem un, enkaitu bang a sepsak in, PHUTLUIH ZIAK hilou in himahleh uttak in, PUNNA THANGHUAI DEIH ZIAK hilou in himahleh kilawptak in. Na kep diing ua piak a omte tung a KILAL SAKLOU/KITHUNEI SAKLOU in himahleh belamte etton dia kibawlzaw in. Huan belam chingpa lianpen a hong kilat chiang in a tul thei ngeilou thupina lallukhu na ngah diing uhi” (1 Pet. 5:1-4)
Hiai a tung a Lai Siangthou I simna ah upa dinmun lunggulhna ziak diklou chi thum gen in a om hi. Tuate bel – (1) Phutluih ziak, (2) Punna thanghuai deih ziak leh (3) Lal/Thuneih ut ziak chihte ahi uhi. Hiaite a banban in I ensuk diing uh.
- PHUTLUIH ZIAK (1 Pet. 5:2a)
Pasian’ nnasepna pen, “Nang hong pang mai oh” chi a kipiak thoh hiam, kisawlthoh hiam mawk diing hilou hi. Upa dinmun diakdiak ah midangte phutluihna ziak ahihleh upate sepdi nnate pen sem zoulou diing uhi. “Hiai tuh thugen muanhuai ahi. Mi’n enkaitu (bishop) dinmun (Office of a Bishop) a lunggulh leh nnahoih sep a lunggulh hi” (1 Tim. 3:1).
Hiai ah “lunggulh” kichi thumal pen Greek pau ah thumal tuamtuak ahihdan uh I sinkhinta uhi. A masapen ah OREGETAI (Strong’s G3713) a kizang hi. Huai bel pawlam a kipan thuzohna/hiipzohna/phutluihna ziak hipahlou in sunglam a kipan lunggulhna, kithalawpna leh uthuai tuntun sakna genna ahi. Hiai nnasepna pen mimal a kipekhia (voluntary) a sepna, mimal a kipumpiak (sacrifice) a sepna ahi.
Sunglam a kipan lunggulhna hilou a, pawlam mite’n a etlah ziak hiam uh, chinzou a sak ziak hiam ua a seh mawkna pen uh “Phutluih ziak” ana hikhathei hi. Huaiziak in chin mahmah hinapi a hiai nnasep sem dia amah a kithalawpna/utna omloupi ahihleh seh a a omna san semsuah zoulou diing hi. Huaiziak in upa dinmun pen, “Va sem himhim sin awle, bang a chi hiam” chih dan a ki-ettehna diing hilou hi. Saptuamte hiam, innkuante hiam, lawmhoihte hiam in a phutluihna ziak a saptuam upa dinmun utna a omkhak leh utna diklou chikhat hi diing hi. Huai I chihna in upa hidia kihasotna om theilou I chihna ahikei. I ki hasuan diing a, upa dinmun luah ut diing a I kisinsak uh kuul hi. Huai khit nung a mahni a lunggulhna om thei mahmahlou ahihleh sawlluih a sepsak mawk diing hilou ahi I chih nopna ahi. A ziak bel upate’ nnasep diing a kigen “Nnahoih” pen mihingte ngaihsutna dan a a nuam, a kipahhuai leh a punhuai nnasep hi gigelou kha diing hi.
- PUNNA THANGHUAI DEIH ZIAK (1 Pet. 5:2b)
“Saptuam upa vaihawm hoihte a lehnih a pahtawituak a seh hi uhen, a diakkhol in thugen leh thugin a semgimte. Lai Siangthou in lah, ‘Bawngtal in buh a chillai in a muk gakken’ chih leh ‘Nnasemmi tuh loh mutak ahi’ a chi ngal a”
Saptuam upate pen vaihawmtu, thugentu leh thugin kembittute ahihziak un “A lehnih a pahtawituak” ahi uhi. “A lehnih a pahtawi” a chih pen hilhchetna tang 18 na ah hon gensuk a, huai bel Bawngtal in a sepgimna ziak a buhtang a chilkhiakte a nek diing chih leh nnasemmi in loh a muh diing chihte ahi. Huaiziak in upate dinmun pen sum-le-pai toh kisai in leng etlahhuai tham dinmun ahi chih I muthei.
Thukalzeh in a lehlam pang genzual lehang, saptuam nnasepna pen sum-le-pai toh kisai a etlahhuai tham mah kipiak diing ahihdan hon musak thei hi. Sum-le-pai lam kia mitsuan a neite a diing a leng etlahhuai tham dinmun na hilou hileh “Punna thanghuai deihziak hilou in” kichi thuhilhna pen poimohlou diing suak hi. Eite lak ah Pasian nnasepna pen etlahhuai tham di’n saptuam nnasemtute I phungvuhna uhiam chih ki-ettel poimoh hi.
Awle, sawltakpi Peter in upa dinmun pen punna/metna muh theihna diing lel a lunggulhna pen utna diklou ahihdan ana gen hi. Hiai PUNNA THANGHUAI kichi thumalte pen Greek ah AISCHROKERDOS ahi. Huai omzia bel, “muhdan kilawmlou (immoral), muhdan chidam huailou (dishonorable), daan toh kituaklou (illegal) a sum muhna” chihna ahi.
Saptuam upate leh thugentute a hasot suk zelna ah sawltakpi Paul in Timothi kiang’h hichi’n a gen behlap hi: “Lungkimna toh kithuah Pasian limsakna tuh punna thupi tak ahi. Khovel ah bangmah I lut pihkei a, bangmah I pawtpih thei samkei diing hi. Himahleh nek diing leh silh diing nei in huai khawng ah I lungkim diing uh. Ahihhang in hauhsak tumte tuh khemna ah te, thang ah te, haihuai leh hihsethei duhgawlna tampi bang ah a puklut nak uhi. Huaite’n tuh siatna leh manthatna ah mite a hih tum nak hi. Dangka sum deihtak zaw gilou chiteng bul ahi ngal a; huaituh khenkhatte’n a eng ua, ginna a pai mangsan ua, amau leh amau lungkhamna tampi in a kisunlet tektok uhi” (1 Tim. 6:6-10).
Hebru laikhak gelhtu in hichi bang in a gen behlap hi: “Na lungsim putdan uh tuh dangka deihtakna panglou hi hen. Na thil neihsun tung uah lungkim un. Amah mah in, ‘Bangchik mah in K’on donloukei diing a, pai leng Ka hon paisankei hial diing a chi ngal a” (Heb. 13:5). Huaiziak in upate chitnate a piaklai in Timothi leh Tita kiang ah, “Sum deihtalou/ sum lam a duhamlou” (1 Tim 3:3; Tita 1:7) a chi chitchiat hi.
Tuni’n thugin a hoihtak a kibulphuh gige in, i khalam mitsuanna hiai sang a sangzaw sem khristian milip in nei touzel lehang I thilpiak uh sum-le-pai nasa zawsem diing hi. Huai kawmkawm in project thupi zawsem leh dinmun etlah huai tuntun thei diing hamphatna muh theihna tampi om diing hi. Tuabang dinmun I tun chiang in leng saptuam upa ut mite a diing in huai hamphatna omte ziak a upa dinmun lunggulh I hih khak leh “Punna thanghuai deih ziak” a hong hikha diing a, pialmangna kongkhak bul ah I ding ahi chih theigige ni.
KILALSAK/THUNEIH UT ZIAK (1 Pet. 5:3)
“Saptuam upa vaihawm hoihte a lehnih a pahtawituak a seh hi uhen, a diakkhol in thugen leh thugin a semgimte” (1 Tim. 5:17). Hiai Lai Siangthou a kipan in upate toh kisai thu poimohlua nih I muthei hi.
Khatna ah, Saptuam upate pen “Vaihawm hoih” diing a lamet leh ngiat ahih dungzui un VAIHAWMTU ahi uh chih I muthei hi. Huaiziak in Khris thupiak bangbang a saptuamte’ tung a vaihawm diing in thuneihna piak ahi uhi. Hebru laikhak gelhtu in upate’ tung a mipite mohpuakna diing hichibang in ana gen hi – “Na tung ua vaihawmtute thu mang unla (Obey those who rule over you), a lak uah kitahlut un. A nnasepna bangbang uh bukkik a om ngeingei diing bang a na khate uh chingtu ahi ngal ua. Lungkham kawm hilou in kipaktak in semsak un, huchilou in zaw nou a diing in phatuamlou diing ahi ngal a” (Heb. 13:17). Hiaite a kipan in Saptuam upate tuh thuneitu ahihdan uh I muthei hi. Thuneihna a neih ziak mah un saptuam upa dinmun bel dinmun etlah huai mahmah a suak hi.
Nihna ah, Saptuam upate tuh “Semgimtu” ahi uh. Sawltakpi Paul in Thessalonika a khristiante kiang ah hichi bang in ana gen hi – “Huan unaute aw, na lak ua semgimte leh Toupa a na tung ua omte leh nou hon taihilhte phawk diing leh a nnasepte uh ziak a itna a ngai thupi mahmah diing in k’on ngen hi” (1 Thess. 5:12-13). SEMGIMTE ahihziak un saptuam mipite’ TUNG A OMTE, gendan dang in “Makaite/heutute” ahi uhi. Hiai Lai Siangthoute a kipan in upa dinmun in vaihawmna leh thuneihna leng ana tuunkhawm ahihdan teltak in I muthei hi. Hiai thuneihna pen zatkhelh baihsam petmah khat ahihziak in sawltakpi Peter in, “Na tante uh tung a KILALSAKLOU in…” (1 Pet. 5:3) ana chi ngiatngiat hi. Sawltakpi Paul in leng Ephesa saptuam upate kiang ah hichibang in ana gen hi – “Pasian saptuamte, Amah sisan a a leite vak diing in noumau leh na heute uh tengteng tung ah pilvang un. Kha Siangthou in a tung uah nou heutu in a hon bawl hi” (Nas. 20:28). Thuneitu ahihziak un, “Mi nunnem, huhamlou, ngongtak a gamtalou” (1 Tim. 3:2-3) ahih uh a kuul hi.
- Thuneihna Zatkhelhna In Pialmangna Tun Hi.
Toupa’n a lamkhiak saptuam a kipan pialmangna masapen bel hiai “Thuneihna” zatkhelhna ziak a hong om ahihdan saptuam khangthute apan I muthei hi. Hiai PIALMANGNA hong om diing pen Lai Siangthou in teltak in ana genlawk hi. “Pasian saptuamte, Amah sisan a a leite vak diing in noumau leh na heute uh tengteng tung ah pilvang un. Kha Siangthou in a tung uah nou heutu in a hon bawl hi. Ka pai nung in ngehangte na lak uah a honglut diing ua, belamte a hawikei diing uh chih ka thei hi. Noumau lak a mi nangawn, nungjui pawlte amau lam a kaimang diing in thutuam gen na hong om diing uhi.” (Nas. 20:28). Hiai a “Ngehangte” kichi pen Matt. 7:15 ah “Zawlnei takloute” ahihdan Jesu’n a na gen hi. Huaiziak in Pialmangna pen gamlapi a kipan hong pai diing hilou in, Pasian thu nnasemte akipan ahihke’h “Saptuam upate’ lak a kipan” mahmah in a hong kipan diing a chi hi.
Hiai “Pialmangna” toh kisai Paul in Thessalonikate kiang a a laikhakna ah teltak in ana gen behlap hi. “Kuamah in bang chimah in hon zekhemkei uhen, PIALMANGNA a hong om masak a, khelhna mipa (man of sin), mangthang’ tapa (son of perdition) a hong kilat masiah huai ni tunglou diing ahi ngal a” (2 Thess. 2:3). Paul in Khris hong pai nihveina toh kisai tang khatna ah a gen hi. Himahleh huai ni a hong tunma ngei a hong om masa diing a gen tuh pialmangna ahi. Huai pialmangna pen “Khelhna mipa, mangthang’ tapa” a hong kilat chiang in a hong om diing a chi hi. Ahihleh huai “Khelhna mipa” kichi kua hita diing ahia?
Hiai “Khelhna mipa” hihnate tomkimtak in 2 Thess. 2:4-12 kikal ah I muthei hi. Huaite a laktom in hiai a nuai a bang ahi:
- Pasian biakna daan toh kisai tengteng leh Pasian NIAL a, Pasian’ inn (saptuam) a Pasian bang a tu a, Pasian’ mite tung a thuneipen dia kitungkhia/kibawlkhia (2:4).
- Huai “Khelhna mipa” bel Thessalonika laikhak gelh ahih hunlai in a khaamtu a om ziak in a kilanghkhe naikei a, amah hun ah a hong kilanghkhe diing hi (2:6).
- Daanlou bang a omna thuguk, huaibel Khris thupiakte bang a omlouhna thuguk in nna sem lellel a, himahleh “a khaampa” lakkhiak a a hong om chiang in “Daan a talekpa” huai “Khelhna mipa” ngeingei tuh a hong kilangkheta diing hi. (2:7-8). Hiai a a khaamtu chi a kigen pen “lakkhiak a om diing” ahihdan leng a gen hi. Pasian’ saptuam sung a mi, Pasian’ dinmun luah a Toupa a kibawl hong omkhe diing “Khelhna mipa” pen hiai laikhak gelh ahihlai in tua dinmun luah theilou dia khaamtu a om hi. Huai hunlai in Rome Kumpite’n thuneipen hihna ana la ua, amau tung a thunei diing kuamah omsaklou uhi. “Kaisar Toupa ahi” (Caesar is Lord) chi in Toupa dinmun a luah ua, huai bang dinmun luah thei diingte a khaam uhi. Huaiziak in saptuam sung a pan a Toupa’ dinmun luah ut a hong dingkhe diing huai “Khelhna mipa” khaamtu chi a kigen bel Rome kumpite ahi a, amau lakkhiak hun a hong tung diing a chi behlap hi. Huchia Rome kumpite lakkhiak a hihzoh nung chiang in huai “Khelhna mipa” a hong kilangh diing hi.
- Huai “daan a talekpa’n” bel satan nnasepdan bangzel in thilhihtheihna, chiamtehna leh zuau thillamdang chiteng zang in nna a sem diing hi. Mangthang lellelte’n hotdam ahih theihna diing ua Khris thutak pen a pom utlouh ziak un a lak uah zuau chiteng in nna a sem diing hi (2:9-10). Huai “Khelhna mipa” bel hiai mun ah gendan dang in “Daan a talekpa” chih in a hong om hi. Khelhna mipa hihna khat ahi a, huaibel Khris daan a pan talek a thutuam gen mi a genna ahi.
- Tua bang a khemzoh a om mite’n zuauthu a ginna diing un Pasian in a lak uah “Ginlouhna kha” (Strong delusion) a sawl diing a, thutak gingta utlou a diktatlouhna a kipakzawten siamlouh a tangvek diing uhi (2:11-12).
- 1 Tim. 4:1-5 kikal ah huai mite’n “Kiten hon khaam diing uh” ahihdan leh “Nek diing ante tung a khaamna bawl diing” uh ahihdan ana gen behlap hi.
A tung a I gen teng tomkim a kaihkhawm in hichibang in I muthei hi. Saptuam upate’ lak mahmah a kipan thutuam gen hong om diing uh (Nas. 20:28-30). Saptuam sung a om a, saptuam milipte tung a kikoihsang a Pasian’ dinmun tuh hial khop a hong omkhe diing uh ahih dan I mu hi. Toupa’ saptuam sung a Toupa bang a hong kitungkhe diing pen Thessalonika gelh ahihlai in a khaamtu Rome kumpite’n nang lellel uhi. Huai Rome kumpite (a khaamtu) lakkhiak a hih chiang in Saptuam sung ah milian “Khelhna mipa” hong kilanghkhe diing ahihdan I mu (2 Thess. 2:4-12). Huai bang mite’n tuh “Kiten a khaam diing ua, nek diing ante tung ah leng khaamna a bawl diing uh” a chi behlap hi (1 Tim. 4:1-5). Hiai “Khelhna Mipa” a hong kilatkhiak dan a ban ah tomkimtak in I ensuk diing uh.
- Genkholh A Om Bang In PIALMANGNA A Hong Tangtung Hi.
Amasapen in “Khelhna Mipa” toh kisai I etna ah, KIKOIHSANGNA, huai bel Saptuam sung a om a Pasian bang a kibawlna gen masak pen a om ahihdan I mu hi.
- Bishop Dinmun Koihsangna
I Lai Siangthou ah saptuam upate pen “Upate” (Elders), “Chingtute” (Pastors) ahihkeileh “Énkaitute” (Bishops) chi in a na kiminloh hi. Hiai kiminlohnate pen upa dinmun genna ahi ua, a sang tuam, a niamtuam omlou hi. Paul in Ephesa saptuam upate a sam a (Nas 20:17), huai UPATE tuh “Pasian saptuam, A sisan a a leite CHING (Pastor) diing in Kha Siangthou in a tung uah ENKAITU (Bishop) in a hon bawl” (Nas. 20:28) a chi hi. Upate tuh Pastor leng ahi ua, Bishop leng ahi uh chih teltak in I muthei hi (1 Pet. 5:1-2 leng en in).
Dinmun kibang himahle uh kumzabi nihna beikuan lam in upate lak ah BISHOP dinmun KOIHSANGNA a hong kipan hi. Upate lak a khat thuneitupen (chairman) in a hong kisepkhia ua, huai tuh Bishop min a pawsak panta uhi. Saptuam sung ah kikhoukhiakna hong om panpanta hi.
- Bial Nei A Kimakaihna (Regional Councils) Hong Kipankhia
Upate lak a Bishop dinmun koihsangna a hong om chiang in thuneihna lianzaw sem deihna a hong piangtou hi. Huchi in tualsung saptuam bangzah hiamte bial (Region) khat a gawmkhawm in huaite tung a thuneitu diing kisehkhiakna hong kipanta hi. Pasian in saptuam kivaihawmna pen mawlchik in ana koih a, huai bel mahni tualsung saptuam chiat upate zang a kivaipuakna ahi. Paul in upate’ thuneihna/etkaina pen “Kha Siangthou in a etkai diing ua a piak belamte tung ah..” (among which the Holy Spirit has made you overseers) a chi sese hi (Nas. 20:28). Khovel pumpi a Pasian’ belam om tengteng tung a Etkaina nna sem diing hilou in “a etkai diing ua piak a om belamte’ tung a thunei” di’n a sep lelzaw hi. Peter in leng teltak in hichibang in ana gen hi: “Na lak ua om Pasian’ belamte ching un…” (shepherd the flock of God which is among you” (1 Pet. 5:2). Khovel pumpi a Pasian’ belam tengteng ching diing chilou in “a lak ua omte” a chi sese hi. Himahleh thuneihna deihziak in hiai kivaihawmna chidam pen pialsan in Bialnei a kivaihawmna hong kipankheta hi.
- Siampu Chi leh Mi Nautang Khentuamna (Clergy & Laity)
Saptuam makaite’ dinmun a hong let deuhdeuh dungzui in saptuam makaite a tuam a kilawikhawmna hong om a, Khris in kross lek a a lakkhiak sa Thukhun Lui hun a siamputna bangbang tunding thak a hong om in mipite leh Pasian kikal a palai diing siampute (saptuam makaite) a hong om uhi. Tuate CLERGY kichi hi. Tuate lak a tellou mi nautangte pen LAITY kichi a, amauten mimal a Pasian naih theihna neilou leh siampute’ tungtawnlou a Pasian naih theilou ahi uh chih kisinsakna hong kipan hi. Lai Siangthou in bel Khristian michihte siampu hichiat ihih dan teltak in a gen hi (1 Pet. 2:5).
- CARDINAL Dinmun Bawlkhiak In Hong Om.
Upa bangzah hiamte tung a thunei Bishop a hong om ban ah, hiai Bishop bangzah hiamte’ tung a thuneitu dinmun thak bawlkhiak in hong om hi. Huai dinmun bel CARDINAL kichi hi. Tua Cardinal ten Regional Council bangzah hiamte’ tung ah thuneihna hon nei uhi. Huchi in saptuam upa dinmun tuh Lai Siangthou a kimulou kiminlohna (title) zang in kikoihsangna a hong liantou deuhdeuh hi.
- CHIEF PATRIARCH
Cardinal bangzah hiamte’ tung a thunei diing dinmun khat hong piangkhe nawn a huai tuh Chief Patriarch a kichi hi. 300 AD vel in hiai Chief Patriarch dinmun lentu mi nga a pha uhi. Amaute bel Rome, Antiok, Alexandria, Jerusalem leh Constantinople a Bishopte ahi uhi. Hiai Chief Patriarch ngate lak ah thuneitupen kituhna nasatak in hong om leuleu hi. A tawp in Rome khua a Bishop leh Constantinople a Bishop kikal ah, hiai thuneitupen diing kituhna kaihzum in a hong omta hi.
Constantinople a Bishop leh Rome khua a Bishop te thuneitupen diing kituh a buai chihtak a a buailai un amaute khaamtu Rome lalgam kumpite tuh 486 AD vel in a pukseta ua, genkholh a om bang in “Lakkhiak in a omta uhi” (2 Thess 2:7-8). 588 AD in Constantinople khua a Bishop in “Universal Bishop” ahihkeileh POPE dinmun a hon ngiatta hi. Himahleh Rome khua a Bishop in a pompihkei a, hiai bang a kiminlohna pen “Diabol-vai (diabolical), khristianna doudaltu (anti-christian), leh Pasian gensiatna ahi” chi in a phuangkhia hi.
- POPE
606 AD in amasapen diing in Rome khua a Bishop lentu BONIFACE III in saptuam tengteng tung a hong KIKOIHSANG in POPE DINMUN masapen a hon luahta hi. Hiai dinmun tuhtu diing Bishop dang om nawnlou in, hiai tuh Thukhun Thak saptuam a kivaipuakna lumlet a pawl bawltawm hong piangkhe masa pen Roman Catholic saptuam hong kipatkhiakna kum a chiamteh in om hi. A khaamtu Rome kumpite lakkhiak a omta ahihman in saptuam makaite’ thuneihna hong lian hiaihiai a, Pope dinmun lentu in tuh khovel leh sahkhua ah thuneihna lianpi a hon tawita a, “Khelhna Mipa” tuh AD 606 in a hong kilangkheta hi.
Saptuam leh Khovel kaihmat in a hong om a Roman Catholic saptuam a siampute tuh simleivai a thuneitute leng a hong hi uhi. 1049 AD in Pope Leo IX in sepaih (Army) a hon nei a, Pope te lak a sepaih (army) nei masapen a chiamteh a hita hi. 1 Tim 4:1-3 kikal a “Kiten a hon khaam diing uh” chi a genkholh a om bang in 1074 AD in kiten khaamna a hong kipanta hi.
1198 AD in Pope Innocent-III in “Peter dinmun luahtu” (Vicar of Peter) ka hi chi in hong kiphuangkhia hi. Ama’n a genna ah, “Peter dinmun luahtu bel Pasian leh mihingte kikal a ding ahi. Pasian’ nuai ah, himahleh mihing tung ah a om a, mi tengteng’ thukhentu ahi a, kuama’n atung ah vai a hawm theikei” (The Successor of St. Peter stands between God and man. Below God, above man, judge of all, judge by none) chi in a kipuangkhe miatmiat hi.
Peter dinmun luahtu bang a kigen hinapi in a kiphuankhiakna ah tuhun a Toupa Khat (Eph 4:5) omsun Jesu Khris (Nas 2:36) dinmun laksak ahihdan teltak in I muthei hi. “Mihing leh Pasian kikal ah palai khatkia a om a, Khris Jesu ahi” (1 Tim. 2:5) Lai Siangthou in a chi a, himahleh Pope Innocent III in bel Pope dinmun pen Pasian leh mihingte kikal a palai dinmun ahi chi in Toupa Jesu Khris dinmun a suh uhi. Huai ban ah mitengteng vaihawmtu diing a seh a om Pope hilou in Jesu Khris ahi (Nas. 17:30-31; Rom. 2:16). Himahleh Pope pen mitengteng vaihawmtu ahi a, kuama’n amah a vaihawm khum theikei a chi hilhial hi. Huchi in “Khelhna Mipa” hihna genkholh a omte lak ah, “Pasian inn (saptuam) a Pasian bang a tu…” (2 Thess 2:4) chi a genkholhna tuh a hong tangtungta hi.
Hichibang zel in Toupa Saptuam dik a kipan pialmangna tuh genkholh a om bang in, THUNEIHNA zatkhelhna, THUNEIH UTNA ziak in a hong piangkhia hi. Lai Siangthou in Upate dinmun diing a ana gelsak kingainiamtak a zui hile uh tuni in Roman Catholic pawlpi leh huai a kipan hong kakhesawn pawl bawltawm tengteng hong piangkhelou diing hi. Upate lak ah thuneituam diing “Chairman” kibawlkhiakna a omlai in, huai dinmun in POPE dinmun tan hon tun diing chih a ngaihtuah chitchiatkei diing uhi. Himahleh Lai Siangthou a, “Daanlou a omna thuguk in tu in leng a sem lellel…” (2 Thess. 2:7) chi a genkholh a om mahbang in Khris daan toh kituaklou deuh a Upate lak a Bishop KOIHSANG TUAMNA in PIALMANGNA thupitak a hon piangsak hi. Huaiziak in Upa dinmun lunggulhna ah KILALSAK UTNA/ KITHUNEIHSAK UTNA ziak ahih hetlouh diing ahihdan saptuam khang tangthu a pan in teltak in I muthei hi.
THUKHITNA
Saptuam Upa dinmun pen dinmun hoih leh lunggulh huai mahmah ahi. Himahleh huai dinmun I lunggulhna ziak a dikkei leh saptuam pimangtu I hi ngeingei diing hi. Utna diklou I muhtheih khenkhat bel – 1) Phutluih ziak, 2) Punna Thanghuai deih ziak leh 3) Thuneihna deih ziak chihte ahi uhi. Hiaibang utna dikloute pampaih in tupdan diktak toh Upa hihna dinmun enchiat a, huai dinmun luahthei chiat dia kisakhawl diing in unaute kuapeuhmah Toupa Jesu Khris min in I kichial uhi. Toupa’n hon panpih hen. Amen!