By Kamlianpau-
‘Nu-le-Pa’ i chih hon suangtute ahi uh. Tua toh kiton in hon kem, hon enkol leh hon khoi khangliante amau mah ahi uh. Keplouh-donlouh in om le’ng i hing suah kei hial ding. Kep diing ta neiloute’n tate kep bang chituk a haksa hiam chih a theisiam taktakkei ding uh. Haksatna, gimna, gentheihna, tampi pal kawm a kep-le-khoi ihi chiat uh. Huai ziak tak in Pathian in hon suangtu, nu-le-pa, thumanna, amaute zahtakna piak ana gen poimoh petmah a, tua bang a hihloute gawtna leng a saang sak mahmah hi.
Laisiangthou in bang a chi a “Naupangte aw, Toupa ah na nute uleh na pate uh thu mang un: huai tuh thildik ahi ngal a. Na nu leh na pa zahtaak in (hiai tuh thupiak chiamnei masapen ahi), Huchi in nang a ding in a hoih dia, lei ah leng na damsawt ding hi” (Ephesate 6:1-3);
“Na nu leh na pa zahtak in: Toupa na Pathian in a hon piak gam a na nite a sawt theihna ding in” (Eksodas 20:12);
“Mi’n tapa phengphi tak, helhat tak nei bang hita leh, a nu leh a pa thu manglou in, a sawina uh limsak takei leh: A nu leh a pa’n a kai ding ua, a khaw upate uh kiang ah a khaw kulh kongpi bul uah a pe ding uhi; Huan, a khaw upate uh kiang ah, Hiai ka tapa uh phengphitak leh hel hattak ahi a, ka thu uh leng a mang nuamkei a; kizatbei hat leh khamhat mi ahi, a chi ding uhi. Huchi in khua a mi tengteng in suang in a denglum ding uhi; huchi bang in na lak ua kipan thil hoihlou na hihmang ding uh ahi; huan, Israel mi tengteng in a za ding ua, a lau ding uh” (Deuteronomy 21:18-21);
“A nu hiam, a pa hiam zahtaklou peuhmah hamse thuak in om hen, a chi ding ua. Huan, mipi tengteng in, Amen, ana chi ding uhi” (Deuteronomy 27:16);
“Pathian in, Na nu leh na pa zah in, kua peuh a nu hiam a pa hiam gensia tuh si ngeingei heh, a chi ngal a” (Matthai 15:4);
“Naupangte aw, bangkim ah na nu u leh na pate uh thu mang un, huai tuh Toupa pahtak lam ahi” (Kolossate 3:20).
Hon suang hon khoi khanglian, nu-le-pate, zahtakna piak in a huam khak khat tuni’n gen leng ichi hi. Huai tuh ‘Hon Suangtu, Nu-le-Pa, Tung a Kipahna’ ahi. Tuni a i gennop tak bel, lungtang a kipan kipahnate hi kam mahmah a a kiang ua kipahthu gen gige ding chih ahi. Ahih ding mah ua koihlou a, a kiang ua, ‘Nu, ka kipak, Pa, ka kipak’ i chih poimoh ahihdan gen nuam ihi.
- I nek ding nek theih hon leisak hiam, ahihkeileh, hon puak chiang ua bang mah le genlou a, lak toh nek thuah a omlou in ‘Ka Ki Pak’ chi le hang i nu-le-pa dah hetlou ding uhi.
- “Ka tate’n duh ua, limsa uh…” chi a ei geelna liau-liau a i duh zawng meh bang hon huansak hiam, hon leisak chiang ua kipahthu gen mangngilh hetlouh ding ahi.
- I pomoh niik-le-puan, silh-le-teen hon leisak chiang ua, “Nu-le-Pa mohpuakna mah eive le…” chih bawl a bang mah genlou a om sang in, kipak takzet ihihna langsak kawm in, “He Nu, He Pa-Ka Kipak…” chi teitei ni. Khawvel ah hichibang silh-le-teen guantu ding neilou tamlaw mahmah ahi chih thei le’ng kipaklou hetlou ding ihi.
- Mi khat i hong suah tei kinepna toh haksa tak a skul leh college hon kaisak uh hamphat huai law mahmah ahi. Sim senglouh phial skul kichi mu khalou khawvel ah naupang tamlaw mahmah hi. Huai ziak in, admission hon bawl chiang un, i laibu, i uniform leh poimoh teng hon leisak a, khateng a fee tam pipi a sun gigete ziak un “Nu/Pa Ka Kipak lua” i chi kha ngei hia?
- I siam zilna a lohchinna i ngah chiang in ei a ding mah ahihlam theilou a, nu-le-pa a ding kia a pass/lohching kisa, “Ka pass man hiai/huai hon hihsak, hon leisak aw…” chi a kiphin bang om thei mawk hi. Amaute’n hiai tan a tunna dia gim-le-tawl a thuak uh geel pih hetlou uhi. A diktak in nu-le-pa a kipah ziak un hihsak hon nei kha thei tham uh, himahleh, a kipak penpen ding, kipahthu gen dia kilawm penpen tuh tate ihi. Huai ziak in lohchinna i muh chiang in, “Nu aw, Pa aw Kei non khualna ua haksa tak in na pang ua, skul/college non kaisak ua, tua ken lohchinna ka ngah theih, nou ziak vek ahi. Nu-le-Pate aw ka kipak lua…” chi a, piak theih i neih leh amau hon piak sang a, en kipahna thilpiak tuak zaw hi.
- Pathian’ lampi a honpi ziak ua, tangtawn hinna lam-en thei ihi chih kiphawk in, thil tengteng saang in hiai ah kipahthu a kiang uah gengen ni.
Khristiante kiang a thupiak tuh “Kipahna dan leng thei un…” (Kol.3:15) chih ahi. Huai ziak in nu-le-pa hon kem ding Pathian in hon piak ziak in a tung uah kipahthu gengen ni. Huan, ei hon suang i nu-le-pa kiang ah kipahthu gen ding mangngilhkei ni. Hiai Pathian kipahlam ahih kia hilou in, i nu-le-pa’ lungsim leh kha suhalh in tha-thak guan dia, a kipah ziak un a chi uh leng dam ding hi. Ei lam ah vaanlam vualzawlna hong luang lut ding hi.
Inkuan Thupiak
Diktat Gige Un[Paunakte 12:22]
Vualjawlna Khat Khat in Sim Un [Sam 34:1-3]
Ki Ngaidam unla Mangngilh Un [Mika 7:18]
Ki Panpih Tuah Un [Nasepte 20:35]
Ki Hehpih in Ki Lainat Tuah Chiat Un [Ephesate 4:32]
Na Kichiamna uh Juausan Kei Un [Romete 4:21]
Ki Khamuan Tuah Un [1 Thessalonikate 4:18]
Huaiteng ban ah,
Ki It tuah Chiat un [1 Peter 1:22]
***