By Kamlianpau-
Lohchinna di’n kipat dik a poimoh mahmah. Tua di’n i patna mun a dik masak kuul hi. A sia-apha kipatna innkuan ahihziak in, salam hi’n khalam hitaleh kipatna mun dik tuh innkuan ahi. Pathian in mihingte a piak masak tuh innkuan ahi. Gendan dang a i gen chiang in, khawvel a kichiilna masapen leh a luipen innkuan ahi. Huai ziak in Pathian in innkuan tuh poimohna thupi pen a pia hi. Pumpi khat a dia buaipih ding thil poimoh tampi lak a a awlmoh pen ding tuh a innkuan ahi. Huai ziak in kumpi Hezekia kiang ah Pathian in “…na innkuan pihte omdan ding gelsak in; dam khelou in lah si ding na hi ngal a …” (Isai 38:1) achi hi. Huan, ginglou mite sang a leng gitlouh khak theihna tuh mahni innkuante ngaihsak louhna ahi, “Himahleh, kuapeuh in amah mite a ding a ngaihtuah sakkei a, amah inkuante khol houh a ngaihtuah sakkei leh, ginna tuh a zuausan a, ginglou mi sang in a gilou zaw ahi” (1 Tim.5:8). Innkuan a i pat a, i mohpuakna bang bang i hih chiat leh thil dang leh mun dang ah i dik thei pan ding hi. A diktak in, innkuan tawn a vangam kikai ding ana hi hi. Huai ziak in, innkuan a kipat a poimohdan tamlou i gen ding uh.
1. Innkuan a Pate hih ding: Pa pen in a poimoh ngaih pen a innkuan ahih ding ahi. Hiai sang a poimoh ngaihzaw a neih ngeingei leh hihkhial mahmah ding hi. Poimoh lua hi khollou a, paulam bawl theih teng bawl a, inn a om ngeilou ahihleh a innkuan a pai dik theikei ding. Hun tam theipen azi-a-tate toh zang khawm a, thu hoih-la hoih houlim pih leh makaih dia a om gige ding ahi. Khawlak a kipan innsung a etkol leh a lohsam sa ahi. Pa i chih innkuante a dia pitu ahih ziak in, makaih khalou a om mawk leh Pathian piak mohpuakna manpha, ngaihsaklou leh zahtaklou suak ding hi. Milak leh khawlak a mihoih dan a kilat a poimohpen ahikei. Innsung a a mohpuakna poimoh masapen zaw hi. A khamitna, a sahkhawmitna a innsung a a kilat masak ding ahi. Huai ziak in Pate’n i Khristian hinkhua pawlam ah panlou in, innkuan ah panni. Hiai dan ahihkeileh ginglou mi sang a gilouzaw kisuak ding hi,
“Himahleh, kuapeuh in amah mite a ding a ngaihtuah sakkei a, amah inkuante khol houh a ngaihtuah sakkei leh, ginna tuh a zuausan a, ginglou mi sang in a gilou zaw ahi” (1 Tim.5:8).
2. Innkuan a Nute’ hih ding: Innsung a Nu poimohna mihing kam in a gen khiak zohlouh khop in a thupi hi. Nu tampite’n innsung a a mohpuakna ngeih-ngaihlou in vial diandian uhi. Pasal tampite bang a vial pawtpawt leh kamtam a mi tungtang gen a pai kawi-kawi a tam uh. Mi theih dan a sahkhawmi mahmah, biak-inn kai taima, khami lawdan a om. Himahleh, tua khamiitna gah innsung a muh ding om hetlou tampi a om. Pasal zahna pe mahmah lou, ahihhang a midangte theih a fel mah mah sai-sai chih pen lepchiahna ahi. Huai ziak in innkuan bawl taktak tum Nu khat in a theih ding tuh pasal zahtak ding, a maipha zon ding, kingainiam tak a om ding ahi. Hiaite hihlou pi’n mi theih a biak-inn kai thanuam mahmah dan a om kaan a lepchiahna thupizaw a omkei. Midangte’ kipahpihna sang a a pasal kipahpihna a zon zawk ding ahi. A Khristian hinkhua diktak tuh a innkuan a a kipat masak ding ahi.
Mi lak a ahipen dan a gen leh houlim siam mahmah, innsung a a hoihna muh ding omlou chih tuh thulimlouhna tawpkhawk ahi. Huai ziak in, innkuan a Nu hihna diktak tuh a innsung a a kipat masak ding ahi, “Nungakte tuh, a pasalte uh it ding leh, a tate uh it ding leh, lungsim hoihtak a om ding a a hilh theihna ding un, Pathian thu gensiat a a omlouhna ding in, siangthou tak a om dingdan bang, amau inn a nasem mi a om dingdan bang, migi a om dingdan bang, hasuan in” (Tita 2:4-5), “Huchiin, meithai nungaklai simten jaw pasal nei uhen la, tate nei uhen la, insung khawsak ngaihtuah uhen la, gensiatna ding lemtang himhim melma musak kei le uh ka deih hi” (1 Tim.5:14).
3. Innkuan a Tate hih ding: Innsung a nu-leh-pa zahtaklou a thumanglou ta tampi a om. Biak-inn kaikai, Bible class a tel gige, ahihke’h, saptuam a kizang sek, ahih hang a tua thilhoih ahihte’ gah innsung a muh ding omlou, ta tampi, a om. Pathian thu-awina diktak tuh innsung a a kipat ding ahi. Nu-le-Pa zahtak a a thuthu uh man ding ahi. Sep-le-bawl a nu-le-pa panpih, nu-le-pa thuhilhna limsak, nu-le-pate’n a piak zoh tan tan ua lungkim. Nu-le-pa maipha zong, a tung ua kipak i hi chih kampau leh omdan a latsak a poimoh mah mah. Pawlam mi’n hon pahtak uh a poimoh masapen ahi kei. Innsung a nu-le-pa’ kipahna, pahtakna tuh a kipatna ding ahi zaw. Biakna limsakna a hoih, himahleh, innsung a Khristian hinkhaw gah hoih muh ding a om kei leh vangam kai theihna ahi kei ding. Huai ziak in, Pathian hon thupiak bang a innsung a nu-le-pa zahtak leh thumanna ah pan le’ng salam leh khalam ah lohchinna ahi ding,
- “Naupangte aw, Toupa ah na nute uleh na pate uh thu mang un: huai tuh thildik ahi ngal a. Na nu-leh-Na pa zahtaak in (hiai tuh thupiak chiamnei masa pen ahi), Huchiin nang a ding in a hoih dia, lei ah leng na damsawt ding hi” (Ephesate 6:1-3)
- “Naupangte aw, bangkim ah na nu u leh na pate uh thu mang un, huai tuh Toupa pahtak lam ahi” (Kolossate 3:20).
***
Hiai Inn Sung ah Kou …
Kuhkal Tak in Nna Kasem Uh [Kolossate 3:23]
Kichiamna ka Juausan Kei Uh [Romete 4:21]
Thudik Ka Gen Uh [Paunakte 12:22]
Vualjawlna ka Kipahpih Uh [Sam 34-3]
Ka ki It uh [1 Peter 1:22]
Nuam Kasa Uh [Paunakte 15:1-3]