By Khamzasawm –
Vualzawlna a don ziaka vualzohna tangkha chih om hi. Himahleh I gen tup pen bel mimal hahpanna ziaka vualzohna tan nunga vualzawlna hon zuite ahi. Thil bangkim ah vualzohna ngahna ding in naktaka panlak kul a, Paul in, “ Nunglama omte mangngilh in mailama om… kipahman mu ding in phakchiamna ka delh hi ” achih bang in theihtawpa kalsuan te kia’n lohchinna leh vualzawlna dong ban lel uhi (Phil 3:13-14). Achiang zaw sem in-salam thil ah lohchinna, khalam thil ah hotdamna, “ lau leh lingkawm in na hotdamna chiat uh semkhia un ” (Phil 2:12)
Khovel ah sahkhua tampi om a, huai te’n kisinsakna tuamchiat nei uhi. Nupi nau-nen te’n bel a kip-a kawi in thei kei mahle uh, a siampu leh makaite un bel a nungzuite uh a sinsakna ding un bangzahhiam bek a theih uh kiphamoh hi. “ Theihna na deihlouh ziak in, ken leng, kei dia siampu na hihlouhna ding in ko’n sam kei ding ”achi (Hos 3:6). Hiai bang kal ah khristiante dia hanthawnna tuh, “ Noumau a om, na lamet uh hon dong peuhmah dawng ding in mansa gige in om un ” chih ahi (1 Pet 3:15).
Awle khristian kichite lak ah pawlpi tampi petmah a om. Bangteng kisinsak uhiam chih zaw thei seng kei ni. Himahleh Bible sinsakna dan in bel khristian tuh Khrist etton a nei hinkhua zang te ahi. “ Khris enzuipa ka hih mahbang in, hon enzuite hi un ” Paul in achi (1 Korin 11:1). A ban ah, “ Khrist Jesu a om huai lungsim neile uchin ” chia thuhilh ihi uh (Phil 2:5). A taka muhkhiak theihna, “ Jesu kiang ah a omkhin ta uh chih a thei uhi ” chi’n vaihawmtu te’n Peter leh Johan tungtang a gen uhi (Nas 4:13). Hiai bang dan a, a hun leh a mun a I hihna taklang ngamlou tuh, “ mite ma hon kitheihmohbawl, ka Pa vana om ma ah ka kitheihmohbawl sam ding hi ” chih ahi (Mat 10:33). Hiai bang chi’n I saang ua? Kitheihmohbawlna deihlou a, gupna leh pauhialna I deihleh, enleng mite ma a I gupna ding banghiam bek kiphamoh hi. Huai ding in Paul in Timothi kiang ah, “ ka hongpai masiah laisim, hanthawn leh thugin limsak in ” a chi hi (1 Tim 4:13). Bang ahia khristian te thugin: (1) Thu konpiak tengteng zui ding in thuhilh un (Mat 28:20); (2) Khrist’ thuhilhna thu a om gige (2 Johan 9)
Jesu thupiak tengteng mi I thuhilh khakte I hilh kim sipsip na hia? “ Pathian vaihawm tengteng a vek in na kiang uah im ka nei kei hi ” Paul in achi (Nas. 20:27). Hiai thu I zui na uhiam? “ Zui a nasem gige mi a thilhih ah vualzawl in a om ding hi ” chi’n Jakob in hon na hilh hi (Jakob 1:25).