Jamson Guite –
Pathian phasakpihna ziak in a siamsa nithak, Toupa’ Ni dam in mel I mu nawm ua I kipak petmah uhi. A siamsa ni leh khate muthei dia I hinna hon hoihsak Pathian ahihman in Amah thpina tengteng I pia uhi. Nitak khua ahong mial a, I lupna ah I lum a dam a zing khovak munawn mai diing in I kingaihtuah. Muh leng I mutouzel uhi. Hiaite ahi diing him bang a ngaihtuahna neikhak theih mawk hi. Nitak a damtak a I lupna a I lup ziak a Pathian’ bawlsa zing khovak muh teitei diing chihna a omkei. A mulou mi tampi a om. Huchi bang kallak a tuni a nang leh kei hun haksatak lak a khosa himahlehang tuni dam a I muh theih pen Pathian pha sakpihna, Pathian ompihna ahi. Pathian in pha salou a hon ompihlou hileh tutan hing dam in I omkei diing. Eite hon humbittu tuh I Toupa Pathian ahi.
Pathian tuh a mite humbittu hitaktak ahihdan Israelte Kumpipa David in Sam ah hoihtak leh kichiantak in ana taklang ngiatngiat hi. “Ei lam a pang Toupa hilou hileh, Israelte’n chi uhen. Ei lam a pang Toupa hilou hileh, mite’n eite hon dou lai un; amau eite tung a athangpaih lai un, a hon hingvalh khinta diing ua, tuilian in ahon taimangta diing a, tuite’n ahon tumta diing ua; tuihatte’n hon taimangta diing uhi. I melmate suksiat a hon omsakloupa, Toupa tuh I phat diing uh! Thangkamte thang a kipan a suakta, vasa bang in, I suakta ua; thang tuh hihsiat in a omta a, eite I suaktata uhi ! Eite’n panpihna I muh utuh, lei leh van Siampa, I Toupa’ kiang a kipan ahi” (Sam 124:1-8).
Tanglai a amite humbittu Toupa Pathian ahi. Tuni tan in leng ahi lailai. Ei a I chih I hinna mahmah leng vangbit a thuneih zouloute I hi uh. I hinna ei khut ah a om kei a Pathian khut ah a om. I hinna tung ah thu I neikei ua I hinsung sausak diing in hihtheihna I neikei. I Toupa Jesu’n hi chi’n a chi, “Huan, noulak ah kua ahia, lunghihmohna ziak a ahinna doksau zek thei? Huai bang thil neuchik bawn hihtheiloute’n bang dia thilteng lunghimoh na hi ua?” (Luke 12:25-26). Eite’n I hinna doksau theikei mahlehang Pathian in ahon doksausak a tuni tan hing dam in I om uh. David in ana gen mahbang in I hinna humtu Pathian hilou hileh lauhuai tampi lak ah I pukkhinta diing ua, natna lauhuai lak ah I pukhin thamta diing uhi. Huaiziak in Toupa tuh I phat diing uh!
David in Eite’n panpihna I muh tuh lei leh van siampa I Toupa akipan ahi a chi (Sam 121:2). Toupa muangte tuh Zion tang hihlin vuallouh, tangtawn a om gige diing bang ahi ua tangte Jerusalem kim a a-om bang un Toupa tuh a mite kim ah a om gige ahi (cf. Sam 125:1-2). Huaiziak in Toupa I muang diing ua, Toupa ah I kinga diing ua, Toupa tuh I phat diing uh. Amah lou in I hinna uh bangmahlou ahi. Amah lou in salam leh khalam ah bitna a omkei. Amah lou a bitna omlou ahihdan Kumpi David mah in hiai bang in ana gen hi, “Toupa’n inn a lam kei leh a lamte’n a semgim thawn phet uhi. Toupa’n khopi a ven kei leh a vengtute ahak thawn lel uhi. Zingkhangpi a thou a, khawl hak mahmah a; nna na sepgim uh phatuamna bei ahi; Toupa’n lah a iite, a ihmut kal un a pe ngal a” (Sam 127:1-2).
Midangte pathian bang pathian nei I hikei uh. Namte Pathian bel dangka leh dangka-eng a bawl milim ahi ua, mihing khutsuak ahi. Kam nei mahleh uh a pautheikei ua, mit nei napi in a muhtei kei uhi. Bil nei napi in a za theikei uh. Huaiziak in amau maungte tuh milim toh kibang lel ahi uhi (cf. Sam 135:15-18). Ahihhang in eite muan Pathian bel pathiante’ Pathian, Toupate Toupa ahi. Thillamdang thupite hihpa ahi a, a pilna a vante bawl a, tuite, leite leh ni leh kha leh aksite bawlpa ahi (cf. Sam 136:1-26). Eite Pathian tuh Abraham Pathian, Isak Pathian, Jakob Pathian ahi a, Tuipisan sattan a Isrealte lei hul a kansak a, Danial leh a lawmte sahang baknei kul apan leh meikuangpi apan pikhetupa ahi.
Eite Pathian tuh hiai bang Pathian ahi a, Aman Amah ittute a diing in thilbangkim a hoihna diing uh a sehsaklai hi (cf. Romte 8:28). Huan, Aman (eite Pathian in) chiklaipeuh in ahon limsak gige hi. Huaiziak in I haksatna leh lungkhamna tengteng Amah kiang ah I nga vek diing uh. Ahon limsak gige ziak in (1 Peter 5:7). I Pathian in hon hum a, chiklaipeuh a hon limsak gige a, Amah ittute adia thilbangkim ahiohna diing ua sem ahihman in I Pathian I it diing ua, Amah phat in a thupiakte ginomtak in I zui diing uh. Hebru laikhak gehltu’n hun haksatak a ana ding gingtute kiang ah hiai bang in thupiak ana pia hi, “I pomtak uh, lametna thugin linglou in I lenkip diing uh, thuchiam bawlpa lah a muanhuai ngal a. Huan, itna leh thilhoih hihlam a kitokthou diing in, ki-awlmoh tuah chiant ni hang. Khenkhat’n ahihdan bang ua I kikhopkhawmnate uh tawpsan mailou in, kihasuantuah zaw ni. Ni tuh hong nai hulhul a na theihna ziak un houh, kihasuan tuahzaw diak un” (Hebrute 10:23-25).
Thuchiam bawl I Toupa Pathian muanhuai ahihman in hun haksa hun ah leng I lamet thugin linglou in I lenkip diing uh. Eite hon humtu I Toupa Pathian I phat diing ua, kenkhat hihdan a I biaknate topsan mailou in Amah biakna pibawl semsem ni hang.