By Jamson Guite –
Toupa Ni paita in Jesu’n tangtung a athugenna a nungzuite hihna ana gen LEI CHI toh kisai I taklangta uh. Pathian in damna leh hun hoih ahon piak nawn toh kiton in tuni’n nunguite hihna toh kisai kikumzom lai lehang i chi ahi. Jesu’ nungzuite’ hihna poimoh mahmah khat nawn tuh KHOVEL VAKNA ahi. Hiai a Jesu’n vak a gen bang chi bang vak hi diing hiam? Jesu’n Matthai 5:14-15 kikal ah hilchetna nih ana gen, “Tangtung a kho om selguk theih ahikei” chih leh “mi’n khonvak de in loh nuai ah a koh ngeikei. A koihna ah a koihzaw uh” chih ngaihtuah ni. A omdantak bel vak in innsung a om tengteng vakna a pia hi. Selguk a I omlouh diing. Tang tung a khua om a kilat bangbang a nungzuite tuh I kilat diing. Nungzui diktak tuh sel in a om ngeikei. Sel theih leng ahikei. Nungzui diktak tuh a omna munpeuh ah a kilang diing. Innsung ah hiam, class room ah hiam, sepna mun ah hiam, khotang ah hiam, khosung hiam ah hita leh nungzui diktak tuh mite theih in a om diing. Mite’n I omlam (Jesu nungzui/Khris Saptuam I hihlam) ahon theihkei ua lebel eilam ah adiklou khat om chihna hikha diing hi.
Hiai a Jesu thugen hoihtak in ngaisun thak mah dih! Pathian in loh nuai a det dia vak a ahon siam I hikei uh. Vak tuh mite muh dia a tankhiak diing ahi. I pindan sung ah I meivakte mekvak in bang hiam in i tuam ngeikei himhim uhi. Jesu’n khovel vak na hi uh ahon chih bang a chihna hi diing hiam? Hiai I theihsiamna diing in amasa in Johan 8:12 a Jesu’n Amah Khovel vak a kichih nasan ngaihsun masa ni. “Jesu’n a kiang uah thu agen nawn a, Kei khovel vak ka hi; kuapeuh kei hon zui mial ah a gamta kei diing a, hinna vak a neizaw diing a chi hi” (John 8:12).
Tanchin Hoih Johan gelh in khovel tuh mialna a dim ahihdan leh vak hong pai diing ngak ahihdan ana tangkoupih hi. Huai vak hong pai diing pen tuh Jesu Khris ahi. Jesu khovel vakna hitaktak ahihdan Matthai in hiai bang in ana gen hi. “Nazaret khua nusia in, kapernuam khua a om din apaita hi. Huai tuh Zebulun leh Napthali uk, Galili dil gei a om ahi. Hiai tuh Jawlnei Isai thugen hihtangtunna di a hih ahi. Zebulun gam leh Naptali gam, tuipi zotna, Jordan gal langkhat a, jentelte gam a Galili ah! Mial nuai a tu, mipite’n vak thupitak amu diing uh. Sihna gam mial nuai a tute tung ah khaw vak a hong tang diing chih hong tangtun theihna diing in. Huai hun a kipan in Jesu’n a thugen, kisik un, vangam a hong naitak ziak in chih a panta hi” (Matthai 4:13–17).
Jesu vak ahih toh kiton in khovel ah vakna thupitak ana tunta hi (Mathhiai 4:13-17; cf. Isai 9:1-2; 51:4; 60:3).Khovel tuh mialna in a dim a, Jesu’ tuh khovel hihvaktu diing a hong pai ahi (Johan 1:4-9). Tuabang hihna (identity)tuh Jesu’n a nungzuite a hon pesawn hi (Matthai 5:14-16). Huchibang hihna I neih uh tuh athupi petmah. Huaiziak in i vak uh i tansak ua, khovel tanvak tuh i mohpuakna lianpen uh ahong suak hi. Vak in mial lak ah lampi a vaksak a, lam ahon lak hi. Hiai thute lungtang a vom kawm in Khovel vakna I hihdan uh gelthak ni. Mial a omte lam laktu diingte I hi ua, Khovel lampi dik kokmuhtu diingte I hi uhi. Chi allou bangmah diing a aphatuamlouh mahbang in vak leng a tan keileh aphatuam tuankei hi.
I Vak bangchi tansak diing?
“Thil bangpeuh phunphunlou leh sel lou in hih un, huchi a Khovel a vak bang a na tenna uh, midiktatloute leh misualte lak a; khelhna neilou, Pathian tate, dembei leh siangthou na hong hihtheih ua, hinna thu na letkip ua, huchi a kitaiteihna a athawn a tai hiam, a thawn a semgim hiam ka hihlouh ua, Khris ni chiang a ka kipah theihna diing un” (Philipite 2:14-16) Hiai Bible tang apan in phunphunlou leh selsel lou a dembei a hiai Khovel khang gilou lak a omna leh hinna thu (thutak) letkipna tuh vak bang a tanna ahihdan I muthei uhi. Thutak kiptak a lenkip a Khovel toh kilamdanna tuh I vak tansakna ahi.
Peter in hiai bang in ana gen hi, “Himahleh nou bel, mial akipan a pawt a, amah vakna lamdangtak a lut diing a hon sampa pahtawinate na tangkoupih theihna diing un, chitel, kumpi siampu, nam siangthou, Pathian mite ngei na hi uhi. Nidanglai in Pathian mi na hikei ua, tu in bel a mite na hita uhi; nidang lai in Pathian zahngaihna na tangkei ua, tu’n bel a zahngiahna na tangta uhi. Deihtakte aw, khovel a zaw mikhual leh khualzinmite lel na hih ziak un, ka hon ngen ah; na kha uh dou gige taksa utnate tawpsan un. Zentelte lak ah tatdan hoih in gamta un; huchi a thil dikou hih a hon ngoh chiang ua leng, na thilhih hoihte uh amuh ua; a hong pai ni chiang a Pathian a pahtawi theihna diing un.” (1 Peter 2:9-12).
Peter in eite nam siangthou, mial akipan vaklamdangtak a lut dia sapte I hihdan a gen. Khovel duhgawlna leh taksa utnate apan kihemkhia a, khovelte’n I thil hoih hihte a muh ua huchia Pathian a pahtawi theihna diing ua omdan gamtat a zahtak huaitak a om diingte I hi uhi. Huai tuh i vak tansakna ahi. Tangtung a Jesu thugen toh akizawiton mahmah. Huaiziak in vak I hihna a I tan diing dan bel khovelte lak a hinkho siangthou zat diing. Amaute khosak bang a khosak louh a, amaute hihteng va hihpihlouh diing. Poisakna himhim neilou a amaute hih teng hih a amaute omdan a va omlouh diing ahi.
I vak a tan theihna dia mial thilhih gah neiloute a panna himhim neihlouh a, mial thilhihte phoulakzawk diing ahihdan Sawltak Paul in Ephesate kiang a alaikhak ah kichiantak in ana gen hi (Ephesians 5:6–16 sim in). Huan, Toupa a vak I hihdan leh vak tate bang a khosa a vak gah suang diing I hihdan leng ana gen hi. Huchi ahihman in I vak a tan theihna diing in khovelte zon bang a zonglou lou a, kovelte ngaihtuah bang a ngaihtuahlouh a, kovelte nek bang a neklouh a, khovelte paudan leh Khovelte bang a muhtheih thilte kia awlmoh louh a ngai hi. Hiaite a khovelte toh kibang a I tuamna a latkei leh khonvak de a lohnuai a koih toh kibang lel hi diing ihi.
Bang ziak a I vak tangsak diing?
Atawpna ah Jesu’n bangziak a eite Khovel vak hi I hiam chih ana gen hi. Pa van a om pahtawi ahihna dia I vak tansak diing ahi (Matthai 5:16). Khovel nuamzaw leh hoihzaw a bawlna diing hipahloulou in I Pa van a om pahtawi a hihtheihna diing ahi. Mite hong kihei a Pathian apahtawina diing ua mite tung a thilh hoih hih diing ahi. Mite’n ei hon muhna diing hilou in Pathian a muhtheihna dia I vak a tang diing ahi.
I vak tansakna tuh Khovelte toh kibanglou a omna ahi. Huan, I hih khempeuh a Pathian pahtawina tuh I vak tansakna ahi chih haihkei ni. Mi’n I kitenna a et chiang un I kiteena tungtawn a Pathian pahtawi a om in a mu uhia? I innkuan tungtawn in min Pathian a pahtawi ngei uhia? I nasepdan, I kampaudan, I nek leh dawn leh I hih khempeuh mi’n a et chiang un Pathian pahtawi a om hi’n a mu diing uam? I vak a tan theihna diing in I thilhih khempeuh a Pathian pahtawi a a-om diing ahi. Khovel vak I hi. I vak tangsak ni. Loh nuai ah koikei ni.