By –Kamlianpau –
Khris’ saptuamte’ chituam biikna tuh, “ unau ” a kichih uh ahi. I Toupa Jesu Khris’ sisan ziaka laigui kizom ahihziak un, “ unaunu, unaupa ” chi’n kisam uhi. Salam kizopna te, leitung khosakna a niam-le-sang; a mawl-a pil; a lian-a neu te pii-bawllou in, “ unaute ” kichi mai ua, kilawm petmah hi. Huaiziakin hiai “unaute” a kichih uh kisuanpih ua, ngaisang mahmah uhi. Himahleh, kim-le-kiang a “khristian” kichi te lak ah zang khollou uhi. Tu chiang in hon zang zeuhzeuh mahle uh, nidanglai deuh in zanglou himhim uh chih theih hi.
Hiai bangkal ah, tuni chiang in hiai, “ unaute ” chi’a I kisap uh zumpih hiam ahihkeileh, ngaisang zou nawnlou ihi dia aw chihtheih dekdek bang hi. “unau” chih kammal zang tawm zaw deuhta I di uam? Biakkhawmna bang ah leng khenkhat te’n, kua hiam khat, “unaupa, unaunu ” chi’a sap pen kamsiamlouhna, ki-zahlouhna dana ngai aki hi diam, “unau” chih ding kisuanglah I bang simsim uhi. “unau” chih sang a, “ Nu-Pa, Pi-Pu ” chi’a sap I ching dekdek uhi. Saptuam sung ah, “unau” kichih’ sanga thupi zaw leh manpha zaw om theilou hi.
Khristiante “unau” iki chih ziak leh a thupina tuh…:
1. Pa khat-Pa kibang suan ihihvek ziak uh ahi- Jesu kipahpih-a pom, amah gingta te tuh, “…sisan suan ahi kei ua, sa deihna suan leng ahi kei ua, mihing deihna suan leng ahi sam kei ua, Pathian suan ahi zaw uhi ” (Jn 1:12-13). Jesu gin ziaka Pathian tate hong hi ahihziak un, “unaute” ahi uh. Huai tuh, Khris a aki baptis lut ziak uh ahi (Gal 3:26-27). Huaiziakin, Pa khat suan a piang vek ahihziak un innkuan khat ahi ua, “unau khat” ahi vek uh (cf I Tim 3:15). Hiai Pa khat suan tate tuh, kua nam, kua beh, sikha, heutu, numei, pasal chih omlou in Pathian tate ahi vek ua, “unau” ahivek mai uh (cf Gal 3:28). Huaiziakin Khris’ saptuam ah salam ki ta-nauna ahihkeileh beh-le-phung gen pen a neih ahi kei (cf Eph.2:18-19)
2. Khris sisan ziak a unau khat ahihvek ziak uh ahi- Hondampa khat I Toupa Jesu Khris sisan a tatkhiak leh leite ahihziak un “unau khat” ahi uh (cf Eph 1:5-7; Nas 20:28). Khris sisan ziaka saptuam hong piang ahihziak in, “unaupa, unaunu” chiha om theite tuh Khris’ sisana tat te ahi uh. “Unau” banga pom theihlouhte tuh Khris sisan a kizopna I neihpihlouhte chihna ahi.
3. Thutak-Pathian thu a piangthakte ahihvek ziak uh ahi- Jesu mahmah in, “ Kuapeuh ka Pa vana om deihlam hih phot tuh ka unaute, ka sanggam nute, ka nute ahi uh ” achi (Mat 12:50). Unaupa Peter in, thutak a piangthak na hi uh achi (1 Pet 1:22-23). Jesu Khris sisana namkip a om thutak toh kituaka piangthak khempeuh “unau” kihivek hi. I Toupa Jesu Khris mahmah in leng, “unaute” hon chih zumhuai asa kei (Heb 2:11). Huaiziakin en leng, “ unaupa/unaunu ” I kichih ki zumpih ni. Tawisang zaw ni.