By – Jamson –
Koimunpeuh ah hileh, unaute lak ah kituahlouhna leh kimuhsiamlouhna neuhneuh a om theizel hi. Tuabang a kituahlouhnate tuh mimal kimuhsiamlouh ziak bang, ngaihdan thilte a kituahlouh ziak bang, theihna taksap ziak a unau dangte toh laisaingthou sinsakna paipi (Bible principle) toh kisai a muhdan kibatlouh ziak ahi tangpi.
Abangziak hita leleng unanu khat hingal a, bekhawm a omkhawmte tuh kutuahlouh ding ahimawkkei a, kimuhsiamlouh theih leng ahikei hi. Thutak kalh a, thutak toh kituaklou sinsak mite toh bel I kituahlouh ua i deihlouh diing mah ahi. I Toupa’n leng tuabang mite deihlou a hua ahih ziak in (cf. Kilakna 2: 6; 2 Johan 9-11). Himahleh thutak kalh ziak hilou a mimal vai leh salam thilte ziak khong a unaute lak a kituahlouhna leh kitheihsiamlouhna a om mawk leh diklou diing hi.
Biakkhawmna mun khat ah hichi om a chisak uh – Preacher khat in kalkhat chihtakna leh kipiakzohna thu agen leh a tawp in thugentupa kalhna dan in a kikhopna ua worship director in lapawlsa pawlte “I shall not be moved” chih la asasak. Huan, Preacher in a Toupa Ni nawn a thilpiak toh kisai a gen leh a thugen kalna dan in, en thilpiak piak ngailou achih nopna un “Jesu’n pekhin vek” chih la asak nawn a. A Toupa Ni nawn a lei ven diing thu agennawn leh “Tua tangthu gen ka nuam hi” chih la asak khum nawn uh achisak uh. A kal nawn in Preacher leng thangpai simta ahihman in kitawp a ut thu agen leh “Ba tuzan hilou” chih la asakkhum nawn ua. A Toupa Ni nawn a Preacher in Jesu’n kitawp dia hon deih ahi ka kitawpta a chih leh a Preacher pen in Jesu neilou a amau nei a chihnopna dan un “Jesu a lawm hoih I neihdan” chih la asa khum leuleu uh a chisak uhi.
Hiai thu ataktak hidin bel I gingta kholkei. Ahihziak in hiai dandeuh sim a saptuamte I dinkhak hun bang omhtei tham diing in uphuai hi. Saptuam in thununna a piak a, a kithuahpihlouh a, a delhkhiak diing pawl bel omtham hi (cf. 1 Kor. 5:13). Tuabang hiloute tuh kikhenna himhim omlou a kituak dialdial a lungsim munkhat leh ngaihtuah munkhat a om diing ahi (1 Kor. 1:10). A kimudah a akiho thei diing ki-omlou hi. Pa Tapa leh Khasiangthou kithuahkhawmna a kithuahkhawmte I hi uh (1 Johan 1:1-3).
Pa khat ziak a innkuan khat hi a, Khris sinsan pha ziak a unau khat hite ihiman un kimuhdah a kitheisiamlou diingte kihilou hi. Khris sisan pha ziak in khat leh khat kihiang tuah in I kizomtuah chiat uh. Eite kizopona tuh ‘khat kizopna’ hilou in ‘khat leh khat kizoptuahna’ (mutual) ahizaw. Laizilte’n I thei mahmah diing, chemistry ah chemical bond tuamtuam a om. Huaite lak a covalent bond kichi a om. Atom nih or nisang a tamzaw in a electron a kihoptuah (share) ziak un hiai tuh chemical bond lak ah atoupen hi.
Khristiante kizopan (bond) leng covalent bond toh kibang ahi. Covalent bond ah atom khat in molecule bawlkhiakna di’n a electron atom dang khat a hom (share) a, a atom khatpen inleng ama electron a hom hi. Khristiante leng covalent bond a atom-te bang a khat leh khat kizomtuahte I hi uhi. Unaukhat in kei hon it diing tan kia ah Laisiangthou a daikei a, ken leng ka unau ka it diing, ka ki-ittuah diing hi’n ahon sinsak (Johan 13:34, 1 Johan 4:7, 1 Peter 4:8). Unau khat in nang hon ngaihdam diing tan a Laisaingthou a daikei a nang leng na unau na ngaihdam diing ahi. Kingaihdam tuahchiat diing a chizaw (Eph. 4:32; Kol. 3:13). Unau khat na tung a ahoih diing kia na lamet diing hilou in nang leng na unau tung a na hoihna na lahsak diing ahi.
Unau khat thumpih diing ngak diing hilou in enleng i unau thumpih diing (Jakob 5:16 ). Huan unau khat in hon thuakzoh diing kia lamet diing hilou in enleng I unau thuakzoh diing ahi (Ephesians 4:2). Huchibang mah in unau khat in hon pahtawi diing kia lamet diing hilou in nang leng na unau na pahtawi diing ahi (Romans 12:10). Na unau in nang hon panpih diing kia na lamet diing hilou in nang leng na unau na panpih diing ahi. Na unau na tung a hong kiniamkhiak diing kia na ngak diing hilou in nang leng na unau tung a na kingiamkhiak diing ahi (1 Peter 5:5). Hiai bang a khat leh khat I kipiaktuah chiat chiang in unau kal a kizopna (bond) amawk mai in selou diing hi.
Hiai bang a unau khat leh khat I kizoptuah theih chiang in unaute lak a kigensiat, kitheihsiamlouh, kimuhdah, kituahlouh chihte muhphak in a omkei diing .Tua ahihman in tutung in ‘khat leh khat’ chih thupi paipih in Kha Namsauh hong kisuah hi. Unaute tung a khat leh khat toh kisai a I mohpuak tampite lak ah bangzah hiamte unau muanhuai bangzah hiam in ahon gelh uhi. Hiai I mohpuakte I sukbuchin theihna din thute kingaihniamna toh sim a sang diing in (Jakob 1:21) ka hon gen hi. Hiai thute phattuampih din Toupa’n hon vualzawl chiat hen. Amen!