By- Kaikhanlel –
Zia achung a kampau thupiak hi I Lalpau’ Jesu Kris’ thupiak ahi (Jn 13:34). Juda Iskariot anasep sem ding in apawt mangta anungzui dang 11-te kiang ah zia thu hi agen ahi. Jesu’n anungzuite aman amau a itgual ma amaule a kiit tua ding uh a doi ahi. Aman hilopi anungzuite phut ziang ahi pua, abung bullam ah anungzuite keng asil piaka, “ Kei ma la hotupa un la keng uh ka sil piak leh nang un le la kisil piak diu ahi ” ati. Kiniamkhakna leh hepina taklatna abawl ahi. Chang 35 na achun “La kihepiu ahi chun mi zosian ka nungzuite la hiu ti hun he thei tanau ” ati.
Hepina umdan: Kiseppiak, kikhok ngai, Kithuakzo, Kingaidam, Kidawisak…. tite ahi.
JESU’N A NUNGZUITE A HEPINA CHU:
- Ama adi kheklo hepina ahi – Mihingte in chu mani kikhuallo kei/kihemil a midangte hepi tihi I nei mang puau. A vainunga ding bang ahem khat kinepna toh mite I hepi tangpi hi. Ahiloleh (golden rule) “Kei a le nang a ” ti a vang hi. Jesun’n ahileh ahinna le apia ahi.
- Kipumpiakna toh ahepi hi – Hepina dik tak in haksatna leh thokgimna te a ngiat ahi. Mi ihepina lam a chan I nei ngai tam?
- Hetchetna toh hepi – Migilo ihi lai un Krist chu isik in a thita ahi (Rom 5:8). Mihingte chu eima titlo na kihelo a mite hepitaklo bang I nei thei hi. Mani mit a inkam mulo midang mit a kidak them mu thiam te, kisathei te, mi hatlona muthiam te ihi. “Nang hun hepite bep la hepi chun kipak man bang hem la mu ding uh? Sedawl miten le zia gual machun abawl tho puau em?” Mathai 5:46 ah Jesun atii.
- Ngaidamtak in a hepi hi (Love with forgivingly) – Kros lek ah thavai tak a a thok lai in a ma chun a khai lumte ahepi a, a pa kiang in, “ Hepa amau hi ngaidam in, a thilhi uh ahiatlo ziak uh ahi ” ati (Lk 23:34). Kihepi tuana ding achun I kingaidam masak angai ahi. Zia hi Jesu hepi guala hehpina neite bep hithei ahi.
I Peter 4:8 ah upa Peter inle zia kihepi tuana hi ahoidan ala tak lang hi. “Bangcheng sang in, phatchuam ngai tak in kihepi tua chiat unla; hepina’n gitlo tamtak akhu sek ngal a ” atii. Hepina umna phot a ngaidamna’n azui lo theilo ahi. Zia hepina nasep ngaidamna hih ahi gitlo tampi khusek tu chu. Zia ziak achu upa Peter chun bangcheng sang a phatchuam ngaitaka unaute laka hiding a agen chu kihepi tua chiat ding hih ahi. Zia hi I hiat thiamna ding achun Paul in “Ka unau pukna ding ahi achun sa nelou in um zawng ka ” (I Kor 8:13).
I Johan 4:7 ah upa Johan in, “Dawitakte haw, kihepitua chiat hitiu, hehpina hi Pathian apat ahi ngala; kuale hepina nei chu Pathian ah piang ahin, Pathian chu ahiai ” ati. Upa Johan gendan achun hepina neilo in “Pathian a hepuai ” ati ahi. Aziak chu hehpina chu Pathian akipat ahia, Pathian chu hepina ahi ziakin, chang 8na ah a male kigenlut in, “Deitakte haw, kihepi tua chiat hitiu,” atii. Bang ziak in? Pathian in zia gual lawm a eihepi chun ei haw le I kihepi tua chiat diu ahi. Aman ihin theina ding ua a chapa khovel ah ahunsawl takna hin. Zia chu eite gitlo thupha choina, iki thoi nau ahi ” (chang 9,10).
Unaupa Paul inle zia kihepi tua na hi kristiante hinkhua di ahidan nasatak in ala gen hi. Rom 13:8 na chun, “ Kihepi tuana beplo chu kuama thil ba kiu vin; midang hepitu chun dan chu ahi bukim ahi ”atii. Kolosa 3:12-14 ah, “ Chutichun, Pathian mitel, thingtho leh dawitakte gual in lainatna lung thimte, hehpinate, kingaitawmnate, thunuaigolnate leh thokhatnate achun kivan tau in; kidawzotua chiat in, kuanle mi chung ah thubuai nei taleu chin, kingaidam tua unla; Lalpan a ngaidam gual in kingaidam tau in. Zia zosia chung achun hepina’n kivan tau in, zia chu kikan zopna bukim chu ahi,” atii.
Pathian chu hepina ahileh Pathian chu thagau ahia (Jn 4:24) hepina neichun Pathian a ahia iti ta. Paul in Galati 5:16-17 ah “Chutichun, zia hi kati ahi, thagau ah kalsuan un, tichun, taksa nopna lam chu zui lo mai inlau. Taksa chun thagau ado seka, thagau inle taksa dona lam a nuam sek hi; thil la hi guat teu chu la hitheilo na ding un ziate chu akikal sek uh ahi” ati. “Himaleh thagau ga chu HEPINA, KIPAKNA, CHAMNA, DAWTHEINA, NUNNEMNA, PHATNA, GINUMNA, THUNUAIGOLNA leh KISUMTHEINA ahi. Ziate toh kikal in dan a un puai ” (Gal 5:22).
Atawpna, hepina hi piakdawna ahi – Pathian in a chapa a piai. Samari mihoi in asum, ahun, atha a piai. Jesu’n ahinna a piai. Israelte kiang Mosi’n, “Lalpa la Pathian chu la lungthim zosia; la ngaituana zosia leh la hatna zosian la hepi ding uh ahi ” atii. (Diut 6:5) Unaute ihepi leh a taksapna zosia panpina piak ding ahi. Agitlona ngaidama, khut nasepa, sumlepai, sil le chen tha leh zung hun le phat, muk le kam a, nat le sat a, siatna phatna, lungkiakna leh thakaina, I muhlai bepa hilo, vilvel leh kanthakna hinkhua mat a ngiat ahi.
Ziate hin; Jesu’n a nungzuite thupiak thak apiak, “Kihepi tua chiat un” atii. Peter manle kristian khat le khat gitlo tampi kikhuhpiakna ding a, “Kihepi tua chiat un ” atii; upa Johan in Pathian ah piang ihitheina ding a, “Kihepi tua chiat hitiu ” atiu chu buting thei ding ahi.
A belapna:
1 Jn 3:18 “Naute haw, athu leh kam sung bep in kihepi puai tiu in, thutak leh thil hi in hi zaw hen.”
Jakob 1:26, 27 “Kuale sakhua ngaisaka kingai ngala a leiteu venglo a, a lungthim ua kithem zawte chu, amau sa khua chu bangmalo mai ahi. Pathian leh Pa mitmu ah sakhaw thiangtho leh sukbuaklo chu zia hi ahi, nau chagate leh meithaite a genthei lai ua kan thak leh khovel kisukbuak saklo hi ahi. ”