Church of Christ, New Delhi

“The Churches of Christ salute you” (Romans 16:16)

Saptuam leh pawl khenthangte

By- L.James –

Thupatna (Introduction)
Tuni in i Khristianna khovel uh pawl khenthangte’n (denominational churches) a luahdimta ua, huaiziak in Toupa’ saptuam leh pawl khenthangte theihkhen theihlouh dikhop hial hileh kilawm in a langhta hi. Himahleh lungsim siangthoutak leh Pasian’ thu zahtakna liantak toh Bible sim a i sut chiang in Toupa’ saptuam pen a pianszia a pawl khenthang a hihlouhna kichiantak in i muthei hi. Tuni a pawl tuamtuam i neihte leh Toupa’n a phuhkhiak, A saptuam a kibatlouhdan leh pawl tuamtuamte bangziak a hong omkhia uh hiam chih thute sutkhawm le’ng uthuai i sa hi.
I. Pawl Khenthang KIchi Bang Ahia?
(What is Denomnation?)
Lai Siangthou zui sam hi a kikoih sahkho pawl khatpeuh, tualsung saptuam sang a lianzaw (larger than the local congregation) himahleh Khris’ pumpi sang a neuzaw (smaller than the whole body of Christ) a kigawmna nei peuhmahte tuh pawl khenthang a kichi hi.
Huai omzia tak bel Tual sung/khobing a saptuam khat sang a lianzaw a kizomkhawm (Kho bangzah hiam a saptuam omte ki gawmkhawm) himahleh Toupa’n a hotdam tengteng tuunkhawm vek ahi chi ngam zellou (kou saptuam ah hotdamte tengteng omvek ahi chilou) huchibang pawlte tuh Pawl Khenthangte a kichi hi.
Huai ban ah, sakho pawl khatpeuh in hiai bang hihnate aneih cha’n pawl khenthang ahi uhi:

  1. Leitung a Headquarter nei a kizon khawm a, daan bawl pawl leh daan seemsuahtu (executive) om a, tute’ thunuai a tualsung saptuam bangzah hiam omte.
  2. Thu-up sinsakna tuam (Bible toh kituaklou), saptuam mun tuamtuam a omte’n a zuih diing ua thuneitak a luikhiak neite.
  3. Pasian’ thu toh kikalh kha thu-up sinsakna bu tuam nei.
  4. Pawl min tuam khat, midangte’n a theihkhen diing ua phuakkhia a huai minpua a Lai Siangthou kalh.
  5. Kikhenna leh kituamhuina lungsim nei.
    II. Bangziak A Pawl Khenthangte Hong Om Ahia?
    (Why Did Denominations Arise?)
    Kipawlkhenna tuh a chiil a kipan a na ompah ahikei. Himahleh Toupa’ saptuam a om mi khenkhatte’n “Thutuam gen a” “Sinsakna diklou” a hon sinsak ziak ua hong piangkhia ahizaw hi. Sawltak Paul mahmah in Ephesa khua a saptuam upate kiang ah hichibang in ana gen hi:
    “Ka pai nung in nge hangte na lak uah a hong lut diing ua, belamte a hawikei diing uh chih ka thei hi. Noumau lak a mi nangawn, nungzui pawlte amau’ lam a kaimang diing in thutuam gen na hongom diing uh” (Nas.20:29,30).
    Timothi kiang ah leng hiaibang in ana thiesak lai hi:
    “Himahleh tunung chiang in mi khenkhatte’n pimangna khae leh dawite thuhilhna limsak in, ginna a hon tawpsan diing uh chih Kha in kichiantak in a hon theisa hi” (1Tim.4:1).
    Kha Siangthou’ theihsak a genkholhna dungzui in i Khristianna ah mihing ngaihdan hel utna lungsim a hong omtou pah hi. Khristian sahkhuana a kikhenna piangsaktu lianpen tuh “Ginna thu” (Matter of Faith) leh “Ngaihdan” (Matter of opinion) theihkhen theihlouhna leh zat siamlouhna ahisek hi. “Ginna Thu” leh “Ngaihdan” bang hihiam chih i sui suk diing hi.
  6. Ginna (Gaith):
    Ginna tuh Pasian, mihingte’ kiang a a hong kitheihsakna thu a kim sipsip a gintakna leh dikna ahi chih pomkipna ahi. Hebrute’ kiaing a laikhak gelhtu’n hichi bang in ana hilhchian hi: “Huan ginna tuh thil lamette om ngei a theihna, thil muhtheihlouhte theihchetna ahi” (Heb.11:1).
    Rome laikhak ah Sawltak Paul in, “Ginna tuh zaakna ziak in a hong om a, zaakna tuh Khris’ thu kigen ziask in a hong om hi”(Rom.10:17) achi nawn hi. Huaiziak in Bible in a gen ginna tuh Jesu Khris tungtawn a thupiakte ahi. Huaiziak mah in Paul in Korinthte’ kiang ah, “Ginna ah na omna uhiam chih noumau leh noumau ki-enchian gige un”(2Kor.13:5) ana chi hi.
    Bible in a gen, “Ginna” pen tuh “Genkhiak theih” (Gal.1:23), “Zaak theih”(Nas.24:24), “Thuman theih”(Rom.16:26) ;ej “Pialsan theih”(1Tim.6:10,21) ahi. Huai omziak tak bel daan sehsa, Pasian in eite’ a dia a honpiak chihna ahi a, huai tuh Thukhun Thak i chih ahi.
    Huai “Ginna” pen “Khatvei a setdet” dia piak (Juda 3) ahih man in kuamah in i khek in i su lamdang theikei uhi. “Ginna thu” ah kuama’n i ngahdan uh i sung theikei uhi. Bible in :-
    a) “Toupa na Pasian uh thupiak ka hon piak na pom theihna diing un, ka hon thupiak na behlap diing uh ahikei a, na kiamsak diing uh leng ahikei” (Deut.4:2).
    b) “Thil kiselte Toupa’ a ahi. Thil hihlatte bel hiai daan thu tengteng i zop theihna diing a eite leh i suante’ a ahi ngitnget diing hi” (Diut.29:29).
    c) “A thute ah behlap ke’n. A hon etchet chiang in zuauthei a muh in na omkha diing” (Pau.3:6).
    d) “Kuapeuh Khris’ sinsakna thu a om gigelou a talek in Pasian a neikei. Huai thu sinsakna a om gige in bel Pa leh Tapa a neikop hi” (2Jn.9; Gal.1:6-9; 1Kor.4:6; Kil.22:18,19 nate leng sim in).
    Huaiziak in Bible thu toh kisai peuhmah ahihleh nang leh ke’n i ngaihdante, bang chituk a kilawm leh hoih hileleng i sung theikei uhi.
  7. Ngaihdan (Opinion):
    “Ngaihdan” tuh thil a piang nailou, ahihkeileh Bible in chiangtak a agen hiloute’ tung a mihing in ama’ ginthu/upmoh thu leh ama’ lungsim hoihsaklam kawksak a agen ahi.
    Michih in ngaihdan i nei chiat. Huai ngaihdante kikum khawm a kithuakzou tuah chiat diing a sinsak i hi uhi. Himahleh hiai ngaihdan in Ginna thu a hon kalh khak chiang in “Ginna thu” pen a tungnung zaw gige hi.
    “Ginna” leh “Ngaihdan” kichi tegel pen akituam vilvel, guam lianpi in a hal, leh gamkhat sunga tengkhawm theilou milian nih ahi uhi. Ginna in gam huap a nei a, huchi mahbang in ngaihdan in leng huap anei veve hi. A tuamtuak a koih a, a tuamtuak a amau mn chiat a kepbit ahih chiang in saptuam ah kituahna leh kipumkhatna a omden thei gige diing hi.
    Mihing in ngaihdante a tungnun sak nak ziak in pawl khenthangte a hong piangkhia hi. Mihingte’n i ngaihdan pen Bible mai a kunsak sawmlou a, Bible pen i ngaihdan mai a i kunsak nak chiang in kikhenna a piang hi. Bible pen i ngaihdan toh kibawllem diing hilou in i ngaihdante pen Bible toh a kibawllem gige diing ahi zaw hi.
    III. Saptuam’ Pianzia (The Nature OF The Church) :
  8. Saptuam khatkia ahi.
    “Hiai suangpi tung ah Ka (Khris) saptuam Ka lamtou diing a misi khokulh kongkhakte’n huai a zoukei diing uh” (Mt.16:18).
    Saptuam tampi lamkhiak diing Jesu in a genkei a “Ka Saptuam” chi in khat lel lamtou diing ahihdan a gen hi.
    Sawltak Paul in “A hon sapna pen lametna munkhat a sap na hih mah bang un, PUMPI khat leh kha khat kia a om”(Eph.4:4) chi in pumpi khatkia om ahihdan ahon hilh hi. Huai pumpi khat kia a chihthu hichi’n a hon hilhchian nawn hi. “Huai saputam tuh a pumpi ahi a, Amah bangkim a bangkim hihdimpa tangchinna ngei”(Eph.1:23; Kol.1:24). Pumpi khatkia om a, huai pumpi pen a saptuam ahileh bel “Saptuam kiahtkia” chihna ahi. Jesu’n, saptuam kaht kia ana lamkhia ahiziak in pawl tuamtuam a kikhenna pen Amah lemgeldan ahi khakei chih chiantak in i theithei uhi.
  9. Jesu Khris’ thuumna (Jn.17):
    “Pa siangthou aw,. nang kei non piakte na min in hum in, pumkhat ahitheihna diing un. eimah pumkhat i hih bang in”(17:11).
    “Hiai khawngte a diing kia a ngetsak ka hikei. A thu ziak ua kei hon gingta lai diingte a diing in leng ngetsak ka hi a vek ua pumkhat ahihna diing un”(Jn.17:20).
    Pawl tuamtuam a om diing hilou in Jesu’n Amah gingtute tengteng pumkhat a a omtheihna diing un ana thum hi. Gingtu hingal a, Khris a kipumkhatna pen ngaihsun hetlou leh sepsuah sawmlou a i om leh bel Jesu’ thuumna vuaksuak saktu ihi diing hi.
  10. Sawltakpite’ hasotna:
    “Huan unaute aw, na vek ua thu kibang na gen ua, na lak ua kikhenna himhim a omlouhna diing in lungsim munkhat leh ngaihtuah munkhat a diktak a na kizop chinten zawkna diing un kipumkhatna vom chinten diing in (1Kor.1:10).
    “Kingaihniamna leh migitna tengteng, thuaktheihna toh itna akithuak zou zaw chiat a lemna a kha a kipumkhatna vom chinten diing in” (Eph.4:2,3).
    Kha hatkhum a om leh Thutak tengteng a pii a omte’ laigelhte a kipan in pawl tuamtuam a kikhenna pen Bible tupdan leh paipihdan hilou ahihdan kichiantak in amuh theih hi.
    Saptuam khat ahi a, huai akipumkhat a om gige diing a sinsak i hi uhi. Tuni in leng saptuam ah denominationalism(kipawlkhen utna lungsim) a piangthei gie hi. “Kei ngaihdan pai gige leh…” “Kei”, “Ka” chih lungsim Khristiante’ lak a alet luat chiang in saptuam ah kikhenna a tungzel a, huai tuh pawl khenthangte hong kipatna ahi. Huaiziak in Jesu Khris in kingaihniamna hinkhua nakpitak in a gen a, Amah mah in leng a hinkhua tungtawn in a su langh hi. Sawltak Paul in, “Kikhen diing hiam ahikeileh kithupisakna ziak hiam bangmah hihkei un, Lungsim niamlak in micih in amah sang in midang hoisa zaw hen. Nalak ua kuapeuh in amah a kia enlou in midang a leng ensam hen…”(Phil.2:3-4) chi in nungzuite a hasuan hi. Himahleh saptuam pen kitungding tuah diing, nna kisepsak tuah diing leh kisuhat tuah gige dia sinsak i hi zaw uhi. Tuni in saptuam ah mahni kitawiletna, midangte sang a pilzaw theizaw, siamzaw leh hatzaw bang a kingaihtuahna lungsim tuh saptuam dik pianzia a hikha ngeikei hi.
    Thukhitna(Conclusion):
    Tuni’n saptuam pawl tuamtuam tampi hiai khovel ah muhtheih diing in om mahleh Toupa’ saptuam bel khatkia ahi. “Suangphum lepkhitsa loungal suangphum dang kuama’n a lem theitakei diing. Huai suangphum tuh Jesu Khris ahi”(1Kor.3:11). Jesu a nuai suangphah ahi a, Amah tung mah ah, Amah mah in A saptuam a lamtou hi (Mt.17:18). Huai saptuam tuh gendan dang in A pumpi ahi a(Eph.1:23; Kol.1:24), Khris ngei tuh a lutang ahi (Eph.1:22; Kol.1:18). Jesu’n pumpi khatkia a nei a (Eph.4:4), huai pumpi a gingtute tengteng kipumkhat a omvek di’n a hon deih hi (Jn.17:20,21).
    Saptuam khatkia himahleh mihingte’n Bible thu a eimah ngaihdan i va hel utnak ziak un pawl khenthangte a hong pian kholoh hi. Toupa’n, “Kung tengteng Ka Pa Vaan a om’ phuhlouh peuhmah bohkhiak vek ahi diing. Amaute awlmohkei un, mittaw makai ahi uh, mittaw in mittaw mah apii leh kokhuk ah akkhawm diing uh”(Mt.15:13,14) achi hi. Kipawlkhennat a bei theihna diing in “Toupa’ Laibu ah kiknawnni.”