By- Kamlianpau (Toupa’ Ni Vol:45; No.33
“ Choosy ” I chih chiang in, deihtelna bawl ding chianga chil-gil, chi khelkhel chihna ahi. Himahleh, tulai pau kizat dan ah, a khengval a ngentelna lam kawk zaw a bang hi. Huai tuh, “deihtel lua” chihna tuk ahi. Huaiziakin, “a choosy lua a eive (a deihtel lua a eive); ahihkeileh, “ deihtel (choosy) law ken, na vaal kha di..” chih kampau kiza sek hi. Bangteng hileh, leitung hinkhua ah I choosy na ding leh choosy louh deuhna ding a om. Deihtel kisa lua, ahilou lam hikha maimah chih a om thei. Ngentel louh ziaka bawlkik theihlouh thilsia maituah leng om tam law zel! Huaiziakin banglam a choosy ding chih toh kisai tomchik in I en ding.
Pathian Laibu in leng, “ Bangkim enchian zaw unla, a hoihlam peuhmah len chinten unla; gilou lam peuhmah ah ki hemkhia un ” a chih ziak in deihtelna bawl dia kisa tuh thil et kimvel deuh poimoh ahihdan muhtheih hi (I Thess 5:21-22). Beria khua te’n thugen a zakte uh thudik tak hina hiam chih theihkhenna di’n ngentel tak in Laisiangthou zong in a na enchian uh (Nas 17:11). Huan, Ephesa khua a saptuam te a na deihtel mahmah uh. Amau te’n, “..sawltak kichite na zeeta, amau zuauthei ahi uh chih..” a muhkhiak ziak un Jesu’n pak ta mahmah hi (Kil 2:2). Huaiziakin choosy louh ziak a damsung leh tangtawn a kisik det theih ahi chih a chiang mahmah. Ahihhang in khovel ah, ngentel (choosy) na dia ngentel lou a, ngentel louhna dia ngentel tampi ki om hi. Huai tuh Jesu gendan in, “ Thousi khisiang a sangawngsau valh te ” suak uhi (Mat 23:24).
Damsung koppih (life partner) zonna lam ah hihkhelhna uang mahmah. Sihna Meidil a pilut thei ginna thu ah tam zaw te ki choosy hetlou. Ginna thu a North pole leh South pole a kigamlat banga ki-kaak himahleh poisa hetlou ki tam. Mial leh Vak a kibat louh bang a kibang lou. Ki nung-ngat hit-het. Pau upa zang le’ng, “ ki-kelki ” hi mai. Ginna thu a kituak taka hakkol (yoke) puakkhawm theih vual hilou. Himahleh, hiaite ah kituak thei ziahziah. Huaiziak in saptuam ah, ginna paisanna leh ginna suk-dauna ( faith dilution) a tam mahmah (cf II Korin 6:14-17; I Korin 7:39-30).
Himahleh, tangtawn thil toh kisai khalou thilte ah ki deihtel (choosy) mahmah zel. Neih-le-lam thu bang ah deihtel mahmah. A hau deuh, khosak nuam deuhloute toh kituak kisa lou. Laisiam leh siamlouh ah deihtel (choosy) mahmah. Nasepna hoih neih leh neihlouh ah choosy mahmah. Lei buan laka a muat mang pah ding polam mel-le-puam thu ah deihtel petmah. Ahihkeileh, ei lampang a koppih hoih hi di’n kiman peuhle buaina omlou ding hinapi, “ huai toh zaw ka kituak kei uh, kei a ding chi hi kei, ka bit kei ” chi’n choosy mahmah. Hiai bang a choosy te’n leitung kia hilou, tangtawn a bei ngeilou ding kisikna hih kha ut mahmah uh. Unaute pilvang ni. Banglam ah I choosy zaw sek ua? Kingaihtuah hun ahi.