Na gou koi ah na khol a

By- Jamson –

Mihingte’n hiai Khovel ah I damsung un I hi­htheih khamkham un leitung gou I kaikhawm ua I kholkhawm uhi. Gou khol I chih chiang in hun hongtung diing a dia neih leh lam kaikhawm, sekkhom a koihching chihna ahi. A hat leh aneuzou deuh kichite’n lei gou tam ana kaikawm zou ua tam ana kholkhawm zou uhi. A zong ahau hitaleh kua­peuh in lei gou kaikhawm in a tam thei lamlam khol akisawm chiat. Lei gou a tamtheipen kaikhawm a khol theih bangbang a khol I sawm lai un van ah gou khol toh kisai I bangchi ngaih ua? Muat a mang thei lei gou khol hiaizah a mihingte’n I ngaihkhok lai un muat a setheilou diing van gou khol bangzahta in I ngaikhok ? Bang I chih chiang a koi a van gou khol hi ihia chihte I ngaihsun thak diing uh. Ka gou koi ah ka khol a, van ah gou bangzah kana kholta a chih hon ngaihtuah saktu ahih khakleh chi in tuni’n hiai thu ko’n gelh hi.

Bank accout bawl a huai a asum neihsate koih (deposit) ngeilou pa’n ‘ka bank accout ah sum bangzah a omta de aw’ chi’n kinepna a neithei kei. Bank accout leng honglou a sum leng koih ngeilou khat in a bank accout a sum tampi om dia ngaihsutna a neih lebel huai mi tuh mi hehpihhuai mahmah ahi diing. Tua toh kibang mah in chikmah a inn mun lei ngeilou khat in Khominthang a inn mun nei dia a ki­hisap mawk lebel thil haihuaipi suak diing hi. Leitung ah lei gou khollou khat in lei gou a nei ngeikei. Huchi mahbang in van a gou khol ngeiloupi khat in van ah gou nei ngeingei lou diing hi.

Gou khol toh kisai in Jesu’n a damlai mahmah in hiai bang in honna sinsak hi, “Lei a, leikha leh tui-ek in a neksiatna ah, gutate’n phenvang a agukna uah gou kikholkei un. Van ah, leikha leh tui-ek in a neksiat­louhna ah, gutate’n a phen ua a guk samlouhna uah, gou kikhol zaw un” (Matthai 6:19-20). Hiai akipan in leitung a gou khol lou a van a gou kholzaw diingte ihi­hdan uh I muthei. Lei a I gou kholte pen muat in sethei a, gutate’n gumang thei hi. Himahleh van ah bel muat thei in setheilou a, gutate’n leng gutheilou hi.

Huaiziak in Jesu’n leitung a gou khollou a van a gou kholzaw diing in honna hilh hi. Muat a mangthang lel diing sang in bel a mangtheilou diing mun a gou khol telhuai zawtham diing hi. Unau nang na gou koilai ah na kholkhawm a?

Na neih leh lamte na pindan sung a bit dia na gintakna koimun hiam ahihkeileh bank hiam a depos­it in na lei gou na khol ahi. Huai na neih leh lamte mah zang in van ah gou na khol ahi. Na neihsate zang a unau genthei leh kuahiam haksa, tagahte leh gentheite na panpih chiang in van a gou kikhol na hi. Jessu’n hichin a chi, “… Na neih tengteng zuak inla, mizawngte kiang ah pia in, huchi in van ah gou na nei diing… (Matthai 19:21, cf. Mark 10:21). Hiai thu Jesu’n tangval hausa adiing kia a agen ahikei. Neih leh lam mizawng leh tagahte kiang a pekhempeuh in van ah gou nei diing uhi.

Neihsate zang a mizawng leh tagahte pan­pihna tuh van a gou kholna ahi. Huchi ahihman in I damsung in tagah leh gentheite adin I neihsate bang­zah I pekheta a chih in I gou koilai ah bangzah I kol a chih hon hilh hi. A tam leh tawm thu ah hilou in i hihtheihna (talent) toh kituak in (Matthai 25:14-30), meithainu thilpiak bang in Pathian in i van gou honna simsak hi. Van a gou i neihna diing in hun lemtang i muh leh tagah gentheite panpih ni. Huan, Toupa Ni a i thilpiakte tungtawn in leng van ah i gou diing i khol uhi. Tu damsung a i thilhih khempeuh in i mailam hun diing bawl ahi chih phawk thakthak ni.

Van ah gou bangzah I kholta a? Lei a leikha leh tui-ek in a neksiat ua, gu­tate’n a guk theihna mun, I goute khollouhna diing mun a gou tampi kholkhawm a van a tawmchik kia khol kha I hi diing a lauhuai. Leitung a ei a diing kia a khol a Pathian lam a haulou ihih khak leh mihau hai pa toh I kibang diing (cf. Luke 13:21). Mihausa leh Lazar tangthu ngaihtuah thak dih! (Luke 16:19-31). Bangziak a mi­hausa pa asih a gimthuakna a apai ahi diing? A hauh ziak in maw? Hilou hial. A kongkhak bul a migenthei Lazar niteng a munapi a apanpihlouh ziak ahi. Huai migenthei panpih a van a agou diing a khollouh ziak ahi.

Jesu sinsakna dungzui in leitung ah hilou in van ah gou atam theipen khol chiat ni. Neih leh lam mizawngte kiang a pia a gou khol tuh supna hilou in ei adia gahpung ahizaw hi (cf. Philipite 4:17). Toupani a I thilpiakte leh tasamte a diing a neih leh lam I piakte tuh ei a dia gahpung, I van gou ahi chih thei in hunlemtang in neih bangzel in mitengteng tung ah thilhoih hih ni. Huan ginna inn­kuanpihte tung ah hikhol diak hen (Galatiate 6:10).