By – Kamlianpau (Toupa’ ni Vol.45;No.36)
Kal masa in, Bolivia, Lebanon, Sudan leh Ghana gamte a kipan mi khat chiat leh India a kipan Sudha Sundari Narayanan te’n America khua-le-tui hihna (citizenship) tang di’n White House ah laklutna hun zat ahi. President Donald Trump in a maute kipahpihna leh vaidawnna thu hiai bang in gen hi. “ Tuni’n America mi tengteng in hiai mi nga te a thupi America innkuan sung ah I na vaidawn uh. Tun, noute Pathian’ leitung (God’s Earth) maikaih a gam thupi penpen a ka gammi hihpih (fellow citizen) na hita uh… Khovel a kipahman gou manpha pen, deihhuai pen, leh gen zohlouh a mantam khua-le-tui hihna lohkhia na hita uh. Huai tuh America gammi hihna (American citizenship) ahi. Hiai sang a zahtakna sangzaw leh hamphatna lian zaw a om kei ”. Leitung vai ah Trump thugen a dik mai thei.. himahleh America khua-le-tui hihna sang a thupi zaw thamtham khua-le-tui hihna Khris’ saptuam te kia’n I neih uh a om.
America gam khua-le-tui hihna toh tehkhin vuallouh gam mi hihna thupi leh manpha tuh Khris’ Lalgam mi hihna ahi. Hiai tuh vanlam khoveng hihna ahi (cf Phil 3:20). Hiai Lalgam mi hihna a manphat dan Jesu’n hiai bang in gen hi. “ Van Lalgam tuh loua gou phum guk bang ahi; huai tuh min a mu a, a sel a, a kipah ziak in a neih tengteng a zuak a, huai lou tuh a leita ” (Mat 13:44). Hiai Lalgam a manphat luat ziak in, Jesu’n gou phum guk toh a na tehkhin hi. Huaiziak in mu tu’n, a neih tengteng zuak in tua gou kiphum omna a lei hi. Lei theih hileh neih tengteng zuak a leitaak tuh Khris’ Lalgam mi hihna ahi.
I theihsa bang in Lalgam tuh saptuam ahi (Mat 16:18-19). Hiai Lalgam ah Kolosa khua te behlap in a na omta uh (Kol 1:13). Amaute mial thuneihna-Dawi mangpa thuneihna a kipan suahtaksak a omte ahi uh. Himahleh, America gam mi hihna in’ khelhna lak a kipan zalenna a pe kei. Huai gam mi te mial thilhihtheihna in thuneih khum veve hi. Khris’ gam mite tuh Jesu Khris’ sisan manpha a tat te ahi uh (Kil 5:9-10). Hiai pen hihlin vuallouh Lalgam ahi (Heb 12:28). Hiai ah kumpite Kumpi, lalte Lal I Toupa Jesu Khris nasem tute in I pang uhi (Heb 12:28). I kumpi Toupa Jesu’ nasem hih khak hamphathuai mah hilou hiam?
A chiamsa bang in I Toupa Jesu Khris ni khat a hong painawn ngeingei ding. Huai hun chiang in thil tengteng tawpna hong hita dia, Lalgam mite a Pa Pathian khut ah a pekhe ta ding (I Kor 15:23-24). Khris’ saptuam hiloute tuh a khua-le-tui hikhalou ahihman un, Pa kiang a piakkhiakte lak ah tel khalou ding uhi. Huaiziakin Khris’ gam mi hih tuh khua-le-tui hihna thupi leh manpha penpen ahi.