By – Jamson Guite –
Aman bangmah hih hihetlou napi a midangte hih leh hihlouh toh kisai a buai chihtak a buai mi I mu ngei uhia? Hiai dan mihing Khovel a om mawk ahi. Khat leh nih lel hilou in hiai bang mihing tampi om ahihman in na muhkhak ngei ka gingta. Huchi bang mite lak a ei leng telkhak bailam mahmah kha diing ahihman in telkhak diing thil lauhauipi leng ahi. Thessalonika khua a gingtute lak ah leng mahni sep diing donlou a midangte nasep a kichinglah ana om uh hihtuak hi. Huaiziak in Sawltak Paul in hiai bang in thu na pia hi: “Na lak ua khentkhat danlou a omte tungtang ka za uhi, huaite’n na himhim a semkei ua, midangte nasep ah a kichinglahzaw uhi” (2 Thessalonikate 3:11).
Jesu’n a nungzui Peter kiang ah hiai bang in gen hi, “Chihtaktak in, chihtaktak in, kon hilh ahi, na naupan lai in na tai ah na kigak a, na utna peuh ah na hoh a; himahleh na upat hun chiang in na khut na zak diing a, midang in a hon gaksak diing uh, na utlouhna lam ah a honkai diing uh, a chi hi” (Johan 21:18). Hiai thu omzia Johan mah in ahon hilhchian hi. Bang chibang a Peter si a Pathian pahtawi diing hiam chih theihsakna dia Jesu’n a gen ahi. Hiai thu a genkhit phet in Jesu’n Peter kiang ah hon zui in a chihzom ngal. Huaikhit in Peter in a nungzuihpihte lak a khat Johan a muhtak in Jesu kiang ah, “Toupa hiai mi’n bang ahih dia?” (Johan 21:21) chi’n a dong hi. Jesu’n, “ka hongpai nawntan a om nilouh din deih leng, huai nang bang lunghimawh zenzen? nang hon zui in” a chihsan hi (Johan 12:22).
Peter in a nungzuih Jesu ziak a haksa thuak a upatak a si diing ahih a kitheih in Johan toh kisai leng ana dong hi. A nungzuihpih Johan sih diing dan toh kisai va dot sese sang a amah hinkhua diing kigen pen a alunglut zawk diing hi a. Huai hilou in kuahiam sih diing dan a dong zosop. Jesu’n dawnna bel midang sih diing dan nang toh bang kisai kha? Nang hon zui in chih ahi.
Hun khenkhat ah eite leng midangte nasepna leh midangte nasepdan kia buaipih a ei nasepna leh I sep diingte ngaisaklou a nelhsiah in I omkha tham diing uh. Tuabang a midangte nasep a vakigolh a midangte sep diing kia vabuaipihna tuh a dikkei. Etsakna – Mari leh Martha. Huchilou diing in Paul in Thessalonika khua a gingtute ana vauhilh khinta (2 Thes. 3:12). Midangte nasep a kidaihlah luatna diklou ahihdan Paul in leng Timothi ah meithai naupanglaite toh kisai in ana genkha hi (1 Timothi 5:13). Midangte nasep a iva kidaihlah luat chiang in “kei ka siamkei/chinkei” hiam “kei ka siamzaw/chinzaw” chih ngaihtuahna ahon pia hi. Hiai bang ngaihtuahna neih tuh Laisiangthou in ana mohpaih hi (1Korin 12:13-25). Midangte nasep a akan-aval a kigolhna in ei leh ei kitawisanna, kithupisakna hiam ahihkei leh ei leh ei kihihminsia a Pathian in sep diing a hon piakte ngaihsaklouhna ahon tun. Tuate banah, I nasep ah hon thadah sak hi.
Jesu’n Peter lunghihmohna thei in “hon zui in” chin hilh hi. Kua ahia I zuih chihleh aman eite’n I sep diing nna nei ahi chih I theih ngeingei diing uh ahi. Jesu’ nung I zuihna ua michih in nasep hoih sep diing I neitek uhi (1Korin 12:12ff; Romte12:7-8). Midangte nna a vakitaklah luat diing hilou in ei sep diing a I ma a koih a ompen awlmohtak a sem diing ahi. Kim leh kiang a mite ziak in ei sep diing poimoh taktakte semlou in omkei ni. Thil hoih hih diing thei napi a hihlouh tuh khelhna ahi chih lah I theichiat ngal ua (Jakob 4:17).
“Amah akipan pumpi tengteng kizopna chiteng sep ziak a lemtak a suktuah leh kizomkhawm a, hiang chih in a sep diing dan bang a sep chiang in pumpi a khang a itna ah amah leh amah a kilamtou hi” (Ephesate 4:16). Pumpi (saptuam) ah mimal chih in nasep diing poimoh I nei chiat uh. Nang a bang ahia? Nang sep diingte zouvek a midangte nasep enkai dia hihna nei na hihhial kei leh nang a dia piak a om nasepna ginomtak in sem hiathiat inla midang nasepdan ah vakitaklah lodah mai in. Peter in a Toupa kiang a “Toupa hiai mi’n bang ahih dia?” chia adotlai a Jesu’ dawnna thei gige in. “Hiai mi’n bang a ahih diing?” pen ah buailou in “kei bang ahia ka hih diing?” chih I dotna hi gige leh huai in I nna ah hon buaisak diing a midangte nasep ah kitaklahna diing hun omlou diing a. Toupa pumpi khang in itna ah amah leh amah in a kilamtou diing hi.