By – Jamson –
Khris doudalpa (anti-Christ) chih a zak chiang un tampite’n Khristian hilou kuahiam khat in mulkimna bei a nungzuite sawi a that dia apanlakna dan in ngaihtuahna aneipah uhi. Huaiziakin Khovel a makai tallang gilou asak deuhte bang Anti-Christ hisak pahpah uhi. Tuabang deuh in tuni a I thupi Khris Kros Melma I chih leng Khristian hilou kuahiamte genna hi diing a ngaihsutna hon pia diing in gintakhuai hi. Paul in Kros melmate toh kisai in hichi’n ana gen hi, “Mi tampi a om ua, a tanchin uh kon hilhta hi, amau Khrist Kros melmate a hihdan uh tu in leng kapkawm in kon hilh hi. Leilam thil ngaihtuahnate zaw a tawpna uh siatna ahi a, a pathian uh a gilpi uh ahi a, a thupina uh leng a daina uh ahi” (Philipite 3:17-19). Hiai ah Paul in Khris melma hilou a Kros melma chih thumal ana zat chitchiat ziak ngaihtuah tham ching mahmah khat ahi.
Hiai I changtel ua Paul in Khris Kros melmate a chihte ginglou mite hipahlou in Khristian mah kichite lak a kuate hiam a genna ahihdan a thutun (context) apan in muhtheih hi. Kros melma tuh Khris melma hithou napi in Paul in Khris melma chihpah louzaw in Khros melma ana chi chitchiat hi. Khovel ah mi tamtak in (gingtu leh gingtu lou) Jesu Khris min pen niallou uhi. A Khris min pentak kuaman a hawkei uh. A thilhihte uh siamtanna diing bang in Jesu min ana zang zomah uhi. A Jesu Khris min niallou napi in mi tamzaw thamte’n a Khros pen deihlouh in a kinial nak hi. Jesu neih pen ut napi in a Kros a kideihkei nak. Jesu’ it kichi napi in a Kros pen a kihawnak.
Romte hunlai in Kros tuh zahlakna, migiloute khailupna ahi. Huai Kros ah Jesu Khris in mihingte ziak in zahlakna khu in sihna ahon tuak. Khristiante a diing in leng Kros tuh sihna chikhat ahi. Taksa sihna hilou in I taksa utna (desire) leh duhgawlnate sihsanna, Khris deihdan zui diing a eimah deihdan (will) sihsanna, Khris a diing a I pumpi piakkhiakna ahi. Hiaite ziak in Khris pen deih napi in I hinkhua ah Khris Kros pen akideihkei nak hi. Hichi bang mi Khristiante lak ah tampi om ahihdan Paul in ana genta (Phil. 3:18). Kros hong kilat mateng Khris nungzui ginom hinapi’n a Kros hong kilat chiang in Kros akinialzel. Tuabang ahihman in Khris deih kichi kawmkawm napi in Kros melma hih ana baihlam mahmah diing abang hi.
I changtel uh Philipite 3:19na in kua bangchite Kros melma hihiam chih ahon hilh hi. Sawltak Paul gen dungzui in Khros melmate tuh agilpi uh pathian a neite ahi uh (Philipite 3:19b). Pathian deihdan pen sang a ei deihdan a paizawkna, Pathian hoihsakdan sang a ei hoihsakdan pen zuihzawkna, Pathian (bible) gendan pen sang a ei toh kituak dia Bible thute heikawi a ei gintakdan pen zuihzawkna tuh ei leh ei pathian a kineihna ahi a. Kros melma hihna ahi. Hiai bang mite ahi Paul in a pathian uh a gilpi a chih mite. Pathian deihdan hilou a ei deihdan, nopsakdan leh utdante zui a sepsuahna, taksa lunggulhte tangtunna tuh I gilpi pathian a neihna ahi. Hiaite tuh Kros a I kilhlup diingte ahi. Jesu’n kuapeuh a niteng Kros pua a hon zuilou a amah leh amah kimangngilh lou tuh ka nungzui a hitheikei diing ana chita hi (Luke 14:24).
A thilhih zumhuaite uh suang mite tuh Kros melma hi’n Sawltak Paul in ana gennawn hi (Philipite 3:19). A gilpi uh a pathian ua neih pen thupina a ngai mite tuh Kros melma ahi uh. Amau nopsakdandan a khosa a Pathian deihdan sang a amau deihdan paipih napi a kikhami sak mahmah. Huai dan a khosak zumhuai hinapi a kisaktheihna a ngai mite tuh Kros melmate ahi uh.
Paul in Kros melma hi a ana gen nawn khat tuh leilam thilte a alungsim uh nga mite ahi uhi (Philipite 3:19a). Leitung a I hinsung a I thutanna bawlte’n I tangtawn mun diing gel ahihdan phawk phalou in vanlam thilte sang in leilam thilte mah I awlmoh pipen ahizaw gige nak. Leilam thilte kia a lungsim nga mite tuh Paul in Kros melma ana chi hi. Eite tuh leilam thilte a lungsim ngalou a tunglam thilte a lungsim nga diing a sapte I hizaw uh (Kolosate 3:1-3).
Khristian khat hingal a, I gilpi I pathian a hih a, I thilhih zumhuaite a I kithupisak a, leilam thilte kia awlmoh a ngaihtuah I hih in zaw Kros melma I hi diing ua, I tawpna tuh siatna ahi diing hi. I phawklouh kal a Kros melma ana hihnilouh khak thil baihlam mahmah khat hi’n a muhtheih hi.