By – Kamlianpau –
Bible ah pianni lop ding thupiak I mu kei ua, etton ding leng a omlouh dan I gen ta. Lop ding hileh, eite khawng sang mah a lop taak zaw tham, Pathian in thupi taka a na zat mi tampi a na om uh. Amaute, pian ni bei a piang ahi tuan kei uh. Himahleh a birthday uh a na lawm het kei uh. Leitung a kum 30 val hong khosa I Toupa Jesu’n leng a pianni a na lawm kei. A sawltak minthang te’n leng a na lawm kei ua, gen leng a na genkha himhim kei uh. Himahleh, Pathian hing theilou, Ni-le-Kha leh Aksi te bia a, aisan a huaite kipisak te, huai ban ah khate (spirits) suklungkimna dia thilhih chiing te’n pian ni lop a na pankhia uhi. Huaiziakin, pian ni lop tuh Pathian theiloute thilhih va koppih khakna ahih chih leng I chian ta uhi ( cf I Kor. 10:14-22; II Kor 6:14-18). Himahleh, tampi te’n pianni lop poilou ahi chi’n selkalhna (arguments) tampi pe sek ua, tua te lak ah tamlou I en ding:
1.“ Bible in pianni lawm kei un a chi sam a…”: Bible in koimah ah, “ Pianni lawm kei un ” a chi kei mah. Hiai mah bang in Bible in, “ Christmas lawm kei un ” a chi kei. Ahihhang in Christmas I lawm kei uh. Bible in, “ Khuangtum khelhna ahi, tum kei un ” a chi kei. Himahleh I tum kei uh. Bible in, “ Sawm a khat pe nawn kei un ” chi kei mahleh, I pe kei uh. Bible in, “ Belamnou sisan in kithoih nawn kei un ” chilou napi’n, I kithoih nawn kei uh. Huaiziakin Pathian in poimoh a sakte a Laibu ah hon gelh a, a genlouh tuh achihlouh leh a phallouh ahi (cf Lev 10:1-2; Heb 7:13-14).
2. “ Sahkho thil ahihkeileh biakna vai a ihihlah hilou a…”: Tampi te’n hiai tuh, “ I pianni I muh I kipahziak a I hih ei mai voi, banghiam sahkho thil leh biakna thil a ihihlah hilou a ” chi’n ki siamtan sek uhi. Christian hinkhua in’ biak inn sung kia, biakna I neih sung kia a huam kei. I niteng khosakna a I thilhihte leng a huam tel vek. Khami taka khristian hinkhua zang khat in leitung hinkhua a beichianga a muh ding thupina a et ziak in pianni sang in sihni hoih sa zaw hi (cf Phil 1:23). Huaziakin Eklijiasti 7:1 ah, “…Mi pianni sang in sihni ahoih zaw ” a na chi hi.
3. “ Pathian kiang a kipahthu genna dia amah min a ihih eivoi ”: Jesu’n a mah min a thil kihihteng mawk pomvek tuanlou ahi chih I thei mahmah. Pomlouh mai hilou in “ Thil gilou hihte ” a na chihkhum zaw mah (Mat.7:21-23). Huchilou hileh, pawl tuamtuam te’n Jesu min a kipahthu genna dia Christmas leh kumthak a lopte uh Pathian in kipahpih mahmah ding hi. Diabol min a lawm tuan samlou ahihziak un. Huan, Paul in, “ Huan, na hih peuhmah uh, thugen ah hiam, thilhih ah hiam a mah ziak a Pa Pathian kiang a kipahthu genkawm in Toupa Jesu min in hih vek un ” chi’n thu hon pia hi (Kol 3:17). “ Toupa Jesu min a thilhih ” chih tuh a mah thuneihna, a mah pompihna, phalna (authority, approval, permission) zang a hih ding chihna ahi. Tua phalna tuh thil a genlouh a daihna (his silence) ah hilou in a gente ah sulang hi. Huaiziakin pianni lop ding gen khak ahihlouh ziaka Jesu min a thilhih ahi thei kei.
Toupa’ Ni Vol-45, N0-49