By – Kamlianpau –
Lot in Sodom phaizang lam manoh a kal a suan ziak in gitlouhna leh thanghuaina a dim khopi ah tenglut kha hi. Tua mahbang in pianni lop kichi le’ng Bible a omlouh kia hilou in, a manohna leh a gahsuah I etchiang in khamitna lam hikha himhim lou hi. Kal paisa ah hiai pianni lop, Pathian in hon piaksa sum-le-pai mawk zat beina, kemtu ginomlou hihna ahihdan I genta. Tuni’n, zanlam a maban sunzom in hiai birthday lop in’ a manohna lam, a kawkna lam leh a gahsuah etbeh zek I tum hi. Tua te:-
2. Khovel noptal-nopbawlna, salam nop-talna a tun sek: Pianni lopna Bible ah nihvei chiangtak in kigelh hi. Pathian hing belou leh theilou Aigupta kumpi Pharo in a pianni a na lawm hi. Hiai kumpi pianni lopna ah ankuang luina thupi tak a om. Huai kia hilou in, hiai ni mahmah in a tanghou bawlpa lutang tan in a om chih I mu (Gen 40:20). A gahsuah a hoih kei hial. Huan, Jesu hunlai mahmah in, kumpi huham leh gilou mahmah Herod in a pianni thupi tak in a na lawm hi. Herod pianni lop thu hiai bang a chiamteh ahi, “… Herod pianni a hongtun in Herodia tanu a lai ah a lam a, Herod a kipaksak ta a. Huaiziakin a nget peuhmah pe ding in thu a chiamta..” (Mat 14:6-7). Aban I sim zom leh hiai pianni lop ziak in Pathian mi hangsan, thutak gen lau ngeilou Johan mulkimhuai tak a thah in a om chih I mu ding.
Laisiangthou a pianni lop thu tangtak a kigelhna omsun hiaite ahi mai. Hiai te leng Pathian theilou leh kumpi giloute’ hih a na hi. Huan, huai pianni te ah nopbawlna, sa noptalna a om sek. Herodia tanu leng sa utna tokthou thei di’n hong lam a kumpipa a su kipak mahmah. Tulai a pianni lopna tam zaw tham ah leng, noptalna a tel teitei. Birthday party chi’n lu-le-taw phawklou a nek-le-dawn a kibual in, numei-pasal kal a maingal tak a gamta in a om uh. Mi tampi te khamtheih tuamtuam a koltang kipatni, thangtat kipatni. Ahihkeileh sa duhgawlna-noptalna suk pichinni, huai tuh khristian hihma a hindan teng ahi mai hi (cf Eph 4:17-19; Tita 3:3). Hichibang kho-phawk lou khop a nopbawlna (revelries) tuh sa thilhih (work of the flesh) ahihziak in Pathian gam tanglou ding achihte lak ah a tel kha (Gal 5:19-21). Hiai bang thilsia gahsuah tuh thilhoih ahi thei kei himhim (cf Mat 7:17-19). Thilhoih gahsuah bang hita zenzen leh leng birthday lopna tungtawn a Pathian pahtawi ding thupiak leh etton ding a om kei.
3. Inn sung kithununna-tate kepna a suse kha- Nu-le-pa mohpuakna lian pen tuh, “ A paina ding lampi ah naupang chiil in, huan a upat hun na-ngawn in leng huai a kipan a paimang kei ding ” chi’a thupiak imuh sepsuah ahi. Tate pianni lopsak, a paina ding lampi a chiilna ahi taktak diam? Pate kiang ah tate sukthangpaih louha, “ Toupa thuzohna leh hilhna a kem zaw un ” chih thupiak ahi (Eph 6:4). I tate birthday I loppih chiang in Toupa thuzohna leh a khalam hinkhua ding ua vakkhang (nurture) kha ihi diam? Khovel ngaihnatna, salam nopsakna, salam lunggel te tuibuak (watering) a phungvah leh khang hatsak ihi zaw uhiam? Khalam thilte maw ahihkeileh salam thilte? Koi pen lunggulh zaw ding? (cf Rom 8:5-8)
Khen khatte’n innsung ah I tate birthday lop i patpih uh. Hun hongpai zel a, hong khanglian ua, polam lawm te bang hon nei uh. Amaute a kipan birthday present a mu ua, ei tate leng I pesak uh. Ei birthday ah a lawmte uh I chial ua, ei tate leng honchial uh. Hong khodak chiang un khovel mite’ birthday lopdan te hon mu in hon eng ua, inn sung a nu-le-pa te leh lawm tamlou toh birthday lop hong lungkim huntawk nawn kei uh. A lawmte utoh koilam hiam a birthday party neihte hong ut ta uh. Tua hunchiang in I phal kei sim ua, ahihhang in a bul a na patpih nu-le-pa te mah ihihziak un, I khaam taktak ngam kei. “ Kua pat hiam aw, Akpi pat ” chih hong hi maimah ta. Hia’n inn sung kithununna koi tan a tun a? Hia’n kua te toh a kithuah sak a? Sapkik phak nawnlouhna gam tung khin uh hi mai thei hi.
Toupa’ Ni Vol-45, No-48