Church of Christ, New Delhi

“The Churches of Christ salute you” (Romans 16:16)

Kideekzohna bangchi khansak ding?

By – Mungmuanlian –

Kideekzohna! I theihsa mah bangin kideeekzohna (self control)  Christian hinkhua ah, apoimoh mahmah ahi. Ahi, kideek nading mun a tam mahmah. Kideekzohna chih i gen chiangin i lungsim ah, nek-le-dawn, teep-le-muam, chihte hong kilang masa pen a, tep-le-muam ana chingte, zudawn chihte bang i piak bawl khanak hi. Huiate apan le hikom in, Pathian thu toh kituak lou peuhmah i chiin khak, i hih khakte apan kideekna chiin i gen ding. I nungzuihna ah iki deek na ding mun tampi  a om.Galatiate 5:22&23“Khagah ahih leh, itna, kipahna, lemna, thuaktheihna, migitna, hoihna, muanhuiana, nunnemna, kideektheihnate ahizaw uhi; huchibang kalh lamin dan thupiak himhim a om kei hi.” Hiai a khagahte lak a tel, i neih ding kideektheihnateahi chih i theih behlap ding.

 BANGCHIIN KIDEEKZOHNA I KHANGSAK  THEIH DIA?

  1. PATHIAN THU THEIHNA IN- II Tim 3:15-17 “Huan Khris Jesu ginna ziak a hotdamna muding a nang hon hilh pil thei Laisiangthoute naupang nou a kipan theikhin na hi chih theigige in. Laisiangthou  peuhmah Pathian hatkhum a piak ahi a; huaiziak in thuhilhna ding, taihilhna ding, bawlhoihna ding, diktatna lam a kichiilna ding in a phatuam hi.”Kideekzohna I neih theih nading leh khansak na ding in, amasapen in, i deihdan leh pathian deihdan (will) i kibatsak masak a poimoh. Pathian deihdan (athu) i theih chiangin, masuan dingdan ompan ding hi. Ei thu hilou in, Pathian thu, amah deihdan ahi chih leh zuih ki sam ahihdan hon phawksak thei pan ding. Tuakia hilouin a khonung gu ding tanpha a theihna in iki deekzohna su hat mahmah ding hi.
  2. KIDEEKZOHLOUHNA  A LAUHUAI DAN PHAWK GIGENA IN – Matthai 5:29 “Na mit taklamin ahon hihpuk leh, khelkhia inlan paimang in, na sapum gehenna a pai sang in na sapum a hiang khat manthat nang a dingin ahoihzaw hi.” Kideekzohlouhna in bang hontun ding hiam chihte theih chet kilkel ding kiphamoh hi. A hon tutna ding mun thei a, hon subuai theite paih khiat mengmeng ding. Khelhna, khemnate i theihchet a poimoh mahmah. ( Mimal ah I kideekna mun ding iki theih chiat, sa duhgawlna, sa utna, mit utna, lawm-le-vual, tanaulaina apan etc ahi kha thei )
  3. THUAK DING  A KISAK KHOLHNA IN – Matthai 16:24 “Jesun a nungzuite kiangah ‘Kuapeuh in a hon zuihnop leh amah ki mangngilh in, a kros pua in honzui hen.”’ Khros puak chih a thumal tak( literally) a lakin leng nabaih lou ding ahih dan ki mu thei hi. Tunmun ding tunpih zoulou leh a pawzou lou ki tam mahmah dingin gintak huai. Tuabang ahih na ah thuak zek ding, gimzek ding a kisak kholh pen a lou theilou ahih ding ahi. Zak hak sim mah leh Pathian in I vualzoh ngei a hon chiam ahi  I Korinte 10:13“Mihing thuaktheih val himhim natung uah a tung ngeikei hi. pathian zaw a muanhuai hi, aman na thuaktheih val uh khemna na tuah uh a phalkei ding; na thuak theih na ding un khemna peuh ah taikhiakna lampi a bawlzaw ding hi.” Kideekzohlouhna hontun naak hi a theih khat tuh aman beisak khak ziak ahi, thuaklouh a hih theih ding sak khak ziak leh, manbei a hih ut ziak hikha nak hi.I Peter 4:1- “ Huchiin Khrist in taksa a thuak ziak in nou leng huchibang lungsim in kivan un; sa a thuak khinsa in gilou a tawpsanta hi.”

                         Tuateng banah khemnate, khelhnate apan a suahtakna I muh theih hun chiang a  nuam’ ding a ki sakkholh ding ahi. I tup pen tawmchik apan, them chik apan, awl awl a, kideek zohkiatan a lungkimna hilouin,  suahtakna, zaleena ahih ding ahi. Pan ilaak chiang in zaleena, muanna, kipahna te ki chiamtou in, awl awl a Pathian deihdan a bukimna ki manoh ahi chih phawk gige a,kipak tak a pang touh touh ding ahi.

  • HINKHUA A ANA VUALZOU SATE APAN SIN LE – I Thessalonikate  1:6&7 “Huan thu haksa thuak kawmin , khasiangthou a kipakin na pom ua, koumau leh Toupa zuite na hita uhi. Huchi in Masidonia leh Akhaia gam a gingta mi tengteng a ding in zuih ding na hi uhi.”Mihing hihna a thilhoih lou hihkhak chiangin lawm zon a baih sam mahmah. Amau le hithou chi a poisak louhna om thei te diklou ahih dan thei in, etton takte mah enton ding leh, huhna nget a ngaih leleng nget zawk ding. Tuakia hilouin ei mahmah leng mite etton a omding.
  • THUM GIGE DING – Luka 22:40“A mun ava tunin akiang uah, ‘ Khemna a na lutlouhna ding un, thum un’ a chi hi.”

Luka 22:46 “Huan a kiang uah, ‘Bangdia ihmu na hi ua? Khemna a na lutlouhna ding un thou unlan, thum un’ a chi hi.”

Romte 8:13“Sa dan a na om uleh, na si mahmah ding uhi; himahleh pumpi thilhihte Kha a na hihlup zel uleh na hing ding uhi.” Hihlup ngam louh, guuk hawi kheenkhaan neikei ni.