By – Kamlianpau –
Jesu tuh Pathian mihing hongsuak ahi (Johan 1:14; Phil 2:6-8). Bangzah hiam lel ah hilou in, “ bangkim ah ” ei mihingte bangbang a hong suak hi (Heb 2:14-17). Hiai ziak tak in mihing in a tuah khemna leh haksatna chiteng a man leng a tuak vek (Heb 2:18; cf Heb 4:14-16). Leitung haksatna leh khemna te tunga a vualzohtheihna di’n a leitung hinkhua tomchik tuh thumna hinkhua in a na zang hi. Hebru gelhtu’n, “ Amah tuh, a sa put laini khawng in, sihna laka amah hondam theipa kiang ah nakpitaka kikou leh khitui ke kawm in thumna te leh ngetna te a lan a, a kihtakdan a siam zel ziak in ngaihkhiak in a om hi ” chi’n a na gen hi (Heb 5:7). Mihing hatna thuguk thumna ahihdan leh thumna thilhihtheihna a theih chet mahmah ziak in thumna di’n hun a kipe gige. A nuai ah Jesu’ thumna hun a zatdan tamlou I en ding uh.
1. Zingsang khovakma in thumna hun a zang: “ Huan zingsang in, khovak ma tham in a thou a, a pawt a, gamdai mun ah a va hoh a, huai ah a thum…” (Mark 1:35).
2. Nitaklam in thumna hun a zang: “ Huan, amau a kikhensak nung in thum ding in tang ah a hohta a. Huan, nitaklam a hong hih in, long tuh dil laitak ah a om ta a, amah kia in gam ah a om a ” (Mark 6:46-47).
3. Zankhua in a thum: “ Huan, hichi a hi a, huailai in, a pawt a, thum ding in tang ah a kuan a, Pathian kiang ah zankhua in a thum a. Huan, khovak tak in a nungzuite a sam a…” (Lk 6:12-13).
4. A subuai ding omlouhna, mun tuam (gamdai) ah a thum: “…Mipi thupitak a thu zanuam leh a natna te uh hihdam ut in a hong kikhawm kheukhou ua. Himahleh, amah tuh gamdai ah a tuam pai a, a thum hi ” (Luk 5:15-16).
5. Tang/Mual ah a mah kia in a thum: “ Huan, mipi te asawl mang nung in thum ding in tang ah a tuam in a pai tou a…” (Mat 14:23).
6. Hun haksa penpen a tuah lai in a thum: “ Huan, a kiang uah, ka Kha a lungkham mahmah a, sihna khop hial ahi; hiai ah om unla, hon ven pih un, achi a. Huan, neukha in malam a vapai zeka, khupboh in, ka Pa aw, a hihtheih leh hiai nou in hon pel mahmah heh; ahihhang in kei mah thu hilou in, nangmah thuthu hi zaw heh, chiin a thum a ” (Mat 26:38-39).
7. Mipi lak ah a thum: “ Huan, Jesu a vandaka ,Pa ka thu na ngaihkhiak ziak in na tung ah kakipak hi. Ka thu na ngaikhe zel chih ka thei a; himahleh, mipi ding demduam te ziak in hiai ka chi ahi, nang non sawl chih a gintak theihna ding un ” (Johan 11:41-42).
Amah banga thumna hinkhua zang a thumnna thilhihtheihna gingta di’n I Toupa Jesu’n hon sinsak hi (Luke 18:1,7-8). A nungzui sawltakte’n leng thumna hinkhua a na pibawl mahmah uh (Nas 3:1; Nas 10:9). Huan, sawltak Paul in thumna a pibawl mahmah ziakin, “ Tawplou in thum un. Thum ngitnget unla, huai ah tuh kipahthu gen kawm in limsak un ” chi’n hon thuhilh hi (I Thess 5:17; Kol. 4:2).
Toupa’ni Vol.46, N0-18