By – Kamlianpau –
Jesu tuh, “ Sum kholna zawn ah a tu a; sumkholna a mipi sum khiakdan a en a…” chih I mu (Mark 12:41). Jesu’n hiai a thilpiak bawma sumkhe tengteng a etchet nung in meithai zawng mahmah tuh petu dik hi’n a mu (Mark 12:42-44). “ Na thilpiak tuh a guk a om theihna di’n; huchiin na Pa a guka mupa’n tuh a hon din ding” chi’n Jesu’n hon hilh (Mat 6:4). Hiai thu te’n chiangtak a hon hilh tuh thilpiak enchian tu taktak Pathian ahi a, mihing ahi ngei kei. Mihing in hon pahtak ziak a Pathian kipahna muh ahi gige tuan kei. A enchiantu Pathian in ka thilpiak a kipahpih diam? chih pen lungtang a koih gige ding ahi. Huan, hia’n hon sinsak thildang khat tuh: Biak inn a thilpiak hi’n panpih ngaite panpihna dia thilpiak I piakte hitaleh a enchiantu tuh Pathian ahi gige chih ahi (Mark 12:41-44; Mat 6:1-4). Huaiziakin I thilpiakte tungtawn a Pathian in a it thil petu I hihtheihna di’n tamlou I ensuk ding.
Pathian in a it thil petu tuh KIPAKTAKA PEMI ahi chih Bible in hoihtak in hiai bang in gen hi. “ Michih in it pipi a pelou in, piaklouh theihlouh bang a leng ngaihtuah a petuan lou in, a lungtang ua a tup bang zel un pe chiat heh; Pathian in kipaktaka pemi ahi a it ” (II Kor 9:7). Huaiziakin thil I piak vanglak leh kipaktaka piak ding ahi. Kiphaltak leh kipaktak a I piak keileh I thilpiak in ei ah kipahna leh lungkimna hon piaklouh kia hilou in thilpiak enchiantu Pathian mitsipna leh hehna hi zaw ding hi. Genthei leh tasamte panpihna thu ah Israel te Pathian in thupiak poimoh taktak a na pia hi. A unau gentheite lak a lungtang khauh louh ding, sumchitlouh ding, a tung ua thilphal ngeingei ding, a taksap awng uh hukna khop piak ding chihte thupiak in a nei hi (Diut 15:7-8). Hiai tuh thukhunthak ah leng ahi veve hi (cf Jak 4:14-16; I Johan 3:16-18; Mathai 25:31-46). Hichibang a genthei te thil a piak chiang ua lungsimnuam lou kawmkawm leh phallou sasa a piaklouh ding achi lai hi (Diut 15:10-11).
Genthei te panpihna thilpiak ah Masidonia te’n kiphal tak in, lungsim noplouhna himhim omlou in a pia uh (II Korin 8:1-5). Korinte kiang ah leng hiai hun a thilpiak pen laksak teitei bang hilou a phaltak a piak ahih ding ahi chi’n Paul in gen hi (II Kor 9:5). Huaiziakin en leng I biakkhawmna mun a thilpiak I hon tawite, ahihkeileh saptuam in I thilpiak akipan huhna I piak te leh tasam huhna I piakte tengteng phaltak leh kipak tak a piak ahih ngeingei ding ahi. Tasam panpihna toh kisai ah bang lungsim put I nei ua? Panpihna piak ding genkhawm ahihchiang in bang I chi ua? Kua hiam tasam leh genthei I inn ua ahong lut chiang in bang I chi ua? Amaute thil I piak chiang in bang ichi piak ua? Lungtang a itna taktak, kiphalna toh kipaktak in I pia uhia? Hiai dotna te dawnna pechiat ni unaute.
Toupa’ni Vol.46, No-11