Khristiante Hamphatna

By – (L) Tunthang Guite –

Khristiante hamphatna gennuam selua hinapi in, mihingte tunga Pathian thangpaihna i gen masa ding. Khelhna ziakin zentelte Pathian in ahon lehngatsan: “Huaiziakin asa uh zumhuaipi a kibawltuah dingin a lungtang uh duhgawlna bang a thilnin hihphal in Pathian in a lehngatsanta hi” (Rom.1:24). Hiai theitel­zaw dingin a Rom.1:18-23 sim in. Pathian lehngatsan a om ahuaisiatdan theihtelna dingin Rom.1:25-31 sim in. Juda nam Pathian tel himahle uh, tatlekna ziakin atung uah a lungkimkei. “Himahleh nang Juda kichi…..Nang dan suangpa, nang dan a na tatlek ziak in Pathian na hihminse zel ahi maw?…Pathian min noumau ziakin zenteltelak ah gensiat in a omta hi…” (Rom.2:17-24).

 Mi tengteng, Juda hi in zentel hitaleh, khelhna a puksia Pathian toh kilemlou ahi uh: “Huan mi tengtengin thil ahihkhial ua, Pathian thupina a tangzou kei uh” (Rom.3:23); “A gawl uh haan ki­hong ahi a, alei un khemna thu agen uhi, a kam sung uah gulgu a om hi” (Rom.3:13). Pathian muh a hiaibang hitel i hi; a poi ngei.

Himahleh, Pathian hon itna lian hinamaizen e! Za­wlnei Isai zangin Pathian in hiai thu kipahhuaitak ahon puangkhia hi. “Toupan, ‘hongpai un, ngai­htuah khawm dih veni! Na khelnate uh san au bangin ommah leh vuk bangin angou ding sand­up bangin sankhin mah leh belam mul bangin a om ding…’, a chi hi” (Isai 1:18-20). Hiai zawlnei genlawk, Pathian in khelhna nin apan mihingte sawpsiangna ding a a tapa Jesu Khrist hon piak Paul in Galatia gam a saptuam omte kiang ah hi­chin gen: “Himahleh, a hunbi ahong kimin Pathi­an in a tapa numei suan in dan nuai a hong suak in ahon sawlkhia hi, ta hihna i muh theihna ding leh dan nuai a omte tankhe ding in” (Gal.4:4-5).

Huaiziakin, dan a ching zoulou Judate leng Jesu Kkrist ginna ziakin atankhia chih i mu uhi. Juda leh zentelte Pathian in sapna kibang in a sam. “Tun bel dan leh zawlneite na theihsak, Pathian dikna tuh dan tellou a hihlat in a omta; huai tuh Jesu Khrist ginna ziak a, a gingtate tengteng adia Pathian diktatna ahi. Khentuamna himhim a om­kei” (Rom.3:21-22). “Amah i kilemna ahi; aman ei nihnte khat a siam in i kikal a kimelmakna

 banglai a hihchimta” (Eph.2:14). Pathian in a lehn­gatsan zentailte hi in, Pathian gensia Judate hitaleh, i Toupa Jesu Khrist sisan ziak in Pa Pathian toh hon kilemsak in, pumkhat in ahonbawlta hi.

“Noute Khrist a baptislut a omsa peuhmah Khrist in na kithuam ta ngal ua, huai ah tuh Juda mi aom theikei a, Grik mileng aomthei kei, huai ah tuh bawi aom theikei a, bawilou leng aom theikei, huai ah tuh pasal leh numei leng aom theikei hi. Krist Jesu ah navek un pumkhat nahi ngal ua” (Gal.3:27-28).

“Ngai un, Pa hon itna thupi hinatel e! Pathian tate chih a i om; tua chibang i hi him uhi. Hiai khong ziakin khovel in ahontheikei hi; amah a theihlouh ziakin. Deihtakte aw, tunah Pathan tate ih ua, bang chiin ahia i om ding chihbel a kithei tadihkei a, amah ahong kilak changin, amah bangin i om ding chihbel i thei hi, amah tuh a om ngeingei bangtak in i mu ding ahi ngal a” (1 Johan 3:1-2).

Ngai in itna, itna tawplou, Pa in a hon pia hi;

Gilou mangthang Pathian tate, Chih a i om theihna.

Ngai in A itna lamdang,

A hon itna lamdang Pa in eite A hon pia hi.

Pathian tate chihtheihna, tate chih a i om na’n

(Khristian Late 328)