By – (L) Tunthang Guite –
“A tungin thu aom, thu tuh Pathian kiang ah aom” (Johan 1:1). “Huai thu tuh sa ahongsuak a, eite lakah ateng, hehpihna leh thutak a dim in; athupina Pa Tapa tang neihsun thupina bang bang eiten imuta” (Johan 1:14). “Pathian in Khovel a it mahmah a huchi in a Tapa tang neihsun apia hi” (Johan 3:16). Huai a thupina Pa’ Tapa tang neihsun thupina bangbang i tan theihna dingin Pathian hihna nei, Tapa Pathian tuh sa hongsuak in Bethlehem gan insung ah Mary sung ngei apan ahongpiang, chih i Laisiangthou ah i mu uhi.
EITEN PATHIAN I IT THUK DINGDAN
Huai mah bangin, en leng Pathian i it dingdan tuh i omna masa i ginna nasep masa, i biakdan masa, i Pathian zondan masa, leh i hindan luite i Laisisngthou toh kituaklou ahihdan i sunglam mihinna in theichian a, huai bawldik tupna i lungtang tawng akipan hong piang khia a, huaimah sepsuahna tuh itna ahi. I Toupa Jesun hiai achi, “Nou non it uh leh ka thupiakte na zui ding uh” (Johan 14:15). Huai ziakin Pathian i itna, Khrist i itna tuh a thupiakte i zuihna in asepkhiak a kimu tuh ahi.
EITEN PATHIAN I ITNA KILAT DINGDAN
Eiten i sunglam akipan Krist itna i neihin i mihinpih lamah huai itna mah alang kheding, chih Toupa Jesun a gen nawn hi: “Thuchiam thak kon pia ahi, ki it un; ken nou kon it bang in nou leng ki it un. Na ki it uleh mi tengteng in ka nungzuite na hi uh chih huai ah athei ding uh” (Johan 13:34,35). Huaiziakin itna in thu gen ni, itna in thum ni, itna in la sa ni, itna thilpiak pia ni, itna in sem ni. Paul in Korinth saptuam kiang ah khalam thilpiakte lak ah itna tuh thilpiak thupi pen ahi, achi ngal a (1Kor. 13:1-13). Tanchinhoih, Thukhunthak dan, Thukhunthak doctrine zaw itna hi taktakna ahi. Hiai kha mangthangte itna in Tanchinhoih gen dingin hon sawl a; Toupa Lalgam – Saptuam – sung ah itna in khat-le-khat kitungding tuah ding in hon tawsawn hi. “Huchi in khut kaikhete leh khut zawte liktou un; huan khebai kilawi saklou a, hihdam a aom zawkna ding in, na khete uh dingin lamtang bawl un” (Heb.12:12,13).
KI-IT TUAHNA LEIBA DITKHIT NGEILOUHA KOIH DING
Sawltakpi Paul in Rome khua a Khrist Saptuam kiang a, “ki-it tuahna lou ngal kua mah bangmah ba kei un” (Rome 13:8) achih i zuih ding, i chiin ding ahi. Khrist itna i phattuampihna dia i it thuk apoimoh bangin, unau kal a itna a kilamtouhna ding in ki-it tuah (ki-it thuk) poimoh hi. Mi’n kei hon it uhenla ken kuamah it thuk sam keileng, huai tuh ken itna neilou chihna hi. Huaiziakin, it thuk ding pen Khristian khat adinga aloutheilou ahi a, huai mah bang in Khrist inkuan, huaibel a Saptuam, sung a om gingtute kal ah ki-it tuahna a om ngeingei ding ahi.