Amun: Phuaizang Village. Ahun: 6th -9th October, 2022
Sponsored by: Delhi Church of Christ
Hosted by: Phuaizang Church of Christ
Theme: “…hihlouh theihlouh ka tung ah a kinga ahi; Tanchin hoih gen kei leng, ka tung a gik hi” – I Corinthian 9:16
Pathian hehpihna tang in, gel leh sawm a om bang in ni sim 6th -9th October hun sung “ Three Days Bible class & Youth Evangelism Workshop Program” mangphatak in kizang zouthei hi. Hiai hun bangmah buaina om hetlou a hon zousak I Biak Pathian tung ah thupina leh pahtawi I pia hi.
Hiai program hong piang khiatdan tamlou thumapi dan in ka hon gen diing. Delhi Khris Saptuam in Annual plan ana bawl zel dungzui un, kum 2022 sung in Evangelism outreach khat vei Delhi polam a neih diing chih a guang galhsa sepsuahna ahi. Hiai sepsuah theihna diing in, Phuaizang khua Unaute toh pangkhawm a sepkhiat a lunglut thu uh Phuaizang khua Khris Saptuam Congregation hong zasak ua, huchi in Phuaizang a om Unauten leng kipaktak in zintun na naa leh a poimoh tha leh zung ah ka hong pang diing uh chi in dawnna om hi. Huchih dungjui in Delhi a Saptuamten, mohpuakna teng program bawl leh zintun na lam banah Bible class a mi tel dingte chial khopna leh logistic lam a poimoh bangkim teng Phuaizang a Saptuamten mohpuakna hon la un chi uhi.
A tup leh Ngim: Hiai program in a tup a leh a ngim bangzah hiam a om. A tup leh a ngimte anuai a bang ahi –
1. Tanchin hoih gen na nasep sem diing a kihasotna leh kisinsakna.
2. Congregation neuchik chik (Haichin, Phuaizang, Suangphuh, Ngalzang leh Lungchin) a om Saptuamte a dia ginna leh nasep sem diing a kisukhat tuahna diing.
3. Phuaizang khua leh akim akiang Tanchinhoih za khanailou lunglutna neite toh Bible study neih diing.
Hiaite banah bang ziak a Phuaizang khua kisawm sese hiam? Hiai mun pen khota, inn 9 khong omna ahi a, 99% Khris Saptuam ahi. Hiai kia leng hi lou in, a khua pen Luipang nuamtak a om ahih banah khovel thawm tuam tuamten subuai khalou, lungluttak leh thanuamtak ahun zattheihna diing a kigel ziak ahi. Program in a tup leh a ngim Pathian hehpihna toh a vek a buchingtak leh vuichingtak a sepsuah ahi.
Hiai a tung ate sepsuah kia leng hi lou a gah suang a hong om theihna diing in program nguntak in kibawl hi. Khatna ah, Tanchihhoih genna toh kisai a theihna lam Khanna diing hun masa kizang hi, theihna tellou in utna leh thathohna kia in bang mahtan kipang zoulou diing ahihman in theihna lam a Khanna diing in zingkal in Nasepte bu zillai in kinei hi. Huai nasepte bu zillai kineite boh zuina in workshop kinei tounawn hi. Workshop hun ah, hun masa ah Manipur Khris Saptuam dinmun siatdan leh hun masa lam a Saptuamten a sepdan nguntak a kikup khawmna om hi. Hun nihna ah, tu hun a tanchin hoih genna diing a chouna thupi taktakte genkhawm hi nawn a, a thumna ah huai chounate a thak hilou ahihdan, Paul in ana tuahsa thute ahihdan leh aman bang chi bang hun haksatak lak a Tanchinhoih na tangkoupih hiam chih nakpitak a kisinsakna om hi.
Hiai tegel a theiha leh theih siamna kisinsakna omte semsuah diing kihasotna hun mipi kikhop zinglam leh nitak in kinei zel hi. Huai banah polam mite leh unaute tate lak ah tanchihhoih genna sun hun in pai gige a, huai ah mi 18 tel thei uhi.
Hiai hun uap diing a hong pai khawm kho tuamtuam a pan hiai dan in ki pai khawm hi. Bible class a tel diing chialte sim louh in mi 48 bang kho tuamtuam kipai khawm in, Khotualte mi 30 kipha hi. Hiai hun a hun zang khawm a Workshop leh kikhopkhawmna leh zingsang bible a class a tel thei 78 kipha suak hi. Avek in Laisiangthou sinna nei diing I chial polamte a pan mi 10 banah ann huan diing a I chialte toh sim in a vek in 95 bang kipha zou hi.
| Sl.no. | Khua/ Congregation | Mi pha zah |
| 1 | New Lamka | 18 |
| 2 | Seitol | 8 |
| 3 | Mata Mualtam | 7 |
| 4 | Haicin | 5 |
| 5 | Mission Veng | 3 |
| 6 | Delhi | 3 |
| 7 | Ngalzang | 2 |
| 8 | Suangphuh | 1 |
| 9 | Kangpokpi | 1 |
| Total | 48 |
Bible Class leh Workshop paidan tangpi
Zingsang teng in Nasepte laibu a pan in zillai kizil gige hi. Hiai hun in Unaupa Siamkhan muan Guite in class la hi. A telten nungzui masate’ Tanchinhoih genna naa a sepsuah dan uh nguntak in kizil hi. Hiai hun a theih tuak mahmah zillai in hon sinsak ahih leh, Nasepte Laibu pen Thukhunkhun lui hun leh thukhunthak kizop khawmna, Jesu tanchin leh Pathian’ Lalgam tanchin Jesu in a damlai a thugente sepsuahna ahi hi. Banah Nasepte Bu a pan zillai hoihtak mai, Tanchin hoih genna ah, mipite I omna mun leh mual chiat a gen diing ahihdan, Nungjui Masate Jerusalem a sawi a omlai un a paina lam teng ua gen uh ahihdan hon sinsak hi. Huai kia leng hilou in ah Antioch khua a saptuamten Paul nasepna ki thuahpih uh ahihdan, huai mah saptuamten tu lel I zuih uh leh I na sepdan tangpi uh ahidan hon taklang hi. Angaihtuah huai thu khat bel, Antiochte dan a thugente panpih diing congregation om zilzial mah le hang, Paul a dan a gam a kuan Tanchinhoih gen diing mi kitaksap luatna pen thil patauh huai ahi.
Sun hun Workshop kinei a, hiai hun ah theihna leh theih kakna Khanna mah in hun kizang hi. Workshop ni masa pen ni Unaupa Jamkhogin in Manipur a Khris Saptuam honglut tung a Unau masaten tanchin hoih a puanzakdan uh hon gen hi. Aman a gen poimoh mahmah bel huai hunlai in “Michih in/ Unau chih in Kam kika in thu kigen hi” chi hi. Hiai in a hon theih sak bel tanchin hoih genna pen kam a gen diing mah ahi huai naa sepna apan in kuamah kizangkhai sak theih hilou hi. I kam mahmah a gen ahih chiang in huai in gah tampi suang ahi. Michih in I gen chiang in a mi tampi in za a, buchi theh bang in mun tuamtuam ah hong pou khia hi. Hichi bang na sepnate ziak in Manipur gam kho tuamtuam mun 40 val ah Khris Saptuam Congregration na dingkhia ngei hi.
A ni nih ni in Unaupa Siamkhanmuan Guite apan in “Tulai khovel leh, Tanchin hoih genna a haksatna leh Chounate” Chih thupi pansan in ki sinsakna hun om nawn hi. Hiai hun ah thu poimoh tampitak hon gen hi. Aman a genna ah, Tuma lam hun in khovel ah khantouhna, telsuina lam a naktak a khantouhna na om hi. Hiai hun ah mihingten thutak kichi pansan in khantouhna, mihing hinkhua bang chi leh a haksatna apan ki suakta ding hiam chi in thutak zong ana zong uhi. Huai ngaihtuahna om lai hun in telsuina tampi in thutak om ahi chih pansan in leitung mihingte hinkhua dawn zangkhaitu diing in thil tampi zongsuah leh sepsuah ahi ahi. Hiai thil muhsuahte pen leitung mihingte hinkhua haksatna I chih a tatak ahi a, huai haksatna pen suk kiam theih ahi chih ngaihtuah na a pan hong piang ahi.
Tua hun hiai bang ngaihdante ziak in khovel ah tanchin hoih gen leh thutak tangkoupihna na pen nakpitak in miten pom thei in zang khai zo deuh in Tanchinhoih puang zak theih in ana om hi. Himah leh tu hun in, thutak kichi om nawnlou (Relativsim or multiple truth or even Post-Truth era). Thudik leh thutak I chih mimal muh dan a kinga ahi chih khovel ngaihdan hattak a pai zang hun ahihman in Thutak (Truth) tangkouna hiai in nakpitak in hon dalkha hi chi hi. Huai lou in leng, khangthakte theihna lam a naktak kisakkholh hong poimoh hun tampi om diing ahi, legal leh constitutional rights khenkhat leng I theih siam hong poimoh hun om mahmah diing hi chi hi.
Workshop a ni thumna hun ah Unaupa L. James Guite in “Paul in Tanchihhoih puanzakna naa a sep dan nguntak a velchet na” hiai thupi poimoh mahmah, zingsang Bible class Nasepte bu toh tong khawm in theihna tampi hong pe khia hi. Hiai hun ah, Paul in nasep dan tuamtuam evangelism methods a zatte nguntak in hon sinsak hi. Paul a hong piang thak ma in, Unau masate sawi a omten gam teng a pai na mun chiat ua tanchin hoih gen uh ahih dan chiang tak in hong phou lak hi. Banah a poimoh mahmah, Mipi tamna, Juda mite kikkhopkhawmna innte leh Greek mite kipolh khawmna innte ah tanchin hoih gen diing lut gige ahih dan hong tak lang hi. Hiai apan zillai hoihtak, tanchin hoih gen diing kuan unaute om louhna a saptuam dangte kikhop khawmna thugenna hun lemchang va muh pen tanchinhoih genna diing hun lemchang mahmah ahihdan hon thei khesak thak thak hi.
Huai banah Tanchin hoih kithehdalh dan, Jerusalem apan Samaria gam leh Kawlmong pha hong kithehdalh dan enton in Lamka ei a ding Jerusalem dan a hisap a huai apan a kim leh a sehvel, Manipur District mun tuamtuam leh North East Pumpi zelhsuak diing in Lamka unau omte panlak diingdan road map hong takkhia hi. Thathoh huai mahmah leh theihna tampi in kikhang hi.
Zingsang hun a Nasepte bu zillai leh Sun hun a Youth Evangelism workshop in a tup paipi kibang ahi a, Tanchin hoih theihna leh theih kakna Khanna, tanchin hoih na sep sem diing a kigalthuamna hun ahi. Nasepte bu a pan zillai tampi tu hun leh tu dinmun theih chiang ban ah tua bang na sepna omte ei dinmun toh kituak a bang chi sepsuah diing hiam chih kisinsakna hun hi hi.
Saptuam Biakkhawmna hun zat dan
Huaite banah, Saptuam kikhop khawmna hun ah, thu genna om a, huai ah Unau Preacher-te Hauminthang, Khupmang leh Jamsonte banah Unaupa James Guite in mipite hasotna nei hi. Hiai hasotna hun ah tanchin hoih gen a poimohna hahtak hon gen nawn uhi. Hun masa ah Unaupa Hauminthang in “Namchih a pan Nungjuite Bawl un” chih thupi zang hon gen a, ngai khete kitai mahmah hi. Namchih a Nungjuite bawl diing a thupiak a omte adia mohpuakna lian mahmah ahihdan hon taklang hi. PAI UN chih thu mal pen thupiak khauh mahmah ahi eiten I nelhsiah vual hilou thupiak ahi chih hon gen chiang mahmah hi.
A ni nihna zing mipi khop hun in ah unaupa Khamkhanmuan in, “Buhlak ding a tam, himah leh a sem diing mi a tawm uh” chih pansan in hon gen nawn hi. Hiai hun ah pau lam tuamtuam I neihte uh hoihtak in hon gen a huaite pau lam taklou ahihdante hoihtak in hon gen hi. Paulam common mahmah, sepna lianpi nei in sponsor-tu in kapang diing chihte bang, ahih kei Tanchin hoih I omdan a le gen theih eivele chihte bang ahi. Aman hon genna ah tanchinhoih omdan (Character/behavior) tungtawn kia a gen theihna hi leh, Jesu in bang ziak Lalgam tan chin hoih gen a vak vak ahi di? Amah kan a midiktat Omlou hi a chin nakpitak chouna lianpi toh hon hasuan hi. Ni nihna nitak hun ah Unaupa khupmang in “Thouni in Lamni” chih pansan in Khris Saptuam kekzak ziak a tha nem a om maimai thei I hi kei a, tungdingna (Restoration) na nasep ei moh puak ahih dan Nehemia tangthu tungtawn in hong gen hi.
Ani Thumni zing kikhop hun ah, Unaupa L. James Guite in, Jona Laibu pan san in “Vei leh tak thei lou Tampi om” chih pansan in hon gen nawn hi. Hiai hun zillai poimohtak mai, Pathian in a thiltup hih tangtung teitei ahi a, Jonna mel 500 vel a gam la a pai diing a sawl omlai in utlou in mel 2500 val a gam la tai mahleh Pathian in sam kik thouthou in a sawl na mun mah ah pai diing in sawl kik veve hi. Pathian’ nasep sem lou diing a taikhe thei vual I hikei chih hon sinsak hi.
Ni nithumna nitak in Unaupa Hauminthang in, “Tanchin hoih gen kei leng ka tung a gik hi” chih thupi pansan in tanchin hoih genlouh pen Pathian leh Jesu thiltup hih buchinlouhna ahi thil lauhuai ahihdan hon gen khia hi. Ni li ni Pathian ni zingkal in Unaupa Jamson in thugenna nei in, Ginna lam a hatna chih thupi zang in thu hon gen a nakpitak in chouna leh hasot na hon nei in nuam mahmah banah ngaikhe tute a diing in lungsim hon khoih kha mahmah hi.
Nitak hun ah Mipi ki khopna om nawn in huai hun ah Unaupa Jamson mah in “Tanchinhoih Gen Tute Tan Tuan Hamphatna” Chih thupi a zang in nuamtak in hon gen hi. Aman a genna ah , Tanchinhoih gente pen Pathian a ding a “Minister” ahih mah bang un lei tung ah leng lian in lal veve uh hi. A tan diing ua seh hamphatna Saptuam mipiten I piak siam chiang in hiai nasepna pen thil haksa leh huphulh huai hiam hilou ahi. Huai banah, hiai nasepna pen hoihtak a semte a diing in mite zahtak leh ngaihsang ahi hih a kilatna mite a mangbat tatak chiang un Pathian’ naa semte mah zuan masa uh hi. Chih leh a dang hamphatna tampi hon gen a nuam mahmah mai hi.
Bible Study Class
Hiai nithum hun sung mah in, Sun hun teng in Polam mite Pathian thu hilhna Unaupa Jamson leh Unaupa Hauminthangten Pathian thu hilh na nei uhi. Hiai hun ah mi 16 a top tan in tel suak thei uhi. Amaute –
| Slno. | Name | Age | Address |
| 1 | Zoramthong@Thongpi | 80 | Behiang |
| 2 | Kamlamkhup | 40 | Suangphuh |
| 3 | Niandeihkim | 34 | Suangphuh |
| 4 | Kimneihngak | 48 | Champhai |
| 5 | Goumuanlal | 32 | Phuaizang/Lamka |
| 6 | Niangsan | 14 | Mata Mualtam |
| 7 | Ngaineihoi | 15 | Lamka |
| 8 | Chingtoilun | 19 | Suangphuh |
| 9 | Donkhanvung | 17 | Suangphuh |
| 10 | Chingzoukim | 18 | Suangphuh |
| 11 | Thangremsiam | 16 | Mata Mualtam |
| 12 | Khamsonmung | 17 | New Lamka |
| 13 | Thangsangmuan | 12 | Phuaizang |
| 14 | Nemneihlun | 11 | Phuaizang |
| 15 | Chinnunnem | 11 | Mata Mualtam |
| 16 | Nuamching | 18 | Suangphuh |
Hiai teng in Bile class hun sung in hoihtak in laisiangthou sinna nei ua hiai hun leng lohchingtak a zoh ahi chin ki record hi.
Hiai Bible class hun sung in mi nih Pathian Lalgam ah lut in Misianthoute toh gouluah khawm thei diing leh Pathian’ ta hihna tang in Pathian in Saptuam ah behlap hi. A Baptisma tanni uh 09/10/2022, Tuivel lui, Phuaizang khua. Amau te ahih leh:
| Slno | Min | Pa min | Kum | Veng min |
| 1 | Khamsonsmung | Unaupa Kaizalian | 17 | New Lamka |
| 2 | Thangremsiam | Unaupa Khaibawi | 16 | Mata mualtam |
Hun nuamtak mai zat zoh ahih nung in kikhelahtak mai in ah dated 10th October 2022 ni in mahni omna lam chiat zuan in zing ann nek zoh in kikhen ving veng hi.
*****