By – Jamson Guite –
“Huai nung in Jerusalem a apai diing dan, upate, siampu liante, laigelhmite apan thil tampi a thuak diing dan leh hihlup a a-om diing dan, ni thum ni a kaihthoh a a-om diing dan Jesu’n a nungzuite a theisak panta hi. Huai phet in Peter in amah a pituam a; “Toupa, hikei hen! Huaite na tung ah tung ngeikei hen!” Chi in, a taihilh hi. Jesu a kihei a, Peter kiang ah, “Setan, ka nung ah pai in; kei a di’n pukna na hi; Pathian thilte ngaihtuahlou in mihing thilte na ngaihtuah zaw hi” a chi hi (Matt.16:21-23).
Hiai a I Toupa Jesu Khris in Setan a chih pa kuadang ahikei a, a nungzuite lak a amuan mahmah khat, Van Lalgam tahbite piak dia a chiam pa Simon Peter ahi (Matt.16:16-17). Peter tuh nungzui sawm leh nihte lak a Jesu’n amuan diak ahihdan mellamdanna tang a mi thum telkhiakte lak a atelkhakna ah leng a kilang (Matt.17:1). Huan, A sih diing kuan mahmah a Gethsemani huan a Pa kiang a thum dia a pailai in leng Peter leh Zebedai tapa nihte a pi tuam hi (Matt. 26:36-37). Peter tuh Jesu toh khosa khawm a nekhawm-dawnkhawm a om himahleh hun khat ah Setan chih in a om. Toupa’n Setan a chi. Bang ziak a Jesu’n huai huntak a anungzui muan mahmah Peter Setan chi hi diing hiam? Hiai apan in eite’n bang zil diing I nei ua?
Peter tuh a damsung teng Setan ahi zenzenkei. Hun khat ah, huai tuh Jesu’n maban a atuah diing Pa Pathian in a gelsate tunglou diing a akham ziak in Setan chih a om ahilel zaw hi. Jesu Khris toh kisai a Pathian thilgel tuh leitung a hongpai a mikhialte a hotdam theihna diing a mite simmoh thuak a singlamteh tung a hong sih ahi (cf. Isai 53). Hiaite a Toupa’ tung a tung diing chih a ngaihtuah chiang in Peter in ngaingamlou in “Toupa, hikei hen! Huaite na tung ah tung ngeikei hen!” a chi hi. Huai Pathian thilgelte kalh a tangtung lou diing a ngaihsutna a neih ziak in Setan chih a loh. Gitlouh ziak hiam ahihkei leh amah mimal hoihlouh ziak a Setan chi a om ahi hetkei. “Pathian thilte ngaihtuahlou a mihing thilte a ngaihtuah zawk” ziak ahizaw.
Huchi ahihleh eite’n leng I ngaihtuah diing poimoh lua om hilou hiam? Hun teng ah hikei mahleh Peter bang in i hinkhua a hun khenkhat ah Setan I hihkhak hun omthei tham diing in kilang hi. Peter in Pathian deihdan kalh a ngaihtuahna a neih ziak a huai hun a Setan chih a a-om bang in I hinkhua a Pathian deihdan leh Pathian geldante deihlou a, tangtung saklou diing a I omkhak leh huai hun ah ei leng Setan chih in ki-om diing hi. Pathian thilgel, Pathian thupiak leh deihdante kalh a ngaihtuahna nei a kal I suankhak hun chiang in Peter dinmun a ding kha kihimai hi.
Hiai mun a Peter, Setan chih a a-omna ziak nawn khat ahihleh Jesu a diing a pukna ahih ziak ahi. Jesu’n kei a di’n pukna na hi a chi. Hiai a Peter I gen mahbang in eileng I unau a diing a pukna hihkhak theih hi. I unau kua hiam a diing a pukna a pan diing hilou in a ahatsaktu leh a tungdingtu hihzawk diing ahi (cf. 1Thes. 5:11; Gal. 6:1-2). Tuabang ahihlai a I unau khat pukna dia kamka a panlatu a I pan chiang in Jesu a diing in huai huntak a setan kihikha hi. Na omdan, na kampau leh na nasepte na unau a diing in bang zahvei pukna ahi khata a?
Pathian thilte ngaihtuah lou a mihing thilte a ngaihtuah zawk ziak in Peter tuh Setan chih in ana om maimah hi. Enleng Pathian thilte ngaihtuah lou a mihing thilte I ngaihtuah zawk chiang in Peter dinmun a ding kha, Setan chih a om ana kihi maimah hi. Huaiziak in Jesu a diing a setan ihihlouhna diing in Pathian thilte, Pathian deihdante ei deihdan a ngaihtuah a paipih maimahlou in Pathian deihdan leh Pathian thupiak dandan mah in ngaihtuah in zui ni. Mihing ngaihtuahna va guang sese dah ni. Pathian thilte tuh Pathian deihna bang mah a ngaihtuah diing ahi a, mihing (eimah) hoihsak bang a ngaihtuah diing ahikei. Setan chih a I omlouhna diing in Pathian thilte tuh Pathian deihna bangbang a ngaihtuah a sepsuah diing ahi.
Thusitna: I hinkhua ah Pathian thilgel leh Pathian thupiak nongkaisaktu hi diing in bangzahvei ngaituahna I nei a? Bangzah vei I kam I ka kha a? Bangzah vei huai diing in I kal I suan khata a? I unau khat sukhat naksang in a pukna diing in ngaihtuahna bangzah vei ina neikha a? Bangzah vei kam ka in I unau khat pukna diing in bangzah vei kal ina suankhata a? Pathian thilte, Pathian deihna bang a ngaihtuah lou in mihing ngaihtuahna toh bangzahvei I hinkhua a thutanna I ina bawlta a?
Asia deih ziak mong hilou a kua hiam deihsakluat ziak leh itlua ziak bang a Pathian deihdan thupiak omsa kalh a ka gamtat khak hung chiang in huai hun ah Jesu Khris a diing in kei tuh Setan ka suak hi. Ka hinkhua a ka ngaihsutna, ka kampau leh ka omdante’n ka unau khat a hihpuk leh huai hun ah kei tuh Jesu Khris a diing in Setan ka hi a, kei mimal hinkhua, ka unaupihte toh kal leh Saptuam sung a ka ngaihtuahnate Pathian thilte toh kikalh a mihing ngaihtuahna ahih hun chiang in kei leng Peter mahbang in Jesu Khris a diing in Setan hikha maimah diing ka hi. Peter bang a hoih deihlua, kua hiam deihsaklua leh itlua I kisak kal in Setan hihkhak ana baihlam mahmah diing bang hi. Jesu toh ton a khinkhua zangte ihihna ah I pilvan kei leh I heutu lian Jesu Khris in “Setan, ka nung ah pai in” a hon chikha nilouh kha diing.