By – Jamson –
Laisiangthou daihna I chih chiang in Laisiangthou in a genkhaklouh, Laisiangthou a thupiak I muhlouhte I genna ahi. Khristian kichi tampite’n Laisiangthou daihna toh kisai theisiamlou in a daihna pen a phalna dan in ngai uhi. Huai ngaihdan in Laisiangthou a kimulou thil diklou tampi sahkhua vai a chin leh zuih in a neisak. Huchibang mite’n tangtak a Laisiangthou a khamna kimulou peuhmah hihtheih chihna in ngai ua huai ngaihdan in thutak apan gamlapi ah apialmang sak hi. Huchi ahihman in hiai I thupi LAISIANGTHOU DAIHNA tuh thupi poimoh petmah ahong suak. ‘Laisiangthou daihna I chih bang hi hiam? Phalna hi hia ahihkei leh khamna’ chihte hatkhum Laisiangthou zang in saulou in I hilhchian suk diing.
Laisiangthou daihna – hatkhum ahih chetna.
Laisiangthou daihna in Laisiangthou tuh Pathian hatkhum ahihna sulang a, Pathian apan ahi chih chetna leh kilatna thupitak khat ahi. J.W Mc. Garvey in “Laisiangthou daihna tuh Pathian pilna leh a thute hatkhum ahi chih chetna lian mahmah khat ahi” ana chi hi. Huan, hiai unaupa mah in, “Thukhun thak tomkimtak ahihna in Pathian hatkhum ahihna a kikoupih” ana chih behlap hi.
Johan in a Tanchin hoih laibu gelh ah, Jesu Tanchin apoimoh teng tomkimtak a ana kichiamteh ahihdan ana gen hi (Johan 21:25). Ahuchih dungzui mah in Matthai, Mark, Luke leh Johan in Jesu’ pianna thu, a hinkhua, a sihna leh thohnawnna thute saulou chikchik lel in ana chiamteh chiat uhi. Tomkimtak a chiamteh ahihhang in Jesu tanchin toh kisai a a tasam leh a kimlou bangmah om hetlou in ana chiamteh theichiat mawk uhi. Etsakna tamlou lazual talehang. Jesu’ baptisma tanna a thil thupi tam a kigolhdan I thei chiat uh. A thupi diing dan ngaihtuah mah dih! Huchi himahleh tangkal tamlou chiklel in bukimtak in ana chiamteh thei uhi. Huchi mahbang in a thohnawnna, van a akalna thute ngaihtuah mah dih! Bangzahta in a thupi dia! Hiai thute tomkimtak lah bukimtak in ana kichiamteh hi. A tom ziak leh thilteng chiamteh vek ahihlouh hang in hiaite toh kisai a thu poimoh khat leng a tasam tuan hetkei hi. Hiai thute nang leh kei chiamteh diing hileh kimtak a chiamteh ahih theihna diing in laidal tampi a lut diing chih theihsa ahi. Huaiziak in Laisiangthou daihna tuh hatkhum ahihna chetna khat ahi I chithei uhi.
Laisiangthou daihna – Phalna hilou in khamna
Sinsakna diklou leh zuihdan diklou tampi hong piangkhiate Laisiangthou hilhchet khelh (misinterpretation) ziak leh theihsiamlouh ziak kia ahi khinvek kei hial hi. A tamzaw thamte Laisiangthou daihna toh kisai a sinsakna paipi (principle) bohsiatna ziak leh theihkhelhna ziak ahi tangpizaw hi. Adiak in denomination-te lak ah hiai thu theihkhelh/theihbuaina nasatak a om. Huchi komkal ah Saptuam sung bang ah leng a theisiamlou tampi ki-om veve diing in gintakhuai hi. Khenkhat in Laisiangthou daihna pen khamna hilou a phalna hidan in ngaihsun uhi.
Tampite’n Laisiangthou a tangtak a khamna a omkei nakleh phal ahi chih gingta in huaidan in sinsak uhi. Pathian thu toh kisai a hiai bang ngaihdan nei a gingtate’n amau mimal vai toh kisaite hiam, ahihkeh amau tung a huai bang in kisem leh a ut hetkei zel diing ua, dik asa hetkei hial diing uh. Laisiangthou a tangtak a khamna a omkei nakleh phal ahi chihna ahi chih sinsakna adik theihlouhdan I theihsiamna diing in unaute lak a atak a thiltung khat etsakna i la diing.
Ni khat unaupa James, Delhi a thautui thunna buk (petrol pump) ah a car toh thautui (petrol) thun diing in hoh a thautui buk ngakte kiang ah petrol hon thun un vachi hi. A ngakte’n petrol thunlou in diesel ana thunsak daih uhi. A car start a tai dia akisak leh bangmahtan taimanlou in a car mitnawnpah a, suk hin zohvual diing hinawnlou hi. A kidot thak chiang un thautui thunte’n petrol thunlou a diesel thun ana himaimah uhi. Huaitak in unaupa James in leng thautui buk ngakte kiang ah bang ziak a diesel na thun uh hiam petrol ka chi hilou hiam chia a dot leh “Diesel thun ken” na chikha sam a chin dawng mawk uhi. Unaupa’n petrol thun un a chih nung ‘diesel thun ken’, ‘kerosene thun ken’ a chih nawnnawn a ngai hetkei hial chih I thei. Huai bang mah in Pathian in a deihdan a genkhit nak leh a deihloute ahon gen nilouh a ngainawnkei hi.
Noah kiang a long bawlna diing a gopher sing zat diing a telkhehtak a Pathian thupiak in sing dang tengteng a posiah gaivek hi (Genesis 6:14). Thukhun lui hunlai a siampu chi dia Levi namte teltuam ahihman in Israel nam 11 dangte a pang theikei himhim uhi. Huan, thukhun thak hun a “lungtang a ging kilawm bawl” a la sak diing chih thupiak in (Ephesate 5:19) a dangteng a posiah khinvek. Huchi mahbang in Jesu’n a (pumpi) Saptuam hondam diing (Ephesate 5:5:23) chih in ama a hilou saptuam dang tengteng a posiah khavek hi. Hiai tuh posiahna dan (Rules of law of exclusion) a kichi. Pawsiahna Dan (Rules of Law of Exclusion) I chih chiang in, “Tangtak a thupiak a omnak leh huai thupiak in thildang tengteng a pawsiah gaivek” chihna ahi.
I niteng hinkhua uah leng hiai “pawsiahna dan” i hinpih ua, hiai dan bohsiat ahih peuhmah chiang in akizadah chiat hi. Pathian leng huaidan mah ahi. Toupa Pathian in Mosi kiang a suangpi apan tui pawtsak diing dan kichiantak (suangpi houpih diing) a thu apiakna in hihdan dangte a pawsiah gaivek hi. Houpih in chih in a chiang (rod) a suang asat leng a pawsiah kha hi (Numbars 20:8). Chiang in suangpi satken chih khamna thupiak omlou napi Mosi in a chiang a suangpi a sat leh Pathian thupiak zuilou a suak maimah hi.
Bible apan etsakna (Biblical Examples) –
Noah leh a long
Leitung mihingte gitlouh ziak, a ngaihtuahna uh ahoihlou lam ngen ahih ngitnget ziak in Noah hunlai in Pathian in leitung apan in mihingte tuichiim a hihmanthat a sawm hi. Himahleh Noah in Pathian mit ah hehpihna amu hi (Genesis 6:8). Pathian tuh diktat Pathian (God of justice) ahihziak in ahoih tuh a hoihlou toh hih manthat a utkei a huaiziak in Noah leh a innkuante tuichiim apan asuahtak theihna diing un long sui diing in thu apia hi (Genesis 6:14). Hiai tan ah thupiak a khawl kei a, Pathian in Noah kiang ah long bawlna a zat diing in sing chikhat, gopher sing a bikhiahsak hi. Hiai thupiak in sing dang tengteng a pawsiah vek. Huaiziak in Noah in Pathian kiang ah “Huai sing zang ken na chi sam a” chi in sing dang amah hoihsak a zang thei mokkei. Zang leng a zangkei bok. Noah tuh Laisiangthou daihna toh kisai a etsakna hoihpen leh etsakna luipen ahi. Pathian in teltak a thu apiak nak leh huai thupiak in thildang tengteng a nelsiah khinvek hi.
Nadab leh Abihu (Levitikas 10:1)
Nadab leh Abihu-te’n mei zatlouh chi a zang uh chih I mu. Ahihleh bang in a mei zat uh mei zatlouh chi (unauthorized fire) hisak ahi diing? Kithoihna khempeuh a mei zat diing chi Pathian in ana gensa a om. Huai tuh Maitam apan mei ahih diing chih ahi (Levitikas 16:12; Numbars 16:46). Huai maitam a mei tuh a mit ngeilouh diing ahi (Levitikas 6:3). Nadab leh Abihu-te’n a mei zatpen uh “Na zatlouh diing uh ahi” chi a khamna ana omkei mahleh “kithoihna a mei zat diing tuh maitam apan mei ahih diing” chih thupiak omsa in mundang apan a mei a lak uh diklou a suaksak a huaiziak a mohpaih a om in anih un amun mahmah a hallup in a om uhi. Mei lakna diing mun genkhit ahihnung laklouhna diing munte vagen doudou a ngainawn hetkei hial.
Antiok a Zeksum thubuai toh kisai (Nasepte 15:24)
“Ka pawl lak ua mi kuate hiam in noute kiang a thugen in, zeksum diing leh Mosi dan zui diing in ahon hihbuai ua, na lungsim uh a hon mangbangsak uh chih ka za ua, amaute hiai thu gen diing in ka sawlkei uhi.”
Mi kuate hiam Juda gam akipan in Antiok ah ahoh suk ua unaute kiang ah Mosi dan bang a zek na sum kei ua leh hotdam na hitheikei diing uh. Zentelte’n leng zek a sum ua Mosi dan a zuih chiat diing uh ahi chi’n ava sinsak uhi. Hiai thubuai Jerusalem ah sawltakte leh upate’n ahon ngaihtuah khawm ua, huai mite zeksum thu gen dia sawllou/thu pelou uh ahihdan Apostolte leh upate’n Antiok a unaute a theisak uhi. Apostolte leh upate’n huai zeksum thu va gente sawllou/thu pelou ahihman un amaute’n gentheihna diing thuneihna (right) a neikei uh. Apostolte apat khamna omkei mahleh a daihna un zeksum thu ava genpen uh a mohpaih chih I muthei hi.Thukhun lui siamputna (Hebrute 7:13-14)
“Hiai a thugenpa nam tuam mi ahi ngal a, huai nam lak a a kuamah maitam ah a gamtang ngeikei uhi. I Toupa, Juda nam lak a ahong suak ahi chih a kichian hi: huai nam thu ah Mosi in siampute lam thu bangmah gen anekei hi.”
Hiai ah Hebru laikhak geltu’n Jesu siamputna toh kisai ahon gen. Jesu tuh salam a Juda suan a mi ahi. Huaiziak in Mosi dan kizang lai hileh Jesu tuh I Siampu lian uh hitheilou diing ahi. Juda suante siampu in a pang theikei diing uh chih khamna omkei mahleh Laisiangthou in Levi suante siampu hi diing ana chi a, Juda nam toh kisai ah bel ana dai (silent) hi (Hebrute 7:14). Hiai a Hebru gelhtu’n Mosi dan kizang lai hileh Jesu siampu ahih theihlouh diing ziak ana gen a, huai bel Juda suante siampu a hitheikei diing uh chih thupiak omziak hilou in Juda namte siampu hihna toh kisai a Laisiangthou a daih ziak ana chi hi. Hiai apan in leng Laisiangthou daihna tuh phalna hilou a khamna ahihdan haih vuallouh in a lang chiang mahmah nawn hi.
Uzzia sihna (2 Samuel 6:6-8)
Kumpi Saul hun a Philistiate’n Israelte apan Pathian bawm ana laksak uh David hun in Jerusalem ah laklut hon sawm nawn uhi. Huchi’n Keriath Jerim a Abinadab inn apan in bawng kangtalai in hon pua uhi. Lampi a bawng hong kipalkhak ziak in Toupa Bawn Uzzia in akhut a ava vasawk ziak in amun ah asih lawh hi.
Mosi dan dungzui in Pathian Bawm tuh Levi-te’n a zawn diing uh ahi (I Kro. 15:2; Deut. 10:8). Namdang in Toupa Bawm a paw theikei diing chihna omkei mahleh hiai toh kisai in namdang ah Pathian a dai hi. Huai Pathian daihna tuh khamna ahihdan Uzzia sihna apan amuh theih. Toupa Bawm khoih ziak a Uzzia ahong sih takin in David in Toupa Bawm toh kisai a Toupa thupiak bang a hihlou ahihdan uh hon phokkhia hi (1 Kro. 15:2,13). Huaiziak in hiai apan in leng Laisiangthou daihna tuh phalna hilou a khamna hizaw ahihdan I muthei nawn uhi.
Tampi’n Laisiangthou daihna pen phalna dan in la uhi. A daihna pen phalna hilou a khamna ahihdan Deuteronomy 10:8 leh 1 Kronikil 15:2 I buktuah leh a chiang mahmah. Deuteronmy 10:8 ah, Toupa thukun singkuang zawng diing a Levite sehtuam hi uh a, nam dang toh kisai ah Laisiangthou dai (silent) hi. Hiai a nam dang toh kisai a Laisiangthou daihna pen phalna hilou a khamna hi ahihdan 1 Kronikil 15:2 in hichi’n hon gen chiang geih hi, “Huailai in David in, Levi mite chihlouh kuamah in Pathian bawm a paw diing ahikei: Toupa’n lah amau Pathian Bawm paw diing leh tangtawn a amah na sepsak diing in amaute ana telta ngal a, a chi hi.”
Thukhitna –
Laisiangthou a tangtak a khamna a omkei nak leh phal ahi chih sinsakna om mahleh Pathian thupiak paizia huaidan ahikei. Laisiangthou daihna pen phalna hizawlou in khamna hizaw hi. Hiai tuh I niteng khosakna a leng a dik hi. Pathian in teltak a thupiak khatpeuh ahon piak chiang in huai thupiak in thildangte a posiah vek hi.