By – Kamlianpau –
Jesu’ gentehna poimoh mahmah te laka khat tuh buhchi thehtu tanchin ahi. Pou napi a gahsuanglou tuh loulingnei laka kete ahi. Theh a om chi (seed) pen pou mahleh a dep mang loulingnei te’n khankhup ua khuhmang vek ahihman in, gahsuah ding neilou hi. Hichi’n Jesu’n gen hi. “ A khen loulingnei lak ah kia a, loupa tuh a hong khang sanga, a depmang ta a, gah himhim a gahta kei kei hi ” (Mark 4:7). A hilhchetna tuh, “ Loulingnei laka kete tuh thu zate ahi ua;himahleh a khosak zelna uah damsung khosak ngaihtuahna te,hauhsakna te,nopsakna ten a depa, a gah piching kei nak uh ” (Luka 8:14). Hiai thu mah Marka in hichi’n gen hi. “ Midang te tuh loulingnei laka theh ahi uh; huai te’n tuh thu tuh a zata ua, himahleh khovel lungkhamna te, thil dang duhgawlna te a hong lut chiang in, thu a dep a, gahlou in a om nak ” (Mark 4:18-19).
I khristian hinkhua hing leh gahsuah ahih ding leh a deptu I om saklouh ding ahi chih hiai gentehna in a su chiang mahmah. Huai dia I kiim a pou “loulingneite” hon dep ma a bohkhiak tawmtawm ding ahi. Marka in a gelhna ah, tua loulingnei te I hinkhua a hong lut achih ziak in lutsaklouh ding chihna ahi. Huai loulingnei a chihte- DAMSUNG KHOSAK NGAIHTUAHNA TE; HAUHSAKNA TE, NOPSAKNA (Pleasures); THILDANG DUHGAWLNA TE (desires for other things) ahi uh. Hiai te I hinkhua akipan I bohkhiak a I sihsak ngeingei ding ahi. I bohkhiak pah keileh, theihlouh kal in zungkai thuk in, a hong khanglian dia I khalam hinkhua tengteng ahon meklum-deplum ding hi. Huaiziakin hichibang te I hinkhua a lutsaklou dia naktaka pan I lak ding ahi.
I khristian hinkhua uh I et vengveng chiang in gah suang zou mahmah lou tampi om hi. I hinkhua ua bohkhiaklouh loulingnei deptu a tam luat ziak ahi. Pathian in tunglam thilte ngaihtuah dia hon deih lai in khovel khosakna ding kia ngaihtuah in I lungkham sek uh (cf Kol 3:1-2). Damsung khosakna ding te kia’n hon pumtuam gawp. Tu damsung a ding leh sihnung a nutsiat ding gou a tam thei pen kholkhawm sawm in I buai mahmah chiat uh. Hiai te’n khamitna gahsuah ding tengteng a lamang vek. Khalam thila hauhsakna-thilhoih leh thilphala hauhsak sang in a mangthang ding leigou a hauhsak keihkuih utna te’n I lungtang a luahdim zou ta. Nopsakna (pleasures) te ngaisang in salam noptalna leh noplenna in hon hiip mahmah. I mit te, I bilte, I ngaihtuahna te leh theihtheihna (senses) teng khovel thil te kia mah in I vaak ua, huai te mah I hinkhua ah I khum lut ua huaiziakin i khalam hingkhua tuh kilawpna leh kipahna neilou in hinglah thei mahmah nilnel hi. Si dia kisa in vul ningniang hi.
Huaiziak in, Pathian pahtawi dia gahsuang ni ichih leh hiai loulingnei a gente- Damsung khosak ngaihtuahna, hauhsakna, nopsakna leh thildang lunggulhna te I hinkhua a lutsaklouh a bohkhiak ngeingei ding ahi.