Church of Christ, New Delhi

“The Churches of Christ salute you” (Romans 16:16)

Khristiante Hamphatna leh Mohpuak

By – Jamson –

Genkholh a ana om dungzui in (Isai 62:1; 56:5; 65:15) nungzuite tuh Antiok khua a Khristian chih in ahong om uhi (Nasepte 11:26). Huai tuh Jesu Khris nungzuite kisapna, mite theihna, amin uh leng ahong hitoupah hi. Huchi ahihna ah Khris nungzui I chih leh Khristian I chih a kibang ahi. Huaiziak in Khristian hihziak a hamphatnate leh mohpuaknate I chih chiang in Khris nungzui hihziak a hamphatnate leh mohpuaknate I chihna leng hi ahi chih theisiam diing in I kingen masa ahi.

Mihingte’n i hinkhua uah ni thupi leh poimoh (bigs events) hi a I ngaih uh a om chiat. Etsatkna diing in I pianna (birthday), I kitenni (marriage), I graduate ni leh a dangdang. A tamzaw thamte bang ngial in houh a pianni uh a hinkhua ua ni thupipen a ngai in a ni ahong tun teng in haih ngeilou in lawm gige uhi.  Khristiante a diing in bel I pian thak ni, Khristian I suah ni kan a thupizawl leh I kipahpih a I ngaihthupi diing ni dang a omkei. I suahtakna ni thupi ahihman in I pian thak ni tuh ni dang tengteng sang a I ngiah thupipen diing ahi. Hiai ni tuh khelhna leh khelna man sihna apan I suahtak ni hi ahiman in ni thupi leh kipah ni a ngai theilou Khristian khat tuh mi hehpih huai hi diing in ka koih hi.

Khristian hih Ziak a Hamphatnate leh Mohpuaknate

Khristian I hih ziak in hamphatna tampi I ngah uh a om.  Huai I hamphatnate uh theihsiam lehang Jesu Khris nung I zuihna leh ana I sepnate uah masawn huaizaw diing a, kipaktak leh thanuamtak in Toupa na hon semsak diing hi. Khristian hih ziak a hamphatna I ngahte uh abanban in ensuk ni.

  1. Pathian I pa uh

“Ngai un, Pa hon itna thupi hina tel e! Pathian tate chih a I om; huai mah I hihna uh ahi hi. Hiai khong ziak in khovel in a hon theikei hi, amah a theihlouh ziak un. Deihtakte aw, tun ah Pathian tate I hi ua, bang chi’n ahia I om diing chih bel a kithei tadih kei hi” (1 Johan 3:1-2a).

Ahileh Pathian I pa ahihziak in bang I hamphatpih theih uh a om a? Pathian I pa a hih ziak a khristiante’n hamphatna I ngahte uh tuh –

  1. Pa Pathian tuh thilpiak hoih leh thilpiak bukim kipatna bul (source of every good and perfect gift) ahi hi.

 “Thilpiak hoih leh thilpiak buching tunglam a kipan a vakte Pa kiang a kipan a hongsuk ahi a, amah ah lamdanna leh kikhekna lim a omkei hi” (Jakob 1:17).

Huai thilpiak hoih leh thilpiak bukim kipatna I pa Pathian in a tate kiang ah a nget bangbang un thilhoih a pia hi. Jesu’n hichi’n a chi, “Ngen un, piak in na om  diing uhi; zong un, na mu diing uh; kiu un, a hon honsak diing uhi; Kuapeuh a ngen in amu a; kuapueh a zong in a mu a; kuapueh a kiu honsak in a om diing hi. Ahihleh noute kuapeuh na tapa un tanghou ngen leh, kuan suang na pe diing ua? Ahiihkeileh ngasa ngen leh kuan gul na pe diing ua? Huchi ahileh nou migilou in bawn, na tate uh thilhoh piak dan na theih un, na  pa uh van a om in a ngente thih hoih pe zawsem lou diing hia?” (Matthai 7:7-11).

  • Gimthuakna ah khamuanna a hon pia hi

“I Toupa Jesu Khrist, Pathian leh Pa, hehpihnate Pa leh khamuanna tengteng Pathian phat in om hen. Pathian in koumau hon khamuanna ngei in gimthuakna peuhmah a omte leng ka khamuan sam theihna diing un, aman ka gimthuaknate uah a hon khamuan hi” 2 Kor 1:3-4). Gim in thua chiang a I poimohpen khamuanna mah hilou hia maw. Gimthuak hun a khamuanna pe pa tuh I pa Pathian ahi. Huaiziak in amah pa a neih a hamphat huai mahmah.

  • Taihilh ngaih hun in ahon taihilh.

“Ka ta, Toupa sawina ngaineu kenla, a taihilh a na om in leng lungke sam ken; Toupa’n a itte sawi nak a, ta a kipahpih a vawnak hi, chi in. Na thuak uzaw naumai a diing ahi; tate tung a hih bang in Pathian in na tung uah a hih a; Pa sawilouh ta kua a om ngei a? Ta chihna teng loh a sawina lawhlou a na om un bel ta tak hilou in, sawn na hi ua kei dia. Huailou leng eite hon sawi diing, sa ah pate uh I nei uhi, huaite lah zahtak ngal hang a; huai sang a thupizaw in, I hinna diing in, khate Pa thuthu in I omkei diing ua hia: Amau zaw ni sawtlou chik, hoih a sak bangzel un a hon sawi ua, aman bel a siangthouna I tan theihna diing in, I hoihna diing in a hawn sawi zaw hi” (Hebrute 12:5-10).

Taihilhtu diing omlouhna mun ah thiltupte lamzang theilou a himahleh taihilhtu leh kawkmuhtu diing tamna ah bel thiltupte paisuak hi (Paunakte 15:22). Taihilhtu diing a Pa Pathian neih bangzahta hamphatna hi in I ngaihtuah ua le?

  • Chikmah in ahon taisankei diing

“Na lungsim putdan uh dangka deihtakna panglou hi hen; na thil neihsun tung uah lungkim un; amahmah in, bang chikmah in kon donlou kei diing a, pai leng kon paisan kei diing a chi hi. Huchi in hangsantak in Toupa hon panpihpa ahi ka laukei diing; mihing in bang ahon chih thei dia I chi uhi” (Hebrute 13:5-6). Chikmah chiang a hon taisan lou diing Pa neih tuh hamphatna tung a hamphatna ahi.

Jesu’n “Tampi piak a om tuh tampi phut ahi diing” (Luke 12:48) a chih bang deuh in hamphatna tuh mohpuakna toh a ton khawm nak hi. Pathian pa a neih khristiante’n tuh Pathian pa a aneih ziak in mohpuakna leng a neikhawm uhi. Van Pathian Pa a I neih ziak a I mohpuakte –

  1. Pathian kiang a I kitahlut diing. “Huchi in Pathian thuthu in om un” (Jakob 4:7a).
  2. Pathian naih diing. “Pathian naih unla, amah a hon naih diing” (Jakob 4:8a).
  • Jesu I Toupa leh Siampu lian ahi.

“Eite a diing inbel Pathian khat kia Pa, a om a amah kiang a kipan in bangkim a pawt a, eite leng amah a dia om i hi uhi. Toupa khat kia Jesu Khris a om hi eite leng mah ziak mah a om I hi uhi” (1 Korin 8:6; cf. Nasepte 2:38). “Huchi in van mun a paisuak khinsa Siampu lianpen thupitak, Jesu Pathian Tapa, I neih ziakin I thu gin i pomkik diing uhi” (Hebrute 4:14).

Jesu Khris I Toupa leh Siampu lian ahih ziak a hamphatna I ngahte uh –

  1. Jesu Khris tuh kumpite vaihawmpa ahi (Kilakna 1:5-6). Kumpi lel hilou a kumpite vaihawmpa Toupa leh siampu lian a neih bangzahat a hamphatna hi diing hiam.
  2. Jesu tuh thuneihna tengteng neitu ahi (Mathai 28:18-20; 1 Peter 3:22).
  3. Jesu Khris unaute I hi uh (Hebrute 2:11-12; Matthai 12:46-50).
  4. Siampu lian ahihna ah eite a din ahon ngetsak (Romte 8:34).
  5. I haksatnate ahon theihpih (Hebrute 2:17:18; 7:24-25).

Jesu Khris I Toupa leh i Siampu lian ahihziak a I mohpuaknate-

  1. A gen bangbang I hih diing uh ahi. “…Luke 6:46)
  2. A thupiakte zuih diing (Johan 15:10,14)
  3. A kiang I naih diing (Heb. 4:14-16)
  • Kha Siangthou I sung a teng

“Pathian tempul nahih uh leh Pathian Kha noumau sung ah a teng gige chih na theikei ua hia?” (1 Kor. 3:16). “Kisik unla na khelhnate uh ngaihdamna diing in Jesu Khris min in baptisma tang chiat un. Huchi in khasiangthou piak na tang diing uhi” (Nasepte 2:38).

Kha Siangthou I sung a aten ziak a hamphatna I tante –

  1. Hong hatsak (Romte 8:11-13; Ephesapte 3:16-20).
  2. I hatlouhna ah hon panpih (Romte 8:26-27).

I mohpuaknate –

  1. Kep siangthou diing (1 Korin 3:16-17; 6:18-20).
  2. Kha a om diing (walk in the spirit) (Galatiate 5:16).
  • Saptuam I innkuan ahi

“Himahleh ka hong om sawt khakleh Pathian inkuanpihte lak a mi bang chibang in ahia a om diing uh chih na theihna diing un ka gelh ahi; Pathian inkuanpihte Pathian hing saptuamte, thutak khuam leh kingakna ahi uhi” (1 Timothi 3:15).

Hiai ziak a hamphatna I ngah ahihleh Saptuam member tengteng I innkuanpihte ahi vek uh (cf. 1 Timothi 5:1-2; Matthai 12:46-50; Mark 10:28-30).

Saptuamte I innkuanpihte ahih ziak a mohpuakna I neihte –

  1. Khat leh khat kitun diing tuah diing (Hebrute 10:24-25).
  2. Puakgik kidawn tuah diing (Galatiate 6:1-20).

Thukhitna–

Khristian hihkhak nak hamphathuai hina tel e! Khristian hihkhak ziak in kipak in I nuam diing uh. Hampha I hihlam uh kiphok thak ni. Khristian hih ziak a kipak a huai hamphatna ziak a mohpuakna I tung a got a omte I ngaisak kei leh I hamphatnate mansuah thei ahi chih thei kawm in hamphatna ziak a mohpuaknate limsak ni.

“Unaute aw pilvang un, hichilou in zaw Pathian hing tawpsan diing in na lak uah kuapeuh sung ah ginlouhna lungtang gilou a hong kha diing hi. Tuni a chih lai un niteng in kihanthawn tuah zaw un, huchi a na lak ua mi kuamah khelhna khemhat ziak a hihkhauh a na omlouhna diing un. I ginna kipatna pen a tawptan a kiptak a I vom hoih phot leh, Khris a tan neite I hita uhi. Tuni in a aw na zak chiang un a hellai bang un, na lungtang uh khauhsak kei un a kichih laiteng” (Hebrute 3:12-15).