Lasak a Biakna a Kipahna

By – L.James Guite –

Thukhun Lui hun hi in Thukhun Thak hun ah hitaleh, Pasian biakna ah vanzat poimoh mahmah khat tuh Lasakna ahi gige hi.

Sam 146:1-2 “Toupa phat un! Ka hinna aw Toupa phat in,

                      Ka damsung teng in Toupa ka phat diing a,

                                Ka hinlai teng in Ka Pasian phat in la ka sa diing hi.”

Eph. 5:18-19 “Huan, Uain kham in omkei un. Huai ah tuh kideklouhna a om ngal a. Kha a dim in omzaw un. Phatna late, Pasian late, Khalam late a kihoupih chiat a Toupa kiang a la sa a na lungtang ua ging kilawm bawl in, I Toupa Jesu Khris min a Pasian, Pa ngei kiang a bangkim tung a kipahthu gen gige in.”

Hiai Lasakna pen hun bukimsakna hiam mipite kingakkhawmna hiam lel a zat diing hilou in kipaktak a Pasian phatna la sa a, hiai lasakna ziak a khalam a kipahna leh limna I ngah diing tuh I khalam khantouhna diing a thil poimoh mahmah ahi.

1. LA I SAKNA ZIAK (The Purpose of Singing):

A masapen in Bangziak a la sa I hia? Ahihkeileh bang ziak a Lasa a Pasian bia I hia chih I theihtel uh poimoh hi. La I sakna ziak uh golpipi in khenthum in khen leng I chi hi;

1. Lasa Dia Siam Ihi Uh (We are Created to Sing)

New Living Translation in hichibang in Sam laibu ana let hi;

Sam 103:22 “Toupa phat un, a thilsiam tengteng in, a lalgam a om tengteng in, mi tengteng in Toupa phat hen” (Praise the Lord, everything he has created, everything in all his kingdom. Let all that I am praise the Lord)

Sam 148:5 “Thilsiam peuhmah in Toupa phatna pia uhen, Aman thu a pia a, amaute siam a om lah ahingal ua” (Let every created thing give praise to the Lord, for he issued his command, and they came into being)

Pasian in a thilsiamte tengteng Amah phat diing leh Amah pahtawina la sa diing a a siam ahi. A thilsiamte lak ah a tungtuang penpen, Amah batpih a a siam mihingte’ pahtawina ngaisang diak hi.

• Lasa Dia Thupiak Ihi Uh (We Are Commanded to Sing)

Sam 98:4 “Leitung luah tengteng aw, Toupa pahtawi in nuamsatak in kikou unla, kikoukhia unla, nuamsa in lasa un. Ahi phatna la sa un”

Kol. 3:16 “Khris thu tuh a hauhna teng toh noumau ah omsak kihkeih un. Pilna chiteng a kisinsak leh kihilhtuah a om a, hehpihna lungtang toh Pasian kiang a phatna la bang, Pasian la bang, khalam la bang sa a om in” (cf., Eph. 5:19).

Pasian phatna lasak diing tuh deihtel thoh hilou in I zuih diing a thupiak ahi.

• Lasa Dia Phutluih Ihi Uh (We Are Compelled to Sing)

Nas. 16:25 “Himahleh zanlai in Pasian kiang ah Paul leh Sila a thuum ua, la a sa ua, hentaten a ngaikhia uh”

Paul leh Sila a omna uh mun lungzinhuai suangkul sung hinapi in Pasian kiang ah a thuum ua la a sa uhi. Dinmun khat pepeuh ah I om ahita zong in Pasian ta I hihna in Amah be diing leh Amah phat a lasa diing in sunglam a kipan hon phutluih hi. Midangte’ hiam ahihkeileh Pasian in hon phutluih hilou in Pasian ta hihna ziak a I hinsan (purpose of living) kitheihtelna in sunglam akipan a hon phutluih zaw hi.

Jak. 5:13 “Na lak uah thil hoihlou thuak aom uhia? Thuum uhen. Kipak a om uhia? Phatna la sa uhen”.

Lasak I siam ziak hiam, I aw a hoihziak hiam hilou in Pasian a kipan kipahna I ngah ziak in, Pasian a kipan tatna manpha I muhziak in, Pasian a kipan vualzawlna chiteng I muhziak in phatna la sak diing tuh I mohpuakna ahi.

• Toupa Phat Diing In (To Praise The Lord)

Heb. 2:12 “Ka unaute kiang ah na min ka gen dia, omkhawmte lak ah la sa in ka hon phat diing”

Rom. 15:9 “A hehpihna ziak a Jentelten Pasian a pahtawina diing un. Huaiziak in Jentelte lak ah kon phat diing a, Na min pahtawina diing in la ka sa diing” (cf., Sam 18:49; 2 Sam. 22:50)

Hiai a “La” chia kigen tuh Grik pau in HUMNOS a kichi a, “Phatna diing a la sa” (a song in praise of) chihna ahi. Huaiziak in Lasa a Toupa phatna tuh eite mohpuak liauliau ahi.

• Khat leh Khat Kithuhilh Leh Kihasuan Tuah Diing In (To Teach and Admonish One Another)

Kol. 3:16 “Khris thu tuh a hauhna teng toh noumau ah omsak kihkeih un. Pilna chiteng a kisinsak leh kihilhtuah a om a, hehpihna lungtang toh Pasian kiang a phatna la bang, Pasian la bang, khalam la bang sa a om in”

Eph. 5:18-19 “Huan, Uain kham in omkei un. Huai ah tuh kideklouhna a om ngala. Kha a dim in omzaw un. Phatna late, Pasian late, Khalam late a kihoupih chiat a Toupa kiang a la sa a na lungtang ua ging kilawm bawl in, I Toupa Jesu Khris min a Pasian, Pa ngei kiang a bangkim tung a kipahthu gen gige in.”

Khristianten phatna la I sak tuh khat leh khat I kihanthawn tuahna uh leh I kithuhilhtuahna uh ahi. Unau laigelhtute’n “Congregational singing is congregational teaching” ana chi uhi.

1. LA I SAKNA A BELHSAH DIING (The Engagement In Our Singing):

Pasian phatna lasakna tungtawn a kipahna I ngahtheihna diing in lasak minpu a salou in I lasakna a behlap diing ahihkeileh I telsak ngeingei diing a poimoh om hi. Sawltakpi Peter in eite kua hi a bang hih diing ihi uhiam chih hiai bang in hon hilh hi: “Amah kiang a hong pai in noute leng suang hingte bang in khalam inn a leptouh in na om ua, Jesu Khris ziak in Pasian pomtak khalam kithoihna lan diing a siampu siangthoute hong hi diing in” (1 Pet. 2:5).

Eite tuh siampu siangthoute ihi a, Pasian’ pomtak khalam kithoihna siangthou lan diing a seh ihi uhi. Hebru laikhak gelhtu in khalam kithoihna I lat diingte lak ua khat hichibang in hon hilh hi. “Huchi in Amah vang in phatna kithoihna Pasian kiang ah I lan gige diing uh, huai tuh a min gupna mukte gah ahi” (Therefore, by Him let us continually ofer the sacrifice of praise to God, that is, the fruit of our lips, giving thanks to his name) (Heb. 13:15). Siamputen kithoihna a lat peuhmah chiang in a kengbai hiam, demkai hiam laan ngeilou uhi. Eite’n khalam phatna kithoihna I lat chiang in demhuai tak in I laan diam, kigingloupi in, kilawpna tellou in phatna la I sa diam? Pomtak phatna kithoihna I lat theihna diing in I telsak ngeingei dia poimoh nihte hiaite bang ahi;

1. I Lasakna Ah THEIHSIAMNA I Telsak Ngeingei Diing Ahi

(We Must Engage The INTELLECT As We Sing)

Lasakna pen mahni kipahtawina hiam mahni nopsakna diing hilou in Pasian phatna ahi. Huai ahihkawmkawm in “Khat le khat kisinsak leh kithuhilhtuahna” (Kol. 3:16) ahi. Huaiziak in bang ahia I lasak chih I theihtel ngeingei kisam hi. Paul in, “Bangchi in a hita dia le, kha in ka thuum dia, theihtheihna in leng ka thuum diing. Kha in la ka sa dia, theihtheihna in leng la ka sa diing hi” (1 Kor. 14:15) a chi hi.

Theihsiamna ahihkeileh theihtelna I helbeh theihna diing in LAMALTE (La a kizang thumalte) limtak a I ngaihsut a teltak a I lohkhiak kuul hi. Bang la ahia ka sak chih I theihtel a, ei theihtel kia hilou a I lasak ngaikhetu in leng I lamal lohte a theihchian poimoh hi. Mi kuahiam in thu gen henla a thugen pen theih mumallouh in omleh kihilhna ahihkeileh kisinsakna hitheilou diing hi. Huaiziak in La I sak pen I kipahpih a huai la in I hinkhua a kipahna leh khamuanna leh hanthawnna a hon tut theihna diing in lamal kichiantak a lohkhiak a theihtel kisam hi.

• I Lasakna Ah I NGAIHSUTNA I Telsak Ngeingei Diing Ahi

(We Must Engage The EMOTIONS As We Sing)

Paul in Kolosate kiang ah, “Khris thu tuh a hauhna teng toh noumau ah omsak kihkeih un. Pilna chiteng a kisinsak leh kihilhtuah a om a, hehpihna lungtang toh Pasian kiang a phatna la bang, Pasian la bang, khalam la bang sa a om in” (Kol. 3:16) chi in kam kia a la sa vongvong himawklou in “Hehpihna lungsim” toh sa diing in a hasuan hi. Huchimah bang in Ephesate kiang ah a lasak didan uh a genna ah, “…Phatna late, Pasian late, Khalam late a kihoupih chiat a Toupa kiang a la sa a na lungtang ua ging kilawm bawl in” (Eph. 5:19) chi in “Lungtang” a kipan sak diing ahihdan a gen hi. Hiaite a kipan in I lasak pen EMOTION tel a sak diing ahi chih I muthei hi.

Ngaihsutna tel a lasak kichi omzia tuh, I lasak pen a lamal leh a thutuun I theihtel a, kipahhuai late kipaktak a sak diing, thathoh huai late thathoutak a sak diing, lungngaih huai late lungsim thawmhau kawmtak toh sak diing chihna hipah hi. Etsakna diing in;

1. KL 292 “Khristian sepaih masuan galkap di’n pai un,

  Jesu Kross pua unla malam ah pai un;

  Khris kumpi, heutupa’n, galdou di’n makai,

  Masuan un galmun ah, En un a puanzak”

Khristiante khalam galkap diing a kihasotna ahi a, thathou tak leh kithapetuahtak a sak diing ahi. Godawn a tuang a kuuipuk di hileh kilawm bang a I sak nguingui chiang in a la toh kituaklou a, lungsim ngaihsutna toh kisakhalou suak hi.

• KL 288 “Hondampa lamdang Jesu ka Toupa hi,

  Kei di’n Hondampa lamdang hi;

  Suangpi khi ah Aman ka kha hon selsak,

  Tua ah nopna luiluang ka mu”

Jesu in a hon humbitna tung a kipahna, Amah ziak a lungkimna leh lungnopna mu a khamuang a I om theihna ahihziak in lunglawng tak kawm leh lungsim sungnungpen a kipan kipahna hong suakkhia lah I pulak ngam zezenlouh a nuam khinkhian a I omna lungsim toh I sakkhiak hiahhiah diing la ahi.

• KL 225 “Hankhuk sung a lum hi,

  Hondampa Jesu;

  A thohna ni diing ngak,

 Jesu Toupa.

                Han apan in thounawnta,

                Vualtungtuang in a melmate zou;

                Mial thuneihna a pan vualzou in thounawn,

                Tangtawn a misiangthou toh vaihawm diing in,

                Thounawnta, thounawnta, Halleluijah Khris thounawn.”

Hiai ladawng ah a tangte lungsim a dahna toh I sak a, a la mahmah leng awl a I sak hiauhiau kisam hi. A thunon I hong tun chiang in lungkhamna hankhuk a kipan vualzou a hong thounawn Toupa Jesu I muh a kipahna thupitak I neih diing lungsim a koih kawm a kipaktak leh thathoutak leh kinoh zaw a I sak kuul hi.

Hichibang zel in ladawng khatpeuh I sak chiang in a lathu in bang gen a bang chibang ngaihsutna toh I sak kul hiam chih I theihtel a I sak kuul hi.

1. LA SAKNA A THEIHTUAK KHENKHAT (Other Important Information In Our Singing):

Pasian biakkhawmna a lasak nuam leh pomtak la I sak theihna diing in theih dia poimoh khenkhat I gen behlap diing hi;

1. Lapitu Theih Diing

1. Lapitu in, biakkhawmna mun a mattawm zual ahihkei ngalleh, innmun ah a lapi diingte kisinsa/kizilsa a a kuan ngeingei diing ahi.
2. Lapi diing a a din chiang in La nambar ngaihtak a, mi tengteng zak diing a nihvei thumvei gen masak teitei diing ahi. Ahihtheih leh la thuvual masa simkhe thei leng hoihsem hi.
3. La pat dek chiang in, solfa theite a diing in, la key la masa lehang awkim a sakna ah nuamtak in mipite dawnzang diing hi.
4. Lapitu pen goalkhuam kiphut bang a taanglou a din geugou diing hilou in, lavai kisin a khutvai poimoh hi. A pathun, a awihna, a patnawnna chihte ah mipite muhtheih diing a chiamtehna chikhat piak poimoh hi.
5. Lapitu in aw ngaihtak a sa a mipite pi diing ahi. Mipite, zuih maimah louh diing. Paungaihna a kizat leh paungaihna toh kinai deuh a ding a mipi tengteng zaktheih diing a la sakkhiak luahluah a pi diing ahi. Lasiam ziak a sak hilou in Pasian phatna dia lasa ihi chih theikawm a kizumpih louh diing ahi.

• Mipite Theih Diing

1. Lapitu a hong din phet chiang in la nambar a hon gen limtak a ana ngaihkhiak diing ahi. Mi dangte’n tang khat leh a thunon bang a sakzoh nung ua en I lasak di ina zon nilouh lai mawk leh Pasian phatna a telkhalou diing hihang.
2. Lapitu in a hon pidan limtak a ngaihsut a, hon kinsak pih hiam hon awl sakpih hiam, dungzui in leh a lathu dungzui in kipapiak tak a leh kilawptak a ina zuih diing ahi. Lapitu khutvai enlou pi a, a oihna hun beikhit nung bang a oih dodoih nilouh mawk diing hilou hi.
3. Lapitu in la apatna key ana chiamteh a, awluang dangte (tenor, contralto, bass) I zuihnop leh leng lapitu key toh kituak a na zuih diing ahi. Mahni mazawn a, mi awkaih toh kituakloupi a, leng vongvong a a na sak mawklouh diing ahi.
4. Lamalte diktak a loukhe kawm a Pasian phatna leh unaute I thuhilhna leh hasotna ahi chih thei kawm a kithalawptak a la sak ngeingei diing ahi.
5. Huai ban ah biakkhawmna a la kilawmtak a sakkhawm ahihtheihna diing in mahni innlam chiat ah leng Pasian la sakkhawmna neih gige poimoh hi.

THUKHITNA (Conclusion):

Tu Khristian hun a kha leh thutak a Pasian biakna ah lasak pen nelhsiah theih vuallouh biakna vanzat poimoh mahmah ahi. Pasian teel siampu siangthouten khalam kithoihna pomtak I lat ngeingei diingte lak ua khat “Phatna kithoihna” tuh hiai lasak a biakna ahi. Huaiziak in Pasian la I sak pen limtak leh kithalawptak a mi tengteng I pankhawmna diing uh biakna vanzat ahi chih I theihtel poimoh hi. Pasian phatna la sa dia siam ihi a, huai dia thupiak ihi a, huai dia phutluih ihi. Huaiziak in Pasian la I sak chiang in a kilawm thei bangpen a I sak kuul a, huai diing in theihtelna leh lungsim ngaihsutna I belhsah ngeingei poimoh hi. I lasak bang ahia chih theichian kawm a lungsim a ngaihsun vengveng a I sak diing ahi. I lasak pen khristiante, I kihanthawnna, I kihehnepna leh I kisinsak tuahna ahihziak in theitel kawm a theihsiamhuaitak a I sak kuul hi.

“Toupa phat un! Ka hinna aw Toupa phat in

Ka damsung teng in Toupa ka phat diing a,

Ka hinlai teng in Ka Pasian phat in la ka sa diing hi”

(Sam 146:1-2)