By – Thangbiakmang –
Jesu’n Haichi thehpa gentehna thu ah “Huan a khen lei hoih ah a kia a, a hong pou a, a leh za in a gahta” (Luka 8:8) chih ana gen hi. Tuni a Pathian sahkhua zuihna kong ah hichi zahzah gindan, zuihdan leh biakna dan kibatlouhna ompen ngaihtuah tham ching ahi. ‘Chi’ tuh a ompen ‘chi kibang’ hileh agah suang khiat a omte leng a kibang mah a hon suangkhe ngeingei diing hi. Tu Khristian hun ah Jesu Khris’ a omna tuh hinna thak khat hihna nei a thounawn diing a Tui a phumlut a omte ahi (Romete 6:4; 2 Kor.5:17; Gal.3:27; Kol.3:10). Huai tuh gendan dang in pianthakna ahi.
Jesu Khris thupiak bang dungzui a pianthakna ngahte Kha Siangthou piak in a om uhi (Nas. 2:38). Khris a thop a omte hinna thak nei a thilsiamthak hong hita ahihman un a a siampa batpihna nei a hong khankhiak ua, gah a hon suanna diing uh kha gah Paul in Galatia gambup a Saptuamte kiang ah kiteltak in ana gelh hi (Gal. 5:22). Kha gah in a tun hihna kua gen a na omte lak ah ‘HOIHNA’ neih a poimohna Laisiangthou ah hiai bang in I mu thei hi.
Gingtu hinkhua a nungzui lohching mikhat I hihtheihna diing in ei a gah muh a om ngeingei diing khat tuh ‘Hoihna’ ahi. Jakob in a laikhak ah “Ginna nasep neilou tuh a si ahi” (Jak. 2:17) ana chi hi. Khris a siamthak a omte “thilhoih hih diing him a siam” (Eph. 2:10) i hihdan mangngilh khak diing thil lauhuai ahi. Huaiziakin, Jesu Khris in “Va gah diing leh na gah uh om gige diing in kon sep ahi” (Jn. 15:16) ana chi hi. HOIHNA lam a gahsuang diing a lamet mahmah a I omlai a ei a hoihna muh a omkei maimah leh Khristian hihna a I kingaihtuah leh I kivel thak diing poimohna lianpi nei I hi kha diing hi.
I. KHAGAH – HOIHNA BANGCHI LATSAK DIING I HIA?
Khristian khat gah nei a hong khang diing a chi tuh a om I hi. Khristian tengteng in hinkhua a gah a neih ngeingei diing a om khat tuh ‘hoihna’ neih ahi. Sawltak Paul in, “Pathian hing temple na hih uh leh Pathian Kha noumau ah a om chih nathei kei ua hia?” (1 Kor. 3:16) ana chi hi. Huaimah tuh Timothi kiang ah “Pathian thilpiak nangmah a ompen mutkuang diing in” (2 Tim.1:6) chi in ana theisak hi. Pathian Kha in hong hihhalh guih diing himawklou in, Kha piak a omte’n gahsuan sawm a pan I lak poimoh ahihdan ahon taklang hi. Tanglai nite a kipan Pathian nasepdan muhtheih a om tuh, a utloute kuamah bankaih ngei lou leh Amah lam a pangzekte tunga panpihna khut zak diing a mansa ahihdan Laisiangthou mun tamtak ah muhtheih in a om hi. Thihoih hih a gah diing tuh mihing lampang a sepsuah diing ngiat a om tuh ahi.
- Jesu’n – Mihoih/hoihlou in a lungtang goubawm a kipan thilhoih/hoihlou a hon lakhe ngal a (Lk. 6:45).
- I mite gahlou a omlouh na diing un, thilhoih hih a kuhkal diing in zil uhen (Tita. 3:14).
- Thilhoih hih diing a siam; Amah khutsuak I hi ua; huai tuh I hihdan diing him ahi.
(Eph. 2:10).
- Thilhoih ahih diing uh, thilhoih hih a ahauh diing uh ahi (1 Tim. 6:18).
- Gitlouh zoh in om kenla, Hoihna in gilou zou zaw in (Rom. 12:21).
- Thilhoih hih chimtak kei ni (Gal. 6:9).
II. BANG CHIBANG HOIHNA NEI DIA LAISIANGTHOU IN HON SINSAK AHIA?
Tangval hau khat in Jesu Khris leitung a hongpai lai in, Heutupa hoih, khantawn hinna ka neih theihna diing in ‘Thilhoih’ bang ka hih diing? (Matt. 19:16) chih dotna Jesu’n a dawnna ah “Mikhat kia loungal kuamah hoih a omkei, huai Pathian ahi” (Mk. 10:18), “hinna neih na utleh Thupiakte zui in” (Matt. 19:7) chiin a dawng hi. Pathian kia Hoihna bukim nei ahi. Pianthakna a sawp siang a omte lak ah Kha gah hoihna a hong suahkhiat ahih chiang in Pathian batna nei a khang I hih kichetna ahi. Laisiangthou in hoihna suah a poimohdan hiai bang in a na taklang hi.
- Na thilhoih hihte uh a mu diing ua na Pa uh van a om apahtawi thei diing uh (Matt.
5:16; 1 Pet. 2:12).
- Khris a na omdan hoih uh gen thanghuaite hih zahlak in a om diing uh (1 Pet.
3:16).
- Nasep hoih chiteng a gah a, Pathian theihna a khang a Amah kipahlam a Toupa a dia kilawm a na hintheihna diing un (Kol. 1:10).
- Thilhoih hih leh thilphal mangngilh kei un, huai bang kithoihna tung a Pathian a
lung hi mahmah hi (Heb. 13:16).
Khristian khat in gah a suan ngeingei diingte lak a khat hoihna a hon suah khiat chiang in a mihinpihte a diing kia a hoih hilou in, Toupa a dia kilawm leh Pathian lungtun mahmah na a khosakna hinkhua zatna ahi chih I mangngilh louh diing ahi. Hoih suahna lam ah pilvanna diing lianpi ana om leuleu hi. Hoih khat kia’ Pathian deihdan tuh A thupiak zuih ahi. A thupiak khengval a hoihna suah sawmna tuh Pathian deihdan kalhna ahi chih khristian hinkhua a pilvan mahmah na diingte lak a khat ahi. Hoihsuah lua a kilang hina pi a, Hoihna nasepna dan in Khris’ sinsakna/Sawltakte’ sinsakna toh kikalh kha a ahihleh diklou a hi diing hi. Pathian itna huang polam a omna a suak diing hi. Jesu Khris in “Ki-it un, huchi-ahihleh Ka nungzuite chih mi’n hon thei diing uh” (Jn.13:34-35). “Non it uleh Ka Thupiakte na zui diing uh” (Jn. 14:15), “Thupiak na zuih peuhmah uleh Ka lawmte na hi diing uh” (Jn. 15:12-13) a na chi hi.
Khris a siamthak a omten Khagah hoihna I suah diing uh tuh Khris’ sinsakna polam ah hilou in, A hon sinsakna Thukhunthak a muh a ombang a gahsuan diing ahi. Jesu’n
“Amau tuh a gah uah na thei diing uh” (Matt. 7:20), “loulingnei/theipi in amau chi bang a suang” (Lk 6:15-19) a na chi hi. Huan ah, Jakob in a laikhak ah huai mah “Tuinak/Chi khuk khat in alim leh limlou a suang zel ahia?” (Jak. 3:12) chiin ana gen hi. Huaiziak in Khristian khat in hoihna a gah a suah diing tuh Khris’ sinsakna toh kituak ahih diing ahi.
III. HOIH SAWMLUA HINAPI IN HOIHVAL KHA HIHTHEIH AHI
I tenna khovel ah Khristian khat in hoihna lam a gah a suah diing tuh, khovel mite toh kibat theihlouna hun a omngei diing ahi. Chituh/phuhlut a I omna Khris ah ahihziakin, hoihna gah I suah diing leng Khris deihna bang hih a kiphamoh ahi. Sawltak Paul in, “Kha hihvui, hihlungkham kei un” (Eph.4:30), “Kha Pathian kiang a kipan hi hia, hilou chian masa un” (1 Jn.4:1) a chi hi. Khristian khat in hoihna suah diing i-neih sepsuah ahihna ah Khris deihna bang a gahsuah ahihkeileh Amah kipahpih lamsang hihsang in hih lungkhamtu I hizaw kha diing hi. Huaiziakin, Khagah hoihna I suah diing dan Paul mah in ana sinsak hi. “Vak gah tuh hoihna, diktatna leh thutak tengteng ahi” (Eph.5:9-10). “Lungsim hoihtak pu diing, thil bangkim thilhoih hihlam a etton a kibawl diing, thugin sinsakna a dikdan taklang diing in” (Tita. 2:6-7) ana chi hi.
Kumpi David in “Toupa aw, nang hote ka holou kei a hia? Huat petmah in ka hua (Sam 139:21-22) ana chi hi. Thukhunthak in, Pathian theilou khovel mite leh thugin dik hoihsa nawnlou a pialmang unau takloute tung ah lungsim put dingdan kiteltak in sinsakna ana pia hi. “Thuhilhna thu noumau hilhlouh lam a kikhenna leh pukna siamte a kipan kiveng/ kiheisan un” (Rom.16:17). “Unau minpu a ahihziaka danlou bang a om, mi huchibangte kithuahpih lou leh a kiang a nek louh diing ahi” (1 Cor.5:11). “Ka lak ua kipan thugousiah na muh bang ua omlou, danlou bang a om unaute tengteng kiang ah kihemkhediing in kon ngen hi” (2 Thess.3:6). “Ginglou mite toh kituaklou tak in hakkol pokhawm in om kei un” (2 Cor.6:14-18).
Khris nungzuihna hinkhua ah kop-leh-kai thuah hinkhua Pathian in chikmah in a deih kei hi. Khris nungzuihna ah laihawl pawl a pang chih a omtheikei hi. Huaiziak mah in Kilakna laibu ah Laodicea Saptuamte laikhakna ah “Na lum leh lum vanglak inla, na vot leh vot vanglak in” (Kil.3:14-16) ana chi hi. Juda in a laikhak ah “Nou zaw sawltakte thugen kholhte theigige un, Pathian itna ah kikem hoih un” (Jude v.17-21) ana chi hi. Unaute khat-leh-khat kikal ah bel lemthu a leng diing ahi (Lk.2:14); ahihziakin, midangte lak ah bel ahihtheihleh (Rom. 12:18) hih diing in ana gen hi. A hitheiloupi hihsak theih sawm a khutsau neihna tuh Pathian thuneihna chouna ahi.
“Huan ka unaute aw, nou tungthu zaw, noumau mah hoihna in na dim ua, na kihanthawn tuah thei uh chih keimah ngei in leng diktak in ka thei hi” (Rom. 15:14).