Church of Christ, New Delhi

“The Churches of Christ salute you” (Romans 16:16)

A Sianthouna Bang a Kiteena Kembit Ding in

By – Siam Khan Muan Guite –

A SIANTHOUNA BANG A KITEENNA KEPBITNA DIING IN KITEENNA A LUT DIING A CHITNA NEI KUATE HI HIAM CHIH THEIH MASAK A POIMOH

Kiteenna bawltu Pathian ahihmanin, Pathian Laisiangthou mah dong kawm in I en diing. A nuai a Laisiangthou thute pansan in mi bangchite kiteenna a lut diing a chin (qualify) hiam chih I en diing.

  1. Kiteenna tuh damsung daih diing ahi chih theichian mite a diing ahi (Rom. 7:1-4).
  2. Kiteenna mihingte utthu a suktawp theih hilou ahi chih theichian a pomkip mite a diing ahi. Hiai tuh Pathianin a tung a ageeldan ahi (Matt.19:7-8).
  3. Kiteennna tuh koppih in a sihsan ziak kia a midang neih kiik theih ahi chih theichian mite a diing ahi (Rom.7:1-4).
  4. Kiteenna tuh Pathian phalsak dan hilou a koppih maa a midang kiteenpih tuh angkawm ahi a, midang neihthak theihna neilou ahi (Matt.19:9) chih leh maksa nei peuhmah angkawm ahi chih theichian mite a diing ahi.
  1. NA KITEENNA THUCHIAM (marriage vow) LENKIP IN
  2. Kiteenna tuh Nu leh Pa paisan a sakhat a belhkhawm diing a kipiakkhiakna ahi chih chiamteh in (Gen.2:24, matt.19:5). Nu leh pa anglum khelah ngoihngoih lai a, taisan zou nailou kawmkawmpi a zinei –pasal nei dia kisak hetlouh diing ahi. A biik in numei tuh pasal lam manoh a va kuankhia ahihman in hiai tungtang ah a mansuah leh a kisakkholhna diing tamzaw diing hi. Kiteenna kizopna melhemsak hiam, kitansak thei diing kizopna dang himhim; nu leh pa nangawn huai nupa kizopna buaisaktu ahih leh paisan diing ahi chih Laisiangthou sinsakna theichian masa in.  
  3. Sihna in honkhen mateng: Kiteena tuh damsung daih kizopna ahi chih telchian inla, huai lenkip diing in ki-aapkhia in (Matt.19:6, 1Kor.7:10-11).
  4. Khat leh khat kitahlut tuah diing: Zi in bangkim a pasal thunuai a kitahlut dia a kiman diing ahi. Krist in a saptuamte a it bang a pasal in a zi it diing a, a kitahlut a ngap diing (Eph.5:22-33). Hiai thukhun zui lou in kiteenna kip leh hoih piang ngei lou diing hi.
  5. PATHIAN LIMLAH (PATTERN) BANG A KITEENNA IN A SIANTHOUNA HON KEMBITSAK
  6. Kiteenna mihing apan suak ahi kei a, Pathian a kipan ahi: (Mt. 19:4, 5; Gen. 2:24). Mitengteng lak ah kiteenna zahtak hihen (Heb. 13:4; cf. I Tim. 4:1-3; Prov. 18:22). Kiteenna tuh mitengteng adia phalsak himahleh, kuamah tung a alouthei lou bang a phutluih leng ahi sam kei hi. (I Cor. 7:6). Nuam gige lou hi—huai tuh salam thilte ziak bang (Matt. 19:11, 12) ahih keileh thil dang ziak bang in leng ahi thei hi (I Cor. 7:1, 7-9, 26-28).
  7. Kiteenna tuh a siangthou pasal khat leh A siangthou numei khat sakhat suahna ahi: Mikhat in khatvei thu in koppih khat kia neithei hi. A buahsa mite koppih dia teellouh bilbel diing ahi (Gen. 2:24; I Cor. 7:2).
  8. Kiteenna tuh kipumkhatna a lamtouh ahi: Pasal naakguh apan a numei siam ahihna in hiai bang ngaituahna hon neisak hi. Nihte sakhat a hong suak uhi (Gen. 2:24; Mt. 19:5f; Eph. 5:31).
  9. Kiteenna tuh “ta” neithei diing a leptuak ahi: Nupa masa Adam leh Evi-te kiang ah Pathian in, “Hong pung semsem unla, gahphatak in hong om un” chi hi (Gen. 1:28). Pathian in numei khat leh pasal khat kia ana siam a, huaite apan leitung maikaih luahsuak diing bul munkhat a namchih a hong piangkhia hi (Acts 17:26). Numei naupang lam deuhte pasal nei a ta nei ding in Paul in thupia hi (I Tim. 5:14). Tate suang a kep piiching dIing tuh tunglam apan hong pai mohpuakna ahi.
  10. Kiteenna ah kisepsaktuah diIng mohpuakna a om: Numei leh pasal tuh ki-awnghu tuah diing in kipoimoh tuah uhi. (Gen. 2:21-24). Amau mohpuakna sepsuahna diing in poimohdan kibang tuak uhi. Numei in a pasal a zahtak a, bangkim a anuai a a kitahlut diing ahi, huchimah bang in pasal in a zi a it a, amah pumpi bang a a kep diing ahi (Eph. 5:25-33; Col. 3:19: I Pet. 3:7). Amau tuh hiaite a kipiak tuah diing uh ahi: Itna a kipiak tuah diing uh ahi Eph. 5:25, 28, 33; Tit. 2.4. Hamphatna ah tankhawmpih ahi uhi (I Cor. 7:3-5; Cf. I Pet. 3:7). Ta neihna ah leng tankhawm nei uhi (I Tim. 5:14; Tit. 2:4, 5).
  11. Kiteenna tuh pasal lupen hihna nuai a kivaipuakna ahi. Tunglam apan thupiak om tuh pasal lupen hihna ahi a, numei tuh thuneihna piak ahikei hi (I Tim. 2:13; Gen. 2:21-23). Cf. (Eph. 5:23, 24; Col. 3:18; I Pet. 3:1).
  12. Kiteenna tuh sahkhomitna a hinkhua zatna diing ahi. Khovel a inkuan ana om masa Hebrew mite inkuan ah Pathian kiang a kipumpiakna in mun poimohtak ana luah hi. Sahkhomitna a kilamtouhna ah Hebrew mite inkuan ana detdou in ana kip mahmah hi. Insung maitam ah paten siampu bang in naseem ua, a tate uh phatuamngaitak in Toupa thu sinsak gige uhi (Deut. 6:7; 11:19; Ps. 78:4; Prov. 22:6). A neu apan laisiangthou thugukte sinsak ahih ziakin Timothy tuh mi thupitak hong suak hi (2 Tim. 3:15). Kristian inkuan ah paten a tate uh Toupa thuzohna a zilsiam sak a, itna toh kep diing ahi (Eph. 6:1-4; Col. 3:20, 21).
  13. Kiteenna tuh mihingte suktan theih louh kizopna ahi. Hiai tuh a tung a kipan kiteenna siam a om dan ahi (Gen. 2:24; cf. Mt. 19:6). Pathian mitmuh in kiteenna tuh sihna in akhen matan daih dia zopkhawmsa ahi. Kiteenna lah hiai damsung a zat diing a piak ahi ngal a (Lu. 20:27ff). Khat zaw penpen sihna in a damlai pen midang toh kiteenna a kizop theihna phalna pia hi (Rom. 7:1-3; I Cor. 7:39).