Church of Christ, New Delhi

“The Churches of Christ salute you” (Romans 16:16)

Kiteenna, Kimakna leh Kiteennawnna

By – Jamson Guite –

Leitung a mipilpen Solomon in “Muhlokna (vision) omlouhna ah mite a zautat nak uh” (Paunakte 29:18) ana chi hi. Zautat I chih chiang in zuih kichian neilou, ut bangbang leh hoihsak bangbang a gamtatna genna ahi. Solomon gen bang geih in kiteenna toh kisai a muhlokna taksapna ziak in khovel ah mi tampitakte kiteena ah ana zautat uhi. Kiteenna bang hiham chih theiloupi in tampi kiteng ua, tuabang a kiteena omzia theiloupi a kiteeng a tamluat ziak in kiteenna siangthouna sukbuah in a omta. Huan, kiteenna bang ahia chih theiloupi a kiteenna in innsung a buaina tampi tun a, nupa kimakna leh khotang, gamsung leh khovel ah buaina leh haksatna tampi a tun hi. Huai kia leng hilou in kiteena theihsiamlouh ziak in khovel ah kiteng hinapi a angkawm tampi a om a (Matthai 5:23; 19:9), kiteng hilou hinapi a koppih a hen tampi a om hi (Romte 7:2-3; 1 Korin 7:11). Huaiziakin kiteenna toh kisai theihchet a poimoh petmah hi.

  1. KITEENNA HONG KIPATNA (The Origin of Marriage).

Mihing lam sute’n (Anthropologist) leitung a mi namchih lak ah kitenna omlouhna omlouh ahihdan ana suikhia uhi. Huaiziak in kiteenna I chih tuh vannuai a mihing tengteng lak a chi’n in a om ahihdan i theithei uhi.

Science a ‘Law of cause and effect’ in “Every effect must have an adequate cause” ana chih dungzui in kiteenna (effect) om ahihman in a omsaktu (cause) a om ngeingei a ngai hi. Huchih ahihleh a omsaktu kua/bang hi diing? Hiai dotna toh kisai in thil hithei nih (two logical possibilities) a om thei. Khanta ah, Ngeinadan bang hilou akipan (of supernatural origin) hiam, anihna ah, ngeinadan apan hong omkhia (It had a naturalistic beginning).

Mihing zawng akipan ahi (evolution) chih gingtate’n ahihleh kiteenna I chih ganhingte amei leh apa kipolhna tungtawn apan mihingte’n ahon puahphattouh uh ahi. Huaiziak in kiteenna mihingte bawlkhiak ahi chi uhi. Abang hitaleh, mihing zawng apan (evolution) chih sinsakna Science mahmah toh leng kituak theilou ahihman in kiteenna toh kisai a athu up uh, huai bel kiteenna mihingte puaksuah chih leng dik theilou diing chihna suak hi.

Kiteenna hong kipatkhiakna tuh ngeina dan apan (mihing apan) hiam  ngeina danlou (Pathian apan) apan khat zawsamsam hi diing ahi I chihtaksa bang in mihing apan hilou ahi I chihkhit lebel Pathian apan ahi chihna hipah hi. Kiteenna Pathian apan mah hi ahihdan Laisiangthou pansan in I taklang diing.

Genesis 2:18 – Toupa Pathian in, “Pasal amah kia a om a hoih kei. Amah panpihtu diing a kilawm ka bawlsak diing,” a chi hi.

Genesis 2:21-24 – “Toupa Pathian in nuamtak in Adam a ihmu sak a, huchi in a ihmuta a; a nakguh khat ala a, a tang diing in sa a pang dimsak hi. Toupa Pathian in Adam apan a lak nakguh apan in numei a bawl a, Adam kiang ah a honpita hi. Adam in, “Hiai hialzaw ka guh a kipan guh, Ka sa a kipan sa ahi. Pasal a kipan lakkhiak ahihziakin, Numei, chih diing ahi” a chi hi. Huaiziak in, pasal in a nu leh a pa a paisan dia, a zi ah a belh diing. Huchi in sa khat a hong hita diing uhi.”

Matthai 19:6 – Huchi in, a nih un sa pumkhat a hong hita diing uh, a chi chih na simkei ua hia? Huchi in nih ahitakei ua, sa pumkhat ahi zawta uhi. Huaiziak in Pathian in a gawmsa mihing in khenkei hen” chi in, a dawng hi.

Hiai Bible tangte apan I muhtheh ahihleh –

  1. Pathian in pasal thawmhauna a mu.
  2. Apanpihtu diing bawlsak asawm.
  3. Adam nuamtak in a ihmusak.
  4. Pathian in Adam nakguh khat lakhia in numei a bawl
  5. Huai numei pasal kiang ah ahon tonpih a, Pathian in – “Huaiziak in, pasal in a nu leh a pa a paisan dia, a zi ah a belh diing. Huchi in sa khat a hong hita diing uhi” a chi hi. Huan, Jesu Khris in “Pathian gawmsa mihing in khen kei hen” a chi hi.

Hiai apan in kiteenna siamtu tuh Pathian ahi chih I mu thei uhi. Kiteenna hong kipatna mihing hilou a Pathian ahihdan kichiantak in I mu thei uhi. A bawltu mihing hilou a Pathian ahihziak in kiteenna ah mihing hilou in Pathian in thu anei. A kitengte hilou in Pathian ahi kiteenna a thuneihna tengteng tawitu chih I theih pah ngeingei diing uh ahi.

  1. KUATE KITEENG THEI DIING? (Who is Eligible to Marry?)

Kiteenna I chih a bawltu Pathian in a utteng lutna dia a bawl hilou hial hi. Pathian in a bawl kiteenna a luthei diing mi bikhiah a om. Kiteena tuh kuate hiam chauh lut theih dia Pathian in a bikhiah kizopna ahi chih theih ngeingei diing ahi. Pathian in abawl kiteenna a lut thei diingte –

  1. Ana kiteng kha ngei nailou, taksa leh lungsim a pichingte (1 Kor. 7:28; 9:5). Huan, ava kitenpih pen leng huchi mah ahih diing ahi (Gen. 2:18-24).
  2.  Kitengsa hi, ahihziak a akoppih in a sihsante (Rom. 7:1-4; 1 Kor. 7:39).
  3. Nupa kal ginomlouh ziak a koppih ana koihkhiate (Matt. 19:9; 5:23).
  1. PATHIAN IN A GEEL KITEENNA (The Devine Plan of Marriage)

Saptuam dik apan pialmangna in khovel a saptuam diklou tampi adinkhiaksak a mi tampi a hamhaihsak bangbang in Pathian in abawl kiteenna apan pialmangna ziakin khovel ah kiteenna toh kisai a hamhiahna thupitak ana tungta hi. Huaiziak in tampi’n kiteenna kichi tengteng bang dikvekdan in apom maita uhi. A poipetmah chihlouh gen diing a omkei.

Pathian in kiteenna ana deihdan leh siamdan, tua leng a deihdan hitou denlai bel – Pasal khat leh numei khat damsung adia kigawmna ahi. Hiai, PASAL KHAT leh NUMEI KHAT damsung a dia kigawmna kichi in thu tampi a tunkhawm. Pasal khat leh numei khat I chih in Zi khat sang a tamzaw neihna (Polygamy) a posiah pah a, pasal khat sang a tawmzaw neihna leng a posiah pah hi. Pathian in ana bawl kiteenna tuh pasal khat leh numei khat kitenna (monogamy) ahi. Himahleh mihingte thulimlouh ziak in bohsiat in hong ompah hi. A bohsia masapen tuh Lamek (Kaina suan) ahi (Genesis 4:19). Thukhun Lui hun in Pathian in Zi khat sang a tawmzaw neihna ana thuakthei mahleh atung apan ageldan ahikei hi. Huaiziak mah in lungkhamna tampi’n ana zuizel ahihdan Thukhun Lui tangthu apan in a muh theih hi (cf. Gen. 21:9; 30;1-24; 2 Sam. 5:13; 1 Kum. 11:1-3).

Mosi dan hun sung in mite’n kiteenna toh kisai a Pathian dan palzut in zi khat sang a tamzaw ana nei mahleh uh Thukhun Thak hun a phal hilou diing ahihdan leh a tung apan Pathian siamdan hilou ahihdan Jesu’n kichiantak in ana gen hi (Matthai 19:8). Pathian in Adam zi diing in numei nih ana bawlkei a, Evi pasal diing inleng pasal nih ana bawllou hi. Huan, Pathian in Adam zi diing in pasal mah ana bawllou a, Evi pasal diing inleng numei mah ana bawllou hi. Huaiziak in Pathian bawl kiteenna tuh pasal khat leh numei khat sang a tawmzaw kiteenna ahikei a, numei khat leh pasal khat sang a tawmzaw kiteenna leng ahikei. Huan, pasal leh pasal kiteenna ahikei a, numei leh numei kiteenna leng ahikei hi.

Pathian in abawl kiteenna tuh damsung daih kiteenna ahi. “Numei, pasal nei a pasal a damsung teng a pasal dan a hen in a om a; himahleh a sih in bel pasal lam ah dan a kipan khah in a om ahi. Huchi in a pasal damsung a midang a kitenpih leh, Angkawm, chih ahi diing hi; a pasal a sih in bel huai dan a kipan khah in a om a, huchi in midang nei leh leng angkawm ahi kei hi” (Romte 7:2-3).

“Huan kitengsate kiang ah thu ka pia, keimah bel hilou in, Toupa piak ahizaw; Zi in a pasal khen kei hen; A khen vanglak leh pasal nei nawnlou in om vanglak hen, ahihkeileh, a pasal toh mah kituak nawn uheh; huan pasal in a zi ma kei hen” (1 Kor. 7:10-11).

Nupa kima diing a kiteng hilou in pum khat, sa khat hi dia kiteng ahi uh. A kibelhtuah (cleave) diing uh hizaw ahi (Gen. 2:24). Hiai ahi a siamtu siamdan. Nupa tuh a damsung teng a koppih a hen in om hi. Kopih I chih puansilh khek bang a ut hunhun a khekthei ahikei.

Huan, Pathian in kiteenna ah pasal lupen in ana bawl hi.

“Numei kiang ah, “Na haksatna leh na naupaina nakpi’n ka pungsak dia; haksatak in tate na nei diing. Himahleh na deihlam na pasal lam ahi dia, aman na tung ah thu a nei diing” a chi hi (Gen. 3:16).

“Himahleh pasal peuhmah lutang Khrist ahi, numei lutang pasal ahi, Khrist lutang Pathian ahi chih na theih uh ka deih hi” (1 Kor. 11:3).

“Khrist amah ngei pumpi hondampa hi a, saptuamte lutang a hih mahbang in pasal zi lutang ahi” (Ephesate 5:23).

Kiteenna toh kisai a Laisiangthou apan thudik I muh theihte –

  1. Pathian in pasal leh numei nupa hi diing in a zomkhawm – Gen. 2:18-24
  2. Hiai nupa kizopna tuh nu leh pa toh kizopna sang in a poimohzaw – Gen. 2:24; Matt. 19:4-5
  3. Pasal tuh zi lutang ahi – Eph. 5:23.
  4. Hiai kizopna damsung a diing ahi – Rom. 7:1-4; 1 Kor. 7:39.
  5. Koppih damlai a koppih dang neihna tuh angkawmna ahi – Matt. 5:23; 19:9.

Hiaite tuh kiteenna bawltu’n kiteenna toh kisai a adan bawl ahi. Pathian geldan in kiteenna tuh pasal khat leh numei khat damsung a diing a sakhat suahna ahi.

  1. KIMAKNA LEH KITEENNAWNNA

Laisiangthou ah koppih mak diing toh kisai in tangtak a thupiak ana omkei. Kimak toh kisai a thupiak muh theih omsun tuh “Makei hen” chih ahi. Pharisaite’n Jesu ze-etna di’n “Mi’n bangziakpeuh a azi a mak asiang hia? chih ana dong uhi (Matt. 19:3). Jesu’n, “Pathian gawmsa mihing in khenkei hen” chi ana dawng thuk hi (Matt. 19:8). Huaitak in Paharisaite’n “Ahihleh bangdia Mosi in kimakna lai pia a kimak diing thu pia ahia? chi’n a dong thuk uh. Hiai thu Jesu’n bangchi’n dawng hiam I chihleh, “Mosi in na lungtang uh khauh ziak in eive na zite uh mak a phal; himahleh a tung a kipan huchibang ahi ngeikei hi. Ken zaw k’on chi ahi, kuapeuh kingaihna ziak hilou a, zi ma a midang nei angkawm ahi: maksa nei peuhmah leng angkawm ahi” (Matt. 19:8-9) a chihsan hi. Pharisaite’n Thukhunlui pansa in kimak theih ahi ana chih sawm mahleh uh hiai a Jesu dawnna apan in kimak phal hilou ahihdan achiang hi.

Mosi in kimak diing thu ana pia ahi chi a Pharisaite’n ana pansan thu uh ahihleh Deuteronomy 24:1-4 ahi. Hiai thu zang in Jesu kalh in kimak theih ahi ana chih sawm mahle uh athu omdantak hiai dan ahi: Numei mak a om a pasal dang nei tuh angkawm ahi a sianglou ahih ziak in a pasal masa in a neih nonlouh diing ahi chih ahi. Hiai a thumal “sianglou” kizang tuh “angkawm” toh kibang a zat ahi (cf. Lev. 18:20; Num. 5:13-14). Pharisaite’n “Mosi in kimakna lai piak a kimak diing thu apia” achih lai un Jesu’n Mosi hun in a dawng thuk kei a, Eden huan akawkmuh zaw. Atung apan Pathian geldan kiteenna tuh damsung adia pasal khat a dia numei khat ahi chi’n a dawng thuk hi.

Hiai a Jesu dawnna apan I muh theih ahihleh Pathian in Eden huan a kiteenna toh kisai a adan khun pen lakkhiak (abrogated) in ana om ngeikei a, khahkol (relaxed) inbel ana om ngei hi (alungtang uh akhauh ziak in). Tu Thukhun Thak hun inbel atung apan zat a ana ompen zat hi diing chih ahi. Huaiziakin kiteenna tuh damsung a diing a pasal leh numei khat kizopna mah ahi. Pathian in kimak ana siam kei a, kimak a zadah hi (Malaki 2:16).

Thukhun Thak hun a Jesu’n kimak theihna dia aziak ana gen omsun (exceptional case) tuh angkawmna ziak ahi (Matt. 5:23; 19:9). Huaiziak in angkawmna ziak hilou a thildang ziak a kimak tuh Pathian thu kalhna ahi. Huan, angkawmna ziak hilou a zi ma a zi dang nei tuh angkawm ahi. Angawm mi kuamah vangam alut theikei diing hi (Gal. 5:19-20).

Kiteenna toh kisai a theihbehlai dia hoih tuh – gamsung dan hiam khotang dan dungzui hiam a I kiten ziak a I kiteenna Laisiangthou toh kituak chihna hipahlou ahi (marriage may be legal, yet unscriptural). Herodias Philip zi ahi (Matt. 14:30). Herod in a kitenpih (Mark 6:17). Ahihhang in Johan in asiang kei a chihsan hi (Matt. 14:14; Mark 6:18).

Thukhitna –

Kiteenna tuh damsung a dia pasal khat leh numei khat sakhat suahna ahi. Huaiziakin koppih damlai a koppih ma a adang neih tuh angkawm khelhna a lutna ahi. Pathian in kiteenna tuh kimakna toh ana siamkhawm kei. Kimakna a hua hi. Thukhun Thak hun a Jesu’n kimak theihna diing ziak ana gen omsun tuh angkawmna ziak keleu ahi. Hiai thu ah leng a mak diing ahi chih thupiak a omkei lai hi. Huan, angkawmna ziak hilou a koppih ma a koppih dang nei mi tuh angkawm ahi.